2010
06241420中華民國99年全國語文競賽-﹝臺灣閩南語朗讀﹞文章57篇(2)
14 行出紗窗的少年烏貓兄 王薈雯[(Ông Huē-bûn )]
十八歲的熱天，我轉去彼个有柚仔芳的所在，透天厝稅佇柴仔店彼條巷仔內，講袂輾轉的柚仔話。我裂(liah)破番仔契，過我的都市庄跤生活。
一个人嫌傷大的透天，我倒佇客廳的『thài-luh』頂面；冰冰的半暝，想起細漢的柚仔城，已經十年無閣轉--來，都市人的腹肚敢會堪得枵甲天光？我穿高雄來的淺拖，順柴仔店口的巷仔一直行，才看著細漢熟似的街仔。街仔頂青青紅紅的『看板(kha̋ng-páng)』，才發現鬧熱的街仔，毋是九點就暗；都市的生活，佇我猶未發現的時陣，先搬入柚城。
小咪(Siáu-mî)佇我目睭金進前，就坐佇二樓窗仔口，看阮門口前遐的阿婆講話開講。毋是小咪耳仔好、嘛毋是目睭金，是柴仔巷內貓仔味傷重，予這隻烏貓佇入柴仔巷就數(siàu)想欲出去熟似新的貓仔伴。
中秋彼工，我一个人佇門口埕烘(hang)肉，出出入入的紗窗，予小咪勇敢起行；睏袂去的暗瞑，看小咪佇鐵筒(tâng)頂來來去去，按怎叫就袂轉--來；轉來柚仔城的孤單閣加一項予貓仔放捒。我坐佇窗仔口，驚小咪會枵--死，驚伊會予炮仔燒--著，驚東驚西，就是叫袂轉--來。我佇『thài-luh』頂睏--去，隔轉工聽著小咪咧叫的聲：「Inn-inn-ann-ann」我傱(tsông)對二樓，拍開西向的鋁窗，小咪是𨑨迌了忝(thiám)，轉來咧討食。
「走！走！走！」我傱過對面紅色鐵門的厝，大聲趕遐的貓仔走；小咪予𪜶箍(khoo)佇中央，勇--仔佇邊--仔講下(kē)下的貓話，差不多七、八隻細漢的𨑨迌仔替勇--仔箍小咪。我趕緊走過替小咪解圍，驚伊予這个貓仔鱸鰻欺負。勇--仔是柴店巷的貓仔王，算是上大尾的鱸鰻，莫講貓仔驚--伊，連『oo-tóo-bái』攏愛閃--伊。勇--仔嘛毋是啥物緣投少年兄，年歲可能嘛有五、六十；但是漢草真勇，色水大範，佮虎仝款的色水，邊--仔總--是綴五、六隻細漢鱸鰻貓公，做伙佇柴仔巷咧欺負別人。小咪嘛毋是簡單的人物，莫講烏貓範勢(pān-sè)先贏別人，翹上天的烏尾，瘦瘦的體格，鳥仔看--著嘛挵著電火柱。而且小咪是二十出頭的少年兄，跤手真猛(mé)，會當算是臺灣上蓋勇敢的烏貓兄，都市來的貓仔，彼支翹懸懸的烏尾，開始佇柴仔店巷咧相爭地盤。
小咪已經佇我的紗窗挖一空，逐工自由出入二樓的窗仔，干焦腹肚枵才會記得轉來食暗；透早出--去，到半暝才會轉--來，真辛苦佇柚城的柴仔巷咧拚事業。(欣賞規篇作品)
15 我每冬期待的一張卡片 林榮淑[(Lîm Îng-siok )]
時間的跤步行入十二月天，又閣是年尾賀(hō)年卡片[(hō-nî-phìnn)]亂亂飛的時陣。
五花彩十色的賀年卡片牽著我的心緒[(sū)]，不知不覺使予我跋落去一種關懷的等待。啊！今年送批的使者是毋是閣會送來彼个老人的賀年卡片？我是毋是會當閣再分享一个老人頭尾有氣魄、無膽[(tám)]無寒[(hân)]佮癌細胞相拍相戰三百六十五工了後，佳哉活--落來的歡喜？
時間倒轉去一、二十年前的熱天。
彼一工，中晝頓已經攢(tshuân)好誠久，老翁(ang)面色有淡薄歹看轉--來，做人的某囝輕聲細說問起。老翁順喙應--兩三聲，講啥物歹空患者齊齊出現......忽然間想起一項代誌，話尾一轉講：「啊！我煞予袂記--得，袂記得共你講。幾工前，有一位名叫某乜人(bóo-mí-lâng)的老阿伯來看病，自我介紹是你以前的同事，敢真正有這个人？」
出嫁做人的新婦，嫁雞綴雞飛，嫁狗綴狗走，嫁乞食就揹加薦斗(ka-tsì-táu)，我對臺灣尾――屏東小所在，搬厝到臺灣頭――臺北城，親像「小鬼毋捌看著大豬頭」，每工無閒tshih-tshih。故鄉的老朋友、同事毋但疏遠，誠濟年已經攏無聯絡。他鄉外地遇[(gū)]著熟似--的，雖然毋是真熟的人，嘛仝款使予我歡喜佇肚心內。
「伊是按怎？」我淡薄仔關心、淡薄仔掛慮。
「病情恐驚無簡單，以經驗來看，我懷疑是歹物(mi̍h)，惡性瘤――癌，即時開轉診蹛院單，做詳細檢查。」老翁平常聲調。
揣著病房的時，看著一頭風霜，滿面白死殺、皺[(jiâu)]襞(phé)襞的面。
「潘老師，我來看--你。」
老人蹛窗仔門外的眼神慢慢回收倒轉--來，閃閃爍爍的尪仔仁踮我的面前踅來踅去......
