2010
06241424中華民國99年全國語文競賽-﹝臺灣閩南語朗讀﹞文章57篇(3)
阿母自細漢就無讀冊，阿爸攏笑伊是「青盲牛」。阿母嘛定定講：「遮的囡仔讀冊的時，我若會曉綴𪜶讀，這馬毋知會加捌偌濟字--咧！」阮讀冊的時，其實是阿母上無閒的時陣；一規家伙仔遮爾濟人，阿母無閒懸、無閒下(kē)，哪有時間綴阮讀冊捌字？
阮兄弟姊妹畢業以後，結婚生囝，阿母就鬥𤆬(tshuā)孫大漢；十外个孫，阿母濟少攏照顧有著。
後--來阿爸破病以後，攏是阿母咧照顧，阮兄弟姊妹歇睏才轉去看阿爸和阿母。阿母定定講：「我若共老--的照顧予好勢，遮的囡仔就免煩惱，才會當安心去拍拚事業。」
阿爸過身了後，獨居[(to̍k-ki/ku)]的阿母，蹛院兩禮拜，復健[(ho̍k-kiān)]誠久才漸漸康健--起來。這个期間，阿母搬厝，搬轉去伊𪜶外家彼个庄頭蹛，有幾个阿姨嘛蹛佇附近，互相照顧攏真方便。
舊年阿母看著對面的小學又閣開(khai)辦成人教育班，毋捌字的阿母想欲去讀冊又閣躊躇，驚講會讀無冊。後--來因為阮逐家的鼓勵才報名，一班十外人，只有伊和另外兩位『歐巴桑』是老人，賰--的攏是外籍[(tsi̍k)]新娘。
逐擺我轉外家，食過中晝飯，阿母攏袂顧得去歇睏--一下，趕緊搝(khiú/giú)我幫共伊看功課，字有寫毋著--無？課文有唸毋著--無？阿母寫字真慢，總--是一筆一劃(ue̍h)畫沓(ta̍uh)沓仔寫；伊的字寫甲非常整齊，我呵咾伊真正是一个好學生，頂擺轉--去緊予伊一包仔个小紅包做獎學金。阿母雖然講毋免--啦，捒規半晡，最後猶是歡歡喜喜共伊收--落來！
大伯前一站仔問我阿母敢好？我共伊講，阮阿母除了運動、參加庄頭--裡的活動、定定和兩三个阿姨同齊煮手路菜鬥陣食以外，猶去讀冊--呢！而且是「負責」得全勤[(khîn)]獎獎狀[(tsióng-tsn̄g)]--的--喔(ooh)！大伯笑講：「按呢會閣較少年！」
我轉外家學予阿母聽，順紲鼓勵伊愛繼續讀--落去。阿母真歡喜，講：「我當然愛繼續讀冊，人數有夠才有法度開班，我讀有讀無無要緊，我是去做伴--的，予遐的外籍新娘會當繼續讀冊才較重要--啦！」
原來阿母逐項攏替別人想，莫怪伊的生活中無埋怨佮不滿，只有感恩佮惜福；對序細無囉唆佮要求，只有關懷佮珍惜。從到今(tann)毋捌來袂怨嘆過，自然就袂憂頭結面。阿母真是我人生學習的老師！(欣賞規篇作品)
31 阿爸，請你愛緊好起來 鄭昱蘋[(Tēnn/Tīnn Io̍k-phîng )]
從來毋捌想過欲對阿爸寫啥物。但是現此時，我卻是坐佇病床邊，看著阿爸吊大筒(tâng)、毋知人、無氣色的面容，我的目屎含牢--咧，驚無小心滴--落來予別人看--著。
阿爸少年學會曉修理錶仔，所以外公將阿母嫁予--伊，想講做生理--的錢水較活。我出世的時，
生遮濟查某囝，阿爸伊上惜--我。因為我纏伊上牢，捌一擺伊出門無𤆬(tshuā)我去，我就敧(khi)佇門口，吼甲伊轉--來。所以，後--來便若暗時無閒煞，阿爸想欲去跋一下散筊[(suánn-kiáu)]仔就愛𤆬我出門才會準算。想起細漢猶有一个真深的印象。一擺綴阿母、阿姨佮一陣姊--仔去彰化的二姨𪜶兜食拜拜，轉--來的時一陣人落車去--矣，煞放我一个佇車頂予客運載走。等我精神的時，看著阿爸佮人咧講話。伊抱我坐佇『oo-tóo-bái』頂，我將阿爸攬牢牢，覆(phak)佇阿爸的尻脊骿，烏烏暗暗的天邊，一點一點的光，是星光、厝光抑是火金蛄？毋知驚的我，永遠會記得彼工暗時，阿爸的尻脊骿。
阿爸，你愛緊好--起來，會記得我共你講--過：等我退休，我欲𤆬你去環遊世界。你若歡喜我所講的約束，就愛趕緊好--起來，因為這个約束愛閣幾若冬--咧！
讀國小的時做值日生[(ti̍t-ji̍t-sing)]，中晝袂使轉去厝--裡食飯。阿母講會捾便當來予我食。等甲時間到，看人咧食飯的時我無飯通食，感覺真歹勢，就共走去運動埕遐覕，恬恬咧吼。無偌久，看著阿爸提便當咧揣--我，我歡喜甲緊傱(tsông)--過。六年的時愛媠欲買懸踏(ta̍h)，佇店--裡一直咧挐阿爸。阿爸真受氣罵--我--一句，我煞喙仔翹翹。阿爸上氣人翹喙，伊就氣甲共我捻喙䫌(phué)。過都無一分鐘，伊對我講：行--啦，去佗買--啦？含著目屎，我面仔笑笑𤆬阿爸去鞋仔店。原來阿爸是惜--我--的。彼下喙䫌阿爸伊一定捻甲真毋甘。
阿爸你若毋甘我佇咧艱苦，你就愛緊好--起來。醫生拄才來，講你是輕微--的--啦，真緊你就會使得轉去厝--裡--矣。阿爸，知--毋？真緊你就會使出院--矣--啦。(欣賞規篇作品)
32 阿桑的形影 陳昆龍[(Tân Khun-liông )]
