2010
03102332語言ｅ生命
咱人有生命，世界每一種動物和植物攏總有生命，甚至看未著ｅ細菌和病毒嘛有生命。咱ｅ語言敢會凍講有生命ｅ存在？
每一種有生命體ｅ物件攏有生老病死ｅ過程，或者是佛家所講ｅ成、住、壞、空ｅ四種階段。咱人本身直接看會著咱家己ｅ自然生命過程是自一個人出生開始，經過一、二十冬ｅ晟養才變成大人，隨著時間ｅ轉移以後，咱人就會變老，加減嘛會破病，但是，最後攏愛離開這個世間。
當然，佇咱自然ｅ過程中，有ｅ人就會發生意外ｅ事故，遭受著天災、地變、人禍...等等，因此，提早結束著in ｅ生命。親像水災、火災、旱災、戰爭、地動、車禍、土埋、石壓、樓倒...等等。千奇百怪攏總有，根本嘛想未著會發生親像韓國ｅ百貨公司按呢無風無搖就規棟樓仔厝直直壓落來ｅ代誌。真正是「天有不測風雲，人有旦夕禍福。」
猶有人是對人生太過悲觀，想未開，家己提早來結束著自己ｅ生命。
動物ｅ世界就無hiah呢好命，因為生存競爭，弱肉強食，自然老死ｅ情形是真少。閣再受著人類ｅ威脅，每一年攏有動物斷種，佇世界上消失。
咱ｅ語言就親像人和動物仝款，伊嘛是有生命ｅ存在，只是咱大部分ｅ人感覺未著。主要是因為語言ｅ生命靠著人類來生存，往往比咱人ｅ生命卡長，語言親像人仝款，有出生、長大、破病、衰老、生亡以及意外。伊有生命，當然嘛有新陳代謝ｅ現象 (這是受著時代ｅ各種文化等等背景ｅ變化影響來轉變)。每一個語言就親像每一個個人相仝，有可能受到意外，親像地球上ｅ生物仝款，佇人為ｅ疏忽下來斷種去。
咱台語ｅ生命到底猶有若長？大部分ｅ人根本無感覺著台語已經病到將近滅亡斷根ｅ地步，主要是因為咱對台語ｅ無知，總以為咱家己台語說了會輪轉就好，根本就毋知咱大部分ｅ人已經變成半條蕃薯ｅ半說話者(semi-speaker)，除了基本生活需求、交際用ｅ固定語以外，其他ｅ能力是非常欠缺。只有少數有熱忱 (sim5) ｅ人有感覺著台語接近死亡ｅ邊緣，認真地扑拚、犧牲、奉獻來研究、繼承、發揚和傳播。希望會凍挽救台語ｅ生命。
其實，台語ｅ存亡是咱每一個以台語為母語ｅ人ｅ責任，咱若本身無覺悟著，kanna卜靠少數人來扑拚挽回，按呢佇世界三千外種語言排名第二十三ｅ台語就會佇一、二百年內消失去。
當然，一定有人會認為台語不管是人為或者是自然消失，消失就消失，根本無啥麼大代誌。這就是無知所產生ｅ觀念。想看覓咧，客家人講：「寧賣祖先田，不忘祖先言。」咱是敬祖先ｅ民族，當咱罵人「數 (sok4) 典忘祖」ｅ時，就代表某一個人ｅ行為親像禽獸仝款。
另外，咱ｅ教育不時就教咱要『恢復中華文化』，敢講咱ｅ台語毋是「中華文化」，每一個教中文ｅ攏知也，若卜讀唐詩一定愛用台語念才會凍顯示出詩ｅ聲韻。
咱時常講：「不孝有三，無後為大。」咱為怎樣只解釋「無後」是「無後嗣」呢？豈不是所有ｅ和尚和尼姑攏是大不孝，甚至基督教ｅ耶穌嘛是，咱教忠教孝教節義，為怎樣會遮呢濟人追隨「大不孝」ｅ人呢？真明顯，「無後」ｅ解釋會凍講是某一個技術、宗教、道統、文化...等等ｅ保存、繼承、發揚和傳承ｅ不滅。所以真正大不孝ｅ行為是無法度將咱祖先傳hoo咱ｅ種種智慧等ｅ文化道統來繼續發揚傳落去hoo咱ｅ後一代。
咱ｅ語言若是消失去，咱就會成為大不孝之人，因為語言消失代表某一個族群ｅ消失。親像一寡客家人完全未曉講客家話，嘴講台語是講kah削削叫，kanna講in是客家人，咱敢未疑問講客家人thah未曉講客家話，in家己講未疑問講平平是講台語ｅ人，是按怎就愛特別說明in是客家人呢？就親像一個台灣人若佇日本出生到大漢，kanna會曉講日本話，講伊是台灣人，咱敢未懷疑？咱一定會講伊是日本人。因為咱ｅ語言親像咱ｅ身份証仝款，是咱ｅ身份尚好ｅ証明。語言ｅ消失就是受著同化，同化了後代表著族群變種，等於是原來ｅ族群消失去仝款。所以，台語ｅ存亡是咱ｅ責任。
1995.07.04
(轉去歡喜講臺語的目錄)
沒有留言:
張貼留言