2010
03301937臺灣閩南語書寫文字講解與寫作序
序
〈臺灣閩南語書寫文字講解與寫作〉是我佇2000年2月13日開始寫的，總編輯的時間是3157分鐘。
2000年是我當咧走全省師資訓練演講的彼一冬，為著欲演講，佇台語文[今作臺語文]猶未真正足濟人實際寫的時陣，又閣無欲像人干焦寫一个大綱耳耳[今作爾爾]。所以就共欲演講的物件全部用台語文寫落來。主要的目的是希望借著我的演講稿，予逐个人會當實際了解台語文嘛是會當寫落來。另外，嘛希望真正對台語文有興興的人會當透過我的演講稿學著實際上的寫作。
當然，因為過去我嘛捌參加過大大細細的研習營。其實，大部分[今作大部份]的研習差不多攏過成禮拜過就攏袂記得甲差不多矣。共演講稿全部寫落來嘛是為著予研習營的 未來母語教師會當透過我的演講稿來複習研習的內容。
會記得，佇彼時陣，逐遍的台語的研習營研習手冊若有裝訂成冊，一定是我的講義佔上濟頁數而且嘛干焦我一个人用台語文寫的。因為上少頁數的人可能是A4一頁的演講大綱耳耳，啊我這篇全部攏總是58頁的一本A5版面大的手冊[1]。
其實，自有網路以來，我就足想欲共我的物件送上網路，毋閣[今作毋過]，我只要拄著上網的代誌就完全袂曉。佇網路上，十幾冬來干焦揣會著我彼篇〈對半條蕃薯[今作番薯，佇地名才作蕃薯]講起〉耳耳。因為我使用的拼音系統是當初時教育部的TLPA系統，佮《台灣文學研究工作室[5]》所用的教會羅馬字的系統無仝。加上我的文章大部分攏有使用著音標的字形。想著講我的系統和人無仝，可能會受著排斥，所以就無閣傳送我的物件予《台灣文學研究工作室》矣。
十年矣，時間過了實在是足緊，教育部的拼音系統對TLPA換做「台羅字[2]」，嘛有部定的台語用字700字[3]出來矣。
十冬矣，教育部早期的用字嘛和這馬的700字有出入。
十外冬以來，我寫台語文一直是用母語使用者的語感做第一个考慮的觀點。一直攏對教育部的用字無法度接受，佇我的文章內底加減攏會去講著這个觀點。
自寫台語文以來，我攏無欲去講理論愛按怎去做。我攏直接共我的理念表現佇我的文字頂懸，佇寫作的過程中，時常會出現著實驗用字，大部分的實驗用字的出現攏是用形聲字抑是會意的構字形式來鬥字的，像夯字。嘛有因為拍字去拍毋著去，像怹[今作字，是電腦造字，無安裝字體無法度顯示]，感覺這字會當提來做台語的佗一字，就佇實際上寫作的時共用起去。
因為時常咧用實驗字，所以會看著我無仝篇的用字無一致。上好的例就是腹肚枵(iau)的枵字。毋是我毋捌枵字，是寫作的時考慮讀者敢讀會出來的問題，所以就開始用實驗字。懸(kuân)字嘛仝款。
用這馬的眼光來看，自從部定700字了後，我的用字就已經退時矣。毋過，有一點予我歡喜的是700字內底有大部分是我咧用的實驗用字。像欲(beh)字就是。我一開始寫台語就無用卜字，是用語感來選用欲字。
最後，我想，我的台語文干焦會當做一个文獻的見證。希望逐个會當歡歡喜喜寫台語，予台語文生湠愈湠愈旺。
上尾就用林央敏先生所寫的話[4]做結束：
頭戴台灣天，跤踏台灣地；
喙講台灣話，手寫台語文。
以及
蕃薯落塗毋驚爛，只求枝葉代代湠。
By 夢生 2010.03.30
2018.06.30 加註今作
[1] 因為我討厭a4的版面，攏需要特別的冊架仔才會當收藏，所以我攏會共我的物件排版成手冊的形式，包括目錄等等，〈臺灣閩南語書寫文字講解與寫作〉印出來是64頁的手冊。
[2] 「臺灣閩南語羅馬字拼音」簡稱叫做「台羅字」。請參看教育部的臺灣閩南語羅馬字拼音方案和《臺灣閩南語羅馬字拼音方案使用手冊》。
[3] 攏總有三批推薦用字，合起來是700字。請參看教育部的公布臺灣閩南語推薦用字(第1批)<sub>[點超連結會自動下載]</sub>佇及臺灣閩南語漢字之選用原則、臺灣閩南語推薦用字(第2批)<sub>[點超連結會自動下載]</sub>、臺灣閩南語推薦用字(第3批)<sub>[原稿已經揣無矣]</sub>、臺灣閩南語推薦用字隨手冊及字卡、臺灣閩南語卡拉OK正字字表及內容說明佮臺灣閩南語按呢寫。
[4] 內容是記佇我的頭殼底，用字和用詞可能和原文有出入。
[5]這馬原網頁佮網站已經攏揣無矣。(201８.06.30增)
沒有留言:
張貼留言