「你清明有欲轉--來--無？」「彼工透早就欲培墓，傷趕--啦，我無想欲轉--去。」「若無你是當時會轉--來？前擺對過年到今(tann)嘛遐久--矣！」「歇熱--啦，我會𤆬(tshuā)囡仔做伙轉--去。」「好--啦，好--啦，隨在--你--啦，較捷(tsia̍p)敲(khà)電話轉--來......」
一冬兩擺轉去南部，看--著的阿桑一擺佮一擺無仝。是猶會騎『oo-tóo-bái』去四界踅，毋過看電視䖙(the/thenn)佇椅仔，就開始盹(tuh)龜的時間愈來愈緊；對假喙齒攏提掉了後，就愛用兩排齒岸哺物件，定定會嫌我煮的菜無夠爛。較早的阿桑才毋是按呢--咧，佇我囡仔囝的目睭--裡，伊是敢若親像布袋戲內底「高長[(ko-tshiâng)]大漢、功夫厲害、任考不倒」的武林高手。
阮兜蹛佇庄跤，厝--裡作穡種弓蕉，別的囡仔禮拜日歇熱攏誠歡喜，干焦我著煩惱，著愛綴去弓蕉園割葉仔、顧水、薅[(khau)]草。其實厝--裡我算上細漢，攏揀輕可的代誌做，粗重的阿桑佮阿兄阿姊早就做甲差不多。毋過我上驚薅草，一个腰脊骨是跍(khû)甲強欲斷--去，看別逝(tsuā)的人愈薅愈遠，規氣坐佇弓蕉跤歇睏，一站仔，阿桑就會越頭來共我鬥薅。
阮欲去弓蕉園愛過一條闊莽(bóng)莽的溪仔，彼陣無人咧撐[(the/thenn)]渡，若欲騎『oo-tóo-bái』去園--裡，對橋過就愛踅一大輾。佇阮庄仔頭，差不多逐間厝攏有一隻竹棑仔，縛佇溪仔邊，棑仔用竹篙撐--咧撐--咧就過溪--矣。阮囡仔陣定定划(kò)棑仔耍水，嘛定定予大人喝閣走咧逐。
逐家攏有家己的棑仔，遮的棑仔按怎來--呢？別人我是毋知，阮兜的是阿桑家己做--的。佇清明雨水開始欲濟的進前，阿桑會先去買一寡比大腿較粗的竹仔，攢(tshuân)一坩(khann)火炭，看竹仔若有彎彎的所在，就用火慢慢仔烘(hang)，等竹仔小可變軟，才細膩仔雕予直。等甲攏雕好勢，才共竹仔鋸平長，排予齊，頂懸囥細枝竹仔拍橫--的用鉛線縛予絚(ân)。
若講做到遮煞工，就無算真正𠢕。阿桑閣會佇棑仔頭遐，那烘那雕，予規个翹--起來，按呢撐棑仔的時陣，頭前的水才袂潑--入來，這才是做棑仔的真功夫。有人毋是竹仔烘甲臭火焦破空，就是雕甲必(pit)--去。規个棑仔做好就愛閣漆一沿點仔膠，會當擋較久袂漚(àu)--去。上煞尾揀一枝較粗勇的竹仔，佇頭仔遐鬥一塊鐵仔，撐棑仔的時陣，竹篙才袂浮--起來歹出力。(欣賞規篇作品)
前一站仔我看著發生佇東石鄉，大家(ta-ke)侵門踏戶走去新婦外家拍傷新婦的事件，予我感受足深。佇較早像大家虐待[(gi̍k-thāi)]、苦毒新婦的問題普遍存在。毋過佇這馬遮先進的二十一世紀，大家佮新婦的問題雖然有減少，但是就親像熱天的蠓(báng)仔永遠攏袂消失--去。
我的阿媽佮阿母的關係一直無好。我定定聽阿媽講伊嫁來胡--家有偌爾辛苦。伊講伊每一工透早四、五點的時陣，就愛起來煮早頓予大家[(ta-kuann)]佮大官食，所以這馬阿母會當睏甲六點，已經足好--矣。毋過阿母煞認為以前每一个新婦攏是按呢，並毋是阿媽一个人按呢爾爾。這馬有真濟新婦睏到七、八點嘛無要緊，阿媽實在是「老古板」，綴袂著時代。阿媽愛揣人講話，但是阿母個性較閉思，較無愛講話，所以阿母定定共厝內款好就佇房間內做家己的代誌。因為按呢，阿媽認為阿母是討厭--伊，刁工欲佮伊做對。阿母佮阿媽袂合[(ha̍h)]，阮爸爸是足頭疼。原本是想講過一站仔𪜶的關係就會變好，毋過二十幾年過--去，阿媽佮阿母猶是按呢。最後阮只好搬--出去，共這兩个人分--開，是上好的辦法。但是我個人猶是認為分開蹛只是閃避(pī)問題，問題猶是無解決。
若講一个查某人這世人會當佮家己心愛的人結婚是前世人的緣分，我想伊佮大家會當結成這層關係，無定著仝款是前世緣。既然是按呢，我認為大家佮新婦應該愛會曉「將心比心」去體諒佮尊重對方。人佇咧講：「家和萬事興」，咱何必為著一寡小可仔代誌，明爭暗鬥，互相計較，佮對方拆破面？逐家攏是一家人，將來欲鬥陣的日子猶閣足長--的，實在是無應該吵吵鬧鬧。因為阮阿媽佮阿母的關係，阮一家伙仔煞強欲煞煞--去，我感覺真艱苦，也感覺𪜶實在是無彩上天送予𪜶一个遮爾好的緣份。
我捌佇報紙的副刊看著一篇文章，寫一个新婦按怎佮伊的大家好好仔相處。伊講佇伊拄拄仔嫁的時陣，伊的大家總--是認為伊嫁--入來是想欲搶伊的囝。這个作者為欲改變大家這款看法，受真濟委屈；毋過伊無放棄，反倒轉定定關心 大家，陪伊開講，共伊當做是家己的老母仝款咧看待。伊的大家落尾受伊感動，也真歡喜有一个遐爾有孝的新婦會使陪佇伊的身軀邊。這个大家開始將新婦當做家己的查某囝來疼惜。(欣賞規篇作品)
34 巷仔內的形影 王湘富[(Ông Siong-hù )](影音檔)
