2010
06241415中華民國99年全國語文競賽-﹝臺灣閩南語朗讀﹞文章57篇
網底: 像 "一个厝家" 表示縣市賽的時是 "一个厝"; 全國賽的時是 "一个家".
A:國小組 B:國中組 C:高中組
D:大專組 E:教師組 F:社會組
註:若是造字圖形無正確顯示出來, 代表教育部的閩南語常用辭典目前無法度連結. 若是有因為造字落字, 顯示空白的所在, 請以比賽公佈為準. 猶閣有問題請到中華民國99年全國語文競賽-﹝臺灣閩南語朗讀﹞的各組篇目網頁和檔案下載連結自行查尋.
01 Grace 廖張皭 [E01]
02 mi-sin(ミシン)佮『麻吉』老爺 陳士彰 [C01]
03 大家．新婦 林美麗 [D01]
04 山頂的烏貓姊 楊昇展 [E02]
05 五月天的旅行，五月的雪 賴淳茹 [D02]
06 予我上數念的彼个人 許沛琳 [C02]
07 予阿母的一張批 劉育君 [A01]
08 毋甘 韓滿 [D03]
09 水溝仔佮金寶螺 許珮旻 [A02]
10 臺灣歌謠．臺語情 張詩瑄 [C03]
11 永遠的疼！陳溝溪 林義和 [E03]
12 甘願做牛1 蘇世雄 [C04]
13 甘願做牛2 蘇世雄 [D04]
14 行出紗窗的少年烏貓兄 王薈雯 [D05]
15 我每冬期待的一張卡片 林榮淑 [E04]
16 我佮阮阿爸 蔡幸紋 [B01]
17 我佮羅馬字相拄 林瓊琳 [D06]
18 批 吳嘉芬 [F01]
19 阮兜這隻可愛的戇狗 黃惠玉 [B02]
20 命運敢是天註定 黃文達 [E05]
21 孤影1 陳怡伶 [B03]
22 孤影2 陳怡伶 [C05]
23 彼......油桐花，開矣未 陳文和 [E06]
24 彼年的熱天 蔡幸紋 [D07]
25 性命最後的幾秒鐘 陳韋豪 [D08]
26 放送頭 張翠苓 [F02]
27 爸囝 藍春瑞 [F03]
28 花崗岩島的真情俺公 陳為信 [F04]
29 阿公的竹椅仔 蘇毓涵 [A03]
30 阿母讀冊記 李月瑛 [E07]
31 阿爸，請你愛緊好起來 鄭昱蘋 [B04]
32 阿桑(sàng)的形影 陳昆龍[F05]
33 前世緣 胡璿蕙 [F06]
34 巷仔內的形影 王湘富 [A04]
35 香燈跤 鄭家和 [C06]
36 氣象報導 王秀容 [A05]
37 烏龍海邊釣蟳仔 尤碧豔 [F07]
38 基隆港的查某囝 紀春綢 [C07]
39 彩券 陳士彰 [E08]
40 教育的種子 蔡瑋琳 [D09]
41 望海 林晏如 [E09]
42 眷村水交社 陳怡君、蘇頌淇 [B05]
43 野生寵物 曹麗華 [B06]
44 部落記事―【田厝寮(千秋寮)―姨婆】 吳正任 [F08]
45 菜瓜棚仔跤 王朝源 [F09]
46 跋桮 徐嘉澤 [E10]
47 夢中的大瓦厝 莊桂英 [F10]
48 對挲圓仔講起 趙玉華 [A06]
49 踮佇天頂的阿媽 王一如 [C08]
50 講古講未來 王秀容 [E11]
51 𥴊仔店 蔡櫻華 [A07]
52 懺悔 陳素經 [F11]
53 鐵路宿舍的記持 李淑貞 [B07]
54 鹿港八郊 邱文錫 [D10][E12]
55 新埔紅柿若出頭 邱文錫 [B08][C09]
56 深深數念的古早味 陳憲國 [A08][C10]
57 宜蘭頭城搶孤 邱文錫 [F12]
01 Grace 廖張皭[(Liāu Tiunn/Tionn-tsiok) ]
我敬佩[(kìng-puē)]遐的為流浪狗奉獻[(hōng-hiàn)]的人，毋過，我本身對狗無啥感覺。我是一个連『米格魯』佮『哈士奇」都分袂清楚的人。對我來講，狗就是狗，毋管伊生做大隻細隻，圓--的抑扁--的，攏佮我無關係。但是，一切攏因為Grace的出現，完全無仝--囉(looh)。這馬的我，逐工下班攏會緊趕轉--去，因為Grace咧等--我，轉--去的頭項工課就是沖(tshiâng)狗尿、掃狗屎。阮歡喜做、甘願受，因為伊是阮的寶貝。為啥物Grace會成做阮厝的一份子？認真回想/huê-sióng/hê-sióng/--起來，冥冥中間，若像註好好--的。
