2010
03102327別人ｅ錶仔
物件拾著人ｅ，毋閣秋菊a suat愛等到伊將拾著ｅ錶仔還人才會快樂。
彼粒錶仔實在是真sui2，佇一條長長薄薄仔ｅ金錶仔帶頂。
秋菊a是佇下班ｅ半路看著。錶仔就佇土腳，佇一隻桌仔和一條椅仔ｅ中央。慢慢仔拾起來閣ka看一下，錶仔舊舊a，頭前有一粒寶石，彼粒寶石是用金仔框起來；後面有DBJ三個字母代表某一個人ｅ姓名。秋菊a確定真緊就會凍找著錶仔ｅ主人。
伊將錶仔ka反倒轉來，有一個真細ｅ聲音引起伊ｅ注意。秋菊a將錶仔ka提倚來耳仔邊，斟酌ka聽，是錶仔恬恬仔lih行ｅ聲。實在是有夠古錐ｅ一粒錶仔。
是啥麼人落去ｅ？沒錯，這款錶仔需要有一個會使來ka好好照顧ｅ主人。
雄雄，秋菊a伊beh愛這粒錶仔。閣卡按怎講，kanna伊一個人看著錶仔niania。彼粒錶仔佇土腳ｅ時陣，別人攏kanna對邊仔行過去niania。
「物件拾著人ｅ，」秋菊a想起卡早有一句俗語按呢講。伊越頭看看咧，看是毋是有人咧看，伊偷偷仔hoo錶仔溜落去家己ｅ落袋仔底。續落去，伊就趕緊離開彼棟樓仔厝。
佇厝，伊目睭金金相錶仔相真久。閣來，伊寬寬仔將錶仔掛起來。看起來實在是有夠讚。秋菊a伊按呢閣按呢看。是啦，彼粒錶仔誠適合伊。毋閣，真奇怪ｅ一項代誌就是彼錶仔lih行ｅ聲音，那會顛倒佇伊ｅ房間閣卡大聲咧！
秋菊a好禮仔ka錶仔剝落來，ka錶仔囥佇梳粧台內底囥hoo好勢好勢。
彼暝，伊確定伊有聽著錶仔佇梳粧台內底lih行ｅ聲。伊想攏無，彼錶仔聲thah會hiah大聲。
早起時，秋菊a ciann早就起床啊。彼工，伊毋免上班。其實，伊會使睏卡晚咧。可惜，伊ｅ心肝頭假若有代誌仝款，伊感覺佇伊lih睏ｅ時陣，有聽見彼粒錶仔lih行ｅ聲。
秋菊a ka錶仔tui梳粧台內底提出來。錶仔佇透早ｅ光線中，看起來閣卡會hoo人歡喜。秋菊a 裝kah sui-sui，閣將錶仔滑過伊ｅ手ka掛起來。想卜佇伊騎伊彼台腳踏車外出ｅ時陣ka錶仔掛出去。
佇外口，伊微微仔笑。彼工真正是一個春天，有日頭，未siunn熱，嘛未siunn寒。秋菊a上愛ｅ就是這款天氣。伊騎去li伊ｅ腳踏車，向市內騎去，想卜買一屑仔物件。
伊騎ciann緊，頭毛飛振動，空氣扑佇伊ｅ面。感覺實在真好。ciann實是一個真好ｅ日子...差不多會使按呢講。
佇第一間店，店ｅ人提一寡仔手只hoo看。
「這kha手只kah妳ｅ錶仔ciann su配。」彼個人按呢講，「咱來看掛起來會偌(gua9)迷人...」
秋菊a雄雄ka手只用落去，伊看彼粒錶仔看一下仔。錶仔佇遐，一秒一秒咧行，比卡早閣卡大聲。
「記咧，錶仔cimma是妳ｅ。」秋菊a講hoo家己聽。但是，伊猶原匆匆碰碰趕緊離開彼間店。無定對，店裡彼個人以前識看過彼粒錶仔。
佇另外一間店，有人問伊時間幾點啊。秋菊a驚一趒suat跳起來。伊應講：「我毋知。」續落來，伊又閣聽著錶仔lih行ｅ聲。「哦！哦！有啊！cimma是，咱來看一下...」佇伊咧ka人講時間ｅ時陣，伊ｅ聲音chuah-chuah (『顫抖』)。是按怎一開始就有人來問起咧？敢講人cimma lih找這粒錶仔？
秋菊a拚上緊ｅ路轉去。彼條薄薄仔ｅ金錶仔帶實在是有夠重，而且伊ｅ頭殼嘛因為行未停又閣吵人ｅ聲咧頭疼。刺刺(chi3chak8)...刺刺...刺刺...
