2010
06260934中華民國99年全國語文競賽-﹝臺灣閩南語朗讀﹞文章57篇(4)
45 菜瓜棚仔跤 王朝源[(Ông Tiâu-guân )]
阿爸上愛褪腹裼(theh)，佇彼翕熱甲予人強欲擋袂牢的六月天。
菜瓜棚仔跤，囥一條竹仔做的䖙(the/thenn)椅，泡一鈷茶米茶，喙--裡咧食薰，收音機倚佇咧耳空邊，聽阿爸上佮意的歌仔戲，那聽那綴咧唱。
阿爸有歲--矣，田--裡粗重的穡頭做無法--矣，這幾冬來的熱--人，逐个熱翕翕的下晡，差不多攏是按呢過--的。
工廠的工課若無誠趕，我定定會提細塊椅頭仔，坐踮阿爸的身軀邊，看伊欶(suh)空氣、吐(thóo)白煙，聽伊講少年時擺，奢颺(tshia-iānn)的往過。
自我捌代誌了後，阿爸予我的感覺，是一个阿莎力、跋義氣的條直人。
佇庄仔內，阿爸毋但是上老輩的村長，閣是重大糾[(kiù)]紛的中間者。聽阿爸家己咧講，較早若是伊欲出來選村長，規庄仔內的人，無人敢和伊拚，會使講是百面贏--的。
一直到六冬外前，身體袂堪--得，阿爸才無閣佮人佇選舉場拚輸贏；毋過庄仔內，若有拄著啥物撨摵(tshiau-tshi̍k)袂好勢的大代誌，嘛是攏就愛請阿爸出面來撨。逐家攏呵咾阿爸，是古早時擺的魯仲連[(Lóo Tiōng-liân)]，頂港有名聲，下港有出名。
予我感受上濟，嘛是阿爸一世人，上值得囂俳的一層代誌。
阿爸講伊十三歲就綴阿公學作田，十五歲就佮庄仔內的播田、割稻仔班，四界去共人播田、割稻仔。
當當(tng-tong)下港的稻仔，黃甲會使收成的時，庄仔內就會組一班割稻仔班，落下港割稻仔趁錢。落下港一逝(tsuā)，上無嘛愛個外月，才有法度閣踏入門。十四、五歲的半大人囡仔，欲參大人做仝款的工課，毋但愛綴人會著陣，穡頭閣袂使做比別人較䆀。阿爸講，彼當時，若毋是存著輸人毋輸陣，輸陣歹看面的志氣，參[(tsham)]天拍天成，勇甲若牛的體格，欲哪牽會去。
天飼人肥泏泏(tsut-tsut)，人飼人一支骨。
阿爸一世人攏咧撋(nuá)田塗，伊對土地誠敬重，伊定定會提田--裡種作的過程，和其中所蘊涵[(ùn-hâm)]的哲理[(tiat-lí)]來教示--我。阿爸雖然無讀偌濟冊，毋過參伊講話，會使予我學著誠濟冊內底學袂著的智識。
作田仔的穡頭誠艱苦，不而過作田人的心內是樂暢--的；雖然天未光就出門，三更半暝才入門，毋過看著家己親手播的秧仔，一工一工咧大欉，彼款歡喜的心情，可能干焦古早時擺的田園[(tshân-hn̂g)]詩人陶淵明[(Tô Ian-bîng)]，才有法度了解。(欣賞規篇作品)
阿公故事講甲誠好，自細漢我就聽慣勢阿公的故事，而且阿公的故事逐擺都無相仝。我想可能是因為遮的功夫，所以人客時常為著欲加聽一點仔故事，就加留--一睏仔。故事聽煞，無買一个手錶轉--去嘛講袂過，總--是佇遮聽阿公講這个所在的神怪故事。但是，是真？是假？除了阿公之以外嘛無人知影。毋過阿公講--的親像是真--的，時間、地點、人物攏總有，攏袂予人(hōo lâng/hông)憢疑(giâu-gî)。細漢聽阿公講以前彼條護城河內捌蹛一隻會害人的鱉精。後--來行過彼條河的時就會驚驚，誠驚鱉精一(peh)--起來就會共我拖--落去。一直到今仔日，護城河予人改了模樣，河水清清，幾隻雁鴨[(gān-ah)]佇河面上泅水，毋知名的魚仔佇水底泅，花草媠媠，蕨(kueh)貓密密。景緻改變氣象了後，鱉精害--人的形象才漸漸無--去。
想起著阿公講故事的時，人客定定問伊這句「了後--咧？」就閣共我的心思搝(khiú/giú)倒轉--去--矣。