拄著Grace進前的一禮拜，一个攏咧抾[(khioh)]流浪狗的阿蘭師姊敲(khà)電話予--我，問我是毋是願意照顧一隻予人(hōo lâng/hông)放捒的『雪納瑞』，伊共叫做Rainbow，大約三歲大。發現的時，規身軀全傷，長躼躼/tn̂g-lò-lò/的毛結規球，對人充滿敵意[(ti̍k-ì)]，可能予人苦毒；經過𪜶個外月的照顧，Rainbow變甲古錐閣纏--人，伊予Rainbow暫時蹛佇寵物[(thióng-bu̍t)]旅館。伊e-mail Rainbow的相片予--我，希望我予Rainbow一个厝家。現實環境的問題，予我真躊躇[(tiû-tû)]。師姐姊講伊的公寓(gū)已經飼六隻中大型狗，實在無空間--矣。彼暗，佮阮翁婿參詳， 伊勉強同意照顧一隻食素食的狗，阮就去共Rainbow𢯾(mooh)--轉來。Rainbow一看著阮，主動跳來欲予阮抱，到厝了後耍規暝。隔轉工阮去上班，心肝亂紛紛，毋知伊家己佇厝--裡有乖--無？想袂到一轉--去，厝邊就來投[(tâu)]，講伊哀規工，社區的主委嘛來抗議，阮只好共Rainbow送--轉去。欲離開的時，伊親像足毋甘--的，我嘛無奈何[(bô-ta-uâ/bô-nāi-hô)]。
十月下旬[(hā-sûn)]，雨落袂煞，彼工總算出日頭，我佮平常仝款去教室巡學生食晝。經過二十五班的教室，一陣囡仔圍佇一隻狗的邊--仔，塗跤有囡仔好心提予伊食的飯菜，伊連鼻芳--一下嘛都無，恬恬坐佇壁邊。「老師，伊呔(thái)攏毋食？」一个囡仔問--我。𪜶十喙九尻川咧會(huē)彼隻狗毋食的原因。「我知影，伊傷心甲食袂落」，一个平常真孽[(gia̍t)]的囡仔大聲講。伊講彼隻狗失去狗仔伴咧傷心，講有一隻佮伊生做一模一樣[(it-bôo-it-iūnn)]的狗，毋知是𪜶姐姊妹抑是囝，已經死--去--矣，這馬賰伊孤一个。其他的囡仔嘛共伊贊聲，講𪜶有看過彼隻狗。我予𪜶講的故事感動--著，用理智的口氣講：「伊應該是破病--啦。」我看著伊的眼神充滿悲傷，緊越頭做我走，袂輸一个戰敗的小卒仔走若飛。心肝頭挐氅氅/jû-tsháng-tsháng/jî-tsháng-tsháng/，我無法度坐咧好好仔食飯，伊絕望的眼神予我的心若針咧揻鑿、刀咧割揻。(欣賞規篇作品)
02 mî-sín(ミシン)佮『麻吉』老爺 陳士彰[(Tân Sū-tsiong )]
看我這台『麻吉(má-tsih)』的老爺，水啉甲差不多--矣，『引擎(ia̋n-jín)』的溫度嘛加降真濟，無閣再趕緊出發袂使--得；因為到高雄猶有一半路，規个頭殼底，想講阿娘這陣倒佇加護病房，毋知有要緊--無？
想到遮，就閣想著五年前，阿娘對一樓跋落地下室彼擺。蹛佇加護病房三禮拜久，對頭殼頂開始，到兩肢跤骨，插甲規个攏是管(kóng)。阮兄弟姊妹，逐擺若入去加護病房，就是目箍紅紅出--來。這擺毋知會像頂擺按呢--袂？
車那開，對面車燈射過來一條一條的光線，閃對頭殼底，變成一條一條的醫療管，若親像一條一條的線，穿(tshng)過阿娘彼台『mî-sín』的針鼻仝款。
會記得讀小學四、五年的時陣，阿娘就淡薄仔有老歲仔目。逐擺若欲車物件進前，攏會叫我的二兄，代先將線穿過針鼻。因為二兄毋但聽話，也是阮所有的囡仔，上𠢕變(pìnn)工藝[(kang-gē)]--的，所以阿娘比較較信任--伊。
有時陣我嘛會要求阿娘，予我穿一擺線看覓--咧，總--是攏予阿娘拒絕：「生雞卵無，放雞屎有，小等--咧針予你毀[(huí)]歹--去，我就加食力--的！」
有一日下晡，阿娘閣叫二兄共伊穿針，了後就去灶跤煮飯。我趁著機會，就一直共二兄姑情(tsiânn)：「二兄！拜託--咧--啦！予我穿一擺看覓--咧好--無？」
「若去予阿娘知影，咱兩个攏會去予伊修理甲金觸觸(kim-tak-tak)！」講--起來，二兄佇阮囡仔中間，比較較無膽。
「免驚--啦！袂--啦！」我一直共伊姑情，精差欠一个跪。
二兄除了無膽以外，嘛是上蓋軟心--的。伊予我吵甲無法度，就閃起來換我穿。俗語咧講：「坐轎--的毋知扛轎--的艱苦。」手提著線一直咇咇掣(phi̍h-phi̍h-tshuah)，『mî-sín』彼枝針㽎(sìm)--一下㽎--一下，我舞甲大粒汗細粒汗，線猶閣是攏穿袂過針。
「你的正跤愛共跤踏仔小(hân)咧，彼枝針毋才袂㽎走--去。」二兄看袂得過，就共我教。
照伊的話，正跤跤踏仔，有影彼枝針袂閣㽎，就強欲共線穿予過，嘛是無法度。
「針鼻傷細空，你愛用喙瀾共線頭小可沾(tsam)--一下，毋才穿會過！」二兄講話的聲音，聽會出來伊緊張甲欲死--去。(欣賞規篇作品)
護士建議先倩二四點鐘的特別護士來共伊顧，因為病人猶無法度家己食物件，洗盪[(tn̄g)]、揉[(jiû/liû)]身軀、掠龍、拍痰、換尿苴仔，攏是真專業的工課。
過兩個月了後，俊生--仔𪜶兩兄弟仔參詳過--矣，感覺予老母一直蹛踮/tuà-tiàm/病院嘛毋是辦法，甲若(kah nā)病情較穩定--矣，應該想一个仔辦法來安搭老大人，看是欲送去安養院予專門的人來照顧，抑是欲予序大人輪火鬮(khau)？
