2010
03271951臺灣閩南語書寫文字講解與寫作(1)
一、起頭
「萬事起頭難」這句話講了無毋著，尤其是咱開始欲來寫台語[今作臺語]文章的時陣才會發現著其中的問題較濟過猫[今作貓][1]仔毛，真正會予人sa1[今作捎]無寮仔門。因為寫作是用文字來表達咱所欲表達的意思，用文字就是語言的紙面表現形式，其中所產生的問題有真濟款，就予咱逐家來做伙思考。
二、名稱
(一) 文字
首先，寫作就是愛用著文字，咱來了解啥麼是文字，文字就是用來表達語言意義的符號，因此，廣義來講，只要任何形式的符號，只要是用來表達語言意義攏會使講是文字，咱上清楚的華語方塊字是表達華語所使用的文字；韓文就是用漢字和諺文符號透濫咧寫；日文就是用漢字和假名透濫咧寫；英文就是用二十六個[今作个]字母來寫；歐洲各國攏是以羅馬字為底經過小可仔修改裝飾了後來寫；阿拉伯和蘇俄有in1家己的文字形式；甚至華語的ㄅ、ㄆ、ㄇ嘛是會當講是文字的一款形式，只是一般攏叫伊是注音符號，無認為伊是文字，這是因為注音符號制定的目的是用來標注漢字的聲、韻、調。因此，咱會使了解符號是毋是文字是佇伊的用途來決定，凡是用來表達語言的符號就是文字，無用來表達語言的符號一般攏無認為是文字，佇遮[2]咱會使看著因為符號的用途是用來決定符號是毋是文字，因此文字符號和注音符號就會有轉換用途的可能。換一句話講，文字符號若是純粹用來使用佇標音功能就是注音符號，注音符號若是用來表達有意義的語詞就會使當做文字。
(二) 寫作
寫作就是運用文字符號來表達語言背後所欲代表的意義來予讀者會使來了解寫作者所欲傳達的觀念及思想。因此，作者和讀者之間需要借著文字來溝通，文字使用就牽涉著語言的使用。所以，作者和讀者之間一定愛共同會曉相仝的語言。就親像我欲寫台語文來講，我一定愛思考著的觀點是，一、看我的文章的人一定愛會曉講台語；二、看我的文章的人一定愛會曉漢字；三、看我的文章的人愛看識[今作捌]我所使用著的拼字系統；四、看我的文章的人愛看識我的文章；五、看我的文章的人愛會當容易了解我欲表達的意思；六、看我的文章的人愛會當接受我所使用的文字；七、看我的文章的人只要受過現在義務教育了後就會當看有我的內容，並無需要十外年的專業訓練就會使看識我的文章。
三、台語文寫作抵著[今作拄著]的問題
寫作既然愛用著文字，所以一切的問題攏是文字採用的問題。簡單來講是採用漢字和拼音系統的問題。另外就是工具的問題。關係工具方面的問題請參考附錄一的文章。
1. tui3「我的」的「的」字講起
這字「的」是台語文常用字，這篇文章寫到遮，「的」字已經用五十五字的「的」，咱就會使知影，這是有偌ciap8[今作捷]用，佇使用頻率來講是台語文的第一名。但是咱會發現著這個[今作个]「的」字，佇台語文寫作者來講，用字就真濟款，上蓋無有十種以上，尤其咱更加意外的是大部分[今作大部份]的台語文寫作者攏無欲用「的」，in1所使用的理由簡單一句話毋是「的」無「e5」的音，無就是政治因素的問題。
大部分的台語文寫作者無採用「的」的原因攏是講這字「的」佇文字的聲韻來講無「e5」的音，「的」的音是「目的」和「無的確」的「tik4」，極加佫[今作閣]加上「端的」的「tiah4」，若用做「e5」，伊的音韻未合[今作袂合]。
