十六、字典系列:

 十六、字典系列:

使用方法: (1) 點任何超連結 (2) 共跳出來的視窗佮本網頁調整做[有的系統愛用拖的]左右兩个視窗 (3) 繼續點有超連結的所在就會當改變內容. 會予咱發現方便閣好用

1. 漢字字源 (Chinese Etymology):
會當予咱查詢漢字按甲骨文到篆書各體的變化. 看字的變化予咱對漢字會有較猛醒的觀察佮了解, 予咱毋免烏白攑香綴拜.

2. 象形字典: 是簡體字的網頁, 會當揣的字約4000字, 所以, 無一定有咱想欲看的字, 看伊的[分部檢索](來去目錄連結], 內底有列出所有的字, 點咱欲看的字就會使看著字形的按甲骨文到今的演變. 閣有真濟資料通好看.

3. 【說文解字注】掃描版網站索引:
目錄予咱直接連接去原稿, 予人看會著2000冬前, 漢朝人對篆書佮古文的理解, 嘛會使看著欲300年前段玉裁對說文解字寫的註解. 予咱看會著文字的變化, 古早人認為毋著的字, 咱這馬煞變成正字. 予咱對文字有誠好的敏感度.

4. 教育部異體字字典: 
予咱查詢漢字, 內底的形體資料表, 予咱看會著按說文解字到今歷代的字形佮切語, 予咱佇有疑問的時, 會當了解無仝時代的發音. 尤其是一般字典揣袂著的人名字典, 靠歷代的切語, 予咱知影一字的台語音應該按怎講. 予咱對某一字會較深的了解.

5.1 韻典網:
予咱會當查詢歷代的韻書 (欲查詢愛揤正手 面頂角仔的圖示) (1) 廣韻, (2) 中原音韻 (3) 洪武正韻牋 (4) 分韻撮要 (5) 上古音系 若是點目錄, 內容會出現網頁下面, 咱閣會當看著原冊的掃描內容.

5.2 廣韻:

佇[諸子百家中國哲學書電子化計劃]內底, 有詳細目錄的超連結予咱看內容. 會當看著全文內容, 嘛會當予咱看著無仝版本(六種)的掃描電子冊.

6.1 康熙字典:
1716成書, 張玉書, 陳廷敬等編, 這是網路查詢版, 查著字, 會當看著, 電子檔的資料, 會當閣點伊的超連結看字典的原稿. 咱嘛會當看伊的原圖掃描版, 伊的網頁倒首爿有部首索引, 方便咱直接照部首掀頁去看資料. 嘛會當改網址的數字跳頁來看.

6.2 在線康熙字典:(這馬網路無這本矣. 2023.09.06)
網路查詢版, 直接查著資料, 看字典資料. 無原圖掃描通好看. 資料內容佮康熙字典無啥關係. 真正照康熙字典去揣字, 定定會揣無內容通看.

6.3 汉程康熙字典: 會使直接查尋欲揣的字, 揣著了後嘛會使去看原稿. 原稿解析度誠清楚. 可能資料庫物件傷濟, 愛有淡薄仔耐心等全圖完整出現. [2023.09.06 新增]

7. 彚集雅俗通十五音:
這是網路版, 有序佮凡例做紹介, 有目錄連結方便咱來使用. 是按原冊去拍字, 有圖形模枋原書, 予咱了解原書的原貌. 原冊是1818年, 謝秀嵐編. 後來1954年沈富進所編的彙音寶鑑就是以這本作藍本去增補的. 原冊予咱會當了解200冬前漳州腔的台語原音.

8. 福建方言字典(DICTIONARY OF THE HOK-KËÈN DIALECT OF THE CHINESE LANGUAGE): 1832年出版, 麥都思牧師編, 這是電子冊, 所以, 若真的冊仝款, 愛家己用手去掀去查, 會使用改網址http://www.archive.org/stream/dictionaryofhokk00medhrich#page/n69/mode/2up的n69的數字部份來跳頁掀. 嘛會使用播送線的位置來跳頁. 會記得頁數差是68頁. 這本冊予咱看著彼時陣的記音. 欲查愛看有英語, 佮伊英語式的拼音系統, 佮漢字三種系統.