阿公啉一喙茶，慢慢仔講：「阿慧從(tsîng)做過彼个夢了後，一直感覺袂安心，所以想欲上訴。伊倩(tshiànn)人寫狀書(tsn̄g-su)佇城隍爺面頭前求情，希望會使網開一面[(bóng-khai-it-biān)]予阿勝早日投胎。伊一直跋桮，一擺閣一擺，攏總是笑桮。伊受氣是笑桮、伊毋甘是笑桮、伊悲哀是笑桮、伊踅踅唸仝款是笑桮，在場的人議論紛紛。伊哭講：『敢閣有天理？欲一个人活甲人毋成[(tsiânn)]人、鬼毋成鬼，厝內有某囝、有爸母，伊驚家己拖累厝內的人，伊毋是袂當食苦，毋是袂忍得疼，是伊犧牲家己救一家人。我嘛怨伊毋閣忍--落去，但是人都死--矣，為啥物無欲予伊好好仔去投胎？』阿慧哭閣較濟，一擲--落去嘛閣是笑桮。伊毋甘願，逐家徛佇邊--仔看，攏頕(tàm/tìm)頭講城隍爺誠靈聖，彼毋是機率[(ki-lu̍t)]的問題，有人佇邊--仔算，阿慧已經跋二十幾擺的笑桮--矣，彼笑桮予人看著攏笑袂出--來。
彼時陣天氣寒，外口落毛毛仔雨，逐家佇邊--仔欲勸伊走，伊雙手搝(khiú/giú)兩个囡仔，一个查埔、一个查某，跪佇遐毋走。最後逐家『案內(àn-nāi)』接載(tsih-tsài)袂牢，硬欲共伊拖走。伊大叫一聲，半空中彼當時拍落來一道爍爁(sih-nah)閃光，共規間正殿[(tsiànn-tiān)]拍甲光焱(iānn)焱，雷聲轟[(hong)]貫(kǹg)入去逐家耳空內，阿慧可憐的表情嘛落佇每一个人的目睭內。紲--落來伊一直磕頭，一直磕，一直磕，磕甲流血流滴，青石磚仔頂頭嘛親像予人鑿一凹(nah)。阿慧喙內咧吼，逐家驚會鬧出人命，趕緊共伊請--出去；伊兩手提桮、喙內踅踅唸唸有詞，閣擲出一擺......」(欣賞規篇作品)
昨暝，我又閣轉去阮兜的大瓦厝。
門口彼欉榕(tshîng/tsîng)仔足大欉，青色的樹葉仔發甲密密密。
榕仔的後壁，是兩間灶跤。只是用足下(kē)的牆仔圍--咧，會當相通、相看。
灶跤的後壁，是浴間仔。浴間仔的外口是一个長形的大水池，半暝的時陣所有的新婦攏佇遮舀(iúnn)水洗衫仔兼開講，定定笑甲足歡喜。
水池閣入--去才是阮兜的大瓦厝，倒手爿有三間房間，正手爿嘛有三間房間。倒手爿上尾間是阿媽的灶跤，閣來是細漢阿姑的房間，頭前間是阮兜六个人的總鋪[(phoo)]，爸爸排第四。
正手爿第一間是阿公阿媽的房間，閣過--來是阿公共人看病開藥的所在，有一个匾仔寫「文秀國術館」。阿公是一位功夫真厲害的師父，會曉拍拳、點穴，伊的藥粉仔會當治療足濟歹醫的病。阿公過身了後，爸爸六个兄弟就是佇遮抽鬮仔分土地。逐家攏照抽的結果來行，無人有別款話。
阿公的手尾――國術館放予五叔--仔，因為伊的身體上䆀，袂當出去揣頭路，所以逐家攏同意將國術館予--伊，包括一粒講是無價之寶的馬卵。
第三間是籠仔[(láng-á)]工場的工人蹛的房間。
中央的大埕是爸爸𪜶兄弟仔做伙煉膏藥的場所，也是𪜶練功夫拍拳頭的所在。佇阿公猶閣在世的時陣，姓莊的宋江陣就佇阮兜的門口埕咧練習。阿公過身了後，換五叔--仔佇遐教徒弟。大埕是逐家公家--的，天氣燒熱的時陣，就會當看著十幾个囡仔佇遐耍「過五關」、『跳房子』、『一二三木頭人』，猶有五六个新婦佇遐披衫仔、曝被單、曝棉襀(tsioh) 被； 過年前用竹篙曝肉乾、魚乾、煙腸(ian-tshiâng)，規个埕曝甲滿滿是。
大年大節的時陣，會佇大埕囥兩塊圓桌仔，每一个新婦會佇家己的灶跤煮菜，才捀(phâng)來埕--裡的兩塊圓桌仔。無排椅仔，大人囡仔攏徛咧食，對這桌食到彼桌。我上愛食米粉炒，二姆--仔的米粉炒真正足好食；媽媽攏會煮瓜仔雞，芳絳(kòng)絳，芳過幾若條街；三姆--仔做的八寶丸比菜市仔賣--的閣較好食。逐家食飯配話，連月娘有出來、無出來，都無人會發現；有放炮、無放炮，嘛無人會注意。
有一暝，阿媽講月娘去予天[(thian)]狗食--去。規个天暗摸摸，阿媽叫所有的囡仔去提鼎仔、水桶仔、鍋仔，共所有會當發出聲音的物件攏提出來挵，講是欲救月娘。阮逐家挵甲足認真，最後真正共月娘救--轉來，逐家攏足歡喜。(欣賞規篇作品)
冬節，想--著--的就是挲圓仔。佇學校佮學生囡仔做伙咧挲圓仔，逐家歡歡喜喜，有講有笑，囡仔挲甲足趣味。面滒(kō)著麵粉、挲的圓仔歪膏揤斜(uai-ko-tshi̍h-tshua̍h )。
