臺灣閩南語書寫文字講解與寫作(2)

 2010

03281334四、理論和實際

490臺語這條路

    佇遮，咱看著台語文第一常用字就引起真濟問題，致使每一個選用無仝「的」的人攏堅持著伊的用字才是正確的，若無就批評對方的用字佗位無合理等等，完全無想著in真正的目的是啥麼_{[今作啥物]}─為著挽救台語_{[今作臺語]}。咱若是共想看覓咧，假使台語文的研究者所使用的字就無法度來互相接受，按呢外行的人敢有法度來接受in的用字，若是一般人攏無法度接受的用字，按呢研究台語文的人是毋是顛倒失去伊原來的目的。甚至有人堅持無欲使用現在教育系統所使用的字，另外家己全部造字，結果伊所寫出來的台語文只有伊一個人_{[今作一个人]}看有，按呢欲按怎來予一般人來接受台語文。話講到遮，到底欲按怎寫台語文咧？

    咱已經看著台語寫作的上大問題就是文字無統一。即馬_{[今作這馬]}，咱牽涉著一個問題，就是理論和實際之間是毋是有法度配合。一般人的直接反應一定會講：「寫台語文就全部用漢字就好矣，是真簡單的代誌，那著佫問_{[今作哪著閣問]}咧？」會按呢回答的人攏認為寫台語和寫華語仝款，未有_{[今作袂有]}問題產生，in從來毋曾_{[今作毋捌]}去思考過這個_{[今作這个]}問題，更加毋曾認真落去寫台語文。攏想講家己的台語是自細漢講到大漢的，華語就寫kah_[今作甲]順順無問題，台語當然是無問題，但是當in真正gia⁵筆_{[今作攑筆(gia̍h-pit)]}來寫的時才會發現問題一大拖，無像in所想的赫_{[今作遐(hiah)]}簡單。就是因為問題有夠濟，所以對著台語文按怎寫的理論就真濟，會當講只要對台語文有研究的人就攏會提出一個對台語文文字化的看法和理論出來，咱若認真來找_[今作揣]資料就知影台語文文字化的理論佇這方面上界濟，因此，主張的派別嘛真濟。簡單講一句就是tui_[今作對]完全純漢字派到完全純拼音派攏總有。一般來講凡是中文系出身的人較傾向純漢字的使用，排斥漢字的人就傾向全拼音派，除了這兩派極端以外，只要有實際寫過台語文的人就採取中央的路線就是漢字拼音透濫咧用的漢羅形式。

1. 純漢字派

    純漢字派的人攏認為咱是中國人的一份子，所以理所當然用漢字，另外in認為拼音字毋是字。純漢字佫會當分傳統保守派和自由通俗派。傳統保守派的人堅持一定愛將「本字」、「正字」找出來，因此咱會發現著真濟找出來的台語日常生活使用的語詞的「本字」、「正字」是一個大學畢業教育程度的人佇咱這個教育制度下的眼內是「怪字」、「僻字」、「罕用字」，一篇真普通平常的日常口語講話的文章佇滿篇「本字」、「正字」就變成受過高等教育讀無路理來的文章。

    自由通俗派的人的特點就是用字無固定，寫作觀點只是純粹以家己的方便為主，無管別人是毋是看有，以早的歌仔冊就是按呢來寫作的，所以咱若欲解讀以早的人所寫的台語文攏愛費真濟心神才有法度看有。

2. 拼音派

    拼音派比純漢字派的人愈濟派別，主要的起因是因為台語特殊的音韻系統所引起的。無仝觀點的人運用二十六個英文字母所編寫出來的拼音自然就形成無仝的派別[1]。簡單舉一個「無」字的拼音來看，就有可能拼做「bo、bor、bbo、bbor、br、bbr、vo、vr、vor、b«、ber、bÆ」。

