2010
03092151天宇展雄風
目前市面ｅ布袋戲錄影帶非常流行，伊受歡迎ｅ原因除了故事內容及拍攝技巧非常新以外，戲尪仔ｅ造型非常有現代感及亮麗感嘛是吸引觀眾ｅ主因。本期欲為咱逐個來介紹另外一個黃氏家族布袋戲--天宇系列。
暑假期間，筆者 和陳榮杰 老師到台中市ｅ天宇布袋戲拍攝現場做了專訪，見著十年前有一面之緣ｅ黃文耀 先生，黃 先生是天宇布袋戲ｅ編劇兼主演，伊非常好客，一個下晡ｅ招待，為阮一一道出伊五年來製作布袋戲ｅ甘苦談--天宇系列。
「天宇」ｅ前身是「驁天九龍」，故事是描寫重聚失散各處ｅ龍族（攏總有九龍)，對抗邪惡勢力ｅ經過，本劇一直經歷「天宇殺機」、「天宇論皇」、「天宇魔空」、「天宇殘殊」、「天宇戰印」，總共過了五年，故事ｅ中心人物是紅雲驕子兩卷書(圖一、二)，他和霹靂系列ｅ素還真(圖三)攏是扮演整合派系ｅ領導人物，兩卷書為了拯救龍族ｅ命運，無惜多次犧牲自己，甚至和魔女結婚，而多次ｅ經歷死亡又重生。這差不多是所有男主角ｅ共通性，也就是講伊是永遠未死ｅ。
另外，劇中嘛有一位和男主角仝款重要ｅ丑角，名叫藏神秘，簡稱小秘(圖四)，伊非常ｅ無能，定定受人欺負，毋閣抵著重要ｅ戰役，一定愛借重伊ｅ力量，才能逢凶化吉，會使講是深藏不露，伊和男主角ｅ共通點是無伊戲就搬未落去a，有青葉仔配紅花ｅ功用。
天宇系列布袋戲和其他電視布袋戲上大ｅ無仝，就是角色ｅ塑造上，運用了超乎傳統ｅ儒(像六合，圖五)、道(像青陽子，圖六)、釋(像續念來，圖七)，而採用了比較卡現代ｅmang-ga(漫畫)造型，親像影子帝王(圖八)、鐵甲銅灣島主(圖九)，邪刀魔劍(圖十)，借用這來吸引無仝ｅ觀眾群。
阮佇現場中嘛實際看著一場拍攝過程(圖十一)，是由弄尪仔大師--蘇仁貴 先生親自掌控，伊ｅ要求非常嚴格，僅單十秒鐘ｅ行路鏡頭，就開得欲半點鐘，若是十分鐘ｅ打鬥場面，大概愛開三仝ｅ時間才會當拍成，會使講是非常ｅ辛苦閣費神。
天宇系列ｅ頭 家黃文耀 先生，是黃俊雄 先生ｅ候生， 和黃文擇 先生是雙生仔，五年前獨立出來和三立影視合作，正式開嘴講口白，並且一手貿編寫劇本ｅ空課，當時所有演出ｅ物件攏是dui無半項開始，到目前伊ｅ布袋戲已經佇市場上占有一席之地，會使講是成績輝煌，成功毋是ui天跋落來ｅ，完全憑伊天生對布袋戲割捨不下ｅ情誼。
十年前筆者 和黃文耀 先生佇嘉義女中第一次見面，彼時陣伊佇後台觀摩黃俊雄演出史艷文，dui伊專注ｅ眼神中，不難發現伊是外呢用心咧吸收經驗，彼一幕一直深深印佇我ｅ腦海中，永遠無法度來消失。
電視布袋戲ｅ觀眾層自細漢囝仔到大學教授攏有，深受逐階層ｅ喜愛，最近市面上成立了這款型ｅ戲尪仔專賣店，亦受到熱列ｅ支持。
以後若有機會才閣再繼續為咱各位讀者介紹戲尪仔ｅ特色及造型ｅ分析。
※感 謝黃文耀 先生提供資料並接受採訪
圖一：兩卷書，徐炎作品。
圖二：兩卷書，沈春福作品。
圖三：素還真，筆者作品。
圖四：藏神秘，徐炳垣作品。
圖五：六合，筆者作品。
圖六：青陽子，徐炎作品。
圖七：續念來，徐柄垣作品。
圖八：影子帝王，徐柄垣作品。
圖九：鐵銅灣島主，徐炎作品。
圖十：邪刀魔劍，徐柄垣作品。
圖十一：拍攝現場。
1996.04.01
【註】本文非常感謝蘇文雄 先生ｅ允準來翻譯成台語文ｅ文章。蘇文雄 先生是1965年生，嘉義人，目前是台中大明中學廣告設計科教師。另外，伊猶有佇台中大里市開一間寰宇布袋戲尪仔開發工作室。
沒有留言:
張貼留言