2010
08281726是真？是假？
「是按怎讀冊讀遐濟冬矣，連這也無法度讀？我干焦讀漢學仔半冬就會曉讀這號物件矣。」阮爸爸當咧用嚴厲的口氣咧共阮查某囝唸。就因為伊袂曉用台語 文讀音來讀論語的開頭：「子曰：『學而時習之，不亦說乎？』
代誌是按呢，阮轉去故鄉看阿爸，我阿爸當佇咧伊的事務桌仔遐咧看較早阮國中的中國文化基本教材。阮查某囝倚過去看阿公咧創啥貨，做阿公的 心血來潮足歡喜的。手裡的冊就叫阮查某囝唸看覓咧，結果阮查某囝袂曉讀就去予阿公唸。
聽著阮查某囝予人唸，我的心裡當然足毋甘的，我就叫阮爸爸按阮兜的門口看對中正大學過去。我手比佇小山崙仔頂的中正大學就共伊講：「你看遐，遐攏大學生，攏讀足濟冬冊。毋相信，你去試看覓咧，遐的大學生你去問十个 看會去問著一个會曉讀的無。阮查某囝才國小的六年的爾，免講嘛袂曉讀。」
彼就有影的，咱這馬的教育學校也無咧教漢學仔的文讀音。欲盍(thah)有可能會曉讀這號物件。予你讀到大學畢業，欲予你揣著會曉讀台語文讀音的人根本就無啥可能。
時代無仝款矣。日本治台的時期，台灣人猶誠有骨氣，會想欲尊重家己族群的文化。學漢學仔是追根溯源無忘祖的行為。阿爸時常講：「做人就袂使忘本。」「食果子著愛拜樹頭。」「飲水思源頭。」「人就愛知影落葉歸根的道理。」
這馬的時代，台灣人經過白色恐怖的洗禮，母語的禁止使用，早就失去家己的骨氣，放棄做台灣人的尊嚴。啥欲去管文化的根猶有傳承抑無。經過十幾年來爭取著的一禮拜一節課的母語課，到底有上抑是無上，一般的人根本嘛袂去注意，因為未來的升學考試，無論是考高中、大學、研究所抑是各種職業的證照，根本也袂考台語文按怎寫、按怎讀。做台語教師強欲有一頓無一頓，逐冬攏有人無課通好教。
像這遍，嘉義市某一間國小學校原本全校有將近六十節的台語課予台語教師教，結果攏總予人收收轉去賰十出頭節課予台語教師教。致使兩个台語教師愛去搶別人的飯碗。夆(hong9)搶去的人煞變成無頭路。真正是予人心寒。
時代無仝矣。想無阿爸咧起啥物性地，台灣人已經失去家己的骨氣佮尊嚴，時勢就按呢咧行矣。二十年後，咱台灣人的母語無定著變成英語嘛無一定咧。你看有偌濟這代的囡仔攏自幼稚園就開始學英語，無拍出雙語教育(英語佮華語)的幼稚園就歹經營。
「阿爸，你好看破矣。論語袂曉也無要緊，讀文讀音根本就佇社會中無用武之地，硬守(tsiu2)咧欲創啥？」
冷靜想起來，阮查某囝無可能會共阿公表示親熱的態度。阮兜的門口埕看對中正大學的所在，根本嘛看袂著。
原來，根本就是一場夢。毋過，佇我的認知內底，就真正有親身體驗著老爸對查某囝的責備佮台灣人失根的無奈。
(轉去主目錄)
沒有留言:
張貼留言