2010
03272133歡喜講台語(3)
1. p- /p/ [p] ㄅ
伊所代表的音是雙唇無送氣塞暴音 (siang1-tun5 bo5-sang3-khi3 that4-pok8-im1; bilabial unaspirated stop; bilabial unaspirated plosive)，發的音完全和注音符號的「ㄅ」仝款，是一個清音 (voiceless) 聲母，發音的時，咱的聲帶並無振動著。這個符號對有學過英語的人會造成真大的困擾，因為，學過英語的人攏將英文字母 P 讀和注音符號的「ㄆ」仝款，其實英語並無「送氣」和「無送氣」的意義辨別之分，伊的字母 P 是一個雙唇弱送氣塞暴音 /p‘/註[1]，佇實際的口語發音有 [p‘] (如：peak)、[p] (如：speak) 和 [p|]註[2] (如：keep) 三個語音。因為，英語無「送氣」和「無送氣」的意義分別，佇拼寫文字的時就會凍省去標寫送氣的成份，就親像華語註[3]的四聲「( #) @ & $ 」仝款，咱一般攏無標寫第一聲的聲調符號，就是因為無標示並未造成語言使用者的困擾。佇茲，咱佇字母p 的後面加一個「-」的符號代表 p 是佇聲母的位置。佇拼音的時，若寫成「-p」就代表 p 是佇韻尾的所在，等到咱談論著入聲的時才閣說明。
例字：比、爬、飽、埔、褒、匏；註[4]壁、錶、彪、拜、包、吠、陪、撥；表註[5]；扁、棚；餅、半；飯；賓、冰、便、班、崩、磅、本；叛
例詞：琵琶註[6]、保庇、寶貝；包辦；半爿；鬢邊、扳變、頒布、變白、八本、八遍、八百、白枋、八寶冰、北部、北爿
2. ph- /pH/ [pH] ㄆ
伊所代表的音是雙唇送氣塞暴音 (bilabial aspirated stop; bilabial aspirated plosive)，發的音完全和注音符號的「ㄆ」仝款，是一個清音 (voiceless) 聲母，發音的時，聲帶並無振動著，佇拼音的時，p後面加一個h代表送氣的意思。咱若是提 (theh8) 一張紙囥 (khng3) 佇嘴頭前唸「ㄅ」和「ㄆ」，咱會發現著唸「ㄆ」的時，紙會去予一港氣流吹了拗 (au2) 彎去。因為台語有「送氣」和「無送氣」的意義分別，所以「送氣」就會變成傾向「強送氣」。假使台語親像韓語仝款「送氣」的強弱有意義分別的話，咱就愛閣加一個「弱送氣」的符號。
例字：疲、批、葩、普、抱、浮；票、派、炮、屁、配、破；飄；鼻、彭、冇；骿、歹、伴；品、評、騙、盼、芳、椪、噴；潘
例詞：普遍；鼻芳；乒乓、膨皮、偏僻
3. m- /m/ [m] ㄇ
伊所代表的音是雙唇鼻音 (bilabial nasal)，發的音完全和注音符號的「ㄇ」仝款，是一個濁音 (lo5-im1; voiced) 聲母，發音的時，聲帶有振動著，氣流是對鼻孔的所在出來。佇台語「m」會凍單獨成為一個音節，嘛會凍出現佇韻尾，對只會曉華語的單語人來講，是一個困難的音節，佇韻母介紹的時才閣來說明。凡是聲母m-開頭的音節後壁一定是接鼻元音，拼音的時鼻元音「nn」會使省略。伊抵好和聲母b-開頭的音節造成互補 (complementary distribution)的現象。
例字：麵、暝、媽、毛；名、邁、貌、每、滿；妙、糜；門
例詞：綿綿綿、冒昧、問名
4. b- /b/ [b] 
伊所代表的音是有聲雙唇塞暴音 (voiced bilabial stop; voiced bilabial plosive)，發的音和注音符號的「ㄅ」類似，注音符號是「
