2011
08112322彙音寶鑑－台語字典ｅ秘密
「寶求果，果一高......君堅金規嘉【註1】，干公乖經觀，沽嬌梔【註2】恭高......柳lo【註3】、邊褒......褒寶報蕔......第二聲......」
相信以上這段，凡是會曉用彙【註4】音寶鑑這本台語字典來找「寶」字ｅ人攏真熟似。但是對一個外行人來講，真正是會「sa1無貓仔毛」，毋知這是啥麼物件，更加毋知也欲如何運用這本字典找字。
咱若問講是按怎欲按呢念，真濟人解說未出來，極加講咱照按呢落去求自然就會出來a。甚至有台語運動界ｅ大粒星認為這本台語字典是一點仔道理就無，一無是處。
甘真正按呢？是按怎民間漢學派ｅ人會每一個人攏有一本？若無路用，是按怎in大部分ｅ人kanna會曉用這本字典niania？是按怎自民國四十三年出版到今已經四十幾版a，目前欠貨？【註5】
其實，這個字典系統佇1800年開始了後，差不多會使講佇1818年就已經定型到今，並無啥麼改變。會使講是將近二百年ｅ歷史，若真正無路用，咱今天就看未著這個系統存在囉。
到底這本字典ｅ秘密佇佗位？咱先還頭看咱現在卡熟似ｅ物件「ㄅ、ㄆ、ㄇ、ㄈ」。ㄅ、ㄆ、ㄇｅ歷史民國以後才出現，佇台灣是民國四十三年才出現推行，並無普遍。套一句土話來講：「用肚才來想嘛知。」一般人毋識「豆菜芽(a,b,c...)」(雖然佇1913年就由基督教會開始用，會曉ｅ人並無濟)。欲按怎學漢字ｅ聲、韻、調和漢字咧？
這時陣，字典ｅ系統發揮著伊尚大ｅ功能，借著「柳邊求去地，頗他曾入時，英門語出喜」十五字學著台語ｅ聲母；「君堅金規嘉，干公乖經觀，沽嬌梔恭高，皆巾姜甘瓜，江兼交迦檜......」等等四十五字學著台語ｅ韻母；「君滾棍骨、群滾郡滑，堅蹇見結、□蹇健傑...」ｅ八字、八字練習學會曉台語ｅ聲調。
像作者所講ｅ：「只十五夜就能流利自由使用，不用再求名師，得免文盲之嘆。」咱來想看覓咧：有啥麼系統會凍hoo毋識漢字ｅ人會凍佇短期間來全盤了解台語ｅ所有發音ｅ聲、韻、調系統，閣無漏(lau3)鉤去，又閣會凍識(bat4)將近三百字ｅ漢字咧？
咱講：「江湖一點訣，講破無價值。」以咱現在ｅ知識份子來講，只要稍點一下仔，一點鐘內就會凍完全明暸並且來查字典。
現在，咱已經知也台語ｅ系統，並無代表咱會曉運用字典工具a。
這個系統ｅ原理和傳統ｅ切音法仝款，其實，ㄅ、ㄆ、ㄇ、ㄈ嘛是運用完全相仝ｅ道理，只是將筆劃簡化而已。
現在，咱若臨時未記得「寶貝」ｅ「寶」欲按怎寫，又閣有心想欲查伊ｅ寫法，欲按怎來查？咱閣再還頭倒轉來看這句「寶求果，果一高」倒底是代表啥麼意思？這句話其實就是本字典最大ｅ秘密所在，了解以後自然會凍運用來找任何咱想欲找ｅ字(當然，字典愛收有著咱欲找ｅ字)。
「寶(po2)」是咱想欲找ｅ字，「寶」字ｅ聲母是 "p" (褒)，韻母是 "o" (窩)，調是第二聲。(註：咱ｅ本能自然有法度將某一字ｅ音拆成二個部分。)
圖一：台語ｅ「寶」字音節結構分析圖
「求(kiu5)」是「追求」ｅ意思，用這字ｅ原因是台語字典上ｅ四十五個韻母字 (註：作用親像一般中文字典ｅ部首以及英文字典ｅ字母順序仝款)攏是和這字仝聲母，另外這字是字典上十五個聲母字ｅ其中一字。「求」本身ｅ聲母是 "k"，韻母是"iu"，調是第五聲。伊和頭前咱所欲找ｅ字「寶」結合成有意義ｅ意思：用「寶」來「追求」咱所欲愛ｅ韻母字。