俊明--仔干焦知影趁錢，伊掠準病人精神就是好--矣，無去想著老母這馬是佇嚨喉切一个空喙，鬥『hòo-suh』管(kóng)通入去肺管(kńg)才有法度喘氣；無法度家己哺(pōo)物件，到今(tann)愛閣用鼻胃管來飼牛奶。倩(tshiànn)特別護士一日兩千，一個月愛六萬，𪜶哪有遐濟錢來倩？月英--仔是誠𠢕拍算的人，既然罔腰--仔出加護病房--矣，會使家己顧就家己顧，橫直伊也無咧食頭路，看特別護士照顧大家(ta-ke)嘛無啥物特別的工夫，毋甘閣開冤枉錢，就共大伯仔參詳，先予伊顧一個月看覓；想袂到美桃--仔𪜶翁仔某對醫生遐提著「巴氏量表[(Pa--sī niû-pió)]」，就去揣仲介[(tiōng-kài)]登記申請外勞；一個月到，欲過鬮的時，外勞仔就已經來到臺灣--矣。
一點仔都無共伊尊存[(tsun-tshûn)]--一下，月英--仔感覺家己若戇人--咧，大--的講：「老歲仔閣有誠濟錢，暫時毋免用著咱的私奇，咱閣有家庭、有囡仔欲飼，先將老歲仔的定期單解約，用伊的錢倩人來共伊顧，是合理--的。啊咱嘛毋通因為老歲仔按呢，生活就來受影響。中風的病人，長誠長，短誠短，逐个人總--是愛以平常心去過生活。」
這寡仔定期單，罔腰--仔本底攏寄佇月英--仔遐囥，聽大--的按呢講，月英--仔無第二句話攏提出來交予𪜶大伯仔。伊自細漢佇清白的家庭大漢，是一个袂痟貪的人，總--是知影「欲食胡蠅家己欱(hap/hop)」的道理。
暗頭仔，天頂規片攏是紅霞(hê)，月英--仔徛佇涼台前，目尾捽[(sut)]對俊生--仔𪜶翁仔某彼台當欲離開的烏頭仔車去。看這个範勢(pān-sè)，自開始𪜶就無拍算欲家己顧的款，按呢我是咧做癮頭[(giàn-thâu)]--的--喔？月英--仔親像予人(hōo lâng/hông)搧著喙䫌(phué)仝款。想著家己共人顧甲歡喜甲，結果去到高雄，所有的復健[(ho̍k-kiān)]工課攏無咧做。原來大伯仔的孝心是咧做予人看--的，早若知影，就規氣共老--的送安養院就好，哪著倩外勞？結果外口的人攏呵咾俊生--仔有情有義，一點仔都毋是人咧講的「大學大不孝」，閣欣羨罔腰--仔飼遮的囝，無共冊讀到尻脊骿去，誠值(ta̍t)！(欣賞規篇作品)
04 山頂的烏貓姊姐 楊昇展[(Iûnn/Iônn Sing-tián )]
隔工一透早，猶未睏飽眠的巫咪(ú-mih)予一陣(tsūn)挵門聲叫醒。伊本底閣咧愛睏，一開門一下開看著『老馬』和眷村[(kuàn-tshun)]自治會會長的身軀邊徛一个警察，伊規个人攏精神--起來，有一个歹吉兆對心肝頭濆(bùn)--出來竄(tshuàn)起。警察開喙：「這雙皮鞋敢是恁翁的？」巫咪會認得這雙鞋是『老宋』結婚時買--的，到今年已經穿十二冬--矣，舊年過年伊本底欲共提去擲掉，結果予『老宋』罵講討債，隔工就看著伊家己去買牛線和針來紩(thīnn)。想袂到這馬眼前/gán-tsiân/(又)gán-tsîng/警察提著這雙皮鞋來揣人。巫咪頕(tàm/tìm)頭表示是𪜶翁的了後，警察紲--落來講：「昨暝佇省道有一个騎跤踏車的老歲仔去予砂石仔車挵--死。阮對伊的軍用外套和年歲判斷，應該是這个眷村的老兵。既然這雙皮鞋是恁翁的，按呢麻煩你佮我來現場指認--一下。」聽到遮，巫咪已經跤痠手軟，頭眩目暗，伊感覺現此時，家己若像是佇咧做眠夢。
雖然伊和『老宋』感情無蓋好，毋過坐佇警察的『oo-tóo-bái』頂頭，伊一路上開始浮現想起『老宋』對伊的照顧。伊會當逐個月寄錢予爸母，閣家己儉私奇，彼是因為厝內的開銷攏是看『老宋』；伊閣想起著結婚的時，老爸退回的五千箍聘金，其實『老宋』早就趁人無注意的時陣，偷偷仔提予阿母，伊閣比手勢叫老母莫講。這是佇幾冬前彼擺伊和阿珠嫂仔相拍，閣予『老宋』罵，伊感覺受著委屈走轉去後頭厝投予老母聽，老母安慰--伊『老宋』是好人的時，才無意中共這件代誌講--出來，伊也因此斷了才無閣想欲離緣的想法。伊慢慢仔了解，『老宋』因為爸母和親人攏佇大陸，無法度盡孝道，所以對丈人、丈姆特別好。尤其是伊願意共𪜶囝囥佇山頂予老爸、老母照顧，也是驚𪜶佇山頂傷過無聊，才忍心按呢做。
巫咪知影有一寡老芋仔因為付傷濟聘金予丈人、丈姆，所以懷恨[(huâi-hūn)]在心，認為這是一場買賣。既然『銀貨兩訖(kit)』，某娶過手了後就無需要登門踏戶轉去請安問好。像『老宋』遮爾好的囝婿，實在無偌濟。伊只有怨嘆『老宋』的愛食醋，閣喙閣袂甜，雖然愛--伊，毋過是共伊當做查某囝按呢疼惜。這對愛情充滿期待愛情的巫咪來講，感覺是誠無實在。講--起來也真諷刺(hóng-tshì)，當初伊是為著欲離開山頂困苦的生活才嫁予『老宋』。等真正過著較四序的日子，伊閣煞顛倒轉來欣羨糖甘蜜甜的愛情。想到遮，伊真正無願意閣想--落去，伊只有向望等--一下看--著的死體毋是『老宋』。