「啊！是林老師，真多謝恁翁的相助。我的病情無啥物耽誤--著，連鞭檢查--出來，確定是『大腸癌』，開刀嘛誠順序。主治醫師拄才來巡房，伊對共我講，幾工後我就會當出院--囉(looh)。麻煩你代替我共恁翁的幫贊[(tsān)]，重重好禮仔說一聲多謝。」
「癌症」兩字，好親像霆雷公拍摃著頭殼，目睭前是「滿天全金條，欲捎無半條」。「其實，我嘛閣誠樂暢，一定會遵照醫師的處方(tshú-hng)，照起工倒轉來追究病院檢查。」堅定的眼神，樂暢的氣口，像一葩燈火點佇陰暗暗的病房。
蹛佇醫學中心工寮十數年，艱苦病疼、生生死死，看誠濟。患者蹛院出院親像啉茶食喙焦，嘛親像行灶跤，無啥物奇巧。(欣賞規篇作品)
16 我佮阮阿爸 蔡幸紋[(Tshuà Hīng-bûn )]
自從看著杜正勝先生彼篇〈佮阿爸講上久的一遍話〉，心肝內一直滾絞，深深受著感動。𪜶阿爸實在真濟所在佮阮阿爸攏真相(siāng/siâng)，毋知是毋是全世界的阿爸攏生做這款。所以我想講是毋是嘛愛為家己的阿爸來寫一篇文章，我並無想欲佮杜部長仝款，佇「彼種場合」佮阿爸講話，就算偌感心的話伊嘛聽袂著--矣！
阮阿爸，屏東東港人。細漢袂愛讀冊，來高雄綴人學師仔。出師了後就佮內底的會計[(kuè-kè)]小姐――就是阮媽媽結婚，家己出來開公司拚事業，所以自我細漢就看阿爸佇外口走傱(tsông)，佮人客盤撋(nuá)。因為阿爸是生理人，閣因為伊樂暢的個性，所以阿爸的朋友迵(thàng)四海[(sù-hái)]。
講著阿爸的個性，伊是一个人人呵咾的人，朋友有困難就算無開喙，伊能力有夠絕對會鬥相共。阿母定定講伊家婆性，明明佮伊無底(tī)代，伊就是會自動倚[(uá)]--去；所以只要任何人有需要幫忙的時陣，頭一个想--著--的，絕對是阮阿爸。阮兜頭前是一个小公園，厝邊頭尾逐家感情攏真好，公園是逐家歇睏開講的所在，逐家有啥代誌一定有阮阿爸的份，像有人兜著賊偷，逐家攏徛佇外口毋敢入--去，干焦阮阿爸頭一个手提『bat-tah』衝--入去。有人兜火燒厝，伊是比消防隊挵閣較頭前去牽水管的人。公園若有老人無拄好咧冤家，伊嘛一定會做公親。阿爸就是遮爾古錐閣家婆的人，別人的代誌定定比伊家己的代誌閣較重要。嘛因為按呢，予阮遮的做伊查某囝--的真煩惱，驚伊干焦顧別人，煞袂記得顧家己的安全。
人攏講我佮阮阿爸生做真相仝，其實我無啥願意。我若是種(tsíng)著阮阿母，無的確我會加較媠。毋但面模仔種著阮阿爸，我的個性嘛遺傳[(uî-thuân)]著--伊。阮攏是個性樂暢無心機的人，阮阿爸真愛練痟話，我講話會遮爾趣味，嘛有一半是對阿爸遐學--來--的。我嘛是一个真家婆的人，代誌無共人鬥做，心肝就會礙虐(gāi-gio̍h)礙虐。無法度！我想一定是受著阿爸的影響。有一遍，佮阿爸咧開講，才發現阮對待朋友的態度真相仝：只要是阮的朋友，阮攏會破心肝對待--人；若是人對阮三分好，阮絕對會還人十分；欠--人的物件會趕緊還--人，顛倒別人欠--阮--的，阮家己會歹勢共人討。我是一个袂曉用頭殼佮人鬥陣的人，感覺佮人鬥陣就是愛用心肝，若是閣愛用頭殼來互相計較，實在是傷忝(thiám)--矣！所以有啥物話就講啥物，朋友之間，會合就鬥陣，袂合就煞煞--去，我相信阮阿爸嘛是佮我仝款。(欣賞規篇作品)
17 我佮羅馬字相拄 林瓊琳[(Lîm Khîng-lîm )]
人一生的機緣實在是足奇妙--的。佇三年前，我猶是一个為著考試無閒甲烏暗眩(hîn)的高中生，逐工毋是英文、國文就是數學。彼个時陣總--是會想講未來的大學生活會按怎過？讀--的是啥物款的科系？彼當陣我的國文袂䆀，閣做三冬的「國文助教」，老師推薦[(tsiàn)]我去考中國文學系。我心內想講，既然老師都按呢共我呵咾--矣，我的實力應該是袂䆀才著，自按呢我就專心準備欲來去考中文系。
結局是我無考著中文系，煞去考著臺灣語文學系。頭起先，我是想講這个系應該是佮中文系差不多才著，應該嘛是讀佮國文課本內面的內容仝款的物件，所以我就決定欲去讀臺文系。
佇欲讀大學的彼个歇熱，我揣著我的頭一份工課，是去『超市』內面做補貨、佇櫃台[(kuī-tâi)]算錢的工作人員。一開始佇遐食頭路，我感覺足袂慣勢；毋過經過一段日子，我嘛適應甲愈來愈好--矣。這馬想--起來，彼个時陣真正是發生真濟趣味閣值得[(ta̍t-tit)]回憶的代誌！
佇遐食頭路嘛予我體會著咱的臺語實在是真重要，因為有真濟阿桑、媽媽佇咧出出入入，講--的大部分是臺語，你若是袂曉講臺語是真歹佮人溝通。我會記得有一擺，有一个老阿伯佇咧揣雪文(sap-bûn)，毋過攏揣無，伊就來問--阮。毋過阮攏聽無啥物「雪文」，到尾--仔阮才發現「雪文」就是茶箍，實在是真見笑。
佇咧無閒的時陣，時間咧過是真緊--的。我欲入大學的日子嘛接近--矣，我真期待我的大學生活，毋過嘛真煩惱同學敢是好鬥陣？離開的時陣就欲到--矣，佇這段時間我真正學著真濟物件佮經驗，這馬欲離開，心內嘛是淡薄仔毋甘。
入來到臺文系的第一件代誌就是學「羅馬字」，這種文字我閣是第一擺看--著--的--呢！講伊是英文嘛毋是英文，總講--一句就是伊有伊一套規則，看--起來是真奇怪，毋過煞會當共臺語完全表達--出來。佇過去的十幾冬內面，我對臺語的印象就是佮厝--裡的人講的話，若是佇學校就是講華語，我所唸--的、所讀--的嘛攏是華語，臺語干焦是一種無文字的語言爾爾，想袂到佇大學內底煞來學著遮爾特別的文字。(欣賞規篇作品)