細漢的時陣，定定坐踮庄跤阿媽兜頭前門的椅條(liâu)邊，喙仔開開聽阿媽講臺灣民間故事。聽阿媽喙角全波咧講「螿蜍討命」、「地牛翻身」，以及「劍潭」、「鶯歌」的故事。其中有神祕[(sîn-pì)]傳奇[(thuân-kî)]、有忠義先民，也有悲涼情戀。逐擺聽遮的故事，我的心肝頭免不了感覺一絲仔心適佮一絲仔趣味。想袂到，我的故鄉是遮爾仔古錐迷人。拄著阿媽心情當順序的時陣，伊閣會哼[(hainn)]唱幾條仔南管、北管的小曲小調，予我鼻芳鼻芳；雖然講彼時臺語我淡薄仔聽袂慣勢，毋過，我也是足佮意佇暗暝，坐佇頭前門的椅條，倚佇阿媽身軀邊，那看滿天頂不時閃爍的天星，那聽阿媽共我講伊過往風華佮這片土地的人文。
隨年歲沓(ta̍uh)沓仔大，我開始去學校讀冊上課。因為按呢，我漸漸較少轉去阿媽兜過暝，只有佇咧歇熱的時，我才會牽阿爸佮阿母的手，共𪜶司奶(sai-nai)，厚面皮要求𪜶𤆬(tshuā)我轉去阿媽兜。會記得有一擺，阮駛車去阿媽兜，一開始，日頭赤焱[(iānn)]焱，車窗外的斑芝[(pan-tsi)]開甲橫霸霸，一蕊一蕊金爍爍，綴著微微涼風，親像一陣一陣柑仔色的海湧，溢[(ik)]來溢去，看著真感心。遠遠天邊跤的小山崙[(suann-lūn)]，滿山紅開透枝，滿山遍野，予人誠驚奇。齊(tsiâu)齊齊拍莓(m̂)開，恬啾(tsiuh) 啾面向天， 樹椏(ue) 停三四隻青苔仔(tshenn-thi-a)，咧唱迷人的歌詩，如癡如醉，予人心迷。一捯(táu)久仔，雄雄煞來烏天暗地，狂風大作[(kông-hong-tāi-tsok)]，飛沙走石[(pue-sua-tsáu-tsio̍h)]，雨規桶摒、傾盆大雨[(khing-phûn-tuā-hōo)]落袂離。等阮駛車駛到阿媽兜頭前門一條狹[(e̍h)]巷仔的時，越頭煞看著阿媽徛佇短牆邊，攑雨傘咧等待阮來。
阿媽看阮已經來--矣，煞對巷仔內三步做兩步走出來接--我。我佮阿媽公家攑一枝小雨傘，軁(nǹg)過彎彎曲[(khiau)]曲的小路，一直行到我記憶中阿媽的紅瓦厝。我攑頭斟酌看一站仔，佮細漢記憶中仝款的椅條、仝款的門窗、仝款的砛簷(gîm-tsînn)，四界敢若攏有我蠻皮的笑聲，嬉耍的身佮形影。細漢時陣種種囥佇心內的光景，漸漸浮現佇目睭前，清清楚楚，使人懷念，使人迷戀。阿媽無等我入去厝內坐好小可仔歇睏，伊隨就捀(phâng)一碗燒燒的紅豆圓仔湯來予--我驅[(khu)]寒，我那啉燒烙[(lō)]的甜湯，身軀也沓沓仔燒熱--起來；一喙一喙的圓仔湯，啉甲喙內甘甜甘甜，心肝頭嘛甘甜甘甜。時間的流變，黯[(àm)]淡事物的光彩，煞掩崁(am-khàm)袂密了人佮人之間的溫柔。彼一暗，阿媽攑雨傘佇巷仔口的形影，捀圓仔湯予我啉的一片心意，無聲無說行入我的夢中，伴我入眠，夢中伴相隨。(欣賞規篇作品)
35 香燈跤 鄭家和[(Tēnn/Tīnn Ka-hô )]
古早的進香客，手攑鼓仔燈、攑香旗，一步一步綴媽祖婆行跤，𪜶，就是香燈跤。佇較早交通無方便的時代，進香攏是用行--的，除了是體力的考驗，閣是精神的磨練。進香客當中，有的人是下願綴媽祖出巡遶(jiáu)境；有的人是無求啥物，甘願綴媽祖婆行千里路途。今年拄好有機會來做大學生代表的香燈跤，是一款文化體驗，也是一種無仝款的「轉大人」儀式。
自細漢，我就是媽祖婆的信徒，伊是我心靈的寄託[(kià-thok)]，有真濟祕密伊攏知影，因為我知影伊袂講--出去，閣會恬恬聽我講。佇較無注重人權、男女平等佮身份地位的時代，神明一直攏是逐家的心理治療中心。因為勸善教化的意義，予咱有人生的方向，袂親像揣無燈塔的船隻，佇大海沐(bo̍k)沐泅。伊慈祥的造型佮面容，可比是咱慈愛的母親，也因為按呢，咱臺灣人共伊號做「媽祖婆」。咱的臺灣，有海洋國家的民族性，信仰方式非常熱情，毋管是南部沿海地區的送王儀式，抑是各地方鬧熱滾滾的大拜拜，攏展[(tián)]現咱臺灣人是有腹腸、熱情，一點仔都袂輸外國的嘉年華[(ka-liân-huâ)]。大甲媽祖起駕進前的幾點鐘仔開始，各地方的陣頭、曲館攏來拜廟，挨挨陣陣[(e-e-tīn-tīn)]的廟埕，各種陣頭攏來遮拚場面。親像內門的宋江陣、外埔的義虎團，也有來送媽祖婆出大甲城。拍算欲行八工七暝的進香客，早早就往新港的方向行--去--矣。有的人拖菜籃仔，有的人騎跤踏車，看𪜶的背影[(puē-iánn)]，愈行愈遠。我算是頭一擺參加，閣毋知做一个香燈跤的鋩(mê)角，無經驗的阮，進香的路途當中，一直想欲放棄，毋過「媽祖婆，疼戇人」，攏有好心的阿叔、阿姨共阮鬥相共，一路行--過來，感恩的心，感謝有恁的幫忙。