我手--裡的圓仔挲甲圓圓圓，挲--啊挲，煞戇神--去......細漢的時陣，冬節暝，阿母共挲圓仔的物件攢(tshuân)予便，逐家圍佇桌仔邊挲圓仔，有時陣比看啥人挲較圓，有時陣比看啥人一改挲較濟粒，足好耍--的！挲好早早就去睏，想著明仔早[(tsái)]仔甜甜的圓仔，逐家攏乖乖仔睏。第二工透早，天色猶閣暗暗，就起來等食圓仔。彼種燒燒、甜甜的感覺，逐冬的冬節，攏會閣出現佇腦海中，是一種寒天透早特別的幸福，我嘛誠珍惜這份挲冬節圓的幸福。
會記得大約二十外冬前，彼陣我佇內山教冊，有一个禮拜六下晡，對山頂轉--來，我佮同事去市內看電影，暗頓食飽轉去到厝，看著阿母䖙(the/thenn)佇眠床，毋是寒天伊煞蓋著大領被，伊講伊足寒，人足艱苦。我佮小弟仔用被共阿母包--咧，抱入去車內底。佇車內，阿母的頭倚佇我的大腿頭頂，阿母無啥清醒，我一直叫阿母、阿母......伊久久--仔共我應--一聲。彼陣我足驚，小弟車嘛駛足緊，為著欲予阿母毋通昏--去，我一直共伊叫，一直挲伊的面。
這是我頭一改挲阿母的面，阿母的面毋捌咧保養，攏用清水戽(hòo)戽--咧爾爾；寒天會抹一種『百雀翎』的面油，彼就是阿母的化妝品，會使抹必(pit)--去的跤後蹬[(tenn)]、焦燥的手盤佮清水洗--過的面。阿母的面挲著誠清釉(iu)幽，毋過嘛是足濟皺痕[(jiâu-hûn)]，雖然阿母較無做粗重的工課勞力[(lô-li̍k)]，阿母攏是咧勞心。挲著阿母的面，我心內足急閣足艱苦，看著伊的目頭結結，一定是誠艱苦，我閣去看電影......誠不應該。
我目屎流--落來，滴佇阿母的面，伊足食力共我講：「莫煩惱，無要緊--啦！」伊講甲誠食力，我聽了後愈艱苦，手佇阿母的面一直挲，心內拜託天公伯--仔，佮佇天頂的阿爸，一定愛保庇阿母，予阿母緊好--起來，毋通予阿母遐爾艱苦。後--來佇病院檢查，阿母少年的時就欠營養，長期落--來，年久月深，毛病就足濟--矣！愛食較濟有營養的物件。阿母干焦應「我知、我知」。好佳哉，彼陣阮姊妹仔、小弟攏大漢--矣，會當有孝阿母，阿母的身體嘛漸漸勇健--起來。
這件代誌提醒--我，有孝阿母、關懷阿母就愛隨時做。這二十外冬來，我定定想--著就挲阿母的面、阿母的手，伊嘛笑笑仔講：「你咧創啥！」我就啦嘻啦嘻(la-hi-la-hi)講：「挲著誠好啊！」這是隨時就有的幸福。(欣賞規篇作品)
夜，tsih-tsih疊(tha̍h)佇天頂，干焦有幾粒星佇天頂燁燁爍(ia̍p-ia̍p-sih)，佇暗毿(sàm)的宇宙[(ú-tiū)]當中，流露[(liû-lōo)]出和諧[(hô-hâi)]佮寧靜！佇這款的暗暝，你的聲音、容貌佮笑容，甚且[(sīm-tshiánn)是每一款的表情，就親像幻影[(huàn-iánn)]出現佇我面頭前，但是伊已經離我真遠--矣！咱兩个中央隔一條茫茫未知的路，對你實在是有盡腹倒袂了的數(siàu)念佮感恩！病疼雖然帶走你平凡的性命，但是你的溫柔佮莊嚴[(tsong-giâm)]，是實實在在活佇我的心內，永遠咧發光！阿媽！
阿媽，雖然病疼剝奪[(pak-tua̍t)]你原本紅牙的面容，但是我永遠會記--得，你彼款對心內散發[(sàn-huat)]--出來的聖潔[(sìng-kiat)]。袂記得佇佗一擺你對病院倒轉--來，我佇學校規工都向望會當較早下課，心內是非常期待，想講欲趕緊轉到厝，閣像細漢的時陣仝款依倚佇你的身軀邊。
彼暗，我拍開你房間門的時，我就像墜落佇迷濛的夢境[(kíng)]當中，心內非常的毋甘，充滿無限徬徨(pông-hông)的感慨。看你趕緊用倒手共鼻仔掩(om)--咧，驚插鼻胃管[(kóng)]的怪模樣共我驚--著，用虛荏(lám)閣輕微的聲音共我講：
「乖孫，真忝(thiám)--矣--乎(honnh)？緊去食飯，通好去歇睏--一下！」
「阿媽，我知影，你嘛愛緊歇睏喔！」
接觸你關愛的眼神，我相信：活--咧就是真實，真實就是永遠！看你吊大筒(tâng)，鼻胃管佇你的身軀頂的折磨，看你無奈咧接受，無神論的我，趕緊求神佛會當賜[(sù)]恩福，予咱繼續編織猶未完成的故事......
