2010
04031707歡喜講台語(10)
(2) 單母音鼻音韻 (basic vowel with a nasal stop ending)
單母音鼻音韻就是一個基本母音加上一個鼻音韻尾形成的韻母，咱若稍注意in 的結構會發現未少的意外縫存在。
若咱發鼻音韻尾-m 的時愛特別注意咱的嘴唇是合起來的，因為母語是華語的人會發現凡是後面是鼻音韻尾-m 的時會卡歹講予正確。定定會發成鼻音韻尾-n。
xxxi. -im /im/ [Im]
例字：沉、林；金、琴、吟；嬸、深、心、忍；熊、音
例詞：沉浸、沉吟、林蔭、琴音、深沉、心音、忍心、熊心、陰thim1
情歌：(1) 頂砱註[1]送哥落下砱，想著毋甘攬來唚，
無想昨暝睏仝枕，今來分開君甘心？
(2) 古井有水清及深，落落(lak4-loh8)紅柑半浮沉，
若是卜沉沉落去，莫(mai3)再浮起動人心。
xxxii. -in /in/ [In; I«n]
例字：賓、品、面；藤、鄰；近、輕、銀；真、親、神、仁；眩、因
例詞：貧民、面巾；珍品、鎮民；謹慎、近親、輕信；親民、親近、親身、親信、稱斤、新進、人民、任憑、認真；姻親、印信
情歌：(1) 一條大路行未盡，行到山頂頭就暈(hin5)，
若無為著娘仔恁，四轎來扛毋起身。
(2) 一日煩惱日落申，一暝煩惱雞報寅，
咱嫂心肝無要緊，無采咱哥的心神。
諺語：(1) 做人著認真，做事愛頂真。
(2) 輸人毋輸陣，輸陣歹看面。
謎猜：四角二面，lak起來七面。[i]
童謠：大食神，孝男面，早睏宴精神。
xxxiii. -ing; -ieng; -eng /iN/ [IN; I«N; EN]
這個韻母佇民間文學中，時常會和韻母-in當做是仝一個詩韻。而且有愈來愈濟人佇語音上分未清韻母-in和-ing。
例字：冰、評、明；釘、停、冷；景、慶、迎；鐘、清、誠；形、應
例詞註[2]：冰冷、平等、平定、平衡、命令、明星、名勝；澄清、定情、定型、寵sing7、冷靜、寧靜、冷冷清清；更正、競爭、肯定、慶生；證明、正經、情景、情形、清明、清靜、清閒、聖經、聖僧、性能、性情；英明、刑警、行政、胸前、行星、形成
情歌：(1) 孔明用計在城頂，魏公押倒七星燈，
親娘的嘴極賢摒，老鼠哭貓假盡情。
(2) 大石也著石仔梗註[3]，阿君也著娘牽成，
牽 成阿 君若定性，不敢拍無娘恩情。
諺語：(1) 看予清，認予明。
(2) 文 無成童生，武 無成鐵兵。
老歌：「青春嶺」第三段、「台東人」第三段、「牛犁歌」第二段、「十一歌」第五段、「走馬燈」全部、「駛犁歌」第一段、「南都夜曲」第一段、「港都夜曲」第三段、「秋風夜雨」第一段、「桃花泣血記」第二段
童謠：哈哈多呵！真歡迎！哈哈多呵！真僥倖！哈哈多呵！機關槍！
xxxiv -ian; -en /En/ [En; iEn; ian]
按照拼音來看，伊原來是一個雙母音鼻音韻，但是咱目前上界無有80% 的人攏已經無介音 /i/ 的存在，所以佇本文ka伊囥佇單母音鼻音韻來討論。
例字：編、騙、免；電、天、蓮；健、乾、研；剪、淺、仙、然；現、緣
例詞：變電、變遷、偏見；展現、天仙、天然、連綿、連天、連戰；淺見、先天、先見、善變；演變、演練、顯現
老歌：「南都夜曲」第二段
情歌：雲淡風輕近午天，身軀無洗全是仙，
落去溪仔底洗三遍，毒(thau7)死烏仔魚數萬千。
xxxv. -am /am/ [am]
例字：談、痰、男；甘、坎、癌；站、慘、杉；陷、暗
例詞：探堪、南嵌；慘淡；暗淡、暗蓋
xxxvi. -an /an/ [an]
例字：班、盼、萬；等、趁、咱；簡、牽、眼；層、田、散；漢、安
例詞：辦案、萬難、萬安；零星、難產；艱難、簡單；讚嘆、燦爛、散漫；漢奸
老歌：「白牡丹」第三段
xxxvii. -ang /AN/ [AN]
基本韻母-a後面若接鼻音韻尾-ng，伊的發音一定會受到-ng 的影響，嘴舌的部位會偏向佇卡後壁。
例字：房、芳、望；冬、窗、人；公、空；粽、蔥、送；烘、紅
例詞：幫忙、放工、放鬆；東港、銅人、動工、人工；工人、空房、空桶；藏人、送人；紅蟲、紅人
情歌：(1) 門口一欉相思欉，相思病落毋知人，
先生來看講無望，貼心來看好噹噹。
(2) 一暝睏去又眠夢，夢見了嫂入我房，
雙手攬來又空空，翻身一看並無人。
諺語：(1) 三工早，重(tiong5)一工；三冬早，重一冬。
(2) 家己種一欉，卡贏看別人。
(3) 歡歡喜喜一工，煩煩惱惱也一工。
老歌：「補破網」全部、「賣肉粽」(燒肉粽) 第一、二、四段、「台東人」第五、六段、「思想起」第一段、「四季紅」全部、「青蚵仔嫂」第二段、「六月茉莉」第三段