大甲媽起駕了後，攏是連夜趕路，所以有經驗的香燈跤，早就行到下一个鄉鎮去補眠--矣！好佳哉有青春的身體予阮倚靠，對大甲行到沙鹿(Sua-lak)，天色拍殕(phú)光，食著燒燙燙的饅頭[(bán-thô)]、豆奶，精神規个好--起來！天光，代表一工的開始，阮定定講：「今仔日閣愛看日出--矣！」就是講「拚暝工」的意思。進香的時陣，阮也定定講：「今仔日閣愛看日出--矣！」因為知影，今仔日又閣是行到天光。一路阮攑香旗，沿路所經過的廟寺，攏會縛一張符仔佮頓(tǹg)廟的宮印。有的人行幾若冬，彼支香旗，就綴了幾若擺，閣經過香煙的加持，舊舊、烏烏的旗仔，變成上價值的紀念品。(欣賞規篇作品)
36 氣象報導 王秀容[(Ông Siù-iông )](影音檔)
放學了後，阿球行轉去厝--裡，路--裡的色緻[(sik-tī)]嘛無仝款--矣！電火柱頂的烏鶖[(oo-tshiu)]，一半烏，一半彩色，笑笑咧講：「阿球，阿球，共我救；阿球，阿球，誠優秀。」閣共阿球使一下仔目尾，若像咧共說(sueh)多謝，叫伊愛繼續拍拚。
轉去厝--裡的時，阿球驚𪜶媽媽會煩惱伊的果子是對佗位來--的，驚伊去予人毒(thāu)--著，伊就共𪜶媽媽講：「我用家己的四秀仔錢買一粒菝仔佮三葩葡萄，我想欲請恁食，多謝恁早起共我對馬桶內底救--出來。若無恁，我毋知欲予水沖(tshiâng)去佗位--咧？」
「乖！你誠有心！暗頓食煞，果子就交予你攢(tshuân)--喔！」
暗頓了後，逐家開電視看氣象報導，阿球共菝仔切做一周[(tsiu)]一周，排蹛𥐵(phiat)仔內底，閣共三葩葡萄按色緻的深佮淺排甲彎彎彎。伊捀(phâng)--出來的時，彼个愛看新聞的爸爸，彼个若冤仇人的姊姊，彼个像拍火隊長的媽媽，攏無啥相信阿球會遐𠢕，保證無代先鬥空--喔！逐家做伙喝講：「哇！彎彎彎，袂輸若虹[(khīng)]的草仔色佮紺(khóng)色仝款，攏足媠--的！」
這時陣，阿球歹勢閣兼歡喜，伊感覺伊是世間上，上蓋幸福的人，若親像伊徛佇天頂七彩的虹頂懸，予人掛冠軍的獎牌，披幔(mua)七彩的彩帶，正手閣比出勝利的手勢。雖然伊是厝--裡上細漢--的，定定共𪜶揣麻煩，定定予𪜶罵，毋過細漢囡仔會當鬥做細項--的，有心做好毋免分大細件層(tsân)，這擺，阿球真正歡喜甲佇客廳跳舞踅玲瑯。電視內底媠媠的記者――這擺阿球有影感覺誠媠--喔！拄好咧報氣象。
「明仔載，出大日頭，無落雨的機會......」
阿球大聲叫雄雄喝一聲。
「哇！」
含(kâm)著笑聲，阿球閣大聲叫一聲。實在無人看會出，伊是咧歡喜啥，毋過逐家看伊的目神攏誠溫柔，無像早起的拍火樣，是若像佇山頂開講泡茶，心清幽仔清幽。
「哇！誠好，誠好，日頭出--來--矣！好天--矣！連雨霎仔嘛無--去--矣！明仔載袂烏陰天--矣！逐工攏袂烏陰天--矣！」
「無--nooh，無咧逐工好天--啦！心情有好天較重要。我逐工早起看新聞，就是驚天氣多變化，驚恁去予雨沃--著。」阿球𪜶爸爸笑笑仔咧講。
阿球一聽--著，發覺原來𪜶爸爸是去予伊冤枉--著，伊就跳倚去共𪜶爸爸攬(lám)--咧，伊的目睭若像小可仔燒燒，驚予厝--裡的人看--著歹勢，伊就假影看對外口去。(欣賞規篇作品)
37 烏龍海邊釣蟳仔 尤碧豔[(Iû Phik-iām )]
頂禮拜日我透早就共細漢囝森博挖(óo)--起來，對七點開始咻(hiu)，咻到八點，伊才目睭盻(he)盻，毋情毋願，那洗喙那嗷(ngāu)嗷唸，講我是緊張大仙，九點欲集合，未曾未就踔踔(tshi̍k-tshi̍k)趒(tiô)，害伊睏無飽。總--是䖳(thē)靠蝦做目，無伊駛車，我就無法度𨑨迌。
阮九點準時到烏龍國小，看著仲元兄佇咧食『三多一摺(sa̋n-tó-it-tsih)』，伊那食那和我觸(tak)喙鼓，麗華佇邊--仔笑--咧笑--咧。這个時陣春芬和[(hām)]淑和[(hô)]做伙到位，春芬講話大嚨喉空兼比手畫刀，伊一加入戰場，隨就鬧熱滾滾。一下仔麗秀嘛來--矣，伊穿規軀水紅仔色的衫，連鞋嘛水紅仔--的，拍算想講穿較媠--的，會當唌(siânn)較濟蟳仔？無的確有影，伊釣誠濟--呢！
無偌久，理事長錦樹翁仔某也來--矣。人會齊了後，阮一陣就往鹽埔仔海邊出發，沿路有看著海茄苳。錦樹兄和阮後生去買「武器」――釣餌和釣具「膏膏纏」，阮一寡查某人慢慢仔行去海邊。天誠清，海真闊，海湧一波一波，海風一陣(tsūn)一陣，一隻白翎鷥歇佇肉粽角頂頭，白頭鵠仔咧開會，椰子樹搖過來、搖過去，海的味搝(khiú/giú)海風的衫仔裾(ki)，偷偷仔鑽入阮的鼻空，啊！有夠幸福--的--啦！
「武器」變(pìnn)規晡才變好，阮共釣具幌入去海--裡，幌去倚海邊有湧的所在。蟳仔有夠饞食，一下仔就一隻，連鞭遐咧吱，連鞭遮咧叫。逐家跤手猛(mé)掠，蟳仔一隻一隻入甕；當逐家笑甲喙仔裂[(li̍h)]獅獅的時陣，忽然間「啊！」厝蓋強欲夯--去的慘叫聲，害阮掣一趒，原來是春芬去予蟳仔鋏(giap)著指(tsíng)頭仔，鋏牢牢毋放。伊共蟳仔姑情：「蟳仔！蟳仔！你好心好行，你共我放--開，我就共你放轉去海--裡做海龍王。」拄講煞，彼隻蟳仔真正共放--開，春芬照品照行，就共擲去海--裡。啊彼隻蟳仔尾--仔有做海龍王--無，阮就毋知。
