2010
04162206台語文拼音系統(台音式拼音)
台語文拼音系統
【後記】
佇我1994年6月開始寫台語文了後，就用台音式的拼音咧拼寫我袂曉寫的台語字。彼冬其實就是台音式拄產生無幾個月的時間。
TLPA嘛差不多是佇彼冬定案，毋過，教育部攏無採用佮公佈。而且，TLPA的製定的功能目標是欲做標漢字用的，功能的定位完全和注音符號仝款。
台音式的產生，我是親身全部看著伊的形成過程。所以我開始寫台語文的時，自然就採用台音式來寫。台音式了後改名叫做通用拼音(目前這个連結是修改過的版本)。因為伊將伊的功能擴大到同時會使拼客語佮華語，甚至連原住民語嘛會使。所以，才共伊號做通用拼音。
佇我讀研究所的時，我收集了十幾套的台語拼音法。彼時陣，只要提到手的台語冊和字典，甚至干焦是一張紙的宣傳資料，我攏會去分析每一个拼音系統，會使講一个人就有一套。為著欲足緊看捌每一个拼音系統，我就攏會隨共聲、韻、調分類製表。上重要的是備忘區，因為我無可能會記得每一个系統，尤其是聲調的出入上蓋大，仝款的符號佇無仝款的系統代表的發音有可能是無仝款的。
我按呢的整理方法是開始佇1986年的時，彼時陣，我當咧大量讀發音學的時陣，我共讀過的英語、法語、西班牙語、德語、日語、華語、福州話、廣東話……等等每一个語言攏做成一頁的筆記。
當然，用筆和紙足方便的，隨意攏會使畫出任何的符號、表格佮圖形。心內嘛一直想欲共筆記的物件用入來電腦內底。毋過，無遐爾仔簡單。
台音式應該是我用電腦共整理過的拼音系統key in的第一个檔案。看會出來，我愛一直到1997年8月才有法度用電腦做出來。佇彼時陣，文書處理其實猶無像這馬遮方便。我彼時陣是用word5.0咧編的，表格猶無合併儲存格的功能。彼時陣的檔名猶袂使號中文名。而且，檔名閣是干焦會使上長用8个字母來號名。
我的檔案，經過十七冬的累積，干焦word的檔到今就將近六千个。根本就無法度去想會出來當初時的檔名是啥物。
今仔日，我想講我的blog內底的文章攏有附註講我的文章是一開始是台音式寫的，了後改用TLPA。所以就想欲共台音式的原檔揣出來。
咱若有去注意時間，改做TLPA是佇教育部公佈TLPA以後才落去改的。想講教育部既然公佈TLPA咱著愛共伊支持。因為按呢，無形中，我的文章就變成足孤單的。因為，彼時陣，市面上的雜誌之類的物件攏無人咧用TLPA(我算實際使用TLPA的先鋒者之一)。想講欲共文章寄予in(差不名攏是使用教會白話字的系統)，就想講每一个派系攏會排斥無仝款系統的人，尤其是有袂少的教會白話字的人是反對使用TLPA的，所以就攏無寄出去。
好佳哉，最近開始會曉耍blog，按呢耍一個外月差不多攏會當解決較早我無法度處理的問題。
經過揣兩、三點鐘，攏無揣著這个檔案。想會著的關鍵詞嘛揣無，改用拼音來揣嘛無。
最後，用word來揣看覓咧，key入去im兩个字母看覓咧。看著其中有一个檔案的名是twn_im.doc。就共開看覓咧......歹勢，這馬的word無法度開這款的檔案。只好就去揣我為著萬一所保留落來的word5.0來開，BINGO！這聲真正揣著矣。
對我來講，這个檔案是我上蓋寶貴的資料。因為，後來所有的拼音系統的檔攏是用伊做底稿來改的。所以，這遍特別盡量保持伊的原形共伊送起來blog。
咱若是注意比對一下，會發現我攏會佇無仝的拼音系統做一寡改進。親像陽聲韻的範圍的改變。所做的調整和修正攏是觀念和看法的改變。
佇伊的名，雖然文章內攏講台音式，就是台語文拼音系統的簡稱。因為，彼時陣，我認為伊是唯一的一个上適合實際來寫台語文的拼音系統。
原本干焦想講這个後記會寫幾字仔聑，想袂到嘛寫千thong2字矣。就按呢做結束好矣。
相關文章:小卒仔的願望[後記]
夢生 2010.04.16
05.25增加超連結
(轉去主目錄)
沒有留言:
張貼留言