9 翻譯英華廈腔語彙(ANGLO-CHINESE MANUAL WITH ROMANIZED COLLOQUIAL IN THE AMOY DIATLECT):
1853年,羅啻(E. DOTY), 鷺門出版. 這是一本分類詞典書影, 內容頭前有目錄(英語寫的)佮聲韻的簡介(英語寫的)和調號的講解, 內容採用三欄編排, 英語|漢字|白話字. 目錄分類有(1) 宇宙 (2) 五行(A)金(B)木(C)水(D)火(E)土 (3) 人類 (A) 外表 (B) 體內 (C) 七情六慾 (D) 五官 (E) 分泌排泄物 (F) 身苦病疼 (G) 歹心行 (H) 好心行 (4) 親情五十 (5) 三百六十行 (A) 士 (B) 農 (C) 工 (D) 商 (E) 下層人 (6) 建築 (A) 建材 (B) 建物 (C) 建物分項 (7) 家伙 (A) 家俱  (B) 餐俱 (C) 灶跤用具 (D) (8) 衫仔褲穿插  (9) 食物 (10) 動物 (A) 野獸 (B) 精生  (C) 動物的身軀 (D) 野鳥 (E) 家禽 (F) 烏類的身軀 (G) 魚仔 (H) 兩棲 (I) 爬蟲 (J) 蟲豸 (11) 家私 (12) 庄跤物件 佮 騎馬的物件 (13) 行船的物件 (14) 文學用的 (15) 科舉階級 (16) 官品 (17) 軍官佮武器 (18) 藥品 (19) 商業用詞 (20) 商業產品 (21) 數目 (22) 量詞 (23) 時間佮四季 (A) 時辰 (B) 過去 (C) 現在 (D) 未來 (E) 無定時 (24) 度量衡 (A) 金銀 (B) 秤重 (C) 容積 (D) 度長短 (25) 三教九流 (26) 詞類 (A) 代名詞類 (a) 疑問詞 (b) 總包 (B) 副詞 (a) 所在 (b) 品質 (c) 數量 (d) 態度 (e) 疑問 (f) 比較 (C) 介詞 (D) 連接詞 佮 感嘆詞 (E) 形容詞 (a) 比較詞 (b) 形容詞表(p.122~136) (F) 動詞 (p.137~p.214)

10.1 廈英大辭典書影連結:
廈英大辭典是1873年杜嘉德編, 補篇是1923年巴克禮編, 網路是電子冊, 為著予咱使用方便, 特別作目錄連結來予有需要的網友使用. 看捌教會白話字佮英語的人就會使讀這本的文獻資料, 予咱會當清楚欲150冬前的廈門音的講法, 小可仔系統轉換一下,就會當學著台語古早的講法.

10.2 廈英大辭典網路查詢版:
查詢時, 愛會記得鉤查詢辭典選項才揣有資料, 會使拍台羅字, 伊會自動轉換做白話字. 看捌教會白話字佮英語的人就會使讀這本的文獻資料. 查著資料會使看資料的原文圖檔. 注意, 操作介面無法度轉來首頁, 愛點網路本身的頂一頁才有法度轉來首頁.

11. 中西字典(Chinese Romanized Dictionary of the Formosan Vernacular):
1874年,偕叡理編;上海美華書館;共232頁;嘛會當改網址pape=4的數字所在跳頁. 看捌教會的白話字就會使看有所有的內容.

12. ENGLISH AND CHINESE DICTIONARY OF THE AMOY DIALECT (廈門音英漢字典,1883) :
這是電子冊, 所以, 若真的冊仝款, 愛家己用手去掀去查, 會使用改網址https://archive.org/stream/cu31924023550878#page/n13/mode/2up的n13的部份來跳頁掀. 嘛會使用播送線的位置來跳頁. 會記得頁數差是13頁. 這本冊予咱看著當時的記音. 欲查愛看有英語, 教會白話字, 佮漢字三種系統.