為著欲予蟳仔代代生湠(thuànn)，阮釣著細隻--的抑是抱卵--的，就共擲倒轉--去，閣共講：「蟳仔！蟳仔！你就較骨(kut)力仔生，予阮後擺來閣釣有。」
就按呢歡喜的時間過了真緊，感覺一目𥍉(nih)仔爾爾，已經過三點鐘--矣，我一个新娘面曝甲變老婆仔面，豆腐曝甲變豆乾，逐家喝熱閣喝枵，就決定共蟳仔掠去好好仔「修理」。佇海產店內底，春芬為著欲報冤仇，食特別濟，但是蟳仔嘛罰伊轉去跍(khû)兩點外鐘的便所。仲元兄興啉酒，『bih-luh』一罐紲一罐，面比蟳仔閣較紅，但是紅了阮就有好歌通聽，我狗聲乞食喉毋驚見笑，嘛哀幾若條歌，逐家也輪流展歌喉，攏唱甲足歡喜。(欣賞規篇作品)
38 基隆港的查某囝 紀春綢[(Kí/Kì Tshun-tiû) ]
基隆港行過百外冬，迒(hānn)過一世紀--矣。咱毋通嫌伊老，毋通嫌伊面皮皺[(jiâu)]。基隆港猶原佮過去仝款，繼續做一个堅強偉大的老母。海水像阿母的奶水[(ling-tsuí)]，晟養一代一代的基隆囡仔。予咱娶某、嫁翁、生囝，代代生湠。嘛晟養我――基隆港的查某囝。
人講「基隆無城，食飽就行」，這句話對基隆人來講，一點仔都無合。像阮老爸一个靠基隆港趁毛[(mn̂g-kńg)]管空流汗錢的碼頭苦力(ku-lí)，做工課的時間無定著，有時佇雞未啼、狗未吠、天未光就出門。寒天的時，佇逐家睏當落眠冷爍(sih)爍的三更暝半，伊毋敢延延(iân-tshiân)，戽(hòo)起跤就緊起床，用步輦(lián)--的，三步做兩步那行那走，走到基隆碼頭，撆(pih)手䘼勒(li̍k)褲跤。不管時拚甲大粒汗細粒汗，趁錢來維持一家伙仔的生活。基隆港是晟養我大漢的所在，若有人問我是佗位的人，我會大聲共伊講：「我毋但是基隆人，閣是基隆港的查某囝」。
基隆港是一个天然的良港，誠少有大風大湧。港岸邊有足大隻的橋式機[(kiô-sik-ki)]，貨櫃一跤一跤吊袂煞。咱毋通嫌伊鑿目，伊是基隆的金雞母，替咱生誠濟誠濟的金雞卵。嘛有各行各業的人，無閒tshih-tshih佇充滿活力[(hua̍t-li̍k)]的這塊土地拍拚。
目睭看--過去，佇遠遠的所在，有青藍分明的地平線。海面有幾若隻覓鴞(bā-hio̍h/lāi-hio̍h)佮叫袂出名的海鳥，展(thián)開雙翼佇紋紋的海面，飛懸飛下(kē)、飛這爿飛彼爿。頭起先掠準佇咧跳水頂芭蕾(pa-lê)，斟酌一下看， 毋著！ 毋著！ 原來是佇咧食鮮沢(tshinn-tshioh)鮮沢的『sa-sih-mih』──也就是活魚。食飽翼仔擛(ia̍t)--咧就飛，歇佇船的甲板[(kah-pán)]頂拍拉涼，佇遐曲(khiau)跤撚(lián)喙鬚，實在有夠逍遙。我若是遮的鳥仔，毋知有偌好--咧。
佇咧星光月現的暗時，我若感覺心內鬱卒，上愛一个人行到基隆港仔墘(kînn)，選一个無人行跤到的所在，恬恬徛踮遐。我毋是佇咧觀星望斗[(kuan-tshinn bāng-táu)]，嘛毋是佇咧犀[(sai)]牛望月，我咧走揣一个熟似講袂出喙的......無風無搖的天氣，毋知徛偌久，我雄雄感覺一陣微微仔海風吹--來，有淡薄仔鹹鹹的氣味，勻勻仔振動海面的水痕，敢若對我笑甲喙仔裂獅獅，問我有啥物代誌，何乜(mí)苦按呢憂頭結面操心擘(peh)腹--咧。人講「一理通，萬里徹[(thiat)]」，一時陣我心肝頭的結感覺隨敨(tháu)開--去--矣！(欣賞規篇作品)
39 彩券 陳士彰([Tân Sū-tsiong/tsiang ])
舊年的年底，我佇教育局服務的單位，必須著愛落去高雄參觀訪問。遊覽車沿路幌過來又閣幌過去，一粒頭是楞捙捙(gông-tshia-tshia)。到高雄了後，欲去訪問的學校，是一間紲接(suà-tsiap)一間。除了欣賞逐間學校，佇鄉本土語言教學的成果，以及[(í-ki̍p)]聽一大堆簡報以外，猶有寫袂完的資料佮報告。
對透早到下暗，上車、落車、目睭看、耳空聽、手又閣愛寫，三日落--來，身軀的厭𤺪(ià-siān)，實在是食袂焦。免講換床鋪就咧歹睏--矣，連食飯嘛攏無滋無味。
領隊的頭家陳校長(私底下阮攏稱呼伊頭家)，為著體貼阮的辛苦，佇落尾一日的下昏，特別安排去愛河邊一間餐廳，除了享受真腥臊的料理，猶閣會通欣賞規條愛河，充滿『羅曼蒂克』氣氛的夜景。耳空聽著優美的古典音樂，身軀承受微微仔涼風，予緊張束縛的精神，攏總輕鬆--落來。