下班轉--來，拄欲入門，看著門頂的「信箱」櫼(tsinn)甲滇(tīnn)滇，伸手提--出來。開門了後，巡看這堆是啥物？有水、電錢的收據、兩間大賣場的廣告單、百貨公司週年慶[(tsiu-nî-khìng)]限時大拍賣、新開幕的自助餐大優待宣傳單......揣無一張是應該囥佇「信箱」的批。共這堆五花十色的紙，先擲桌頂，暗時食魚仔吮(tshńg)魚刺通用。若無，食西瓜呸[(phuì)]子嘛好。
「信箱」內底無半張批，這个情形，毋知經過幾冬--囉(looh)！
你有偌久毋捌攑筆寫批--矣？寫予你思思念念的伊、寄予你遠遠的親情(tsiânn)朋友。我若是共身軀邊的人問這个問題，總--是予人(hōo lâng/hông)笑講：你是食飽傷閒咧換枵--喔(ooh)！這馬啥物時代--矣，若有代誌，電話、手機仔一敲(khà)，隨就撨(tshiâu)好勢；較重要的文件、資料抑是相片，電腦一開，「電子信箱」傳--過去，一指(tsáinn)手指[(tsíng)]頭仔就四序；想欲聽著聲閣看著人，「即時通」馬上應付--你，寫批欲哪會赴市--咧！
毋知佮我仝款捌靠寫批解鄉愁、寄相思的你，彼當時敢想會著有一工，寄批毋免用批囊(lông)、貼郵票？如今，資訊[(tsu-sìn)]發達的Ｅ世代，彼當時(hit-tang-sî/hiáng-sî)的「筆友」早就無時行，這當時(tsit-tang-sî/tsiáng-sî)流行的是「網[(bāng)]友」。攑筆寫批對現代人來講，敢毋是閒甲掠蝨母相咬的人，才會做的戇代誌--咧？
想著我頭一擺寫批，是替阿母寫予外媽。彼陣，我才欲讀小學二年，字捌無幾个，有--的用注音寫，有--的阿母教。阮阿母冊讀無濟，毋過字寫誠媠，伊欲共外媽講--的心內話，一句一句唸予我聽，我一字一字勻勻仔寫。寫規半晡，一張批總算寫好勢，對臺東深山林內寄到嘉義的山頂尾溜，一來一去愛成[(tsiânn)]個月，是真正常的代誌。阮的批雖罔有貼郵票、寫住址，毋過，送批--的會共仝庄頭的批，做伙囥佇街仔口𥴊(kám)仔店的「大信箱」，家己愛出去巡，共批提--轉來，定定收著批，好歹代誌早就過去了(liáu)-- 矣！ 知影嘛無較縒(tsua̍h)。所以，真要緊的代誌就愛拍電報，往往聽--著--的，攏是親人過身的歹消息。
拄開始學寫批，也捌共寄批佮收批的住址寫倒反(píng)。過幾日仔，閣收著家己寫欲寄予外媽的批，批囊頂予人頓(tǹg)「退回」，毋但了兩箍的郵票錢，閣險予阿母罵--死。(欣賞規篇作品)
19 阮兜這隻可愛的戇狗 黃惠玉[(N̂g Huī-gio̍k )]
人講「貓來富[(pù)]，狗來起大厝」，但是阮毋捌想過欲飼狗、飼貓，飼這隻狗是機緣。彼時陣弟弟予一个查某囡仔因為開車傷緊，去挵--著，需要蹛院開刀。本來有倩看護[(khàn-hōo)]共伊顧，阮家己家婆想講：隔轉工是拜六佮禮拜有歇睏，就共看護講彼兩瞑阮來顧。真拄好，可能賊仔早就咧觀察阮兜--矣！
所以彼一暝阮厝就予賊仔篦(pìn)--去--囉(looh)。拜五暝轉去阿媽兜蹛的後生，透早轉--來看著厝挐氅氅，驚一趒(tiô)，較緊敲(khà)電話予--阮。就按呢，舞規半工，才處理好。包括報警、做筆錄、算損失、整理挐氅氅的內面。
就佇賊仔走入來厝的代誌發生了無偌久，阮翁電廠的同事講欲送伊一隻『哈士奇』的狗。若佇較早，阮是絕對反對飼狗--的，這隻狗好親像來了真著時陣，厝--裡的人攏想講：飼狗防賊仔。所以就共伊答應--矣！
人是真奇怪的動物，佇阮細漢的時，阮嘛會記得講真愛飼狗，不時就要求阿母予阮飼，毋過阿母攏毋答應，吵幾擺了後，阮只好死心。當阮做人的阿母，阮囝也捌共阮吵講欲飼狗，毋過想著伊較早做的工課定定著愛阮替伊拭尻川，佮飼狗的麻煩，阮就毋敢答應。所以阮囝嘛死心--矣！若毋是這擺的賊仔，阮兜是無可能會飼狗--的。
第一擺看著這隻狗，阮是真佮意，因為伊實在有夠媠；毛――膨膨膨，身軀――圓圓圓，大部分毛跤是白色的，毛尾仔有插(tshap)烏色，尻脊骿的毛烏殕(phú)金烏殕金，除了有一條烏殕色的線框[(khing)]--過以外，腹肚是全殕白--的，膨獅獅的尾溜真大葩(pha)，伊不時共尾溜翹懸懸，有一種高貴大方的範勢(pān-sè)。四肢跤若大柱，講著伊的面，喙䫌 (phué)是白色--的，對目睭跤周圍以上攏是殕烏色殕烏色的框，看--起來親像掛目鏡，真有智慧的款。目睭面頂有一个白點，看起來真歹。伊佮本土狗上無仝款的所在是：伊的目睭仁是淺藍色--的，真罕見！阮一入門，伊就(peh)起來阮身軀佮阮司奶(sai-nai)，看著伊彼種無辜閣媠的面，阮就想欲共好好仔惜惜咧！
因為看伊生做遮媠，阮就用英語belle 美女的意思，共號名，叫伊『bé-lih』。(欣賞規篇作品)
20 命運敢是天注註定 黃文達[(N̂g Bûn-ta̍t )]
是死是活都也知--矣，目屎嘛早就流焦，阿滿--仔刺(tshiah)罔刺，毋過真捌事理，膨肚--的留--落來的債務伊決定擔-- 起來。翁咧失德了然， 做某-- 的毋願失氣落臉(lak-lián)。「阿明--仔，膨肚--的共你借--的二十萬，我會沓沓仔還--你，歹勢--呢(neh)！」阿滿--仔電話櫓(lóo)袂煞：「阿俊--仔......是--啦，多謝你遮諒情，我後半世人做牛做馬嘛甘願。」一通敲(khà)過一通，阿滿--仔的誠意予逐家真感心，毋但無半个人講著討數(siàu)的歹聽話，顛倒煞攏咧共阿滿--仔安慰：「都攏膨肚猴--的惹--出來--的，翁仔某相欠債，姑不而將才著共你討這條數，阿滿--仔你寬寬仔是[(khuann-khuann-á-sī)]，免急欲還--啦！阮猶轉踅會過，若有啥物愛鬥相共--的，免細膩hânn......」