」，是一個濁音 (voiced) 聲母，發音的時，聲帶愛振動著，和 /p/ 無仝的所在只有聲帶有出聲音或 (ah8) 無，發 /p/ 的時，愛等到嘴唇開開了後聲帶會因為發母音註[7] (vowel) 才開始振動，發 /b/ 的時，嘴唇猶未 (iau2-bue7) 開開聲帶就會開始振動。咱若將手踵頭仔囥佇頷珠面頂一塊三角形的空間 (就是聲帶頂面)，或是用手踵頭仔塞佇耳孔，慢慢仔發 /b/ 的音就會凍了解有聲的發音是啥麼情形。這個音對只會曉講華語或是客語的人是一個真富挑戰性的音。時常會發成 /p/ 或是 /m/ ，需要一段時間的練習。這個音和英文字母B是仝音的，只是大多數學英語的人受到ㄅ、ㄆ、ㄇ的影響，將B /bi/ 發成 [pi] ，只要咱若聽英國人或是美國人開始學講咱的「拜拜」(bai3-bai3) 的音，會聽著in講成 [baI baI]，毋是 [paI paI] 和in 的「bye-bye」仝音，按呢就知影聲母p- 的音對in來講是卡困難的發音。
例字：米、馬、麻(ba5)、某、帽、武；廟、眉(bai5)、卯、眛 (bui1)、尾、磨；苗；民、明、免、萬、蠓、摸、文；滿
例詞：美妙、美滿、眉目、未免、買賣、馬母、馬面、賣肉、無卜磨墨、無尾、埋沒(but8)、眠夢、面目、名望、罔磨、茫霧、茫茫渺渺、卜買否、抹面、目眉、滅亡
5. t- /t/ [t] ㄉ
伊所代表的音是齒齦無送氣塞暴音 (alveolar unaspirated stop; alveolar unaspirated plosive)，發的音完全和注音符號的「ㄉ」仝款，是一個清音 (voiceless) 聲母，發音的時，聲帶攏無振動，這個符號對學過英語的人嘛會造成困擾。因為，學英語的人攏將英文字母 T 讀成注音符號的「ㄊ」，其實伊和英文字母 P 是仝款的道理，請參考頭前第一項聲母p-內面的說明。拼音的時，若寫成「-t」就代表 t 是佇韻尾的所在，咱會佇討論入聲的時才閣說明。
例字：豬、底、踏、肚、刀、蛛；爹、釣、稻、獃、豆、堆、綴、大；條；甜、鄭、膽；鼎、張、單；頓；沉、鎮、丁、電、淡、等、冬、同、唇；店、長(tiang2)註[8]、中、端
例詞：遲到、蜘蛛、徒弟、道德、台大、台中、大同、鬥陣、到底、打賭、大地動、大條、擔當、振動、定單、撞(tong7)著、唐朝、電池、電動、中晝、重大、重點、直達、竹東、桌頂
6. th- /tH/ [tH] ㄊ
伊所代表的音是齒齦送氣塞暴音 (alveolar aspirated stop; alveolar aspirated plosive)，發的音完全和注音符號的「ㄊ」仝款，是一個清音 (voiceless) 聲母，發音的時，聲帶嘛攏無振動著。佇拼音的時， t 後面加一個 h 仝款是代表送氣的意思，咱若是提一張紙囥佇嘴頭前唸「ㄉ」和「ㄊ」，咱仝款會發現著唸「ㄊ」的時，紙會去予一港氣流吹彎去。
例字：剃、體、兔、桃；頭(thio5)註[9]、抽、泰、頭、梯、退(thue3)註[10]、拖；跳；天、躺、他；聽、炭；湯；停、天、貪、趁、蟲、統、吞；添、暢、團
例詞：剃頭、體貼、土炭、討趁、透天、偷聽、偷提、頭疼、探聽、吞吞吐吐、鐵鎚
7. n- /n/ [n] ㄋ
