2010
04031701歡喜講台語(9)
(2) 雙鼻母音 (nasal diphthongs)
雙鼻母音就是照發雙母音的方法仝款，只是聲音同時有按鼻孔出來，和單鼻母音仝款，雙鼻母音嘛有意外縫存在，因為雙母音有韻母-ue，並無雙鼻母音-uenn存在，佇雙母音韻母-iu和-io是分開的韻母，佇雙母音中，類似的組合韻母-iunn和-ionn是自由變音，韻母-ionn是漳州音，-iunn是泉州音，佇嘉義地區，-ionn 的消失非常的緊，會凍講差不多是全部攏總以講-iunn為主體。
xxi. -iann /iA)/ [iA)]
例字：餅、骿、名；鼎、聽、嶺；行、迎；正、請、聲；影、兄
例詞：拚命、名聲；疼命命；京城；正廳
情歌：(1) 我娘與君斷約定(tiann7)，勸君安心毋免驚，
娘既嫁君作某囝，閣卡艱苦我著行。
(2) 頂暗陷眠叫娘名，阮某知也我真驚，
若有來問講無影，毋通卜與伊輸贏。
諺語：(1) 少年拚出名，食老惜名聲。
(2) 坐予正(ciann3)，得人疼。
(3) 趁小錢靠拍拚，趁大錢愛運命。
老歌：「青春嶺」第一段、「思想起」第四段、「天黑黑」上尾二句、「駛犁歌」第二段、「安平追想曲」第三段
童謠：一鼠賊仔名，二牛駛犁兄，三虎跁山坪，
四兔遊東京，五龍富貴命，六蛇人人驚，
七馬跑兵營，八羊食艸嶺，九猴樹頂行，
十雞報曉聲，十一狗吠囡仔兄，十二豬菜刀命。
xxii. -iunn；-ionn /iu); iɔ)]/ [iu); iɔ)]
韻母-iunn和-ionn是自由變音，若用漢字表記是無法度來分別之間的無仝，只有佇標寫拼音的時，才會顯示出來in 的地方色彩。
例字：張、讓；薑、腔；癢、象、箱；香、羊
例詞：上場、廠長
情歌：(1) 阿哥愛這雙人想，娘會想兄哥想娘，
看娘無兄卜怎樣，夜夜思想心肝溶。
(2) 與君相好睏仝張，離別分開兄離娘，
咱無鬥嘴按怎樣，干單來煞心真溶。
諺語：(1) 少年未曉想，食老毋成樣。
(2) 有樣看樣，無樣家己想。
老歌：「十一哥」第六段、「秋風夜雨」第二段
謎猜：看是一斤 稱無 四兩 ，五個人拖 十個人搶。[i]
xxiii. -ainn /a)i]/ [a)i]
例字：歹、甭(mai3)；耐
xxiv. -aunn /a)u/ [a)u]
例字：貌、腦；藕(ngau7)
xxv. -uinn /u)i/ [u)i]
這個韻母除了「每」以外，對大多數的嘉義人來講，已經是無存在的一個韻母，原來漳州系統「檨仔」的「檨」語音是 [su)i] ，大部分已經講成 [sua)i] 的語音，「芫荽」的「荽」原來是[su)i] 變成 [sui]，其他大部分已經轉化成韻母-ng，存在這個韻母的所在就變成真特殊的腔口，親像宜蘭地區以及桃園的大園鄉攏是維持著這個韻母。
例字：每、荽
xxvi. -uann /uA)/ [uA)]
例字：盤、伴、鰻；彈、炭、爛；汗、肝、看；碗
例詞：半山、盤nua2；碗盤、換線
情歌：(1) 池中無水天作旱(huann7)，天頂落霜地下寒，
咱哥無娘通作伴，卡慘六月無水泉。
(2) 阿哥有來娘有伴，阿哥若去娘孤單，
親像孤鳥尋無伴，阿君我囝我心肝。
諺語：(1) 人情留一線，日後好相看。
(2) 關門著閂(chuann3)，講話著看。
老歌：「農村曲」第三段、「思相起」第三段、「河邊春夢」第一段、「淡水暮色」第二段、「南都夜曲」第三段、「六月茉莉」第一段
謎猜：(1) 頂山合下山，中央一塊牛肉干。[ii]
