2010
09181810走揣失落的音—彙集雅俗通十五音網頁版序
走揣失落的音—彙集雅俗通十五音網頁版序
時常咧講話的時，攏三不五時仔就會拄著人講某某字愛讀佗一音，像「逃避」的「避」愛講做pi7，毋是講phiah4。「去應徵」的「徵」是講ting1，毋是講tsing1。
十五冬前就有聽著人講，少年人台語袂曉講，共「電腦程式」的「程式」講做「城市」。因為佇華語兩个是仝音的，叫是台語是仝音的，所以就共「程式」當做「城市」來發音，其實，台語「程式」發音是ting5-sik4。
佇教育部的《閩南語常用詞辭典》出來了後，我時常拄著的問題是我的語音定定會揣無(像「葡萄」，我的發音是pho5-tho5)，有時陣會懷疑是我的音變去予走精去的。
這个時陣，我唯一會當揣的線索就是古早人流傳落來的字典佮辭典 (1) 台日大辭典 (2) 廈門音新字典 (3) 彙音寶鑑 (4) 彙集雅俗通十五音 (5) 廣韻 (6) 康熙字典 佮其他手頭提會著的資料來掀來看。
佇十幾冬前，我甚至有做幾若本的發音佮字的資料輸入，想欲做發音佮用字的比較。結果，敢若做三、四本了後，就佇資料合併的時來放棄，實在是太厚工咧。
四、五冬前想著欲共《彙集雅俗通十五音》規本模仿原冊共排版起來。資料是輸入完畢矣，模仿原冊嘛做甲差不多矣。唯一的缺點就是有太濟字是電腦拍袂得出來的，會當組字的就勉強共伊組起來。組袂出來的只好用□來代替。結果，這款的□攏總有798字(包括解說內底)。若欲排版會好勢，就愛用造字的方式來處理才會當。因為□有七百外字，代表用造字的方式就愛造七百外字，想著遮的工，我就停起來矣。
有一改，教囡仔讀朗讀稿內底有一字「舐」字，拼音注tsinn7，我本身的發音是講tsuinn7，我有聽過人講tsng7，就是無聽過tsinn7。想講是原稿拍字重耽(tann5)去，就教囡仔讀tsuinn7。了後，我轉來查教育部的辭典，發現內底有tsinn7又唸作tsi7佮tsng7，就是無我的音。查台日大辭典有看著tsng7，漳音tsuinn7，才證明我的發音無去毋著去，是教育部無收著。
毋過，想想咧，這款的情形毋是第一遍拄著，像講兩講no7的音，我細漢的時猶有聽過一位老阿伯講過。這馬，教育部的方音資料內底嘛無去矣。
提近的例來講「技術」的「技」，因為有一遍我教的囡仔去參加台語辯論比賽，裁判講評的時共伊講的「技術」的「技」發音提出來批評，講「技」愛講「ki3」才著。我一聽，這根本就無可能的，因為我知影「技」無ki3的發音。「技」愛講ki7才是正確的，講做ki1嘛是講會得過。了後，我就查證「技」的發音，「技」因為俗讀的關係，伊有音變「ki5」、「ki2」佮「ki1」。就是無「ki3」！！明顯是彼个裁判用「記錄」的「記」佮「技術」的「技」佇華語仝音，所以伊認為「技」愛講做「ki3」才著！！這馬教育部的辭典內底「技」已經無「ki7」的音矣，干焦賰「ki1」的音。唉！佇一般人的認知來講，若完全毋知影的，就會認定「ki7」是毋著的音。變成欲證明「ki7」的音是著的就愛揣古早人的字典來做證明矣。
咱人若拄著問題的時陣，總是愛去揣根源才會當解決問題。雖然《彙集雅俗通十五音》內底的俗字佮錯字袂少，毋過，欲解決發音有爭論的時，其實，是一本足會當值得咱參考的物件。
親像最近語文競賽閣欲開始進行矣。上捷予人提出來講的是「評審」佮「裁判」愛用佗一个？「評」到底是「phing5」抑是「ping5」。教育部這馬是「phing5」。啊兩百冬前的古早人按怎講咧？想欲知？就入來家己親身查一下就會知。
(轉去主目錄)
沒有留言:
張貼留言