13.1 Tw-Ch台文中文辭典:
予咱任意查詢一个詞的台語講法, 揣著了後, 閣會使點圖示TJ, 有內容出現佇網頁下面, 點[原冊掃描](台日大辭典)會使看著日本人替咱保留100冬前台語的講法, 予咱學著正港古早的台語講法.  

13.2 台文/華文線頂辭典:  
是Tw-Ch台文中文辭典舊的操作介面, 基本操作佮教育部的臺灣閩南語常用詞辭典仝款. 使用說明直接佇仝一个網頁. 會使輸入台羅字, 伊會自動轉換做白話字揣著資料, 內底的喇叭點落去會有若機器人的台語詞發音, 表格頂面有一段說明, 說明咱會當閣操作的動作.

14. 台語線頂字典:
真正是字典, 干焦查某一字漢字的讀音, 尤其是人名, 會使揣看伊的發音做參考. 首頁有操作說明, 毋過, 目前白話字查詢, 可能系統出問題, 無法度查詢.

15. 台語辭典(台日大辭典台語譯本)查詢:
注意伊是分欄查詢, 所以, 看清楚咱想欲查的是佗一項, 台語輸入愛照教會的白話字的拼法才揣有. 揣著了後, 閣會使點 [原冊掃描] 去看台日大辭典(看凡例)的原稿.

16. 日台大辭典(上冊)&日台大辭典(下冊):
1907年, 小川尚義編;台灣總督府出版;這是書影, 愛家己一頁一頁去掀, 嘛會當改網址page=後壁的數字所在跳頁. 看捌日文佮漢字就會使看有所有的內容.

17. 廈門音的字典:
1913年三版, 打馬字牧師編, 大美國歸正教公會印. 這是書影, 愛家己一頁一頁去掀, 嘛會當改網址p5的數字所在跳頁. 看捌教會的白話字就會使看有所有的內容.

18. 甘字典查詢:
查詢畫面佮台語辭典(台日大辭典台語譯本)查詢仝款, 注意拼字一定愛用教會羅馬字(白話字)加數字聲調才查有資料, 查著了後點 [原冊掃描] 會使去看甘為霖牧師1913年出版的廈門音新字典的原稿. (來去廈門音新字典書影連結詳細目錄:予咱看會著規本冊的全貌結構)

19. 台灣語典:
1922, 岩崎敬太郎編, 台北新高堂出版, 這是書影, 愛家己一頁一頁去掀, 嘛會當改網址page=後壁的數字所在跳頁. 看捌日文佮漢字就會使看有所有的內容.

20. 瑪利諾會的台語英語字典佮英語閩南語字典簡介佮目錄連結

21. 閩南語字彙:
1997年出版, 干焦收395字台語專用字, 分五類索引查詢, 用字已經佮教育部這馬的用字無仝, 咱會使做文獻資料來參考. 像: 囡仔囝, 照這本的講法愛作 囝囝囝.

22. 李氏台語辭典 Lee's Taiwanese Dictionary:
2001, 李春祥編;李豐明出版;這是書影, 愛家己一頁一頁去掀, 嘛會當改網址page=後面的數字所在跳頁. 善用目錄, 會當較清楚規本冊的結構, 看捌教會的白話字就會使看有所有的內容.

23. 當代泉州音字彙:
介面操作非常便利(來去看紹介網頁). 愛注意的是拼音是漢語拼音法, 佮台羅字無仝. 聲調的算法順序佮咱無仝款. 伊的部首揣字嘛足方便, 文字列表一目了然. [音頻]就是一寡詩文佮曲文的聲音檔.

24.1 拍拍知音:
2010, Dyer Tung製表, 是根據教育部的閩南語常用詞辭典製造出來的音節表. 是予初學者佇短期間會當完全掌握台語的聲韻調, 每一个表攏有編號, 會使予人來耍密碼的齣頭.