「我卜ka錶仔剝落來一時仔，」伊按呢講hoo家己聽。「小等一下我卜閣出去ｅ時陣才閣ka提起來掛。」
彼暝，秋菊a走去看電影。可惜，伊聽無啥會著電影ｅ聲。伊ｅ錶仔聲行kah實在siunn過大聲。
秋菊a足早就轉去厝啊。
彼暗，伊ka錶仔囥入去衫仔櫥內底。毋閣，彼煩人ｅ聲閣tue伊入去夢內，伊根本就睏未好勢。
早起時，伊無ka錶仔提出來。禮拜歸工，伊攏無閣掛彼粒錶仔。伊苦未得拜一趕緊來到位。
拜一，秋菊a ka彼粒sui-suiｅ錶仔囥佇一個盒仔內提去上班。
「有人扑見一粒錶仔，」伊按呢嘩講。「是佇這隻桌仔附近ｅ土腳拾著ｅ。」
有一個查某人隨行過來。秋菊a無啥識伊。彼個查某人問講：「彼是一粒舊錶仔是否？另外一爿ｅ頂面有三個字母DBJ是否？」
彼個查某人就講：「彼是阮阿母ｅ。」伊tui秋菊仔遐ka錶仔提過來掛起來。「非常多謝妳！」伊ｅ聲ciann快樂，目尾閣笑微微。「是我用無去ｅ，」伊繼續講。「毋閣我知影伊受著真好ｅ照顧。這二工，我親像會凍聽著伊咧行ｅ聲。」
秋菊a並無講偌濟話。雖然ka錶仔還人心內會艱苦，但是伊最後並無閣再聽著錶仔咧行ｅ聲。煩人ｅ聲已經佇腦海中消失a。
「彼錶仔真sui，」秋菊仔按呢講hoo家己聽。「毋閣彼是別人ｅ。」
1995.端午 (台音式)
1998.端午 (TLPA式)
【後記】 這篇是按現主時ｅ高中英文課本第三冊第二課小可仔修改翻譯過來ｅ。雖然有人認為翻譯毋是創作，但是翻譯ｅ空課並毋是親像咱所想ｅhiah呢a簡單，至少伊需要佇咱了解二個完全無仝組織ｅ語言了後，才會凍來適當ｅ轉換和表達，其中猶原需要未少ｅ技術，嘛是需要一寡仔語言運用ｅ藝術，會凍講是另外某一方面ｅ創作。在下區區不才並毋敢自認為講家己ｅ用詞是會凍提出來hoo人來看。因為小弟對語言ｅ運用，實在是一個三腳貓ｅ角色。翻譯這篇是因為非常欣賞這篇將咱人ｅ良心苛責表現kah無任何痕跡，kui篇並無有提起主角ｅ良心如何ｅ不安，kanna用主角所聽著ｅ錶仔聲和伊對錶仔ｅ感覺來顯示出主角內心掙扎ｅ種種心情變化。
在下只是卜將這篇翻成台語來hoo咱逐家共同欣賞咱台語佇描寫咱人ｅ情感變化嘛是會凍真深入，嘛是會凍表現一個語言應該有ｅ各種層次。本篇所卜表現ｅ，只是文章ｅ內容和意思，而且希望以後咱會凍看著閣卡濟完全無仝風格、活潑又閣對咱有啟示作用ｅ文章。
【註】今年端午佇拜五( 一九九五年六月二日)，阮無歇睏愛上班，拜六、禮拜m免上班，真扺好和本文故事有合，若照咱茲ｅ生活起居，真正無法度對這篇做合理ｅ解說，有可能會想無是按怎主角拜六m免上班。雖然佇外國這是真正常ｅ代誌，總是佇無仝ｅ文化下，故事ｅ情節實在真難hoo咱做合理ｅ接受。
【補註】三年a，時間過了真緊，今仔日抵仔好又閣是肉粽節，現在咱unna自今年起有週休二日制。當然，我目前上班ｅ所在猶未有這款ｅ福利，對阮來講，週休二日ｅ制度了後，阮放假ｅ時間顛倒減少去。佇今仔日將過去ｅ檔案罔修改才發現時間真正是無留情hoo咱。
(轉去歡喜講臺語的目錄)
你這個大仙，阿使講，按怎翻攏嘛袂bai2!
我只是想欲共你呵咾一下............看來是用詞不當
煞予你..............
講毋著話的所在請多多包含.......