差不多過了一世紀，巫咪予警察載來到失事[(sit-sū)]現場，伊遠遠就看著塗跤倒一个人予白布仔崁牢--咧，趕緊三步做兩步走，一掀開白布......天--啊！真正是老宋，眼前這个七孔流血的死體，確實是𪜶翁，伊頭殼一陣眩愣(hîn-gāng)，眼前一陣烏暗，就按呢(tsua̋n)毋知人--去。(欣賞規篇作品)
05 五月天的旅行，五月的雪 賴淳茹[(Luā Sûn-jû )]
透早，一陣朋友來阮兜樓跤揤(tshi̍h /ji̍h )門鈴，我當好睏，聽著有人咧揤門鈴實在是真煩，離開我的眠床，拖毋甘願的跤步去開門。門才開一半，恐怖的叫聲就直接貫(kǹg)過門枋迵(thàng) 到我的耳空。「啥？ 你猶未換衫-- 喔(ooh)！你敢袂記得今仔日欲去看五月雪--啊？」一向[(it-hiòng)]嚨喉空上大的阿庭目睭激甲大大蕊咧喝。
「五月雪？」我雄雄想起昨暗，欲睏進前接--著的「通知」。這聲，我真正完全醒--矣。「歹勢--啦！予我十分鐘，我馬上落--來！」
幾分鐘後，阮就已經佇前往山頂的路--裡--囉(looh)！
沿路，阮那騎車那唱歌，這是阮這陣朋友的特殊(ti̍k -sû)習慣。雖然騎車--的佮坐車--的攏腰痠背疼，毋過時間佇阮「快樂的出帆」、「滿山春色」、「四季紅」的歌聲中真緊就過--去--矣。
「看--著--矣！看--著--矣！我看著五月雪--囉！」車拄斡(uat)入去小路，就看著山頂有一大片[(phiàn)]開甲白白白的五月雪。因為是頭一擺看--著，害我歡喜甲共形象[(hîng-siōng)]攏抨(phiann)無--去--矣。
阮車騎--咧一直對山頂踅--去，綴小路彎來彎去，總算踅到勝興車站--矣。阮軁(nǹg)過充滿客家風情的街仔路到勝興車站，遐真正是一个好所在，而且聽講勝興車站是全臺灣上懸的車站，既然無法度到玉山攻頂，毋過至少攻到上懸的車站，嘛有享受著上懸的感覺！阮趕緊共車停好，做一睏衝到車站鐵枝路邊。雖然彼工天氣真燒熱，毋過柔軟的風吹佇阮的身軀，敢若咧掖(iā)五月雪，唱風的歡迎曲，歡迎阮來到遮，阮的心情隨就變甲真爽快！
為著欲做一个好遊客，阮誠負責任佇四界翕相；對蓋有歷史的車站，真久無火車經過的鐵枝路到烏嘛(mà)嘛的磅空，完全無想欲放過這个美麗的所在任何一个特別的角頭。除了翕相以外，另外一項做遊客一定愛做的代誌就是頓(tǹg)紀念章--啦！所以我買一本紀念冊，佇紀念冊頂懸頓一堆大大細細的紀念章，感覺真滿足，了後才予彼陣趕緊欲去磅空耍的朋友搝(khiú/giú)到磅空邊--去。
本來到磅空是為著欲翕相，尾--仔發現佇磅空內底有囥真濟有關勝興車站的紹介牌，順紹介牌，規陣人不知不覺煞行到磅空內面。阮毋知影佗位來的戇膽，竟然決定繼續往內底行--入去。行--啊行，磅空愈來愈深，愈來愈暗，阮敢若予人吸入去宇宙[(ú-tiū)]的烏洞，看袂著底。(欣賞規篇作品)
06 予我上數念的彼个人 許沛琳[(Khóo Phài-lîm )]
昨昏暝我又閣夢著你--矣......
佇咧夢中的你，猶原是真莊嚴[(tsong-giâm)]，佮你在生的時陣仝款，一點仔都無變......自從你過身了後，這是我第二擺夢著你......
我永遠都會記得第一擺夢著你，是你過身無偌久，去嘉義共你送了了後，我的心情就親像是拄著大風的海湧，無法度平靜。彼暝，我真數(siàu)念--你，倒佇眠床頂，反(píng)來反去，睏袂落眠。頭殼內，干焦想講你到天頂了後，敢會共我放袂記？後擺我若是想--你、我若是有話想欲共你講，按呢我欲按怎？我一个人覕佇棉襀(tsioh)被內底，那看你的相片人那吼，吼甲睏--去。講--起來，嘛是真聖[(siànn)]，彼暝，我就夢著你--矣。
佇咧夢中，是下課時間，你坐佇教室頭前，同學攏咧做家己的代誌，予你罵慣勢的我，目睭根本就毋敢掃對你彼爿去。啥人知影，你雄雄共我叫--去，講：「是按怎交男朋友無共老師講？」我聽了煞驚一趒(tiô)，就睏袂去。精神--過來，才知影原來這是一場夢，嘛因為看著你真安心，所以我真緊就閣睏--去--矣。
最近，我為著學業的代誌咧操煩，毋知影到底欲去考研究所抑是欲去實習[(si̍t-si̍p)]做老師？我就想起著佇我高中的時陣，你三不五時攏會講，畢業了後的學姊[(ha̍k-tsé)]定定攏嘛會轉來揣你講心事，無論是學業抑是愛情。彼時陣，阮攏毋相信，心內想講：「老師遮爾歹，到底有啥人(siánn-lâng/siáng)會閣轉來揣你討論？家己褒較袂臭臊--啦。」猶毋過，到這馬我才知影，老師你講--的攏是事實。高中三年，逐工攏佮你生活做伙，讀冊做伙、食飯做伙食、耍嘛耍鬥陣，我敢講：「你是全學校上認真、負責的導師，嘛是全校上關心學生的老師！」