謎猜：(1) 一隻鳥仔白蔥蔥，二枝竹仔 趕入孔。[ii]
(2) 頭刺刺 尾施帆，在生無血色 死了滿身紅。[iii]
童謠：新娘水噹噹，褲底破一孔；
頭前開店窗，後壁賣米香；
米香無人買，跋落屎礐仔底。
xxxviii. -om /m/ [m]
這個韻母除了少數人保留幾個日常常用的語詞以外，已經算是無存在的一個韻，相信這個韻母真緊就會消失去。
例字：蔘(som1)
xxxix -ong /N/ [N]
佇無外嚴格的文學押韻情形之下，韻母-iong是和這個韻母的韻是算仝韻。
例字：磅、椪、摸；同、統、農；講、抗、戇；總、聰、爽；鳳、旺
例詞：擋風、童裝、通往、痛風、籠統、攏總；裝潢、總統、狀況；王莽、轟動、風光、放蕩、鳳凰
情歌：(1) 白紙寫字青紙封，紅包外面做批囊，
愛寄幾句加君講，內山火車未交通。
(2) 為娘掛吊註[4]半顛戇，
池內無水魚會哢註[5]，
是卜是毋照實講，講了無影真膨風。
諺語：(1) 龍交龍，鳳交鳳；隱龜交懂戇。
(2) 第一門風，第二祖公。
老歌：「運命」、「安平追想曲」第一段
童謠：一年的悾悾，二年的孫悟空，
三年的吐劍光，四年的gau5膨風，
五年的上帝公，六年的閻羅王。
謎猜：日出滿山去，黃昏歸滿堂；年年出真主，日日採花郎。[iv]
xl. -un /un/ [u«n]
佇實際發音的時，因為嘴舌按基本母音的發音部位徙到頭前發鼻音韻尾-n 的，一定會有 /«/ 的韻母插入，佇台語來講這個插入的成份非常的明顯，所以咱若唸英文的 [un] 的時，外國人馬上就分別會出來咱是台灣英語。
例字：本、盆、文；唇、吞、論；裙、坤、銀；船、春、孫；雲、運
例詞：本文、本分；吞忍(lun2)、論文、倫敦；軍訓；遵循、春圇、春筍、春分、孫文；溫馴、隱遁、允準、韻文、分寸、渾沌
情歌：(1) 梅仔好食酸吻吻，
楊桃好食加冷損，
若無與哥仝床睏，
因何褲帶短三寸。註[6]
(2) 女：小妹攬兄唚嘴唇，
二人相看淚紛紛。
男：咱嫂心肝不時悶，
連飯未食湆未吞。
諺語：(1) 惜花連盆，疼囝連孫。
(2) 大鼎未滾，小鼎沖沖滾。
老歌：「白牡丹」第一段、「日日春」第一段、「秋風夜雨」第三段
謎猜：紅面將軍，吐舌三分，大大細細攏是阮囝孫。[v]
(3) 雙母音鼻音韻 (a diphthong with a nasal stop ending)
雙母音鼻音韻就是雙母音的後面閣加上鼻音韻尾，理論上，雙母音有八個，鼻音韻尾有三個，按呢就有二十四個可能性的組合。但是實際上，大部分的人只有四個有意義的組合而已。
xli. -iam /iam/ [iam]
例字：點、添、念；減、欠、驗；針、簽、閃、染；險、鹽
例詞：檢驗、鹹纖(siam1)；漸減；鹽店
謎猜：頭尖尾尖，放屎臭馦(hiam1)馦，上桌無人嫌。[vi]
諺語：偷占偷捻(liam3/1)，一世人欠。
xlii. -iang /iAN/ [iAN]
這個韻母的有部分語音和韻母-iong是自由變音，伊嘛是漳泉音的差別，一般來講，韻母-iang和韻母-iong有自由變音的時，講-iang是屬漳州語音，-iong是屬泉州語音的系統。
例字：長、亮；雙、嚷；享、陽
例詞：張揚、響亮、養傷
xliii. -iong /iN/ [iN]
例字：中、暢、龍；強、恐；終、衝、傷、絨；雄、勇
例詞：隆重、忠良；中央、中庸、中獎、中傷；恐龍；從中、松茸、傷重；勇將
情歌：(1) 三國猛將趙子龍，唐朝勇將蔚遲恭，
咱嫂心肝無意愛，兄哥毋敢娘參商。
(2) 分開也是姑不終，毋敢講兄你梟雄，
親夫親妻卡致重，你咱也是無久長。
xliv. -uan /uan/ [uan]
例字：滿；端、團、暖；縣、款、願；全、喘、選；灣、幻
例詞：貫穿；專員、全權、宣傳、軒轅、旋轉；圓滿、婉轉、完全、宦官、反串
諺語：生死攏共款，有啥通操煩。
xlv. -uang /uAN/ [uAN]
自例字來看，韻母-uang應該是屬擬聲語音，除了外來語以外，咱已經是找無其他的例字，一般來講，擬聲語音並無算是一個韻母，但是咱的台語字典系統攏有收集這個語音單獨做一個韻母。
例字：嚾(uang1)
註[1] 砱(gim5)：戶碇頭前的階梯叫做砱仔。
註[2] 按：-ing韻的詞佇台語真濟，猶有真濟無扑。
註[3] 梗(king7)：支撐
註[4] 掛吊：非常思念的意思。
註[5] 哢(long7)：跳躍。
註[6] 暗示已經有身並且愛緊做解決。
沒有留言:
張貼留言