2011
08172046"睡懶覺"就較高雅??
最近佇facebook的台語社，有人貼蘋果日報的新聞(教部辭典教念 懶叫雞掰 發音太直接 | 頭條要聞 | 蘋果日報)咧講咱台語咧講查甫人身軀下面彼項物件，佮查某人身軀下面彼項物件。這兩項物件攏是傳宗接代一定用會著的物件。佇教育部的常用詞辭典發音照實寫出來是咧教歹囡仔大細。
我就咧想規氣咱遮的做台語母語教師的就刁工共膣屄，按文讀音來讀 tiat/tit/tsit-phi/pi/pui；𡳞鳥就讀līn-niáu，嘛叫教育部共音改做文讀音，按呢就袂直接，嘛袂教歹囡仔大細，閣順紲予所有的人來研究這四字，看報紙是毋是換批評講是烏白講抑是脫離現實傷遠，若閣經過調查了後，發現干焦台語文教師咧按呢講爾爾，毋知閣會按怎來講咱遮的台語教師。是毋是連遮爾四常普通的稱呼都袂曉咧？
我就去想講阮細漢的時陣，予人禁止講台語，做囡仔的時，加減攏嘛會較孽，就有人想空想縫欲製造一寡詞來講。會記得上捷講的就是『棒賽』(棒球比賽的簡稱)；『懶覺』(睡懶覺)。逐个就一个傳一个，開始刁工佇掠講台語的人面前講遮的詞。當然因嘛無法度掠阮矣，因為確實是華語詞啊。
其實，跨語言(政府絕對袂承認華語對台語是跨語言)攏有這个現象，像英語的see(看)/sea(海)、sigh(吐氣)/thigh(大腿)、song(歌)。佇講台語的人的耳空內聽起來就是無好聽的話，咱會去聯想著死、屎、爽。攏是台語人無啥想欲聽著的音。
有一寡音，台語人基本上是佇生活上盡量無出現的音。佇華語的『母雞、公雞、機會、基隆、時機、基礎、成積、激動、足迹、饑餓、肌肉、奇數、畸形、幾乎、譏笑、茶几、木屐、乩童、考稽』的ㄐㄧ，佇台語人的耳空內是足癩ko(是社會文化賦予伊的)的音。佇華語講ㄐㄧ就蓋高尚？
| 1. 睡懶覺 | ||||
| 注音一式 ㄕㄨㄟˋ ㄌㄢˇ ㄐ｜ㄠˋ | ||||
| 漢語拼音 shuì lǎn jiào | ||||
| 注音二式 shuèi lǎn jiàu | ||||
| ||||
最後，附這个詞，佇無仝腔口的台語人聽起來，實在是足歹聽的。有人會聽做「細lān-tsiáu」/「塞lān-tsiáu」、有人是聽做「稅lān-tsiáu」。這个華語詞，除了細漢的時陣做孽講以外，上國中了後就完全無閣講過這个詞。一直到facebook的台語社引起激烈的討論。我今仔日才去想起囥佇深層記憶內底的這个詞。
其實，膣屄這个詞佇阮細漢的時陣就是禁忌詞。阮真正是「囡仔人有耳無喙」，阮是乖囡仔，所以這个詞聽有，就是無綴咧講。
(轉去主目錄)
沒有留言:
張貼留言