我的看法：咱未凍[今作袂當]否認字形類似，怹[今作][3]之間的音嘛有關係，但是我認為某一個字形無某一個音是淡薄仔過分的講法，我所知影mai3[今作莫]未凍寫「勿」的原因只是講伊的字形無ai的韻而已，並無真好的說服力，按呢的講法暗示漢字是真強的表音文字，意義只是附屬品而已，已經未記得文字的意思和音是上下文所產生的，以華語來講，破音字「和」有ㄏㄜˊ(和氣)、ㄏㄨㄛ．(暖和)、ㄏㄜˋ(附和)、ㄏㄨㄛˋ(和麵)、ㄏㄢˋ, ㄏㄨˊ(和牌)六音四韻；「著」有ㄓㄜ．(坐著)、ㄓㄨˋ(名著)、ㄓㄠˊ(著火)、ㄓㄨㄛˊ(附著)、ㄓㄠ(著急)五音四韻是上好的例(以上兩例引自教育部國語辭典光碟版)。下面我找出華語有「勺」字形的字(用電腦找[今作揣]真方便，這只是一個例，但我相信毋是特例)：勺ㄕㄠˊ、杓ㄕㄠˊ、芍ㄕㄠˊ、豹ㄅㄠˋ、瓝ㄅㄠˊ、趵ㄅㄠˋ、釣ㄉㄧㄠˋ、扚ㄉㄧㄠ、尥ㄌㄧㄠˋ、魡ㄉㄧㄠˋ、妁ㄕㄨㄛˋ、灼ㄓㄨㄛˊ、酌ㄓㄨㄛˊ、圴ㄓㄨㄛˊ、彴ㄓㄨㄛˊ、汋ㄓㄨㄛˊ、的ㄉㄜ．/ㄉㄧˋ/ㄉㄧˊ、旳ㄉㄧˋ、玓ㄉㄧˋ、虳ㄉㄧˋ、靮ㄉㄧˊ、馰ㄉㄧˋ、約ㄩㄝ、礿ㄩㄝˋ。和「勺」仝音的只有二字；仝韻三字；加上ㄧㄠ算仝韻就七字；仝聲母只有一字；ㄨㄛ韻應該無仝韻，有六字；ㄧ韻有六字七音；ㄩㄝ韻有二字；輕聲獨立一韻有一音。因此有「勺」字形有二十四字十三音六聲母(含零聲母)六韻，奇怪的是無第三聲，仝韻的字只有38%。我想干單[今作干焦]憑字形「勺」欲按怎做有力的說服面頂二十四字十三音六聲母六韻之間的音韻關係？如果從「勺」尚有破音字ㄕㄨㄛˋ(我相信真少人知影)來解說，就會凍[今作會當]講仝韻的有63%。但是「勺」本身的二音佇韻上的關係欲按怎用字形本身來做強佫有力的說明，另外37%無仝韻的字欲按怎來說服(用「的」和「約」來硬拗？)？若真正會凍自字形來正確判斷，按呢面頂二十四字做亂數排列後應該會凍正確注出來每一個音才對[今作才著]。干單用一個字形的音來做理由，就予咱佇文字的使用上縛稠稠[今作縛牢牢]，未記得文字是語言記錄的工具，咱是使用文字來表達語言和思想觀念，毋是用文字來縛家己的。(引自寫予新竹師院 董忠司 教授的email(1999.08.14))
另外有小部分的人無採用「的」的原因是講「的」是華語才用的，in講若是採用『我的、你的、他的』的『的』是受著教育制度毒化siunn深[今作傷深]的人，因為跳未開毒化所留落來的毒物才使用『的』。
針對這點我就開始查證字典─1907日台大辭典「的」；1913廈門音新字典「丌/亓/其」；1931台日大辭典「的」；1954沈富進彙音寶鑑「的(e7)」；1957王育德台灣語常用語彙「的?」；1972黃有實台灣十五音辭典「?」；1984普通話閩南語方言詞典「兮/的(俗)」；1994胡鑫麟實用台語小字典「的」。
真明顯的代誌是「的」已經使用一百冬以上[4]，相信和現在的教育制度無關係。
因為無採用「的」的人就開始另找別字 (借音、借字、借外文) 或者另造新字 (加偏旁、加筆劃[今作筆畫]、改字形) 來使用，所以才產生十種以上的寫法。嘛因為按呢，雖然我相信用「的」來寫台語文「我的、你的、爸爸的」的時，人未共我的「的」讀做 [tik4]，變成「我tik4、你tik4、爸爸tik4」，但是我早期的台語文的「的」字為著欲和華語做區別就用音標式全形字無標調的「ｅ」來寫，以方便人會當看出來我所寫的是台語文毋是華語。