「做著歹田望後冬，娶著歹某一世人；嫁毋著翁，嘛攏相仝--啦！」阿滿--仔真毋願，才咧講：「彼陣都毋知哪會遮眵目(tshuh-ba̍k)，膨肚--的明明生做是三分無成人，七分無成鬼，予阮阿母嫌甲無一塊著(tio̍h)，攏怪我彼陣傷過單純，才會嫁予這个死路旁--的，跋落人生的烏暗空。」
阿滿--仔佇別人面頭前罵罔罵，嫌罔嫌，心肝內其實誠毋甘𪜶翁早死。想著翁仔某對破草厝仔，拚甲這馬總算有樓仔厝通蹛，烏陰天毋免閣煩惱雨水空襲[(khong-si̍p)]，飛蟲走蛇蟲豸(thâng-thuā)嘛袂閣佇厝內底耀武揚威，趖(sô)來趖去，才咧欲甘蔗倒頭甜爾[(niâ)]，啥人知影煞來半路折(tsi̍h)扁擔。逐工日頭若落山，伊一个人孤單守空房，定定棉被掩(om/am)--咧，哭甲毋知煞，那哭那想起膨肚--的講伊囡仔時代的代誌。
膨肚--的出世佇番仔溝邊的庄頭，老爸Khok--的的人佇庄內是鹹澀甲真出名，一仙(sián)五厘(lî)銀都算甲到到，人攏講：「彼烏店的頭家Khok--的，真正是kho̍k 仔鉎，kho̍k仔屎，一个錢銅仔拍二十四个結，算盤真𠢕擉(tia̍k)！」Khok--的毋但對別人按呢，對某囝嘛仝款。尤其膨肚--的自出世就無媠，像『la-jí-ooh』頂懸放送--的：「猴頭鳥鼠耳，鼻仔翹上天，胸坎若樓梯，腹肚若水櫃，雙手若摃槌......」真無老爸的緣， 烏焦瘦， 規面油肭肭(leh)燙燙， 身軀黏黐黐(liâm-thi-thi)，不時掛兩條黃錦錦(n̂g-gìm-gìm)的鼻屎膏，身軀身較長過彼雙跤，兩丸跤肚仁肉肉肉，一看就是作穡人的歹命種。算命--的諞仙仔(pián-sian-á)共Khok--的講：「你這个大漢後生是地府拂(hut)毋著--去，才會予伊走來人間，命底帶衰，啥人做𪜶老爸，這世人都免想欲翻身。」毋才Khok--的不准膨肚--的叫伊阿爸，改叫「阿叔」。(欣賞規篇作品)
三--月的海風，猶閣淡薄仔涼涼，吹著予人感覺特別爽快。我坐佇駁岸(poh-huānn)邊，看著海湧共沙埔拍甲誠齊勻[(tsiâu-ûn)]，大概佇五百公尺遠的所在，我看著阿媽的形影。自從阿公往生了後，我總--是感覺阿媽的形影加一分孤單佮寂寞[(tsi̍k-bo̍k)]。雖然伊的目睭看--起來猶閣媠媠，但是眼神已經無較早的熱情，目睭親像是一口焦涸(khok)涸的古井，對井口看--落去，深甲予人看袂著底，無法度估計伊的深度。我干焦知影，佇上深的所在有伊佮阿公的過去。
阿媽行到我身軀邊順勢坐--落來，我趕緊去共伊扶。
阿媽提著伊拄才煮好囥入去盒仔內的飯菜予--我，我看著佇海坪(phiânn)頂𨑨迌的囡仔，感覺家己嘛轉來到囡仔時代彼種無煩無惱的生活。
「較早你上佮意叫阿公𤆬(tshuā)你去海邊仔𨑨迌，我會記得你上佮意共塗挲捏(lia̍p)做細粒圓仔，閣吵阿公愛紮轉來煮，逐擺攏是我去叫恁轉來食飯。這馬你大漢--矣，嘛較會曉想，無親像細漢時陣遐爾𠢕使性地。」阿媽吐一口氣，紲--落來講：「時間過了真緊，逐家攏已經佮以早無仝款--矣。」
阿媽伊無讀過啥物冊，所以嘛袂曉用「人事已非[(jîn-sū-í-hui)]」來形容，但是這是阿媽想阿公的方式，伊總--是輕輕仔講起以早發生的代誌，敢若是別人佇咧講故事仝款。雖然伊目睭瞌瞌，但是我猶原看會著悲傷，感覺著孤單。我定定咧想，阿媽是毋是無想欲流目屎，所以伊選擇共目睭瞌--起來，共目屎關佇彼口看袂著底的古井內。有幾若擺我艱苦甲一句話都講袂出喙，我干焦恬恬仔聽阿媽講伊佮阿公的故事。
海湧猶原共沙埔拍甲真齊勻，敢若有真濟話想欲佮海坪[(phiânn)]講，所以一直發出「啪(phah)啪」的聲音，親像阿媽有真濟對阿公的思念仝款，嘛可能是因為今仔日是阿公的忌[(kī/khī)]日的關係！
「你猶會記得阿公送予--你的彼條袚鍊--無？」
「會記得啊！」我刁工講甲真輕鬆。
「恁阿公定定咧講，所有的孫仔攏無，毋過因為伊上疼--你，所以就偷偷仔買一條送--你。」
我摸著袚鍊，阿媽繼續講：「我佮恁阿公去金仔店的時陣，一看著彼條袚鍊，阮就知影你會佮意。拄拄仔好你相(siùnn)兔，所以就買落來送予你做生日禮物。我猶會記得你看著彼條袚鍊那跳那叫的模樣，想袂到落尾你煞歡喜甲哭--出來。」(欣賞規篇作品)
我知影阿媽猶是毋甘離開遮，佇這个所在，有傷濟伊佮阿公的過去。我嘛知影，我佇臺南定定想起阿媽，嘛定定煩惱--伊，但是煞干焦會當佇半暝，偷偷仔覕佇棉襀(tsioh)被內底哭。
今仔日的海水是深藍色的，海湧嘛比平常時閣較大。我坐佇駁岸(poh-huānn)頂感覺著規个人敢若綴海湧咧浮沉，若親像阿媽佇我心海內底浮沉仝款。
我每禮拜攏會轉去高雄看阿媽，因為我想欲加陪--伊，加佮伊做伴。我毋知影未來的日子猶有偌濟時間會當陪佇伊的身軀邊，我只是想欲盡我所有的能力陪伴--伊。毋過，我知影阿媽伊猶是寂寞[(tsi̍k-bo̍k)]、伊猶是孤單，因為阿公的位置是無人會當代替--的。
猶會記得有一擺，當我轉來到庄跤，一踏入門，就看見阿媽坐佇搖椅頂面，手--裡提著阿公的相片，恬恬仔流目屎。我徛佇遐無法度振[(tín)]動，鼻仔一直酸--起來，一直無法度講出話。黃黃的電火光線有淡薄仔鑿目，照佇阿媽的身軀頂，照佇塗跤頂的影像有淡薄仔無清楚。音樂對一台舊的收音機傳--出來，聲音雖然真大聲，但是袂鑿耳；旋律[(suân-lu̍t)]毋是你愛--我我愛--你的彼種流行歌，嘛毋是古典音樂，嘛無親像是民謠，是伊佮阿公彼首訂情歌――櫻吹雪。曲調非常的優美，聽--起來有一種年久月深的感覺，這个時陣我才發現，這个聲音真熟似，這敢若是......