咱學校，是一間私立中學，升學的壓力已經真大，而且你佮恁翁閣攏是𤆬(tshuā)資優班，閣再加上你的身體本來就無好，欲𤆬阮三冬，真正是一个真食力的工作。佇咧阮高三的時陣，有幾若擺，你攏因為身體袂堪--得，煞來請假。有當時仔，課上到一半，你就會雄雄頭楞(gông)，無法度講課，叫阮家己看冊。自阮一年仔到三年，你講課從來就毋捌用『mài-khuh』；但是彼站仔，你攏愛靠伊才有法度上課，阮逐家攏真煩惱。(欣賞規篇作品)
07 予阿母的一張批 劉育君[(Lâu Io̍k-kun )](影音檔)
阿母：
這是我第頭一擺會想欲主動寫批予阿母。舊年，是我食遮爾大漢第頭一擺離開厝到外地讀冊，無法度逐工陪伴佇你身軀邊。也因為離開厝，久久才轉去一擺，我才會當開始體會著你對我的關愛。每一擺若轉去厝，你攏會煮我上愛食的菜、準備我上愛食的物件。若是有人送好物仔予--你，你嘛會專工留到我轉--去才提--出來。你嘛會定定注意我需要啥、欠啥，無嫌艱苦抑是麻煩，攏會𤆬(tshuā)我去買。
雖然，像咱這種傳統的家庭，互相表達關懷是遐爾頇顢(hân-bān)，攏干焦會曉用責備的口氣來表示家己的關心。雖然每一擺聽你的口氣攏予我感覺心情無好，親像無得著關心，但是我攏會共家己講：「這是阿母關心--我的方式爾爾。」親像頂學期尾，明明就感冒--矣，煞硬欲拖到一禮拜後轉去厝的時才予醫生看，害我病甲足嚴重，你就足受氣罵我講毋知影代誌的嚴重性。彼擺我就恬恬仔予你罵，因為我知影你會遮爾受氣，就是表示你對我袂曉好好仔照顧家己，是偌爾煩惱。其實，我對你的關心嘛是按呢；講話的時，攏足平靜，袂表現出家己內心(luē-sim)真正的想法。會記得以早你開刀蹛院的時陣，我心內是足煩惱--的，但是我一直毋敢實際表現，抑是講--出來，干焦有人欲去看--你，我就逐逝(tsuā)攏綴--去，去遐嘛無創啥，只是佇你邊--仔踅來踅去。雖然按呢，毋過，我知影咱其實攏足愛對方，只是歹勢表達--出來爾爾，就算講表達--出來嘛是用毋著方式，這點我相信你我攏知影。
雖然咱兜本底就無佇咧過母親節，但是，今年總--是感覺應該愛轉--去，若無，嘛愛送啥物予--你，至少嘛應該愛寄一張批予--你。但是等我有這款想法的時，母親節已經欲過--矣接近尾聲，等我寄到厝，節日嘛袂赴過--去--矣。彼工接著厝--裡的電話，敲(khà)--來--的雖然是阿爸，毋是「母親」，但是我仝款感覺足心酸--的，雄雄感覺無轉去厝誠不應該，這是我到今(tann)頭一擺因為無轉--去，煞想欲流目屎的經驗。
離開厝來遮生活，予我真正看著你的母愛，我嘛才知影其實咱互相對待的相處模方式[(siong-tshú bôo-sik)]對以早到這馬有慢慢仔改變，上無講話的口氣有較平和、溫柔，但是仝款袂直接講出「愛」。我相信咱攏一直佇咧改變家己，我有明顯看--著、感受--著。無要緊，時間慢慢仔會予咱改變。佇遮因為看袂著你，我會當毋驚歹勢，勇敢、大聲共你講：「阿母，我愛--你！」(欣賞規篇作品)
08 毋甘 韓滿[(Hân Buán )]
假使[(ká-sú)]講人生像舞台，我希望家己是一个笑詼劇的丑仔，毋但會當共快樂帶予別人，嘛會當共歡喜囥佇心內；假使講人生是一本冊，我希望家己是一本內容精彩的故事冊，逐家看了會想欲閣看；假使講人生是真珠、瑪瑙、璇石貫(kǹg)起來的袚鍊，遐爾仔光、遐爾仔顯(hiánn)，為啥物我的人生敢若幾粒仔暗淡的星，佇遐爍/sih/--咧、爍--咧，閣有淡薄仔孤單？
阮兜的囡仔真濟，阿爸干焦是一个小小的公務人員，逐個月的月俸無夠通予遐爾仔濟口人食。阿爸下班了後，就去巷仔口排擔仔――削甘蔗、破(phuà)西瓜，加減仔趁錢；阿母嘛佇厝跤邊飼雞、飼鴨佮飼豬；阿姊透早就去市場，抾菜葉仔轉來予雞仔、鴨仔食。雖然阮規家伙仔攏誠無閒，毋過，阮攏嘛過甲誠快活。
阮兜出--去彼條路，就是嘉義上蓋有名的林森路，有一个衫仔行的頭家來阮兜行幾若擺，伊共阮爸母講：「恁兜囡仔傷濟，阿梅也誠有我的緣，若予我做囝，我會好好仔共伊栽培，後日仔定著會有出脫，恁兩个序大人嘛毋免做甲遐爾仔忝(thiám)！」阮老爸共伊應講：「囡仔欲來綴我食穿，我若有一喙水通啉，囡仔上無都有一碗番薯簽湯通啉；雖然無大魚大肉通食，毋過，絕對袂去予枵--著、寒--著。毋管我的囡仔有偌濟，我攏袂共囡仔分予別人做囝--啦！」