現在，請特別注意，咱取「寶」ｅ韻母以及聲調"o2"和「求」ｅ聲母"k"結合起來(看無這句這篇就白看，會浪費著咱讀者寶貴ｅ時間)，聲母囥前，韻母接後，就變成"ko2"(果)。因此，利用「寶」和「求」切音後，結合ｅ結果 (註：有人愛經過訓練才有法度結合起來。) 來得著「果」。所以，咱才會講：「寶求果」。所有ｅ運作過程就是按呢來ｅ。
圖二：「寶求果」ｅ內部運作分析圖。
然後，將所得著ｅ結果攏總轉換成第一聲(調)，因為所有ｅ四十五個韻母字攏是第一聲(調)。「果」轉變為第一聲(調)就成「高」。【註6】
咱已經講完「果一高」ｅ過程，閣來就真簡單，就是開始找字典內咱所需要ｅ字。咱開始按四十五個韻母字ｅ順序開始找【註7】，一直找到「高」【註8】ｅ所在；繼續仝款用切音ｅ方式【註9】按十五ｅ聲母找到和「寶」仝聲母ｅ字群；閣來利用八個聲調順序來確定「寶」ｅ聲調，確定聲調了後，掀到和「寶」【註10】仝聲調ｅ所在，自然就找會著咱欲找ｅ字(尾後二步會凍對調
咱台語字典「彙音寶鑑」ｅ秘密已經講完a，咱手提著一本工具冊一定愛會曉使用，咱會凍小可仔添一屑仔物件hoo咱ｅ工具冊用著卡順咱ｅ心咧。當然，咱嘛會凍按呢來找(希望咱看有)：
「寶一褒，褒求高......君堅金規嘉，干公乖經觀，沽嬌梔恭高......褒寶報......第二聲......柳老、邊寶......」
1995.07.06 (台音式)
1997.07.28補圖kah註
1998.03.24 (教育部1998.01.09公佈ｅ拼音法)
2010.03.07上網佇嘀咕
2011.08.11重上網
四十五字母音
(來去看台語字典彙音寶鑑索引)
(去看檔案圖)
(繼續看彙音寶鑑(二)－台語字典入聲ｅ秘密)
(轉去主目錄)
============================================
註1「嘉」ｅ音讀做ke1，和「加減、雞婆」ｅ「加、雞」仝音。讀做 "ke1"只是維持著1800年原來ｅ系統而已。
註2「梔」ｅ音讀做kinn1，將「居住」ｅ「居」掛鼻音就會發成這個字，有人發「羹、更」和本字仝音。讀做 "kinn1"只是維持著1800年原來ｅ系統而已。另外漢藥名有「黃梔」嘛是這個音。
註3 本文原來ｅ拼音系統是按照台中市台語世界雜誌ｅ系統拼注台語音。如果咱若是遵照對英文標準K.K.音標ｅ了解，先對「毛、無」開始標注，進一步思考「褒」和「波」了後，就會明白原理，了後才來注「刀、滔、怒、羅；高、科、悟、五；支、持、時、字；和」，閣來標注「醫、會、阿、烏、蚵、有；夜、腰、柚，愛、歐，胃、話、活；妖、歪；圓、嬰、餡、惡；影、鴦、揹、換；音、因、應，煙，暗、安、紅，王，運；姆、黃；鹽、殃、用；灣......」等等，相信會有90%以上ｅ拼音真緊就學起來a。試看覓就會知真假。
註4 「彙」ｅ音讀做lui7，和「類似」ｅ「類」仝音。
註5 ti寫本文ｅ時，曾經因為受人拜託去買一本彙音寶鑑，冊店ｅ頭家講，欠貨，愛我閣等一站仔才閣來買。
註6 非常失禮，篇幅已經超過小弟ｅ按算，希望咱有耐心繼續看落去。
註7 字典是按這個順序編成ｅ，若講伊無道理，按呢英文ｅ二十六個字母ｅ順序就有啥麼道理？
註8 就是順「君堅金規嘉，干公乖經觀，沽嬌梔恭高」唸到「高」ｅ部分。
註9 就是「柳lo、邊褒」ｅ部分。
註10 就是「褒寶報蕔......第二聲」ｅ部分。
沒有留言:
張貼留言