2. 對用「个[5]」字的看法
實際上我個人一下開始就真排斥「个」字，這個字是「個」的簡寫，而且字形無穩重的感覺，另外字形像一支箭，尤其將伊身兼所有的「個」(除「個人」等讀ko3以外)和「的」的意思，使得「个」成為非常常用的字，滿篇文章攏掛了箭頭。我曾經 和洪惟仁 先生為著這字自暗時點外辯到三點外，最後伊無法度才講ah8毋是[今作也毋是]伊發明的，人原本就按呢寫矣。我認為當初寫台語文的人本身的教育程度以及文字造詣(ge7)攏無好，只勉強識幾字a0，因此咱時常會發現「解讀」以早的歌仔冊是真麻煩的事志[今作代誌]，因為頂頭大部分[今作大部份]攏是借音和倚音的字，無聲韻的基礎研究，使得咱愛想盡辦法來「領悟」和「解讀」，若抵著[今作拄著]因為文化背景無仝所產生失傳的語詞，咱更加費解。「个」，我相信當初寫「个」的人所知有e5的音的字只有「個」和「鞋」，因此將所有的e5攏用簡寫的「个」代替，伊可能毋知影e5會凍用普閩字典上的「兮」(這字伊可能毋識)或是[今作抑是]台日字典的「的」、甚至用廈門音的「丌」(這字伊更加可能毋識)。我認為真好sng2的事志是咱目前的學者每一個人[今作一个人]的學問攏真飽，程度攏比以早的人好幾a[今作幾若]百倍，顛倒相信程度無好的古早人，未免對咱家己無信心去，我感覺普閩的處理方法未bai2[今作袂䆀]，伊用「兮」俗寫「的」來表示；「的」文tik4、白tit4、俗e5。「個」佇普閩用「个」是理所當然，因為怹推行簡寫字，但是真明顯的是「个」是「個」，絕對毋是「的」，而且所有的字典e5攏有清楚將「的」和「個」分開，干單咱無分。佇遮我特別將頂面的「的」用粉紅色用起來，代表咱無形中就用「的」，而且佇別的檔嘛是有這個[今作這个]現象，只不過我cin3前[今作進前]攏將怹改掉。] (引自寫予新竹師院 董忠司 教授的email(1999.08.14))
註[1] 這字「猫」是電腦造字，因為台語猶有「ba5仔[今作猫仔]」，為著分別「niau1a2」我寫「猫仔」[今作貓仔]；「ba5仔」寫「貓仔」[今作猫仔]。
註[2] 音cia1：佇早期我寫作是用「此」、「茲」或是「邇」。因為用「遮」的人較濟，所以採用，但我個人比較較kah意[今作佮意]用「此」，親像「話講到此[今作遮]為止」。
註[3] 這字是我家己寫台語文所用的，因為「in1」佇台語是常用字，無意中扑字[今作拍字]去扑著這字，看伊的字型類似「您」，因為華語罕用著這字「怹」，所以我就將這字當做「in1」。
註[4] 以早文人所寫的文章以文言文為主，所以「的」佇文言文是「之」，就是無人用「之」來代表口語音「e5」。
註[5] 這字「个」是電腦造字[這馬的電腦拍會出來矣]。(2018.06.30增註[今作]的註解l
引用
1 
「的」這共提來表示臺語 ê 「ê」敢有合理咧？彼當時中華民國今〔tann〕開始制定國語字 ê 時，會將[的]字共伊表示所有格「ㄉㄜ˙」，彼只是因為北仔人咧講「我ㄉㄜ˙東西」佮「無的放矢〔sí〕、的確」ê 時，拄好是仝音 ê ，所以講怹北仔人才共借來用。