    頂面所舉的拼音猶未標上 聲調，若佫_[今作閣]再考慮著聲調，彼就真正驚人。咱若是看拼音的編寫者的理論會發現in攏講了有道理，甚至有的理論找無缺點通講，但是無一定符合母語使用者的實際使用。

3. 漢羅並用派

    有實際大量寫作的人自然會選擇漢羅並用的方式，因為用純漢字的時，時常會抵著未曉_{[今作拄著袂曉]}寫的文字，更加較慘的是有時字典ping²_[今作反]透透就是找無_{[今作揣無]}。有時找著的字是以早攏無看過的字，寫出來人嘛看無；有時查幾a本_{[今作幾若本]}字典，結果是字典之間的用字無仝[2]，毋知到底欲用佗一字。

    因為拼音派有真濟派，致使著漢羅並用拼音字的時嘛有幾仔派_{[今作幾若派]}。但是漢羅派的人之間互相容忍，因為in¹注重的是文章的創作以及理念的傳達，只要作者的文章本身有統一固定的拼音系統就會使a_{[今作矣(--ah)]}。有時一個作者本身因為實際的使用會換無仝的拼音系統[3]。

4. 其他的派別

    除了以上的派別以外，猶有其他的就是用外語的文字形式來表現，有用日文假名的；嘛有用韓文諺文式的，遮的少數人只是提出in¹的主張而已，並無真正推行，另外嘛有出現過用簡單筆劃_{[今作筆畫]}漢字組合而成的表音方塊字，最後因為和人討論的結果考慮著現代電腦工具的使用來放棄。

    總講一句，台語文的文字使用猶是佇戰國時代，自解嚴了後到今十外冬的論戰猶未解決，教育部邀請學術界的人為常用的台語定字形，是毋是會當予母語創作者來接受是真大的問題[如今2018年，經過欲二十年，教育部的字典嘛上線十冬矣，反對的人嘛是仝款足濟的。嘛是仝款咧證明教育部的替用字佮白話字等等的用字是毋著的。揣著的字攏是咱一般讀到大學畢業都攏毋捌看過的字。[4]。

(頂一頁)(轉去目錄)(繼續看落去)

(轉去主目錄)

---

註[1] 台語的特殊音韻系統致使著編寫拼音者愛考慮的方面有(1)子音：(a)送氣無送氣的處理方法；(b)是毋是有將c-聲母分做ㄗ和ㄐ兩個聲母；(c) m, n, ng三個是毋是會當做聲母；(d) j-聲母的表示方法；(e) l-聲母的表達方式；(f) 字母大小寫的意思；(2)母音：(a)「蚵」和「湖」的標記；(b) 介音u的標記(ue, ua, uai,uan,uang)；(c) 鼻元音的記法，伊的外形和位置；(d)「惡(onn3)」的記法；(e)「英」和「淵」的記法；(3) 入聲：聲調和字尾的處理方式；(4) 調號：(a)標本調或是變調；(b) 符號的形式(字母、符號、數字)和位置。

註[2] 親像khau1刀：教育部「剾」、普閩「摳」；廈門音、胡「敲」;彙「敲、搞」;台日用「刨」；王用「鉋」。

註[3] 有作者開始用教會羅馬字的音標，了後換早期的TLPA，用一段時間了後換台音式。系統的轉換只是為著創作的時無欲扑斷_{[今作拍斷]}思考的靈感。

註[4] 親像「lai⁷l i²」教育部_{[700字公佈進前]}寫「裡裡」_{[今作內裡]}；「i²a²」寫「椅囝」_{[今作椅仔]}；「cin¹m⁷bat⁴tai⁷c i³」寫「真不別事志」_{[今作毋捌代誌]}；「ce¹、cit⁴、ciah⁴_[今作遮]、cia¹」攏寫「這」；「he¹_[今作彼]、hit⁴_[今作彼]、hiah⁴、hia¹_[今作遐]」攏寫「許」；「oo¹pang¹」寫「烏方」_{[今作烏枋]}。