當阮所有的人，猶深深沉迷佇輕鬆的氣氛的時，一位行動不便的『歐吉桑(oo-tsí-sáng)』，坐佇電動輪椅頂頭，無聲無說駛對阮的坐位來，予阮逐家雄雄掣一趒(tiô)。老大人的車頂囥一疊(tha̍h)彩券，來到阮中間，將彩券褫(thí)像一支葵扇，佇眾人(tsìng-lâng)的面頭前擛(ia̍t)--一下擛--一下：「頭家！拜託買--一張！」彼種的『起毛(khí-moo)』，完全拍歹拄才幽雅的情調。有兩、三位同事忍受袂牢，就行去愛河岸邊。
雖然看無人欲插(tshap)--伊，總--是彼位『歐吉桑』猶閣是袂死心，輪椅一直佇阮的四箍輾轉踅來踅去。伊來到我的頭前，對我的面擛風：「頭家！一張才五十箍，拜託買--一張！」
我共伊指對陳校長去：「頭家佇遐，你叫伊買。」逐家看我一擺創治兩个人，攏笑甲攬腹肚。
我從到今[(tsîng-kàu-tann)]攏毋捌買過彩券，因為知影家己並無彼款運氣。親像過去，若是咧對發票，到今(tann)嘛無著甲半擺，連啥物叫做著兩百箍的滋味，攏毋捌鼻--過。總--是看一个行動不便的老大人，猶閣咧靠賣彩券來度活，想--起來嘛是真可憐。當時我也有淡薄軟心，就寬寬仔對褲袋仔撏(jîm)五十箍出--來：「我買--一張！」其實我是向望伊趕緊離開，毋通共阮一直囉(lō)。
阮的單位工作真無閒，大細項的工課較濟貓毛。逐家除了固定的時間辦公以外，平常時嘛愛倒轉去家己的學校教冊。所以頭家為著欲予阮毋免遐爾辛苦，有聘請一位專任的秘書，叫做魯小姐來鬥處理代誌。(欣賞規篇作品)
教育的種子佇佗位？教育的種子是愛對細漢培養--的，人的思想是愛對細漢就建立一套正確的價值觀。有一个充滿熱情的少年人，伊真佮意囡仔，嘛對𪜶有一種責任感，想欲做一个老師，來教育囡仔，予囡仔親像種子彼一款，會當落佇肥底，慢慢仔發穎(puh-ínn)、發芽[(huat-gê)]；向望種子會當吸收塗--裡的營養，開花、結果子；伊就是想欲成做囡仔的肥底。為著欲實現理想，伊去參加一个營隊，號做「教育營」。這个活動是去原住民部落輔導囡仔的功課，伊想講參加這个活動，會當充實家己的教學能力，是欲成[(tsiânn)]做一个老師的頭一項工課。
這个少年人頭一擺參加教育營，雖然有滿腹的熱情，心肝頭煞有淡薄仔驚驚，因為人第一擺總--是會生份生份，毋過看囡仔純真的笑容，規个人就歡喜--起來，敢若共落(làu)風的雞胿(kui)仔歕(pûn)風仝款。第一擺看著原住民的小朋友，逐个囡仔攏生做足相(siāng/siâng)，袂輸一个模仔印--出來--的，攏會笑面笑面問伊：「老師，你叫啥物名？」上恐怖--的是閣會𢯾(mooh)佇伊的身軀頂，毋甘放伊走。甚至有時仔下課了後，𤆬(tshuā)轉去厝--裡，會閣隨傱(tsông)過來欲佮伊耍，若像袂停止的電池，不管時都充滿活力[(hua̍t-li̍k)]。
當然，若是欲教𪜶一寡智識佮道理，上代先著愛佮𪜶盤撋(nuà)感情，這是伊心內所想--的。就按呢，伊做一件足偉大足偉大的代誌，就是伊決定欲撥時間來陪伴這陣猶未予人(hōo lâng/hông)發現的璇石。伊利用食晝佮下課的時間佮𪜶鬥陣，建立感情了後，毋但會當教𪜶智識，也會使教𪜶生活禮貌、規矩等等。紲--落來一禮拜久的時間，伊攏用真熱烈[(jia̍t-lia̍t)]的心來教--𪜶，想欲教𪜶足濟智識，欲予𪜶一下仔就吸收真濟觀念。譬論講有一工早時[(tsái-sî)]上課，囡仔共早頓提來上課的所在食，伊想講按呢就準拄煞，想袂到𪜶咧食--的竟然是泡麵佮一罐「保力達P」，泡麵閣是用齧(khè)--的。伊目睭展(thián)甲大大蕊，袂輸看著啥物驚--人的物仔。等到下課的時，伊共囡仔搝(khiú/giú)--過來，共𪜶講這是毋好--的、無健康--的。因為彼个囡仔認為按呢食無啥物奇怪，是真四(sù)常的代誌，所以伊就將一寡健康的觀念共囡仔講，向望會當改變𪜶的想法。(欣賞規篇作品)
阿婆的大官(ta-kuann)佇日本時代，予日本警察叫去造路，拄仔好總督巡查經過大路的時，有一尾毒蛇趖(sô)--出來，險險咬著總督，阿婆的大官為著欲救總督大人，犧牲家己的性命，予毒蛇咬--死。因為按呢，日本總督就收阿婆的翁婿做契囝。猶毋過「花無百日紅，人無千日好」，日本總督無偌久就予人(hōo lâng/hông)調轉去日本，雖然有留一寡仔財物予阿婆𪜶翁仔某，阿婆的翁婿因為破病，所有的錢攏開了了，最後也無法度共伊寶貴的性命救--轉來。阿婆無法度，只好將唯一的祖產果子園賣掉，變換錢財才通埋葬[(bâi-tsòng)]𪜶翁。而且賣地的時，有佮買主參詳：雖然共地賣掉，伊猶原欲蹛佇果子園內底的厝，到死為止。
