2010
04031720歡喜講台語(11)
5 入聲韻 (unreleased stop endings; checks)
入聲的特色就是發音的時間特別短，也就是進前咱所介紹的四十五的韻母語音發一半而已所形成，將原來鼻音韻尾的音完全切斷去，仍然維持著原來的發音位置。所以，佇台語的傳統分析內底，只要是韻尾是-p [p|], -t [t|], -k [k|], 以及 -h [h|] = [/] 等四個攏總歸類叫做入聲。
因為入聲語音對真濟人來講是干單 (kan1-na7) 知影理論，比較卡無法度舉例的音，所以，佇茲特別儘量舉卡濟例，予咱會凍更加知影入聲的發音位置。
i. -p
入聲韻尾-p 的發音特色是咱講話的語音最後嘴唇是和鼻音韻尾-m仝款，只是完全無聲並且將所有氣流塞著 (tiau5) 咧，嘴唇無像聲母p-和ph-閣再開開，所以這個韻尾是一個完完全全的塞音 (unreleased stop)。佇民間文學方面以及傳統十五音的字典系統，凡是有入聲韻尾-p 的韻母攏和鼻母韻尾-m 的韻母仝一個詩韻的。
例字：立、急、吸、集、溼、入；壓、答、納、磕、十、插(chap4)、屑(sap4)、合；葉、蝶、貼、粒、劫、業、汁、妾、澀、脅
例詞：立業、吸入、集合、執業；納入、雜插；接納、接洽
ii. –t
入聲韻尾-t 的發音特色是咱講話的語音最後嘴舌尖的位置是和鼻音韻尾-n仝款，只是完全無聲並且將所有氣流塞著咧，嘴舌尖無像聲母t-和th-閣再放落來，所以這個韻尾嘛是一個完完全全的塞音 (unreleased stop)。佇民間文學方面以及傳統十五音的字典系統，凡是有入聲韻尾-t 的韻母攏和鼻母韻尾-t 的韻母屬佇仝一個韻母內底。
例字：一、筆、匹、蜜、直、桔、乞、一、七、實、日；搧、別、撇、滅、哲、徹、列、結、孽、節、切、設、熱、穴；密、達、踢、力、賊、虱；熨、勃、物、突、禿、律、骨、屈、卒、出、術、佛；閱、潑、末、奪、脫、劣、決、缺、月、絕、雪、法
例詞：密切、直達、實質、實物、失職、失業、日出；值得；物質、出力、鬱卒；骨節、骨力、出發、出日、出脫；結實；法律
諺語：(1) 一遍賊，百世賊。
(2) 講到予你識，嘴鬚好打結。
謎猜：(1) 頭圓尾直，六支腳四支翅。[i]
(2) 烏面賊，扑(phah4)未死 埋未密。[ii]
iii. –k
入聲韻尾-k 的發音特色是咱講話的語音最後嘴舌後半部分的位置是和鼻音韻尾-ng仝款，只是完全無聲並且將所有氣流塞著咧，嘴舌後半部分聲母k-和kh-閣再放落來，所以這個韻尾嘛是一個完完全全的塞音 (unreleased stop)。佇民間文學方面以及傳統十五音的字典系統，凡是有入聲韻尾-k 的韻母攏和鼻母韻尾-ng 的韻母囥佇仝一個韻母的下腳。
例字：益、逼、霹、墨、竹、畜、歷、極、刻、逆、叔、策、色；沃、北、曝、目、觸、讀、六、角、殼、獄、齪、鑿、學；惡、卜、博、木、毒、拓、鹿、國、酷、作、簇、束、福；育、築、畜、陸、菊、曲、玉、足、綽、淑、辱
例詞：霹靂、的確、德國、特色、綠色、刻薄、克服、積極、即刻；北極、六角、角色；鹿角、暴力、國策、束縛、復國；約束
諺語：(1) 娶某冊毋讀，嫁翁腳毋縛。
(2) 無催無託，食到老皓(khok4)皓。
iv. –h
入聲韻尾-h 的發音特色是咱講話的語音最後聲帶是合起來和咱禁氣無閣再喘氣的感覺仝款，所以這個韻尾嘛是一個完完全全的塞音 (unreleased stop)。佇民間文學方面以及傳統十五音的字典系統，凡是有入聲韻尾-h 的韻母攏和母音韻尾 的韻母算做是仝韻母的。
例字：鱉、滴、鐵、裂、舌、蟋；厄、白、麥、、笠、格、客、冊、雪；鴨、百、拍、肉、踏、塔、蠟、甲、插；薄、桌、落；額、隻、赤、削；石、惜、歇、對；月、說、血、畫、襪；活、撥、抹、屜、割、闊、煞、熱、喝
例詞：滴血、鐵壁、鐵塔；白鐵、白雪、白食、隔壁、冊頁；鴨舌；血滴、血跡；活頁
諺語：(1) 食魚食肉，也著菜佮(kah4)。
(2) 人掠厝拆，雞仔鳥仔踏死無半隻。
(3) 無的 驚囝大食，有的 驚囝毋食。
(4) 食錯藥，人參一石；
食對藥，青草一葉。
老歌：「思想起」第二段 (押-ioh韻)
謎猜：(1) 頂石合下石，會生根未發葉[iii]。
(2) 一欉樹仔二片葉，越來越去看未著[iv]。
(3) 一項物件 輕輕薄薄，浸水未澹 放火未著[v]。
童謠：日頭赤役役(iah8)，貪官污吏卡緊掠。
[i] 田嬰。
[ii] 人影。
[iii] 舌。
[iv] 耳仔。
[v] 人影。
沒有留言:
張貼留言