伊所代表的音是齒齦鼻音 (alveolar nasal)，發的音完全和注音符號的「ㄋ」仝款，是一個濁音 (voiced) 聲母，發音的時，聲帶有振動著，氣流是經過鼻孔的所在出來。佇台語的鼻音聲母中只有 n- 未凍單獨成為一個音節，伊嘛會凍出現佇韻尾。凡是聲母n-開頭的音節後壁一定是接鼻元音。這個情形和聲母b-以及m-仝款，伊抵好和聲母l-開頭的音節造成互補 (complementary distribution)的現象。也因為按呢，造成母語是台語的人，時常分未清華語的「ㄋ」和「ㄌ」。親像「念、練」、「能、冷」和「南、蘭」。
例字：年、林(na5)、怒；嶺、讓、耐、腦、爛；猫；卵
例詞：年年、爾(nia7)爾、惱怒、爛爛、軟軟
8. l- /R/ [R] ㄌ
伊所代表的音是齒齦輕拍音 (alveolar tap; alveolar flap)，發的音和注音符號的「ㄌ」類似，是一個濁音 (voiced) 聲母，發音的時，聲帶嘛愛振動著。是台語特殊的發音，音值抵好是 /d/ 和 /l/ 的中央，聽起來像 /l/ 嘛像 /d/ ，因為伊是輕拍音，所以佇各家台語拼音系統內面會看到l-, d-, 和 r- 三種的標記，攏是指這個聲母。
例字：你、禮、蜊、路、勞、女；柳、來、樓、雷、賴；廖；林、恁、冷；蓮；男、咱、人、論；念、涼、諒、戀
例詞：路螺、溜掠、流浪、流浪、榴槤、來臨、內裏、內乳、老練、老人、伶俐、能力、男女、弄龍、能力、long7 liu2 lian1、倫理、聯絡、力量
9. k- /k/ [k] ㄍ
伊所代表的音是軟顎註[11]無送氣塞暴音 (velar unaspirated stop; velar unaspirated plosive)，發的音完全和注音符號的「ㄍ」仝款，是一個清音 (voiceless) 聲母，發音的時，聲帶無振動，這個符號對學過英語的人仝款嘛會造成困擾。因為，學英文的人攏將英文字母 K 讀成注音符號的「ㄎ」，其實伊和英文字母 P 是仝款的道理，請參考頭前第一項聲母p-內面的說明。若是寫成「-k」就代表 k 是佇韻尾的所在，咱會佇討論入聲的時才閣說明。
例字：枝、雞、咬、姑、果、句；寄、橋、球、改、狗、鬼、過、歌；嬌、乖；見、更、敢；鏡、薑、肝；關；光、金、巾、經、堅、甘、奸、公、公、軍；兼、強、捐
例詞：奇怪、假鬼假怪、解決、狗公、經過、感覺、工具、觀光、結果、結局
10. kh- /kH/ [kH] ㄎ
伊所代表的音是軟顎送氣塞暴音 (velar aspirated stop; velar aspirated plosive)，發的音完全和注音符號的「ㄎ」仝款，是一個清音 (voiceless) 聲母，發音的時，聲帶無振動著。佇拼音的時，k 後面加一個 h 仝款是代表送氣的意思。
例字：去、溪、腳、褲、考、區；騎、口 ( khio2 )、蚯 ( khiu1 )、開 ( khai1 )、哭、虧、詼、誇；巧 ( khiau2 )、快；坑、腔、看；勸；琴、輕、慶、乾、堪、牽、空、抗、睏；欠、鏗、恐、款
例詞：開闊、慷慨、欠缺
11. ng- /N/ [N] 兀