「阿媽！這是......阿公的聲音？」
「伊伶！你轉--來--矣！」阿媽越頭對我講。「這是恁阿公唱--的，我用錄音機共伊錄--起來--的。」
我猶原踮佇遐，真久無講話。我看著阿媽的一舉一動，雄雄感覺目睭前這个人敢若親像毋是我的阿媽，伊變甲真消瘦落肉，面頂加真濟的皺痕[(jiâu-hûn)]，連行路嘛袂在，這時陣我才發覺，我腦海中有關伊的檔案，竟然有幾若年毋捌改變。我的目箍紅，胸坎仔誠疼，我的目屎淹目空，若親像透早天罩雺[(tà-bông)]仝款，予我看袂著面頭前的物件。我拚命欲共目屎吞腹內，毋過猶原是失敗。我趕緊共目屎拭[(tshit)]予焦，去扶阿媽。原來天公伯--仔遐爾殘忍，毋但搶走阮鬥陣的時間，嘛奪走阿媽會當陪我成長的機會。
「天烏--矣！」
「阿媽你趕緊轉--去！海風搧傷久，對身體無好。」
「我閣陪你坐--一下，等--一下就轉--去。」
阿媽摸我的手，無閣加講啥物。我感受著伊的溫暖，嘛感受著伊對我的愛佮關心。(欣賞規篇作品)
23 彼......油桐花，開矣未 陳文和[(Tân Bûn-hô )]
一蕊桐[(tâng)]花親像咧創治仝款飄--落，先是摸著伊的肩胛頭，閣來做孽[(gia̍t)]仔落(lak)[(la̍k)]--落(lo̍h)來，拄拄好落佇伊對褲袋仔撏(jîm)出來準備欲接聽的手機盒仔蓋頂面。嘛毋知是因為手機的振動，抑是民興掀蓋的動作，雪白--的、正豔的桐花，就按呢落--落來，滑--落、落--落，輕輕仔隨淡淡的微微仔風，好親像跳完最後一條首的輓(buán)歌[(buán-kua)]仝款，倒轉去原本就是屬於伊的大地眠床。
看--來，油桐嘛知，這毋是五--月山林的婚禮，卻是𪜶最後--的嘛是上媠的告別式葬禮，親像無外偌久進前才落土的阿爸，親像咧哀悼[(tō)]阿爸佮阿爸的年代......
阿母一直倚佇伊的身軀邊，無聲無說，戇神戇神，恬恬仔綴民興仔行。
手機仔接--起來，民興親像行轉去「『時光隧[(suī)]道』」，伊萬萬仙想就想袂到敲(khà)--來的人竟然是二十幾年無聯絡的尤老師，伊那驚惶那歡喜......
「彼......油桐花，開--矣--未？」
阿爸的後事[(hiō-sū)]無閒煞了後，民興定定一个人坐佇山坡頂，一坐就是規下晡；目睭內干焦有滿山的油桐，頭殼內是一片的空白，心肝頭就算講有千頭萬緒[(tshian-thiô-bān-sū)]的煩惱，總--是按怎都捎無總(tsáng)整理袂出一个頭緒[(thâu-sū)]來。
阿母知影伊心煩，就無去攪吵--伊，嘛一个人坐佇伊尻川後的大埕邊，一欉大樟[(tsiunn)]仔樹跤，遠遠共伊看。
一對母仔囝就按呢犀[(sai)]牛望月，相(sio)對相(siòng)，煞恬恬無講話。
有時陣，民興的牽手昭枝會出來招呼--一下，捀(phâng)一杯茶予𪜶啉，𪜶兩个才(peh)起來行行--咧，看--一下，互相笑--一下，問幾句仔聲閒仔話，閣再坐倒轉--去。
毋過，嘛是著面對現實，該來--的總--是閃袂開，問題毋是放--咧就會自動消失。就佇民興準備欲轉去臺北上班的下晡，阿母上煞尾猶是先開喙--矣。
「阿興，你放心轉去上班，厝--裡的代誌你免操煩。」
阿母雖然共話講甲足輕鬆，毋過民興按怎會當無管，按怎會當放心，總--是伊喙內的「厝」，對阿爸走了後，就賰伊孤孤單單一个人爾爾。
民興越頭走揣阿母的聲，干焦看著伊規个頭毛攏白蒼蒼--矣，親像油桐花，又閣全無彼款青春模樣。手底咧弄[(lāng)]著一粒油桐果，焦焦扁扁，親像阿母的面，規个勼(kiu)做一丸，直--的、橫的條紋，是歲月雕刻--出來的皺痕[(jiâu-hûn)]。條紋愈深，風霜愈厚；條紋愈濟，滄桑愈濟。(欣賞規篇作品)
24 彼年的熱天 蔡幸紋[(Tshuà Hīng-bûn )]
暗時食飯，靜文的細粒子阿母攢(tshuân)甲一桌的菜腥臊甲，有炕肉滷豆干、芹菜炒鯊魚皮、破布子炊南洋鮘仔[(tai-á)]、糋(tsìnn)花枝丸、煎牛肉，閣有一大𥐵(phiat)煠(sa̍h)甲紅絳(kòng)絳的蝦仔，摻一大碗公筍仔魚丸湯。
「喔！攢甲遮豐沛，今仔日是有人客欲來咱兜--諾(hioh)？」靜文用手拈(ni)一塊花枝丸塞對喙空。
「緊共菜捀(phâng)落去樓跤，叫恁阿爸好入來食飯！」款甲規桌頂的菜，靜文阿母猶閣佇灶跤無閒。
靜文的阿爸上大的趣味就是屈(khut)佇公園，毋是佮人行棋就是佮人開講講政治，顧公園袂輸咧顧𪜶兜仝款，天暗--矣猶毋知欲入來食飯，逐遍攏愛靜文佇門跤口喝甲大細聲：「阿爸～食～飯～--矣～！」喝甲規公園的人攏知影靜文𪜶兜欲食飯。
靜文看著規桌頂滇(tīnn)滿滿攏是伊愛食的菜，予伊想起四年前，伊今仔(tann-á/tá́nn)欲讀大學，去臺北讀冊的前一暝，阿母嘛是煮規桌頂的菜，閣叫伊蝦仔佮魚仔愛加食--寡，驚伊後遍佇外口生活較無機會食著海產。時間過了真緊，四冬一目𥍉(nih)就按呢過--去--矣。