阮細漢的時，阿爸為著阮這陣囡仔，逐工做工課做甲活欲忝--死，毋過，伊上大的娛樂就是聽『la-jí-ooh』、看布袋戲。彼陣我誠愛讀冊，所以阿爸上疼--我。伊攏會𤆬(tshuā)阮去看布袋戲，史艷文、藏鏡人......遮的人，予阮囡仔時陣的日子過甲誠心適。逐暗規家伙仔攏去睏--矣，阿爸就提『la-jí-ooh』去柴間仔聽。這陣，我會過去共阿爸司奶(sai-nai)閣佮阿爸做伙聽『la-jí-ooh』，劉備三請孔明、孫臏(Sun Pīn)鬥龐涓(Pâng Kuan)......攏是阿爸上愛聽的戲齣。
阮大漢的時，踏入社會食頭路--囉(looh)！有一工落雨，一个幔雨幔的菁仔欉，青磅白磅走入來辦公室，阮誠受氣共伊講：「毋管你有啥物代誌，先出去共雨幔褪--落來才閣講。」後--來，這个人定定來阮公司，伊生做懸懸--仔閣小可仔大箍，毋但誠愛講笑，有當時仔嘛會挈(khe̍h)物仔來予阮食。有一擺歇睏日，伊𤆬(tshuā)阮去山頂𨑨迌，閣紮阮上愛食的葡萄，伊毋但共葡萄洗甲誠清氣，閣共葡萄拭甲誠焦才予阮食，實在足感心--的。到山頂的時，伊沿路行沿路呼噓仔(khoo-si-á)，阮沿路行沿路抾楓(png)仔葉，規路有講有笑，予阮規工攏誠快樂。(欣賞規篇作品)
09 水溝仔佮金寶螺 許珮旻[(Khóo Puē-bûn/bîn )](影音檔)
細漢的時陣，阮定定會去田岸邊的水溝仔底掠𧌄梅仔(am-muî-á)。會記得，彼時的水溝仔無崁蓋，水仔清清，今仔(tann-á/tá́nn)對一區一區的『phòng-phuh仔』流--出來，𧌄梅仔掠袂完，水雞仔嘛𧿳(phu̍t)𧿳跳。掠掠--咧、耍耍--咧，時間到--矣，𧌄梅仔、水雞仔閣共伊放--轉去，規陣囡仔相招來轉。
𧌄梅仔罔掠，總--是看著水溝仔的壁堵頂黏著真濟粉紅仔色的物：一粒一粒，規捾規捾，閣袂輸若桑材(sng-tsâi)-- 咧！但是細漢的我實在嘛毋捌桑材生啥形，看著伊是粉紅仔色--的，就認伊做『草莓』。
印象上深--的有一擺，我綴大人去阮相合[(sann-ha̍p)]港仔的豬牢「𨑨迌」。看慣勢趕豬、飼豬，參刣豬、共豬仔接生[(tsiap-senn/sinn)]我都看過，所以感覺真無趣味，我就趁𪜶無注意，一个人走去對面的田--裡耍。
有一條大水溝遐𨑨迌。彼條水溝對細漢的我來講蓋大條――凡勢比我人較懸――無水，塗焦焦，水溝仔壁是石仔鞏(khōng)的，嘛有大粒石頭排齊齊，噗(phok)出來佇石仔面頂。上重要的是，壁堵頂有真濟『草莓』。
『草莓』這號物，對阮庄跤囡仔是真罕見，感覺就是貴參參的果子，平常時真罕得難得食會著。進前掠𧌄梅仔的時，想講彼『草莓』可能因為生佇壁堵，塗滒(kō)甲垃圾垃圾，才無人愛食，無人欲食我嘛歹勢講。但是這陣有這个機會，無人看--著，閣有規排的『草莓』在我捎(sa)，我應該把握......
結果我人傷矮，手捎無，換用跤來勾，踢一下規个『草莓』煞爛甲𣻸(siûnn)𣻸𣻸，莫講想欲共伊勾--起來。
我真毋甘願，硬死欲挃(ti̍h/ti̍nnh)我數(siàu)念真久的『草莓』。我用石頭搩(kiat)、用柴仔枝剾(khau)，我一个貼心的紅狗蟻......毋著，是紅『草莓』，害年歲少少的我這个囡仔疕(phí)誠厚工。
啥人知影一下無張持，我煞規个人跋跋落去水溝仔底，摔一下有夠工夫。
這聲我緊張--矣，煞袂記得吼：因為這條水溝真正比我人較懸。若講著(peh)壁我是真內行，毋過這擺我連溝仔墘(kînn)都摸袂著，是欲按怎樣？偏偏真無拄好，石仔閣不止仔滑，大粒石頭又閣噗[(phok)]了無夠出--來，無所在通徛――我這陣咧想，應該是囡仔人緊張咇咇掣(phi̍h-phi̍h-tshuah)，驚一下傷生狂，毋才雄雄袂靈巧[(khiáu)]――就按呢，我干焦會當目睭金金看遐--的閣看一眼生做厚厚、黏著規个溝仔，有的閣佇遐滴湯、𣻸𣻸、粉紅仔色的『草莓』，賰--的就袂赴去關心--矣。(欣賞規篇作品)
10 臺灣歌謠．臺語情 張詩瑄[(Tiunn Si-suan )]
桌仔頂的喇叭響起「異鄉的我，一个人起畏寒......」歌詞配合旋律[(suân-lu̍t)]，歌曲內底的世界不知不覺浮現佇我的面頭前，慢慢仔𤆬(tshuā)我進入時間的旅行，看見臺灣歌謠生湠(thuànn)的故事。