遮爾濟年的歇睏日，我上愛佮你做伙坐佇眠床頂，干焦為著欲依倚佇你的身軀邊，閣做一个親像予人(hōo lâng/hông)倖(sīng)慣勢的囡仔。大部份的時間，咱攏談一寡仔生活當中趣味的代誌，或者是做伙唱臺語歌；有當時仔我心情無好，或者是生活無目標、感覺失志的時，你總--是關心--我，閣指導我行向另外一个方向，予我對人生的體會，有閣較濟的感悟。佇你的身軀邊，我就親像共我堅強的外衫褪掉，真自然享受佇一款完全無干擾、安祥的氣氛。這馬，你行佇人生上坎坷的路途，我希望會當佇你的身軀邊佮你做伴，用我的笑聲趕走你的病疼，求佛祖會當保庇--你，予你有重新向前的力量！(欣賞規篇作品)
教冊若像徛佇大舞台。若無--兩步七仔，下跤的觀眾朋友，毋是戇神覆(phak)佇桌頂補眠，就是偷看尪仔冊；較無規矩--的，會開始tshi-tshi-tshu̍h-tshu̍h tshih-tshih-tshuh-tshuh 咧開講，講一寡五四三--的；較惡質--的，可能會搬海反(huán)，坐袂牢(tiâu)，徛起來烏白趖(sô)，遮觸(tak)--一下，遐觸--一下。
感心的學生囡仔嘛有，有的是毋管偌吵，猶原是目神有彼種予老師看了想欲閣較認真教的光彩，親像燒烙[(lō)]的日頭，予老師有一種活--落去的勇氣佮拍拚的動力[(tōng-li̍k)]；雖然講甲喙角全波，嚨喉喝甲梢(sau)聲，烏枋寫甲手麻，跤徛甲發(puh)青筋，關節炎加腰痠背疼，毋過一切攏有價值、有意義，值得拍拚。另外閣有一款感心--的，若看同學傷吵，伊會起來喝聲，叫人恬恬莫吵；雖然上吵的聲，就是咧喝的聲，毋過有這號為老師鬥出嚨喉的體貼佮勇氣，嘛會當算做是老師的菩薩--矣！
一樣米飼百樣人，囡仔百百款，教冊的趣味勝過百百行！若去𨑨迌，總會希望體驗著無仝款的風景，引起佮平常時無仝的思考，會當欣賞著萬物的變化，會當發現著較特出的趣味。做老師--的，是世間上幸福--的，每一分鐘，攏是咧創作無仝的故事。一班三十外个囡仔，對無仝所在來，受過無仝的家庭教育，想法無仝，做法無仝，講話的方式無仝，交--出來的作業無仝，興趣的物件嘛無仝，致使每一个人發生的故事攏無仝。多元的人生，多元的變化，囡仔活佇這个多元的世界，老師就愛用多元的教法，來雕塑[(tiau-sok)]𪜶多元的未來。
雖然我只是一个小小的老師，毋過，我嘛是一个工程師，咧做一件比錢銀閣較有價值的性命工程，咧寫家己的故事，嘛咧寫學生囡仔的故事，甚至是咧寫咱人類的故事。人生誠奇妙，是一種循環，一項代誌，一个人，一分鐘，一秒鐘，對這个世界，攏有料想袂到的影響。
我的學生，未來猶會入去這个循環內底。我誠重要；𪜶閣愈重要。
課程的專業傳授是上基本--的，毋過佇傳授的過程，囡仔除了學著專業的智識來應付未來的考試以外，𪜶學著你對專業的熱情佮責任感，學著你教冊認真的態度佮組織表達能力，學著你佮人進退盤撋講話的智慧，學著你情緒[(tsîng-sū)]的控制，學著你對人的尊重佮對幸福的堅持。講--起來，欲學的物件實在誠濟，有形--的佮潛在[(tsiâm-tsāi)]--的，攏誠重要。(欣賞規篇作品)
51 𥴊仔店 蔡櫻華[Tshuà Ing-huâ ](影音檔)
細漢的時陣，媽媽定定𤆬(tshuā)我去揣蹛佇鹽埕埔的外公。外公開𥴊(kám)仔店，外口有掛一塊鴨綠色而且淡薄仔落漆的『菸酒專賣』圓形鐵牌仔。白光映映(iànn)的店內底啥物攏有咧賣，厝邊隔壁煮菜的時無鹽、無豆油，攏會叫厝--裡的囡仔走來買。𥴊仔店內底囡仔愛食的四秀仔嘛真濟：『橡皮糖』、『巧克力球』、含(kâm)仔糖、鹹酸甜、茶仔粉......攏有。每擺外公問我：「阿華，欲食糖仔--無？」我攏會真歡喜大聲喝講：「好啊！」媽媽會共我擋，講彼是外公欲提來賣--的，外公總--是笑講：「無要緊--啦！囡仔愛食就予伊食，無差彼幾箍銀--啦！」這个時陣媽媽就會佇邊--仔踅踅唸講外公傷倖(sīng)孫仔，外公只是笑笑摸我的頭。我因為有糖仔通食，感覺真滿足，心內嘛希望家己大漢的時陣會使佮外公仝款開一間𥴊仔店，予我的孫仔有糖仔通食。