伊代表軟顎鼻音 (velar nasal)，注音符號是「ㄥ」，是一個濁音 (voiced) 聲母，發音的時，聲帶有振動，氣流是對鼻孔的所在出來。伊是台語真特殊的聲母，伊的特殊毋是講別的語言無這個發音，是因為伊佇其他的語言罕lih囥佇聲母的位置，發的音其實就是注音符號的「ㄥ」[«N] 和「ㄤ」[AN] 的收尾音。伊和 m 仝款會凍單獨成為一個音節，伊嘛會凍出現佇韻尾。凡是聲母ng-開頭的音節後壁一定是接鼻元音。抵好和聲母g-開頭的音節造成互補 (complementary distribution) 的現象。也因為按呢，各式台語拼音系統中，有一寡系統有標記鼻音聲母m-和n-，並無閣另外標記鼻音聲母ng-，只有標記聲母g-而已。
例字：硬、雅、娥；迎、牛(ngiu5)註[12]、藕
12. g- /g/ [g]
伊所代表的音是有聲軟顎塞暴音 (voiced velar stop; voiced velar plosive)，發的音和注音符號的「ㄍ」類似，注音符號是「
」，是一個濁音 (voiced) 聲母，發音的時，聲帶嘛愛振動著，和 /k/ 無仝的所在只有聲帶有出聲音或無，發 /k/ 的時，愛等到舌面後 (the back of tongue) 和軟顎的接觸離開了後，聲帶才會因為卜發母音才來開始振動，若是發 /g/ 的時，舌面後 猶未離開和軟顎的接觸 (chiok4) ，聲帶就會開始振動。這個音對只會曉講華語或是客語的人，甚至是受語言教育政策影響會曉講台語的少年人，是一個上富挑戰性的音。時常會省略這個音，「囡仔」 (gin2-a2) 講成「印仔」 (in3-a2) ；「台語」 (tai5-gi2) 變成「台椅」 (tai5-i2)；「拜五」(pai3-goo7) 變「拜芋」 (pai3-oo7)。換一句話講，這個聲母已經是開始行入消失的階段，真需要一段時間的特別練習才發會好勢。這個音和英文字「go」的開頭的音是相仝的，只是大多數 學英語的人受到ㄅ、ㄆ、ㄇ的影響，將應該發 [g] 的音攏總發成「ㄍ」。
」，是一個濁音例字：義、藝、牙、五、鵝、牛；夯、扭、涯、夯、魏、外、外；堯；吟、銀、迎、研、癌、顏、戇、銀；驗、源
例詞：語言、語源、額外
註[1] 這個符號「‘」是遵照Trager and Smith (1951)的用法，國際音標是用和這個符號上下顛倒反的符號，電腦並無國際音標所用的這個符號，所以改用目前這個符號。
註[2] 這個符號「|」所代表的音是頭前的音無釋放出來，其實台語的入聲攏是無釋放出來的音，親像「集」[tþip|]、「一」[tþit|]和「叔」[tþi«=k|]。
註[3] 「國語」一詞有顯示語言地位有無平等的涵意，同時也顯示出族群的無平等以及歧視，相對之下，無形中做為消滅其他「道不同，不相為謀」的語言。所以ti本文稱呼伊是華語，對咱大部分的人來講伊是咱的第二個語言，並毋是母語。
註[4] 例字是以母音圖分類的順序排的，用分號來做區別。
註[5] 當一個字有幾a個音，為著欲予咱卡清楚所舉例e發音時，特別用楷體字來代表文讀音。
註[6] 佇傳統的聲韻，這款的例詞叫做雙聲。
註[7] 母音相對是子音，攏是翻譯名稱，傳統聲韻學稱為元音，子音稱呼做輔音。
註[8] 請參考雙母音鼻音韻-iang e說明。
註[9] 頭e文讀音一般讀thio5，另外一音是thoo5。照康熙字典切音為too5。照詩韻資料來看，老前輩攏是讀thiu5。
註[10] 加網底e口語音代表是新一代所講e泉州音。
註[11] 顎的發音是kiunn1，和「薑」仝音，軟顎就是嘴舌正頂頭 (號做ting7顎) 後面和嚨喉鐘仔頭前中央一片會振動的組織，若是照鏡發「阿」的時，咱就會凍看著軟顎上下移動。
註[12] 一般聽著牛文讀音是ngiu
沒有留言:
張貼留言