靜文是厝--裡的孤查某囝，所以自伊去臺北讀冊，𪜶阿爸阿母就加足孤單。靜文雖然放假會轉來高雄，毋過若是拄著學校代誌無閒，無拄好的時陣，成[(tsiânn)]個月嘛無通轉來一逝(tsuā)。𪜶阿母若等無伊轉--來，就會假無意敲(khà)電話予靜文，哩哩囉囉(li-li-lo-lo)講一寡有--的無--的，上尾--仔一定會問伊這禮拜敢會轉--來。
大學畢業搬轉來故鄉的頭一暝，靜文倒佇眠床頂反(píng)來反去，想起大學四年的生活已經結束，佇人生內底做欲二十冬的學生，佇遮先告一段落，煞--落來的人生靜文猶是感覺真茫霧。窗仔外開始落著霎(sap)霎仔雨，一片茫茫霧霧，毋過翕熱的燒氣已經變甲淡薄仔清涼。靜文那想後禮拜去國校報到的代誌，目睭開始沙微(sa-bui)......
「Eh！你猶閣咧睏--喔！你今仔日透早毋是愛去學校報到？你這个囡仔哪會按呢攏無要無緊，頭一遍去人遐毋就愛較謹慎[(kín-sīn)]，無較早起來準備，到時陣又閣趕袂赴，看是欲按怎。」靜文予 細粒子阿母喝一下趕緊看時鐘，六點，無錯！
是透早六點外。靜文欲去國校報到的時間是九點，對𪜶兜去到國校騎『oo-tóo-bái』只要兩分鐘，用行--的極加五分鐘，靜文共棉被掩(am)--咧繼續睏。(欣賞規篇作品)
可能真濟人攏捌跋落去水底，尤其是對我這種自細漢袂曉泅水的囡仔來講，每一擺落水就親像咧拚生死仝款。水面下跤是另外一个世界，是一个無重量、無空氣、無時間的空間，所有的聲音佇遐若親像攏無存在，毋過一點點仔振動(tín-tāng)的聲音煞顛倒予人感覺真實在。佇水底是一種真平靜的感覺，雖然我從來袂曉泅水，毋過我是真佮意耍水。每一年熱天，我攏會招朋友做伙到厝附近的公立游泳池去浸水，幻想家己是佇宇宙[(ú-tiū)]之間浮沉。一直到彼一年的熱天，因為一點仔小小的意外，予我對自然佮人生有無仝款的體驗，嘛真長一段時間毋捌閣泅水。
彼是二○○七的熱天，大概是八月底--啦！阮四个朋友相招去花蓮旅行，按算用五工的時間走遍花蓮、臺東。阮走的路線真長，佇花蓮市租車出發，第一工先經過光復鄉，暗時參加太巴塱(Tapalong)部落[(pōo-lo̍k)]的豐年祭；這是阿美族上大的一个部落，有真濟外地遊客來參加。當地的原住民太太非常熱心共阮介紹阿美族的舞蹈佮文化，原本掠準家己對臺灣佮原住民的文化已經有部分的了解，但是原來咱所知影--的，只不過是咱家己想--的爾爾。
紲--落來的路線是經過瑞穗、富里、池上、三仙台，閣走濱海公路轉去花蓮。頭前幾工攏過甲真平順嘛真歡喜，毋過代誌往往毋是照咱所計畫--的咧發展，恐怖的代誌就佇旅行的第四工發生--囉(looh)！
前一工阮蹛佇臺東三仙台邊--仔的民宿[(siok)]，這一工是計畫去秀姑巒溪『泛舟』。想著欲『泛舟』雖然內心是真歡喜，但是嘛淡薄仔驚驚；較早捌聽過真濟『泛舟』的代誌，有人講安全，嘛有人講危險，家己總--是有一種不安的感覺。毋過東部炎[(iām)]熱的天氣予人頭楞(gông)，阮已經予日頭曝三工--矣，會當落水當然嘛袂閣想傷濟。
秀姑巒溪的出海口是長虹[(khīng)]橋，離三仙台有兩點鐘機車的車程。阮欲佇透早七點半進前趕到長虹橋，會有專車佇遐接--阮。所以這一工透早天猶未光，差不多五點半的時陣，逐家綴慢慢仔升--起來的日頭出發。相信大部分的人攏看過日頭落山落佇海--裡的畫面，但是毋捌看過日頭對海面浮--起來。阮佇濱海公路那騎那看大海，日頭--出來的時陣海面會變成金色--的，毋但是海面，山、道路、路邊的花草攏總變做金色--的，慢慢仔行出來相借問，有的徛踮路邊向(ǹg)大海做運動。路--裡送瓦斯的車真大聲咧放原住民歌曲，毋知是咧歡喜啥，可能是欲叫部落的鄉親起床。駛車的人揤(tshi̍h/ji̍h)兩聲喇叭，佮阮遮的騎車--的相借問。若是欲問我上帝送予人類一塊純淨的土地佇佗位，我想就是這个所在--啦！(欣賞規篇作品)
26 放送頭 張翠苓[(Tiunn Tshuì-lîng )]
是按怎的因緣，會當佇歲月流轉三、四十年的時空，閣佇電台聽著放送頭周進升先生的聲音？
彼年，會記得是阮囡仔猶咧讀國校仔，我六點外起床，透早落來無人做伴的樓跤，拍開收音機陪伴我攢(tshuân)早頓。七點外送囡仔去學校，收音機內容放送啥無咧注意，總--是有聲就有伴。
有一工，咧等欲載囡仔出門的時，順手捘(tsūn)音響彼粒選台鈕[(liú)]仔，捘著一个電台，輕輕仔放送出來一首日本演歌「相逢有樂町[(Iú-lo̍k-ting)]」的音樂。這首輕柔的音樂，有我細漢時溫暖的記持。音樂放送無偌久，聽著主持人的聲音，我人煞愣[(gāng)]佇遐。開始彼首熟似的音樂，予我聽甲已經茫--去--矣，閣聽著主持人的聲，我足毋敢相信，敢是咧眠夢？敢是我聽毋著？敢是我家己咧幻想[(huàn-sióng)]？伊的聲，明明是三、四十外年前，佇庄跤的囡仔時聽--著--的。仝款的片頭音樂「相逢有樂町」、仝款的主持人，三、四十外年時空的流轉停止佇這个時陣，好親像踅轉去原位無變，這是啥款的因緣！因為驚喜、因為感動、因為毋敢相信，規身軀毛管[(mn̂g-kńg)]空攏徛--起來，咧向這个佮舊時空奇妙的相逢行禮。