彼个時陣𥴊仔店真時行，干焦外公厝附近就有兩三間，我佮小弟、阿芬猶有潘--的攏會走去外公厝後壁彼條巷仔的𥴊仔店買「『養樂多冰』」，熱天食真正是透心涼，予人心花開。嘛會行到鹽埕國小閣過--去的巷仔內的𥴊仔店抽獎，若是提著『集字獎』，仝款的字總--是鬥袂峇(bā)，一直鬥袂著『美」、『少』、『女』、『戰』、『士』抑是『閃』、『電』、『霹』、『靂』、『車』。每擺對外公遐烏西--來的銀角仔，總--是投資佇彼註死永遠抾袂著的第五字。
我嘛真佮意去阮兜後壁巷仔內底彼間𥴊仔店。有時共頭家娘講我欲十粒糖仔，伊就會對櫥仔頂提紅色蓋的桶仔落--來，蓋拍--開，對內底提糖仔，一粒一粒囥佇我充滿期待的手內，我心肝內嘛綴咧算，一粒、兩粒......佇我的手內疊一粒細粒山，然後我就足歡喜共糖仔囥入去褲袋仔內底，撏(jîm)十箍予頭家娘。𥴊仔店外口有一台大冰箱，內底有真濟枝仔冰，我佮小弟躡(neh/nih)跤尾，共頭直欲栽入去冰箱內選揀想欲食的冰。嗯(ngh)！梅仔--的看--起來真好食，啊毋過芋仔嘛袂䆀--呢！「正陽，你買梅仔我買芋仔，按呢就攏食會著--矣！」做姊姊的我就按呢壓霸幫替小弟決定，然後那行那食轉去厝。(欣賞規篇作品)
我實在真毋願行上這條不歸路，翁猶緣投，囝猶細漢，爸母猶健在，這欲叫我怎樣離開跤？七爺八爺請你莫相趕，牛頭馬面你莫嚇(hènn)驚，喔(ooh)！耶穌你嘛來--矣，我知影天國近--矣！平常我信你神愛世人， 猶毋過這時陣看著你， 我是驚甲咇咇掣(phi̍h-phi̍h-tshuah)；我哪會舞甲這款地步--咧？
人講第三查某囝食命，這敢有影？有--啦！傳說[(thuân-suat)]中的水雞土--仔𪜶某就是，心肝好、腹腸闊、袂計較，天公嘛來鬥相共，尾--仔過著富裕[(hù-jū)]的好日子；西方三姐妹囡仔古嘛是，大姊嫁予國王做『pháng』的師傅，二姐嫁予國王的總舖師，逐工食腥臊，第三--的嫁予國王，生媠噹噹的囡仔，過快樂的日子。現實中阮大嫂嘛袂䆀，人巧、讀冊順利，考著師專，頭路便便，閣嫁著好翁，食好做輕可，好命ni-ni；做老師二十外冬，會使退休--矣，閣去讀碩士，是上新的臺文所，研究臺語喔(őo)！伊實在是我的好模範。平平是第三查某囝，哪會天差甲地？這就愛怪我一步錯、步步錯--啦！
彼年師專考無牢，袂曉計畫去補習--一冬，堅持讀新娘學校──家專幼兒[(iù-jî/lî)]保育系。雖然厝--裡散赤，爸母疼--我，予我開大錢，畢業揣頭路，才知代誌大條--矣！固定的頭路歹揣，做囡仔頭王月給[(gue̍h-kip)]下(kē)，做國小代課老師雖然逐年愛考試，毋過放假固定，薪水袂䆀，自按呢做幾若年，這是我無煩無惱、無憂無愁查某囡仔時代。啊！實在足懷念，足懷念--的。唯一的致命傷是無在額[(tsāi-gia̍h)]，予人(hōo lâng/hông)看輕。
「男大當婚，女大當嫁。」我去煞(sannh)著同事紹介的「科技[(ki)]新貴」男朋友，我誠欣賞伊的電腦功力，誠佮意伊的緣投好看，除了遊山玩水，開講踅街之外，逐擺伊若來， 阮攏關佇房間仔內， 嗤舞嗤呲(tshi-bú-tshi̍h-tshū)袂厭𤺪[(ià-siān)]。爸母攏講：「按呢毋好--啦！」「按呢傳--出去足歹聽。」
愛--著較慘死，親情(tsiânn)朋友、兄弟姐妹並無贊同，干焦我目睭去予蜊仔肉糊--去，堅持綴時行──自由戀愛。嫁了才知苦，大家(ta-ke)真勥(khiàng)跤，先生是有孝，毋過我講話無人信篤(táu)，佇厝--裡無地位。因為我無穩定的工課，結婚前的頭路大家叫我辭辭--掉，翁仔某同齊拍拚電腦事業。翁婿是做工程師的料，人古意，功夫好，修理電腦逐家攏呵咾。毋是做生理的範，喙水䆀，歹勢收數(siàu)，景氣好猶拍會過，景氣䆀，就負債累累。我真後悔，同期的代課老師攏浸甲變正式--的，干焦我無堅持，這陣才予人看無目地。(欣賞規篇作品)