因為𪜶兜無啥物錢，阿婆常在(tshiâng-tsāi)捒奶母車仔，抾歹銅舊錫咧賣；嘛有收厝內面有幼囡仔的尿苴仔，抾轉去洗，洗好曝焦才提轉去佮主人算工錢，秀萍佮小弟阿義--仔細漢時的尿苴仔攏是予阿婆洗--的。阿婆有三个後生、一个查某囝，因為條件無好，三个後生毋敢娶某攏予人招；唯一的查某囝本來八歲的時已經予人做新婦仔，啥人知影伊嫁毋著人，對方十年後共伊放捒去愛別人，生一个查某孫仔𤆬(tshuā)轉來予阿婆飼。阿婆的查某囝無面子繼續蹛庄內就離開，幾若年攏無消息。
秀萍的爸爸猶未將阿婆的故事講煞，秀萍的小弟阿義--仔佮𪜶某心彤(tông)就轉--來--矣。阿義--仔𪜶翁仔某轉--來了後，秀萍就佮𪜶做伙去樓頂照顧囡仔，共囡仔洗身軀、洗衫、款內底，所以阿婆的故事只有另日才閣繼續聽--落去。
秀萍徛佇二樓的陽磚台[(iông-tâi)]披衫，拄仔好會當看著阿婆的厝；伊的厝是杉仔枋釘--的，無法度看著厝內的情形，干焦知影內底一定真狹(e̍h)，大概(tāi-khài)只有兩坪大；杉仔厝頭前有用紅磚仔疊--起來的灶，灶頂面囥一个鼎，邊--仔有破好的柴疊(tha̍h)做伙。看--起來阿婆毋捌用過瓦斯爐，攏是用柴火咧煮飯燃(hiânn)燒水。杉仔厝的外口就是果子園，園內有種檨仔、弓蕉、蓮霧佮龍眼，秀萍自細漢就蹛佇庄跤，就算干焦遠遠看著葉仔嘛是有法度知影園仔內底有種啥物果子。今仔日聽𪜶爸爸按呢講，伊才知影，原來園仔內種遐爾濟果子攏毋是阿婆的，猶閣有，樹仔跤飼的雞仔、鴨仔佮鵝仔嘛攏是別人的。果子園門口停的彼台車已經駛行--矣，秀萍共衫披好猶閣毋入--去，徛佇陽磚台一直想𪜶爸爸所講的故事。(欣賞規篇作品)
42 眷村水交社 陳怡君、蘇頌淇[(Tân Î-kun、Soo Siōng-kî) ]
阿姊斟酌聽，雖然『郝老師』講話有真重的口音予伊聽甲霧嗄嗄(bū-sà-sà)，毋過看圖講故事、想故事，對阿姊來講攏無問題。『郝老師』捌共阿爸講--過，阿姊的聯想力[(liân-sióng-li̍k)]佮理解力袂䆀，希望予阿姊繼續畫圖通好開發伊的創造力。阿爸雖然無啥了解，毋過猶是尊重長官[(tiúnn-kuann/tióng-kuan)]的建議；就算講阿母對學費真有意見，阿爸猶是予阿姊去眷村[(kuàn-tshun)]學畫圖。
『郝老師』透過粉筆解說，將今仔日課程的重點教予學生；阿姊就親像接受電波按呢全部接收，用家己的理解力一項一項共消化，了後才貯(té/tué)佇頭殼內。原來，『郝老師』透過粉筆咧解說「寫實[(siá-si̍t)]」的重要性。總講一句話：畫啥物就愛成(sîng)啥物。
阿姊共新的『雄獅不透明水彩』盒仔提--起來，這是三年仔參加海報比賽得著第三名的獎品，阿姊是彼當時的美術組長，所以愛做代表上台去領獎。上台領獎彼工，阿姊感覺真礙虐(gāi-gio̍h) ， 自頭到尾攏共頭向下下(ànn kē-kē)，毋敢攑頭--起來；因為全校老師佮學生幾百人的目睭攏看對遮來，會予阿姊有一種罪惡感[(tsuē-ok kám)]。
佗位來的罪惡感--咧？啥人知影。
所以，當阿姊予校長叫上台的時，雖然導師有事先共伊通知，毋過伊猶是予校長透過『mài-khuh』發出奇怪的聲音驚--著。彼是一種無「寫實」的感覺。
阿姊實在真驚『mài-khuh』的聲音。佇伊的禁忌[(kìm-khī/kìm-kī)]當中，大聲講話是無符合規定的一種行為。『mài-khuh』將聲音放送--出去，閣較按怎溫柔的聲音透過金屬[(kim-sio̍k)]製閣圓圓的一支槌仔傳--出去，干焦賰真響的噪[(tshò)]音佮無注意的喘氣聲，是按怎才有法度共講話聲佮講話的人聯想做伙--咧？伊閣較無法度了解彼支『mài-khuh』有啥物好處，哪會有人硬死欲霸佔閣無愛放手！
予阿姊感覺礙虐--的是彼个活欲吵--死人的聲，叫逐家愛拍噗(pho̍k)仔。佇台仔頂領獎的一排學生，逐家攏歡喜甲強欲飛上天；干焦阿姊規面紅絳(kòng)絳、頭犁犁(lê)，佮身軀邊頭攑懸懸的囡仔成做強烈的對比。
阿姊真歡喜。阿姊實在真歡喜，因為伊畫的海報得著肯(khíng)定，只是佇遮爾鬧熱的頒獎典禮--裡，阿姊刁工共得獎歡喜的心情硩--落來，除了驚傷過頭歡喜會予雷公摃以外，伊家己嘛無願意徛佇逐家的面頭前予人看。伊共家己講：莫傷過展風神較好，莫傷過展風神較好......阿姊堅信，佇世間若是歡喜過頭，一定會有歹物咧等待機會出頭，掖(iā)落不幸的氣氛予人痛苦。這就是世間「不寫實」的規則。(欣賞規篇作品)
43 野生寵物[(thióng-bu̍t)] 曹麗華([Tsô Lē-huâ ])
想起彼擺佮野生動物的意外遭遇，這馬想--起來嘛是感覺足感心、足心適--的。人講一[(it)]沙一世界，一花一天堂，生活中若會當用心觀照[(kuan-tsiàu)]，四界攏是驚喜佮趣味。這種可遇[(khó gū)]不可求的代誌，可能是天公伯送予咱的禮物。