歌謠咧吟唱時代上奢颺(tshia-iānn)的旋律，一个音符、一葩(pha)歌詞，攏咧表達生活佇這塊土地頂懸每一个人的情感佮生活。烏狗兄的熱情，烏貓姊的妖嬌，彼當陣上時行的打扮佮流行歌曲，陪伴足濟人度過的青春少年時。這馬的CD 佮過去的舊曲盤真無仝款，彼種對留聲機流--出來的歌聲，雖然我聽無幾擺，毋過彼種聲音聽--起來有五○年代特殊(ti̍k-sû)的感情佮氣味；就是彼當時上流行、上有名的代表，像〈孤女的願望〉、〈人生〉、〈港都戀歌〉等等，真濟歌到這陣(tsit-tsūn/tsín)攏猶予逐家數(siàu)念。這馬閣放出來聽--一擺，感覺真熟似，敢若捌聽--過的款--呢！好聽的歌謠會永遠流傳--落去，爸母少年時代的歌，有彼个時代的特色，陪伴𪜶行過快樂、行過傷心；總--是歌謠的時代意義真大，嘛影響足濟人！
離鄉背井來到臺中讀大學，一條〈落雨聲〉引起我思鄉的情緒[(tsîng-sū)]。親像命運的交響曲一个音、一个音彈奏--出來，敢若是為我寫的曲，予我感動，閣一擺記錄我佮這个時代的故事。
台仔頂老師認真咧講臺灣歌謠發展的故事，一條一條對喇叭放送--出來的歌，無論是描寫女主角予人(hōo lâng/hông)放捒、寂寞[(tsi̍k-bo̍k)]心情的〈青春悲喜曲〉；抑(ia̍h)是〈鑼聲若響〉歌詞內面彼種船未到就咧等待，船走了後閣毋甘的心情，我攏會那聽歌那想歌詞內底的故事，予我感覺有一點仔稀微。臺灣歌謠百百首，無法度逐條攏來聽清楚。上課的時，老師講，每一个時代攏有𪜶家己的故事佮歌曲，予我印象上深的是〈安平追想曲〉。有一擺，夜市仔人𤲍(kheh)人的時陣，聽著這條歌，我感覺真熟似。後--來上課的時閣再聽，對照老師分予阮的歌詞，解說歌曲的故事佮伊過去時代的特色，就有真無仝款的感覺。這條歌是陳達儒作詞，許石作曲，發表佇一九五一年，佇臺灣流行歌謠史佔真重要的地位，江蕙、洪榮宏佮張清芳等等，真濟出名的歌手攏捌唱--過。(欣賞規篇作品)
咱若駛車行鹿港迵(thàng)南投，這條台七十六號東西向快速道路[(khuài-sok-tō-lōo)]，來到埔鹽段，佇南北兩爿道大路的中央，有一條成[(tsiânn)]百米的大溝，在地人就共伊叫做「陳溝溪」。
若問講陳溝溪佇佗位，相信大部份的人攏毋知；就算講提上新的地圖來反(píng)，嘛揣無。陳溝溪對外埠頭[(poo-thâu)]的人來講，是一个真生份的名。毋過，若佇彰化縣的東福興佮秀水鄉南爿，對這箍圍仔成十个庄頭的人來講，陳溝溪就親像是𪜶的爸母仝款。
論真講--起來陳溝溪毋是真長，伊只不過是引八堡一圳[(Pat-pó-it-tsùn)]的水流--落來的一條溝。水頭過埔鹽埤[(pi)]就是員大(tuā)排，水尾行到鹿港就是福鹿溪，總長無夠一舖(phòo)路。溝底離駁岸(poh-huānn)袂超過三米。早前農業社會在地人無自來水，所有的生活用水，毋管是田欲用--的，抑是人欲食--的，攏愛靠陳溝溪。連熱天時仔，風颱大水嘛愛靠陳溝溪來消敨(tháu)水；所以講，陳溝溪毋但是附近這幾个庄頭上重要的水源，嘛是袂當欠缺的排水溝。
是按怎陳溝溪遐爾深，做排水溝算是正常，哪會當做水源？原來彰化縣農田水利會佇陳溝溪的中段──陳溝庄(tsng)莊，有設一个抽水站，號做「臺灣溝抽水站」。這个抽水站佇1949一九四九年十一月二十二開工，隔轉年五月三十完成。自本有四台五十馬柴油『引擎(ia̋n-jín)』的抽水機，1987一九八七年三--月才閣全部換新。佇抽水站猶袂運轉進前，遮附近的田佮人攏是靠天咧過日生活；無雨水的時陣，田底必(pit)痕(pit-hûn)無法度種作。古井斷滴，三頓用水真艱苦。就愛等到雨水期，田才有水通食，古井嘛才有水通予人用。彼當時的生活，絕對毋是這馬的少年人有法度體會--的。一直到抽水站起好了後，在地人才毋免過彼種看天生活的日子。干焦予這个抽水站致蔭的這成十个庄頭，面積[(bīn-tsik)]就超過七百甲。這箍圍仔的農產品，包括米、番薯佮荷蘭豆攏是全國上主要的出產地。
佇臺灣溝抽水站，除了有四台主要的抽水機以外，猶閣有一棟機房佮一棟宿舍。外口有一窟水池仔，閘[(tsa̍h)]糞埽佮入水口，四箍輾轉有種真濟樹仔佮花，光景實在有夠媠。會記得讀國校仔的時陣，學校逐年攏會安排一个年級來遮遠足。佇囡仔時代的記持中，陳溝溪是沙質的溪底。抽水站前有一个閘水壩，平常時仔壩底水沖(tshiâng)跤，上深的所在才兩、三尺爾爾，是囡仔上愛落去耍的好所在。溪水清清清，魚、蝦、蜊仔有夠濟，閣看現現。雙爿的草仔、樹仔，烏幼閣青翠。(欣賞規篇作品)
12 甘願做牛1 蘇世雄[(Soo Sè-hiông/iông )]