53 鐵路宿舍的記持 李淑貞[Lí Siok-tsing ]
除了大姊佮二姊佇彰化縣和美拍鐵山出世以外，阮其他五个囡仔攏佇彰化市出世。印象中我蹛過『me-lí-á』枋厝佮鐵路宿舍，這兩間厝留予我誠濟記持，尤其是鐵路宿舍，是心中永遠的疼。
每一擺若是轉來我的故鄉彰化，攏會經過鐵路宿舍的天橋。
定定攏會經過這條往鐵路宿舍的彰美路天橋的入口。天橋正手爿是鐵路局工務段辦公室，倒手爿就是一个小型社區──鐵路局工務段佮機務段的員工宿舍。大概蹛兩百戶左右，分在額[(tsāi-gia̍h)]--的佮臨時工，厝的坪數，當然佮階級有關係。
阿爸彼陣的職務是『看柵工』的臨時工，阮蹛--的就是獨身仔的宿舍。
阮宿舍的位置是佇斡(uat)三條巷仔的巷仔口，一排四間透天厝的第二間，記持中這間才七坪的二樓透天厝，影響我的一生。這間厝有歡喜、有悲傷，因為阮阿爸予車挵--著過身。為著無愛予人(hōo lâng/hong)看輕，阮勇敢面對未來，嘛比人較早體會社會的冷暖。
『看柵工』毋是阿爸第一份較固定的收入，雖然，臨時工薪水無濟，毋過是爸母建立家庭主要的經濟來源。記持中爸母定定共親情(tsiânn)借錢，爸母嘛真守信用，準時還錢，阮三頓嘛食甲袂䆀，嘛儉錢予阮讀冊，予阮讀甲毋讀為止。
我想：天下間的爸母攏仝款，一世人辛苦攏是為著囡仔，阿爸嘛是。
阿爸佇咧值夜班的時發生意外，毋過工務段認定阿爸是破病過身，無資格閣蹛宿舍。阮陳情[(tîn-tsîng)]無效，經過兩年，被逼搬--出來。
後--來阮買厝，買佇離鐵路宿舍五百公尺隔壁條大路邊，大裕[(Tāi-jū)]食品公司對面的辭修[(Sû-siu)]路。這間厝頭期款，是用阿爸的粟(tshik)仔會佮撫卹(sut)金納--的，賰--的分三十年貸款，每個月納五百箍。阮總算有一間屬於家己的厝，予外人感覺真意外，因為阮是三級貧民，哪有才調買厝？感謝爸母佮大姊遮辛苦。
這間厝阮一直蹛到這陣，上蓋遺憾就是阿爸攏無蹛--過。
離開鐵路宿舍已經三十六年--矣，真想欲知影厝邊仔敢攏好過？對面的阿婆、猶有佇阮上困苦的時陣，幫助--阮的李--先生......這幾年攏無相揣。溫暖的厝，這馬毋知變甲按怎？是毋是猶有阮一家伙仔做伙拍拚的形影？猶有阮失去親人啼哭的聲音？(欣賞規篇作品)
現代人對「郊」(kau)較無熟似，毋過佇百外年前，「郊」是真普遍的組織，伊是對英語guild gould 音譯--過--來--的，用現代話來講，就是商業同業公會。古早的小生理人開店，大生理人開行(hâng)，開行的人會參加同業的「郊」，所以有人將「行、郊」做伙講，「開行郊」就是開大商行，做大生理的意思。
鹿港佇乾隆(Khiân-liông)嘉慶(Ka-khìng)年間，是臺灣上蓋興旺的商港，當時當地有一句話講：「頂到通霄(Thong-siau)，下到瑯嶠(Lông-kiau)。」就是講鹿港的貿易區，向(ǹg)北到通霄，向南到恆春(瑯嶠就是現此時屏東的恆春)。因為商業發達，伊當然有真濟的大郊，有閣較濟的大郊行，人稱「八郊」(pat-kau)，就是有八[(peh)]个郊。佇1815年，重修威靈殿[(Ui-lîng-tiān)]的時，就有八郊敬立的牌匾(pâi-pián)，現時咱知影這八个郊就是泉郊、廈(ē)郊、南郊、糖郊、𥴊(kám)郊、油郊、布郊佮染(ní)郊。泉郊專門佮泉州做生理，廈郊對廈門，南郊對廣東、澎湖佮南洋，南郊較有外國貨，親像玻璃、水晶、目鏡、時鐘等等新奇的物件。糖、油、布、染就是做糖、油、布佮染料的進出口，糖是彼陣真重要的出口貨，有一句話講「臺灣糖籠(láng)──有去無回頭」，規船載的糖籠佇中國卸貨，空船轉--來真拍損，船空身嘛較會幌，就載大杉大石來硩重。大杉會使作上等的建材，大石嘛會當作宮廟大石柱，正正是「摸蜊仔兼洗褲」，「來去拍，加趁幾若百」。這款大石條(liâu)嘛有另外一个名稱，叫做石重(tāng)，就是現代的『壓艙石』。𥴊郊就是做南北貨的生理，南北貨攏是焦料，會使囥佇𥴊壺仔(kám-ôo-a)內，日--時捀出來排佇店面，排到亭仔跤，暗時就捀入去店內，真方便。現時迪[(ti̍k)]化街的南北貨，佇日本彼个時代就是叫做講「𥴊仔貨」。