24.2 知音捌十五音:
2010, Dyer Tung製, 是根據教育部的閩南語常用詞辭典製造出來的仝韻字字表. 結構遵守十五音的系統, 予咱會當知音捌字. 揣仝韻字的法度請參考 (a) 彙音寶鑑－台語字典ｅ秘密(去看檔案圖)   (b) 彙音寶鑑(二)－台語字典入聲ｅ秘密  這兩篇文章.

25. 教育部臺灣閩南語常用詞辭典:
2008年10月試用版開始上網, 2011年教育部正式版公告使用, 逐年攏會有字音修訂, 查詢說明佇查詢頁下面.  索引瀏覽有(1) 聲韻調索引 (2) 分類索引 (3) 部首筆畫索引 (4) 附錄. (1) 是初學者練功的好所在. 會當大量學台羅字. (4) 內面有 (A) 俗諺 (B) 百家姓 (C) 地名 (D) 方言差 (E) 外來詞 (F) 二十四節氣 (G) 親屬關係 (H) 人體器官圖. 資源下載內面有(1) 臺羅拼音建議字型 (2) 臺灣閩南語漢字輸入法 (3) 新細明體擴充字集套件 (4) 臺灣閩南語按呢寫 (5) 教育部閩南語相關成果 (6) 桌面下載. 其中輸入法, 有的系統會衝突, 無法度安裝, 安裝更新後會致使程式關掉視窗, 需要共舊資料改名崁掉無資料的檔案才會使運作. 閣有安裝輸入法的時, 愛先安裝 (3) 新細明體擴充字集套件.

26. 新編台灣閩南語用字彙編:
2013, 吳昭新編, 是仝音字表. 內底的教部台羅, 是台羅字數字版, 這本是書影, 需要家己一頁一頁沓沓仔掀. 內底收集的字足濟, 目前看會著的台語字典, 有標注台語音的字, 伊的字應該講是上濟字. 冊皮看著的注音是台語注音符號. 目錄完整(來去目錄連結), 注意內底的台語用字佮這馬的教育部有出入, 愛家己轉換.

27. 常用國字標準字體筆順學習網:
干焦會使查常用字字表的字, 予咱了解一字的正確筆畫順序, 資料看完會使去[進階學習], 會當看著[國語辭典簡編本]單字的解說, 嘛會使看著[國字標準字體教師手冊]內底單字的標準寫法, 予咱寫閣較正確的字, 嘛會予咱的字變較媠.

28.1 台語現代辭句辭典: 
1997年上網, 1998年佮2004加強內容. 林繼雄編, 伊的台語拼音系統自成一个系統, 號做現代文書法, 需要特別學習才看有伊的拼音系統, 用一般台語拼音用袂著的字母來表示聲調. 嘛是有一群人咧使用這套文書法咧寫台語, 只是一般會曉白話字佮台羅字的人嘛無法度讀. 這本電腦版的辭典, 是詞表, 目錄非常詳細, 排序列表嘛蓋詳細, 會當講無字典的索引比伊做較詳細的. 漢字部份干焦做參考用的, 無一定照教育部的用字, 需要家己轉換.

28.2 電腦全部漢字台語音字典:
2002年, 林繼雄編, 共BIG5電腦全部漢字攏共注台語音, 有詳細的目錄, 照部首字畫排序, 點筆畫數字, 會使看著一字所有的台語發音. 欲看捌伊的台語拼音愛先學伊的拼音系統.

28.3 漢字台語音字典(部首索引):
2001年, 林繼雄編. 目錄的漢字用圖片顯示, 點部首發音會使看著發音字表, 分別標明文白音佮變調音. 欲看捌伊的台語拼音愛先學伊的拼音系統. 點[速查]會走去 電腦全部漢字台語音字典 的字表.

28.4 由字音查字字典:

1997年上網, 林繼雄編. 目錄用大量的超連結予咱方便查仝音字, 其實就是仝音字字表, 欲查仝音字字表, 需要會曉伊的現代文書法的台語拼音系統才查有咱欲愛的字.

(轉去主目錄)