代誌是發生佇前(tsûn)--年的熱--人，厝邊兜陳老師講伊有一工下昏暗，佇厝邊的樹欉頂，看著五隻精牲仔，用手電仔火一照，五對目睭閃閃爍，鼻中央若有一條白線，應該毋是野貓也毋是膨鼠，可能是某種暗時出現的動物。彼當時阮聽聽--咧就袂記--得，嘛無閣張持。
一直到九--月入秋的時陣，天氣開始反寒，大葉欖仁[(lám-jîn)]的樹仔開始變紅，逐工透早出門上班的時陣，行過厝邊潘經理兜的欖仁樹欉跤，攏會看著塗跤頂有一寡仔予動物食--過的樹子，逐家才開始懷疑是啥物動物變的把戲。
暗時仔開始有人徛佇樹仔跤，目睭金金相，想欲張(tng)看覓--咧。皇天不負苦心人，經過規禮拜的等候，神秘的嬌客現身[(hiàn-sin)]，逐家總算看著伊的廬山真面目。佇水土保持局做工課的蕭課長，分辨出伊是保育類的野生動物――白鼻心[(pe̍h-phīnn-sim)]，研判可能是人飼佇籠仔底偷走--出來--的，也有可能是偷走--出來了後生湠的後一代。伊古錐的模樣佮形體，深深得著大人佮囡仔的喜愛。
風聲傳--開了後，社區的大大細細，樓頂招樓跤，厝邊招隔壁，阿公招阿媽，阿母招阿爸，逐工下昏暗，攏會結結做伙，袂輸夜市仔遐爾鬧熱，見面的頭一句話就是：「來--矣--未？來--矣--未？」有人開始佇伊不時出現的所在囥一寡仔果子，想欲唌(siânn)伊來食。閣叫做果子猫(bâ)的白鼻心，就佮伊的名仝款，對逐種果子，攏無揀食，尤其是木瓜佮弓蕉。有當時閣會同齊出現兩、三隻，野外的動物就是佮飼佇籠仔內的無仝，體格讚，毛色媠，目睭金爍爍，看--起來足健康--的。
伊的出現，煞變成社區的大代誌，有人來翕相，有人來畫圖，有人做記錄，若親像是逐家公家飼的精牲仔仝樣。社區厝邊頭尾的感情嘛因為這幾隻動物的關係，愈來愈好，連親情(tsiânn)朋友來相揣的時嘛相爭來看。
幾隻野生的果子猫，竟然會當帶來遮爾濟的快樂，蹛佇都市的人一定連做夢嘛想袂到有這種代誌，毋過伊真正確確實實發生佇阮的身軀邊。
向望有「福爾摩莎」之稱的寶島臺灣，永遠是咱佮野生動物生活的快樂天堂，嘛是囝孫世世代代安居樂業的好所在！(欣賞規篇作品)
44 部落記事――【田厝寮(千秋寮)――姨婆】 吳正任[(Ngôo/Gôo Tsìng-jīm)]
「田厝寮」佇外烏山的半山，離滾水沫(phueh)仔(養女湖)無偌遠。古早作穡人割茅(hm̂)仔草，佇園邊搭草厝予佃農徛(khiā)，號做「田厝寮」。後--來，音走精--去，煞轉(tńg)做「千秋寮」。
我細漢的時，捌佮阿母去田厝寮予姨婆請。姨婆𪜶兜的私佛仔生日鬧熱，刣豬刣羊以外，紅龜粿炊咧幾若床(sn̂g)：鹹--的、甜--的、塗豆餡、竹筍仔餡、扁豆仔餡、菜脯仔餡，隨在你揀。腥臊食煞，姨婆閣切一塊大封，予親情(tsiânn)朋友做伴手紮--轉去；真正是有食閣有掠。聽阿母講，當時姨婆𪜶兜，山坪[(phiânn)]幾若十甲，逐冬果子仔收著會驚--人。往陣有人三頓煠(sa̍h)番薯籤配豆粕仔醬，姨婆𪜶兜定定有白米飯配豬肉通食。冬尾神明生鬧熱欲請人客，年初就掠豬仔囝轉來弓，時到一隻一隻攏變大豬豚(thûn)。姨婆徛佇深山林內，遐無幾戶厝，閣離疏[(se)]疏--仔，毋過親情朋友嘛攏會相揣。大漢了後，我才知影「富[(pù)]在深山有遠親[(uán-tshin)]」這句話的道理。
聽講後--來姨婆佮𪜶後生搬徙去燕巢[(Iàn-tsâu)]徛。阿母講，姨婆從(tsîng)細漢就足疼--伊，阿母知影姨婆猶閣佇--咧，定唸欲去看姨婆，親像藏佇心肝底數十冬的心願。年初，我駛車載阿母去燕巢，四界探聽，問真久才予阮揣--著，我捾一寡仔果子仔去看姨婆。姨婆已經九十外歲--矣，人看--起來像猶精光，毋過記持已經失--矣。伊坐佇藤椅，面路仔我猶閣認會出。我細漢去田厝寮，伊才卌(siap)外歲，雙爿耳垂[(suê/sê)]肉用細節[(tsat)]茅仔桿揬(tu̍h)過耳空；閬(làng)幾若十冬了後，今(tann)伊已經失去記持，據在阿母倚去伊的耳空邊，大聲喝：「我是玉英--仔--啦！水雞潭再憔[(tsiâu)]𪜶某--啦！」姨婆兩蕊目睭霧霧，一直相[(siòng)]阿母，就是無反應，一身人愣(gāng)愣，坐佇藤椅，看起來都好好--咧，毋知致啥物症頭，按怎叫--伊，攏是神～神～神。
當初姨婆對平地嫁去山頂，逐工透早到暗作穡。查某人韭菜命，嫁雞綴雞飛，嫁狗綴狗走，日子一久，就燒烙(lō)--矣！毋過捌聽人講，初頭伊嘛有一屑仔怨嘆序大人，共伊嫁去遐作穡、食苦。有一擺，阿母拄著𪜶小姑仔，𪜶小姑學予阿母聽，講𪜶阿嫂嫁去「田厝寮」頭幾冬，家己編一塊「褒歌」咧唱：
番麥開花吐紅纓(iann)，是阮爸母無探聽；
共我嫁來烏山坪(phiânn)，抾柴擔水我上驚。(欣賞規篇作品)
2010-06-29 19:17:18阿妹 email給阿妹 前往阿妹的日誌