人講「千年田，八百主」，現時郊的會所攏無--去，干焦有一間郊行留--落來，伊就是「日茂[(bōo)]行」，這間行是泉郊的頭，泉郊閣是八郊之首，二十年前去參觀，是欲倒欲倒的古早厝，經過後--來政府出大筆錢整修，佇2007 年完成，閣展現出當年的氣派，嘛會當看出彼當時商業活動的交易(ka-ia̍h)，真值得逐家好好仔參觀。(作者原稿)
「紅柿好食，對佗起蒂[(tì)]？」凡勢(huān-sè)你毋捌聽過這句話，毋過你一定愛了解，「起蒂」諧[(hâi)]音「起致」，就是代誌的原因、物件的源頭，紅柿當然是對柿仔樹欉來--的，所以伊的意思是講咱人著愛「飲水[(ím suí)]思源頭，食果子拜樹頭」，著愛「飲水思源，知恩報本」。
按呢咱市面的紅柿，伊的源頭又閣佇佗位咧？這个源頭就是新竹縣的新埔鎮。這个所在是好地理，每年九--月，紅柿採收的時陣，九降(kàng)風會準時來報到，柿農共採收的柿仔披佇厝埕，予日頭曝，予九降風吹，予𪜶變做甜閣𩚨(khiū)、特別好食的柿粿，𪜶的柿粿嘛名聲迵(thàng)規臺灣，錢水趁袂完。新埔柿粿的行業已經有百外年--矣，毋閣現代的柿農毋但有現代的種作技術，閣有現代行銷[(hîng-siau)]的手法，將柿粿行業當做當地的文化來經營。每年九--月，紅柿大出的時陣，𪜶就舉辦柿粿的文化活動，鬧熱滾滾，袂輸咧迎媽祖--咧，予市面繁榮，予柿農橐(lak)袋仔飽滇(tīnn)，會使講紅柿若出頭，新埔的錢水滿街流。
這予我想起另外一句流行通臺灣的古早話──紅柿若出頭，羅漢跤仔目屎流。那會差遐濟咧？原來古早時代，唐山羅漢跤仔來臺灣揣生路，𪜶攏是做散(suánn)工，做苦力(ku-lí)，做毛管(mn̂g-kńg)出汗的工課。到九--月、十--月，紅柿出頭的時陣，漸漸進入寒天的季節，市面較無工課，無工就趁無錢，𪜶腹肚會枵、身軀會寒，今年的寒天毋知度會過--無？想到遮目屎就暗暗仔流、暗暗仔流。
佳哉時代無仝--矣，現代觀光客來到新埔，看著新埔的紅柿出頭，顛倒是喙瀾水一直流、一直流。(作者原稿)
56 深深數念的古早味 陳憲國[Tân Hiàn-kok ]
這陣(tsit-tsūn)臺灣滿四界攏有咧賣池上便當；毋過食來食去，猶是感覺攏無池上車頭月台的便當遐爾仔好食。以早佇花蓮食頭路的時，有真濟機會坐火車經過池上，攏會盡量時間節(tsat)好勢，去到池上買便當食，彼款古早味便當的滋味，到這陣猶記踮頭殼底。
講著池上米便當就愛先講著池上米， 伊的粟種(tshik-tsíng)是佇日本時代對日本山形縣[(San-hîng)]縣引進--入來的蓬萊米。因為池上地區的環境真適合種稻仔，當時的池上米捌由臺灣總督府送去東京進貢日本天皇，可見伊的品質有夠讚--的。到這陣池上地區的稻仔田猶是較無受著工業污染，池上米猶是品質保證的品牌。
記持內底的池上便當攏是仝一款，便當盒仔是用柴片仔做--的，飯當然是用池上米煮的白米飯，菜色有兩塊精(tsiann)肉、半爿煙腸(ian-tshiâng)、半爿滷卵、兩片醃(am)瓜仔、蝦仔糋(tsìnn)、筍絲、青菜等等。
池上便當到今(tann)已經有數十年的歷史，聽講這陣較出名--的有三間，口味精差無偌濟，無論按怎，若有機會去臺東，毋通袂記得去試看正港的古早味——池上便當--喔。嘛會當來參觀一間真出名的池上飯包博物館，伊詳細記載池上便當久長的歷史。
池上的位置是佇花蓮縣富里鄉的南爿(pîng)，是臺東縣上蓋北的鄉鎮。伊地名的由來是因為伊拄拄佇大坡池的北爿，才會有「池上」的名。大坡池嘛有人講做大埤(pi)，以早有50外公頃(khíng)，是濟濟魚蝦的出產地，這陣大概干焦賰28公頃的跤兜(kha-tau)，已經漸漸轉變做是花東縱谷(tshiòng-kok)出名的天然濕地，水面不時會看著有水鳥經過，這是池上鄉上媠的自然景觀。