(2) 樹頂一塊碗，雨來貯未滿[iii]。
童謠：嬰仔嬰嬰睏，一暝大一寸；
嬰仔嬰嬰惜，一暝大一尺；
搖囝日落山，抱囝金金看，
囝是我心肝，驚你受風寒。
嬰仔嬰嬰睏，一暝大一寸；
嬰仔嬰嬰惜，一暝大一尺；
仝是一樣囝，那有兩心情，
查甫也著疼，查某也著晟註[1]。
(3) 三鼻母音 (nasal triphthongs)
口母音 (khau2-bo2-im1; oral vowels；就是基本母音、雙母音以及三母音) 和鼻母音的數目就是佇三鼻母音和三母音攏總仝款，並無改變，無意外縫，嘛無變成自由變音存在。
xxvii. -iaunn /ia)u/ [ia)u]
例字：妙；猫
xxviii. -uainn /ua)i/ [ua)i]
這個韻母嘛是佇轉化之中，有可能是因為這個語音比較卡困難發音並且卡佔時間，佇日常生活使用方便來講，實在是無夠經濟，所以親像「小妹」的「妹」/muai/ 就變做其他的音，如：[mue]、[bue]、[mai]、[be]...等等。
例字：糜；關；檨；橫
童謠：眠床重(tang7)重橫(huainn5)橫，無某無猴睏袒橫。
4 鼻音韻 (nasal stop endings)
鼻音韻的特色就是佇基本母音以及雙母音的後面閣接一個鼻音韻尾，佇台語來講，有三個鼻音韻尾，就是韻尾-m， -n 以及 -ng三個。後面二個華語嘛有，就是「ㄢ、ㄣ」 /an; «n/和「ㄤ、ㄥ」 /AN; «N/。
佇鼻音韻這一方面，咱卜分做音節性鼻音韻、單母音鼻音韻以及雙母音鼻音韻三部分來講。
(1) 音節性鼻音韻 (syllabic nasals)
音節性鼻音韻就是用鼻子音 (nasals) 單獨獨立做一個音節來使用，這款的音節結構是華語所無的音韻形式，台語有韻母-m以及-ng二個。
xxix. -m /m`]/ [m`]
這個韻母除了常用的「是m是」以及「阿姆」以外，差不多嘛是會凍算是得卜無存在的韻母，除了和聲母h-結合以外，差不多就無和其他聲母結合存在。
例字：姆、茅(hm5)
xxx. -ng /N`/ [N; «N`]
這個韻母有真濟語音是對韻母-uinn變化過來的，佇發音的時，因為舌的移動，因此加減會有一個中性母音 /«/ 的語音插佇頭前，假使 /«/ 的成份真重，就會變成單母音鼻音韻，完全和「ㄥ」是仝款的語音，因此，伊的音節結構嘛會產生變化。因為佇台語，聲母b-和m-是互補的，聲母l-和n-嘛是互補的，鼻音聲母m-和n-後面一定是接鼻音，所以韻母-ng頭前 /«/ 的成份過重，原本的聲母m-和n-會變成聲母b-以及l-。有可能這款的組合顯示出講話者 (speakers) 原來的母語並m是台語，有可能是客語或是人所講的「鶴佬客」。
例字：飯、問；長、湯、卵；光、糠；裝、床、酸；園、黃
例詞：飯湯；褪光光、軟糖、趡鑽(nng3-tsng3)；裝門、損斷、酸軟；黃痠、遠門、遠光
情歌：水車車久著操損(sng2)，精牲飼久會脫毛，
若卜有交就無斷，塔無翁某睏仝床。
諺語：(1) 時到時當，無米煮蕃薯湯。
(2) 萬事不由人計算(sng3)；一生攏是命擔當。
老歌：「心酸酸」全部、「農村曲」第一段
謎猜：(1) 天頂一抱秧(ng1)，無水無汁家己長。[iv]
(2) 青桶盤 綠竹管(kng2)，空手去 抱囝轉。[v]
(3) 一日走三頓，一暝踦(khia7)到光。[vi]
童謠：點a點水缸，啥麼人放屁爛腳倉。
註[1] 晟：音chiann5。栽培養飼的意思。
沒有留言:
張貼留言