水源--仔𪜶老爸是一个有十幾甲田園的小地主，嘛是一个有讀冊的草地紳士。佇日本時代，伊無入公學校受日本教育，顛倒是漢文讀足飽。伊毋但會曉吟詩作對，對漢醫藥嘛真有研究。厝內大細若有啥物人咧無好勢，伊攏家己共脈節[(tsat)]節--咧，才閣開一張藥單去拆[(thiah)]藥仔轉來煎[(tsuann)]予病人啉啉--咧，真緊就無代誌--矣。有時，厝邊隔壁人艱苦嘛會來拜託--伊。伊每一擺攏足熱心替人節脈[(tsat-me̍h)]、開藥單；毋但攏無欲收錢，若是有拄著較麻煩--的，伊閣會去人兜教人按怎煎藥仔。
另外猶有一項就是：庄跤所在的作穡人大部分攏毋捌字，若欲看批、寫批，攏會來拜託--伊。伊寫批一定家己磨墨、用毛筆寫；毋但字媠，規張批文攏足齊勻(tsiâu-ûn)，無任何錯誤、修改。連批囊、郵票都替人攢(tshuân)便便，嘛是仝款攏免費奉送。
日本人知影伊有學問，閣是佇地方上受尊敬的人，就特別指名請伊做保正(tsiànn)；規庄仔頭無論老--的少年--的，逐家攏嘛足服--伊。連公學校的日本先生為著欲教臺灣學生囡仔，都攏會定定來共伊請教漢文，閣呵咾伊是「先生的先生」。
彼當時的臺灣社會，尤其是農村，有讀冊的人確實足稀罕。水源的老爸是日本先生的漢文先生，又閣是替人看病攏無收錢的漢醫先生，會使講是足好名聲、足有面子的代誌。毋過，這對伊另外一个身份，應該講是伊祖傳的本份，就是愛負責種作彼十幾甲田園，做一个標準的作穡人這項代誌，毋但無啥物作用，甚至伊想想--咧，實在感覺足毋值[(ta̍t)]，閣足怨嘆。
自細漢讀冊慣勢，厝內面的穡，伊其實真罕得摸。繼承祖公仔的田園了後，橫直繼續有倩長工咧作田，伊只要三不五時木屐(ba̍k-kia̍h)穿--咧，田頭田尾巡巡踢踢--咧，規家伙仔就有通食閣有通賰--矣。彼个年代的臺灣，大部份的人攏猶無鞋通穿；尤其作穡人，逐个攏嘛褪赤跤。會當像按呢穿木屐去巡田，就表示伊是田頭家、紳士人。
想袂到有一年五日節才過無偌久，天氣漸漸開始咧燒熱，平時攏足勇壯的長工雄雄煞破病，連紲倒佇眠床幾若日，攏無才調起--來。這个草地頭家除了親身共長工節脈看病以外，想著縛佇厝後彼隻水牛嘛袂使無飼，伊就叫長工好好仔歇睏，家己共葵笠(kuê-le̍h)仔戴--咧，就家己一个人牽牛出去食草。(欣賞規篇作品)
13 甘願做牛2 蘇世雄[(Soo Sè-hiông/iông )]
後生毋敢閣講傷濟，伊越頭看阿母，期待𪜶阿母會當做主，招阿爸留踮臺北蹛--幾日仔，通予𪜶做序細的人小可款待--一下。𪜶阿爸從到今[(tann)]，逐遍來臺北攏是一日往回，毋捌咧過暝。頭起先，逐家攏掠準伊是蹛電梯公寓(gū)袂慣勢，原來到這馬才知影伊是攏咧煩惱彼隻牛無人顧。
後生知影老爸無別項掛慮，干焦數(siàu)念彼隻水牛，只好順從，馬上款款--咧就載兩个老--的轉去草地。
水源--仔轉來到厝，第一項代誌果然就是去厝後的牛牢看牛。草猶閣足濟，水嘛猶賰半桶較加，根本就無啥物問題；但是，無看--著總--是袂放心。
雖然水田已經休耕、放咧拋荒[(pha-hng)]，水源--仔照常逐日攏會牽牛去巡田園；早暗兩擺，像以前作大穡的時陣仝款。其實，伊這馬會當做的工課干焦賰三不五時共田--裡的雜草[(tsa̍p-tsháu)]除除刜(phut)刜--咧爾爾，若無恐驚會覕鳥鼠。有時伊會加減種一寡番麥抑是高粱(kau-liâng)，彼攏足輕鬆。其實這馬農村早就已經全面機器化--矣--啦，加上真濟工課攏有專門的人貿(bāu)咧做，根本都攏無需要牛--矣。
這幾年，庄頭庄尾已經揣無人咧飼牛，干焦水源--仔一直猶閣共牛留--咧。人若看著伊共牛牽咧四界賴賴趖(sô)，攏會勸伊緊共牛賣賣--咧，毋通繼續做牛奴才。伊攏笑--咧笑--咧，照常逐日牽牛巡田，毋管田園已經拋荒偌久。
有一个親情(tsiânn)欲佇基隆辦喜事，親身送喜帖來予水源--仔。聽著伊為著彼隻水牛無人顧，毋敢出門，這个親情真袂諒解，強強欲變面。講到尾--仔無法度，這个親情想著一个辦法......
「無，按呢--啦......我倩一台『thoo-lah-khuh』，予你彼隻寶貝水牛坐，逐家做伙來去予我請，按呢你毋就安心--矣？」
眾人笑甲強欲跋跋--倒，水源--仔嘛綴人一直硞(kho̍k)硞笑。
水源--仔笑笑--咧，雄雄想著一个問題：「是講......恁基隆附近，敢有草通割？」伊足正經咧問。
逐家攏笑甲流目屎，干焦這个親情已經笑袂出--來。
到喜事彼日，果然是𪜶某代表去基隆，水源--仔本人並無出席。
這款得失--人的代誌，已經發生不只一擺。後生、查某囝看老爸一世人辛苦作穡，到這馬七十外歲--矣，猶閣予彼隻牛縛牢--咧，袂輸咧做牛的奴才，感覺足毋值[(ta̍t)]。逐家經過參詳，決定欲苦勸老爸共牛賣掉，按呢伊才會當真正清心過日子。(欣賞規篇作品)
十五冬…認真佮伊想起來
佮我仝款
我嘛足足十五冬無聽歌囉
所以我熟悉e