池上除了有誠(tsiânn)大片的稻仔田，生產出名的池上米以外，目前閣有大約九百外公頃的農地，休耕的時陣攏種規大片的油菜，每年冬天的「油菜花季」就會吸引千千萬萬的人客來遮觀光。可能真濟人會想講油菜哪會是菜咧! 其實油菜原本就是一種青菜，食著嘛袂歹食，毋過因為油菜有較臭賤，足好種--的，閣足𠢕開花，佇咱臺灣就用來當做稻仔田的綠肥，所以便若有稻仔田的所在，通常就會有規大片的油菜花，全臺灣就算「池上鄉」上蓋著(tù)名。雖罔油菜花並無偌大蕊，毋過千千萬萬、規大片的油菜花，看著猶原嘛是誠媠啊！(作者原稿)
宜蘭頭城的搶孤，是佇每年咱人(lán-lâng)七月底，欲關鬼門的這暝舉辦，是真趣味、真鬧熱的宗教民俗活動。
活動前幾工，著愛搭一座懸拄天的孤棚，棚跤是十二枝大柱，柱懸三十九尺，柱身嘛是成人尋(tsiânn-lâng-siâm)的大杉(sam)，棚枋捅(thóng)出大柱六尺外，這叫做「倒塌(tò-thap)棚」，因為疊[(tha̍h)]佇頂懸的棚枋比棚跤閣較闊。棚頂閣徛十三座孤棧(koo-tshián)，掛鰇魚、鴨鯗(siúnn)、臘肉這類的焦料，孤棧懸十外丈(tn̄g)，上頂頭插一枝順風旗，幾里外遠都看會著，人佮鬼攏看會著，攏會來搶孤。
搶孤頭一步就是對棚跤𢯾(mooh)大柱上棚頂，棚柱抹牛油，是滑溜咻(ku̍t-liù-siuh)，搶孤的人就五个人一隊，用人疊人閣縛大索的方式，將一个人沿棚柱托(thuh)到棚枋下跤，這時這个好漢就愛雙手插入棚枋的空縫，雙跤吊半空中，慢慢仔吊到棚枋墘(kînn) ， 展一下飛天掛角(hui-thian-kuà-kak)的工夫將人幌上棚頂，這步上蓋硬篤(ngē-táu)，毋是每一隊攏會當幌--起去。
頭一个幌上棚頂的好漢就趕緊閣(peh)孤棧，搶彼枝上懸、上颺(siōng iāng)的順風旗，聽人講這枝旗仔若插佇船頭，就會魚蝦滿船載，所以有船頭家會出懸價來買這枝旗。
搶孤這个活動，咱毋但普渡陰間的好兄弟，嘛會將祭品留予陽間的人分來食，對遮會當看出咱的人善良、有同情心的好品行。(作者原稿)
【金山老街來𨑨迌】 邱文錫[Khu Bûn-sik ]
你知影臺灣上蓋好額的庄頭佇佗位--無？土想[(thóo-siūnn)]嘛知，臺北縣的金山鄉--啦！因為伊名叫金山，當然是金銀滿四山。
毋過專家共咱講，金山原底有平埔名，後來用平埔名的音，煞有「金包里」這个漢名，日本人來將伊改做「金山」。原來伊無出黃金，伊出名的是鴨肉。
無黃金，有鴨肉嘛真好。來到金山舊街，鴨肉店有十外間，人講：「濟戲濟人看。」人濟店就濟，有錢公家趁--嘛！
毋著--呢！逐間的菜盤攏是對外口捀(phâng)--入來，原來十外間店攏是仝一个頭家，頭家生理好，閣稅(suè)十外間店面，攏是排椅桌食飯，料理是中央廚房供應，生理好甲這款，莫怪金山鴨肉是一名透京城。(作者原稿)
因為寫的東西不是在回應文章, 所以就放在留言板了, 您說不會用, 還不是很快就看到了, 哪像我, 有朋友留言給我, 等我看到的時候, 時間都已經過了一年多了, 最少的也過了好幾個月了. 我才真的不會用blog, 是最近四個月有花時間在這一個blog上面, 所以過好久才看到留言的情形就沒有再發生了, 加上, 在這個blog留言或回應都會有email寄到我的信箱去, 所以, 除了, 我沒有開機上網外, 基本上, 現在只要一有留言或留話就馬上知道了:)
笑話是,昨晚我拿著老查居士的書(專程要人去台灣買的),跟列印一篇夢生
的台語語文競賽來唸給侄子聽(大我幾歲,任職香港官職),我一直用台語唸夢生的字,遇到不懂的字就說:[跳過],老查居士不懂的就說[我再研究].過1小時后,侄子有點不耐煩說:[姑姑,妳說要提倡,我聽來聽去妳不是跳字就是略過.是不是請姑姑先搞懂再來提倡,不然人家會說你姑姑是不是腦袋有問題?]我自已覺得很笑ㄝ
~~~~
足用心
來遮讀台語文