「的」佇康熙字典內底，本底就有伊本來 ê 意義--矣，就是「明確、實在、目標」ê 意思，而且這字是「入聲〔siann」字」，北京話無入聲，才會烏白共捎〔sa〕--來--用。
重點是「所有格 ê」 是臺語上捷講--ê ，咱敢欲予臺文有遐呢仔重 ê 北京語文色彩？ 有時陣我看著規篇臺語文，出現了一大堆 ê 「的的的的的」，我嘛會有一種錯亂 ê 感覺，是毋是我這馬咧看北京語文？廣東話是用「嘅」來表示，比論講「佢係我嘅女朋友」、「維基百科：自由嘅百科全書」，人是用「嘅」來表示，一看就有真重 ê 廣府話色彩--矣。就算講臺文將「量詞 ê」 佮「所有格 ê」 攏共用「个」來表示，嘛是會使，Holo話上介早 ê 話文記載，明朝時代 ê 「荔鏡記」，就是按呢用--矣。所以講，咱共「的」借來表示「所有格 ê」 敢好？這需要咱好好仔去思考這个問題。
教育部 ê 國語會怹推薦 ê 「閩南語建議用字」，只是建議爾爾，有誠濟字攏制定甲足奇怪--欸，比論講 lâng ê 本字是「儂」，就硬共定作「人」，若按呢 「hū-jîn-lâng」 咱毋就愛寫作「婦人人」？？國語會怹咧編 ê 臺語字，建議抑是參考用就好--矣--啦。
感謝你開遮爾長的時間來寫遮的物件, "的" 的問題佇我的別篇文章就有討論過矣. "的"的使用佇台日大辭典就咧使用矣, 所以 "的" 是的使用佮國民黨政府無關係. 閣再講漢語系統的仝音字足濟的, 無仝語法功能用仝一字來表示的時, 是借用的功能, 既然是借用就無本字的問題.
儂字是形聲字, 袂使講是人的本字, 而且文獻嘛有明顯記載, 儂是人的音變, 是走音去的, 閣再講仁字比儂字閣較有資格做人的本字, 看說文解字的說明就知影. 若欲講人的本字, 大, 六, 立, 亻,儿, 夫, 等字攏比儂抑是仁閣較是本字, 人字本身是象形演變來的, 倒爿下面是的筆畫原底是手, 正爿下面是跤, 明明就是畫一个人, 實實在在就是人的本字, 只是因為伊的發音是jin5, 就講伊佮lang5無仝款, 閣講伊無資格做人的本字. 較早文字論戰的時, 我無法度插喙, 因為我完全無發度知影啥人講的著, 啥人講的毋著, 這馬, 我知影矣. 假使你若欲佮我論文字, 麻煩你先共文字的演變自甲骨文開始看起, 才來共我講佗一字才是本字. 你嘛會使看古文字詁林的物件, 等你看過這方面的物件才閣來下結論猶袂慢.
國語會的用字, 我仝款有足濟字無同意, 毋過, 為著台語早日生湠興旺, 我無想欲講文字的問題, 其實, 我佇文章寫的使用原則, 雖然當初咧寫的時無研究過文字的問題, 純粹是母語使用者的看法, 毋過, 我的看法猶是無改變. 唯一的改變是儘量配合教育部的用字爾爾.
最後兩句予你思考, 按你的講法"个"佮"的"無分, 按呢 "第三个个" 有兩个無仝款的音 (1) te7 sann e5 e5 (2) te7 sann--e5 e5. 你欲按怎分別. "的"用字, 我捌佮洪惟仁教授爭論過, 最後伊講袂贏我, 講一句也毋是伊發明的矣, 是古早人就按呢用的矣.
最後, 閣請教你, 我若講 "我的爸爸" 是台語文, 按呢到底有幾个人會共伊讀做(1) gua2 tik4 pa-pa; (2) gua2 tik8 pa-pa; (3) gua2 tiah pa-pa???????????(以