我綴阮阿爸聽『la-jí-ooh』的年歲，是佇猶未讀冊的囡仔時。阿爸佮阿母對田--裡作穡轉--來，阿母入去灶跤款中晝頓，阿爸準時十二點捘開『la-jí-ooh』。雖然經過幾若十年，我猶原會記--得，對『la-jí-ooh』放送--出來的片頭音樂是日本演歌「相逢有樂町」。好聽的旋律[(suân-lu̍t)]，主持人下(kē)下迷人的聲音響起，陪伴阿爸過一个輕鬆的中晝時，阮嘛綴咧聽彼若捌若毋捌的廣播內容。想袂到彼个聲、彼个景，佇三、四十年後的這時陣，又閣浮佇面頭前、又閣響佇我的耳空邊！
細漢的時，阮兜彼台『la-ji-ooh』是真空管[(tsin-khong-kuán)]--的，關--掉的時，真空管的燈火真久才會化(hua)--去。因為彼台『la-jí-ooh』捌歹--去，表兄提去修理了後，腹內佮喇叭箱仔煞鬥袂好勢，只好分開囥，嘛才予我看會著內面慢慢仔化--去的燈管。『La-jí-ooh』的外表無媠，伊的聲音卻是豐富我真媠的囡仔時。會記得彼時節目的尾站，主持人總--是用慢慢、下下真有磁[(tsû)]性的聲音講：「歡迎下一次暗時收聽！」怪奇--咧，當頭白日的中晝時，是按怎伊逐擺攏叫人「暗時收聽」？逐擺閣攏佇中晝時就放送？彼時的我，戇戇毋知通問，想講的確是主持人覕佇『la-jí-ooh』內底，暗眠摸無看著外口光焱(iānn)焱的日頭，掠準日--時是暗時。這是我家己予家己的答案；感覺這款的答案真合理。(欣賞規篇作品)
阿義初中出業，去花蓮讀五專，頭年就捌著𪜶牽--的；毋過，跳年六--月欲升二年的歇熱，就𤆬(tshuā)轉來厝--裡，共老爸講伊無愛去讀--矣。到底是啥緣故，嘛無人知。自按呢辦退學，踮厝綴老爸做生理。都無半冬，聽講是有身，兩个才著結婚。連紲生兩个囡仔，阿義才去做兵。彼陣，阿文讀大學二年。
阿義十七歲就踮厝--裡，功勞、苦勞伊上懸，承續[(sîng-sio̍k)]老爸的事業，定著伊排頭範(pān)--的，別人袂使佮伊爭；就是這个緣故，伊共阿文看做是欲來佮伊搶家伙的冤仇人，較加嘛對阿文無好面腔(tshiunn)，實在也袂使怪--伊。
兇兇狂狂到一个生份所在做生理，閣變[(pìnn)]無成[(sîng)]，檢采是伊家己看甲耽(tânn)--去；毋過，佇心肝內阿義原底猶有一必一中[(it-pit-it-tiòng)]的把握，嘛認定干焦伊有資格通去試；定著愛予伊選、予伊先去。仝這个道理，伊若試袂使[(sái)]，翻頭閣轉來頭城，別人袂使插喙，袂使笑--伊，閣愛歡歡喜喜去接(tsih)--伊、讓--伊。
腹腸狹[(e̍h)]的阿義，有遮的想法，閣雄雄講袂出喙，煞共怨慼囥踮心肝頭，磕袂著就欲揣阿文出水，毋是正剾倒削，就是反(píng)歹面色予伊看。是講，若干焦按呢舞，也無起跤動手，敢會使講阿義毋著--咧？
另外猶有一个誠僫[(oh)]比並[(pí-phīng)]的所在，就是阿文大學出業，欲引頭路較緊，應該出--去，莫踮厝和阿義爭才著；這嘛是阿文到落尾仔會看破世情，無愛佮伊計較的緣故。
後--來，撞突(tōng-tu̍t)勻勻仔濟--來，勢面愈來愈䆀，雄雄阿文嘛想無步通敨(tháu)，毋是「避[(pī)]」就是「逃」；見有閬縫(làng-phāng)就旋(suan)去送貨、收數(siàu)，罕得佇店。代誌行到這个坎站，予阿文無去拍算後過的出路袂煞--矣，有大兄就無伊，閣留嘛無啥意思--矣。
拄搪(tú-tn̄g)老爸佇大溪倚濱海公路邊，新買一坵[(khu)]焦田，租一隻怪手咧整地，猶未好勢，伊逐工攏有去巡、去看。有一暝，阿文和伊坐咧開講，老爸先開喙：「恁阿兄遐無講情理，你敢袂怨--伊？」
「伊踮厝較久，論功勞、苦勞嘛較濟過我；另外，伊冊讀較少，閣佮[(kah)]兩个細漢囝，若平平規家𪜶出去討食，真正有比我較歹過--淡薄；你做老爸原--仔有講袂直的所在，為伊、為我攏僫撨(oh tshiâu)......」停睏兩、三秒閣講：「歸尾，若欲家和就愛讓--伊；這我無怨嘆，干焦想欲緊旋爾。」阿文做一氣[(khuì)]講煞，心肝內加快活足濟；毋過，後過的出路佇佗，才是阿文上驚惶的所在。(欣賞規篇作品)
28 花崗岩島的真情俺公 陳為信[(Tân Uî-sìn )]
我的家鄉，是海上美麗的島嶼[(sū)]，國軍軍管時代的戰地，反攻大陸的跳板，更加是阮家族一代一代大大細細，生湠生存的好所在，伊名叫做――金門。
