2010
05301855彙音寶鑑(二)－台語字典入聲ｅ秘密
「發求決，決一觀……君堅金規嘉(ke1)，干公乖經觀……柳luan、邊般、求觀、去寬、地端、頗潘、他湍、曾專、入juan、時宣、英彎、門buan、語guan、出川、喜歡……歡反煥法……第四聲……」
相信以上這段，凡是會曉用《彙音寶鑑》這本台語字典ｅ[的]人攏真老練，攏一時仔就會當找[揣]著「發」字，但是對一個[个]抵[拄]開始用字典ｅ[的]人就有一點點仔問題。主要ｅ[的]原因就是出佇欲按怎將[共]入聲字轉換成第一聲。
因為佇實際經驗中，我發現有真濟人已經學會曉掀字典了後，便若抵[拄]著第四聲和第八聲ｅ[的]時陣，嘛是會抵[拄]著問題，所以才佫[閣]繼續寫一篇專門教咱練習入聲的秘訣。
抵[拄]學會曉口訣ｅ[的]人，佇非入聲韻ｅ[的]時攏無問題，攏會當順利找[揣]著欲愛ｅ[的]字，但是抵[拄]著入聲ｅ[的]時就未[袂]順序囉。
假使咱現在欲找[揣]「發達」ｅ[的]「發」字，照以早ｅ[的]方法，咱若唸口訣一定會是：「發求決，決一觀。」會曉口訣ｅ[的]人對「發求決」一定無問題，伊ｅ[的]原理佫[閣]再用圖示看一下：
但是「決一觀」ｅ[的]時，真濟人就有問題。咱來看問題佇佗位，咱用下一頁的圖來看一下伊的運作，才來做探討。
經過運作圖ｅ[的]分析，咱看著大部分ｅ[的]人的問題就是出佇韻尾ｅ[的]部分，除了第四聲變成第一聲以外，咱佫[閣]看著韻尾嘛有改變，由字尾-t變成字尾-n。
圖二：「決一觀」ｅ[的]內部運作分析圖。
那會按呢？是啥麼[物]原理？
現在咱來了解台語ｅ[的]入聲是啥麼[物]才有法度了解是按怎字尾-t會去變成字尾-n。咱台語入聲ｅ[的]特色就是時間比較較短，是將平、上、去等聲直接將[共]韻尾切斷去所形成ｅ[的]，咱ｅ[的]嘴[喙]舌所有ｅ[的]發音部位攏總無改變。換一句話來講，台語所有屬佇同[仝]一個[个]韻ｅ[的]聲調，怹[亻因]ｅ[的]發音ｅ[的]部位是完全仝款，是仝一個[个]部位ｅ[的](請注意這句話一定愛看識[捌]，無就前功盡棄)。
咱詳細來講「觀」和「決」兩字，注意著咱最後嘴[喙]舌所囥ｅ[的]所在是佇佗位？咱會發現怹[亻因]兩字攏是囥佇頂齒後面。佇實際上字尾ｅ[的]發音無仝，所以佇拼音ｅ[的]時分別用字尾-n和字尾-t來表示。
像這款情形ｅ[的]，咱台語攏總有四款：
(1) 字尾-m → 字尾-p。
(2) 字尾-n → 字尾-t。
(3) 字尾-ng → 字尾-k。
(4) 字尾- → 字尾-h。
第一款就是平、上、去字尾是-mｅ[的](就是第一、二、三、五、七調)，佇入聲ｅ[的]時攏變成字尾-p。親像「甘kam1」、「敢kam2」、「監kam3」、「唅[含]kam5」，入聲就是「蛤kap4」。
第二款就是平、上、去字尾是-nｅ[的]，佇入聲ｅ[的]時攏變成字尾-t。親像「丹tan1」、「等tan2」、「旦tan3」、「陳tan5」、「誕tan7」，入聲就是「妲tat4」、「達tat8」。
第三款就是平、上、去字尾是-ngｅ[的]，佇入聲ｅ[的]時攏變成字尾-k。親像「經king1」、「景king2」、「敬king3」、「擎king5」、「競king7」，入聲就是「擊kik4」、「極kik8」。
第四款就是平、上、去字尾是母音結尾的字，用一個[个]細橫線「-」來表示，佇入聲ｅ[的]時攏用字尾-h來表示。親像「賒sia1」、「寫sia2」、「瀉sia3」、「邪sia5」、「謝sia7」，入聲就是「削siah4」、「杓siah8」。
所以咱若發現欲找ｅ文字是入聲ｅ[的]時，佇轉換成第一聲ｅ[的]時，就愛會記得將[共]韻尾轉換成仝發音部位ｅ[的]第一聲。就是下面四款方法：
(1) 字尾是-p4、-p8 → 字尾-m1。
(2) 字尾是-t4、-t8 → 字尾-n1。
(3) 字尾是-k4、-k8 → 字尾-ng1。
(4) 字尾是-h4、-h8 → 字尾-1。
經過按呢ｅ[的]解說，相信已經會當明白入聲轉換成第一聲ｅ[的]時是按怎愛改變字尾，有規則以後就會當用來運用。咱就未[袂]感覺講「決求觀」真困難。
因為這篇是針對已經了解台語字典《彙音寶鑑》ｅ[的]人寫，只是將重點囥佇入聲轉換成第一聲ｅ[的]部分，後面「柳luan、邊般、求觀、去寬、地端、他湍、曾專、入juan、時宣、英彎、門buan、語guan、出川、喜歡......歡反煥法......第四聲......」等部分無欲佫[閣]做說明，有疑問者請麻煩看頭前彼篇，彼篇是針對全完毋識掀字典ｅ[的]人寫ｅ[的]。
當然，這個口訣嘛是會當改變順序，換成「發一歡，歡求觀……君堅金規嘉(ke1)，干公乖經觀...... 歡反煥發......第四聲.....柳劣、邊撥、求決、去缺、地綴、頗潑、他脫、曾拙、入juat、時雪、英斡、門抹、語guat、出撮、喜發.......」
為著欲予各位對規則較熟咧，請麻煩練習找[揣]下面ｅ[的]文字：(因為是練習，所以將[共]拼音和聲調攏標示出來。)
1. 數字ｅ[的]「一cit8[tsit8]」「六lak8」「七chit4[tshit4]」「八peh4」「十cap8[tsap8]」「百pah4」。
2. 數字「三八」ｅ[的]「八pat4」、「十一」ｅ[的]「一it4」。
3. 成語「六六大順」ｅ[的]「六liok8」。
4. 「發達」ｅ[的]「達tat8」。
5 「吉利」ｅ[的]「吉kiat4」。
6. 「鹿草」ｅ[的]「鹿lok8」。
7. 「鴨母」ｅ[的]「鴨ah4」
8. 「叔cik4[tsik4]伯peh4」。
9. 「白peh8色sik4」。
10. 「桌頂」ｅ[的]「桌toh4」。
11. 「法huat4律lut8」。
12. 「捷運」ｅ[的]「捷ciat8[tsiat8]」。
13. 「翻譯」ｅ[的]「譯ik8」。
14. 「教育」ｅ[的]「育iok8」。
15. 「學校」ｅ[的]「學hak8」。
(1993.12.14寫)
(2010.03.03上網Yuh-Ru's blog)
(2010.05.30徙過來隨意窩
並加教育部現在用字佇[ ]內底)
(2010.08.21發現圖片
不明原因連結失敗,
所以重做圖補起去)
(轉去主目錄)
沒有留言:
張貼留言