阮的鄉里位佇「大山」跤，鄉里外有山園、有海坪[(phiânn)]，猶閣有通金門山特讚的水質。俺(án)公講：「咱的祖先誠勥(khiàng)，相著這跡[(jiah/liah)]好所在，對宋朝尾就來開基--矣。」
從(tsîng)細漢我佮小弟攏是俺公佮俺媽晟養大漢--的。俺公定定講：
「阮是青盲牛，攑筆比攑鋤頭較重。」無想--著，這枝鋤頭柄一攑就幾若十年，年年攏佮田園剝袂離，天𡨞(tshím)光就出門，「對清明穀雨[(kok-ú)]寒死虎母，就開始挓(thà)園、種作、鋤草、沃肥」。大粒汗細粒汗嘈(tsha̍uh)嘈滴，枵飢閣失頓。佳哉，一目𥍉(nih)仔，「到六月十九三項新――塗豆、番薯大母(bú)四公界(kè/kuè)，『六月火燒埔』，露穗、包穀是滿山墘(kînn)」，規年迵(thàng)天、無暝無日，勤儉拍拚，就是欲憶(it)起著通趁寡所費，予阮規家大大細細食穿無煩惱。
作穡人長年看「天」食飯的本事，予俺公變成氣象專家。會記得有一年，歇熱彼站，規四界燒嗙(pòng)嗙，輕輕仔動--一下就規身軀汗，若親像籠床咧炊粿，俺公那搥[(tuî)]肩頭，那講：「天氣漚鬱(àu-ut)--矣，規身軀痠疼幾若日--矣，我看天公是欲閣扯(tshé)一場大雨。」我那攑頭看天頂，那講：「俺公，你是講著抑毋著，大日頭熱甲若火咧著--咧，哪有可能會落雨？」俺公應我講：「我老罔老，嘛會哺塗豆，我的跤頭趺就是氣象站。」我猶是無啥相信，欶(suh)我的枝仔冰較贏。
閣無一霎(tiap)仔久，風一陣一陣吹--來，天邊的烏雲直直斜(tshiâ)--來，田嬰愈飛愈下(kē)，俺公講：「田嬰若結堆，戴笠穿棕蓑」，一下爍爁(sih-nà)了後，俺公喝講：「龍--仔，門口埕的塗豆，緊去抔(put)抔--咧。」俺公的跤頭趺，實在有夠厲害。我三步做兩步行，欲用我的跤頭趺，來救俺公的塗豆。
彼下昏，規四界格格[(keh-keh)]是颺颺(iānn-iānn)飛的大水蟻，俺公叫我捀(phâng)面桶水囥佇電燈下底，無偌久，一隻一隻的大水蟻直跋落面桶內--矣！俺公那看那笑講：「天無雨，人無步。」「這幫(tsit-pang)雨若落會透，下冬晚(mńg)--的露穗就會飽仁--矣！」伊講古早作穡人是看天食飯，天公伯--仔若是毋落雨，規家口仔就枵腹肚。(欣賞規篇作品)
29 阿公的竹椅仔 蘇毓涵[(Soo Io̍k-hâm )](影音檔)
頂個月，阮轉去舊厝看阿媽，無意中煞來發現一條(liâu)退色，頂懸全坱埃(ing-ia)佮必巡(pit-sûn)，又閣斷一枝跤的竹椅仔，若像一个虛荏(lám)的老歲仔，恬恬倚佇壁邊。啊！彼是阿公猶閣佇--咧的時，上佮意的竹椅仔！
會記得我細漢的時陣，看阿公三不五時會坐佇竹椅仔歇睏。伊就親像隱居佇山林內的雅士[(ngá-sū)]，遐爾仔清閒。阿公定定穿紗仔衫，目睭微微(bui-bui)、文文仔笑，坐佇竹椅仔，手那擛(ia̍t)檳榔扇，那聽收音機，邊--仔的嚷鬧攏袂共伊攪吵--著，敢若是道行真深的高人，遐爾清閒佮得定[(tik-tiānn)]。
每一擺我若去吵--伊的時，伊攏嘛笑微微，毋捌受氣，閣會提幾个十箍的銀角仔予--我，講是欲予我買冬瓜茶佮小妹做伙享受。我聽著真歡喜，隨提銀角仔，那跳那走去共小妹講這个好消息。姊妹仔三人就真樂暢傱(tsông)去𥴊(kám)仔店，阮ka̍h-ka̍h 叫的笑聲強欲共厝瓦反(píng)--過去，厝內的大人袂堪得吵，連鞭共阮阻擋。毋過阿公伊無受阮影響，又閣坐轉去伊的竹椅仔，享受伊予人(hōo lâng/hông)拍斷的清閒。有當時仔阿公會共我抱起去坐佇伊的跤頂懸，共我講起較早的故事；有--的我聽著真心適，感覺足趣味，想欲知影閣較濟的故事；阿公嘛袂感覺煩，沓(ta̍uh)沓仔共我講古；有的故事我猶細漢，毋知伊的意思，攏聽無，感覺無啥趣味，無張持煞睏--去，就算是按呢，阿公嘛袂受氣。閣有一擺，我無細膩跋倒，坐佇塗跤哭，哭甲流鼻流滴，哭甲規个面攏花巴哩貓(hue-pa-li-niau)，嘛無愛起--來，蝹(un)佇塗跤一直躽(nuà)，別人攏無我法。這个時陣，阿公就慢慢仔對椅仔(peh)--起來，老神在在，寬寬仔、一步一步向我行--來，伸出伊彼雙予人感覺安心的手，共我抱起來竹椅仔面頂，輕輕仔共我搭尻脊骿，一直到我無閣哭才停，閣提糖仔安搭我的心情。佇我的記持中，阿公一直是遐爾溫柔又閣閒仙仙，坐佇竹椅仔面頂。
雄雄有一工，我煞無看著平常時攏會坐佇竹椅仔面頂的阿公。我厝內厝外走傱，誠生狂咧四界揣阿公。厝--裡的大人看我咧欲哭出來的款，就趕緊共我講阿公破病，需要蹛病院，真緊就會轉--來。毋過，對彼个時陣開始，我就毋捌閣看著阿公轉--來--矣，彼个疼孫的阿公已經離開--我，只賰囥佇相片頭前的菊花，猶閣有彼條無人坐的竹椅仔。(欣賞規篇作品)
2010-07-11 09:44:5733 email給33 前往33的日誌
