2010
04031645歡喜講台語(8)
(2) 雙母音 (diphthongs)
一般的母音分析，假使有二個母音排做伙，攏會將頭前是i-或是u-叫做介音，主要是因為佇頭前的母音發音的時間攏真短，毋是佔主要的角色，所以並無承認伊是母音，ka稱呼做半母音，國際音標分別標記成 [j] 和 [w] 後面若是-i或是-u仍然認為伊是母音的一部分，和頭前的母音合聲稱為雙母音，國際音標分別標記成 [I] 和 [U]。佇茲，咱無論是啥麼款的情形，只要是有用著二個基本母音組合起來的母音，攏總ka in稱呼做雙母音。
即然雙母音是二個基本母音連起來，咱佇茲標寫國際音標的部分，若無特別有地方腔口的問題，佇標記方面就無真正非常嚴格來做標記，若有需要詳細標記，請參考基本母音的部分。
佇下面韻母的數目標記繼續頭前的編號接落去，一直到四十五個韻母講完為止。
vii. -ia /ia/ [ia]
例字：爹；寄、騎、夯(gia5)；者、車、寫、惹；瓦、夜
例詞：騎車；夜車
諺語：心肝若想邪，雨傘借人夯。
心肝無想邪，雨傘借人遮。
viii. -io /io; iF/ [io; iF]
漳州系統的人大部分會發 [io]；泉州系統的人大部分會發 [iF]。這個雙母音有漳泉之分是因為韻母-o所引起的。
例字：錶、票、廟；釣、挑；橋、口、蟯；蕉、笑、小、尿；後、腰
例詞：招標
情歌：含笑過午芳芎蕉，手扞(kuann7)花藍挽茶葉，
驚父驚母毋敢叫，假意呼雞喊鴟鴞(hiam3 lah8-hioh8)。
諺語：老父扛撟，囝坐轎。
謎猜：我的手攬你的腰，你的尻川予我放火燒。[i]
童謠：搖啊搖，搖啊搖，囡仔愛睏愛人搖。
ix. -iu /iu/ [iu]
例字：彪；稻、抽、鰡;球、Q、扭；酒、手、收、柔；休、油
例詞：柳樹、琉球；九流、求救；秋收、收留、繡球、袖手、授受；憂愁、優秀
諺語：滿山攏是樹，司傅取無樑。
老歌：「日日春」第二段
謎猜：(1) 四蕊目睭，頭前行後壁咻。[ii]
(2) 四腳落地二腳勼，講猴閣無尾溜，講牛閣毋食稻。[iii]
(3) 有腳無手，有衫無鈕，出門專食紅燒酒。[iv]
童謠：溜溜瞅瞅，弓網仔鰗鰡，縛肉粽hainn3韆鞦。
x. -ai /ai/ [ai]
例字：拜、派、眉；獃、待、來；改、慨、礙；在、菜、獅；海、愛
例詞：排解；台大、台海、大概、大使；開泰、開採；災害、齋戒、在內、彩排；愛戴、愛財、海派、海苔、海菜
情歌：(1) 二人意愛在心內，兄哥在東妹在西(sai1)，
咱嫂若無嫌我醜(bai2)，當蠅當蚊都卜來。
(2) 嫂嫂與(kah4)哥真意愛，又驚咱厝父母知，
暝日偷來幾十擺，兄哥無講嫂不知。
諺語：(1) 人生親像大舞台，苦齣笑詼攏公開。
(2) 心歹無人知，嘴歹上厲害。
老歌：「台東人」第二段、「望春風」第二段、「十一哥」第三段、「孤戀花」第三段、「駛犁歌」第四段、「淡水暮色」第一段、「望你早歸」最後三句、「六月茉莉」第四段、「心事誰人知」全部、「桃花泣血記」第三段
謎猜：(1) 二蕊目睭無目眉，有腹肚 無肚臍。[v]
(2)一個老伙仔老哀哀，厝前厝後補米篩(thai1)[vi]。
(3) 長腳秀才，逐暗你也來，若予阮五兄弟仔知，看你生命毋就害[vii]。
童謠：大箍呆 炒韭菜 燒燒一碗來 冷冷我無愛。
xi. -au /au/ [au]
例字：包、炮、卯；豆、頭、樓；狗、哭；走、草、掃；孝、甌
例詞：包抄；偷走、老頭、老狗、老猴；狗頭、口頭；走漏、走狗、走到、灶頭；後斗、後頭
情歌：(1) 阿娘洗衫在圳溝，目屎流落水底走，
人人笑我偌(jua7)愛哭，與君離開失對頭。
(2) 與君約在後壁溝，菅尾打結做號頭，
夭壽啥人給阮解(thau2)，拍歹姻緣是無賢(gau5)。
諺語：(1) 食果子，拜樹頭；食米飯，敬鋤頭。
(2) 寵囝不孝；寵豬夯灶；
寵查某囝，未落人的家教。
老歌：「牛犁歌」第一段、「農村曲」第二段、「駛犁歌」第三段、「青蚵仔嫂」第三段、「六月茉莉」第二段
謎猜：溪口一抱草，囡仔背未行，老人背咧走[viii]。
童謠：人插花 你插草；人坐轎 你坐膨匏籚註[1]；
人抱孫 你抱狗；人未嫁 你先tue3人走。
xii. -ui /ui/ [ui]
例字：肥、屁、眛(bui1)；堆、梯、雷；跪、虧、魏(gui7)；水、嘴、瑞；輝、胃
例詞：肥水；堆肥、追隨、對壘、類推；歸隊、歸類、鬼鬼祟祟、開嘴；水肥、水雷、水鬼、醉鬼、摧毀、嘴水、隨隊、瑞穗；渭水、翡翠、匪類、廢水、違規
情歌：(1) 金蠅嘛店嫷花蕊，蝴蝶看著緊飛開，
實在真正不死鬼，汝的地場在糞堆。
(2) 茶甌摃破無成瓷(hui5)，少年無某真克虧，
兄哥坐落喘大氣(khui3)，好魚好肉食未肥。
諺語：(1) 有心拍石石會踒(ui1)，無心做事半路廢。
(2) 有毛的食到棕簑，無毛的食到秤錘(thui5)。
老歌：「白牡丹」第二段、「賣肉粽」(燒肉粽) 第三段、「青春嶺」第二段、「十一哥」第四段
謎猜：毋驚神 毋驚鬼，驚風颱 驚大水[ix]。
童謠：累累tui-tui，累tui囡仔真累tui1註[2]，
食飽放粉鳥 歕(pun5)雞kui1，
無雨衣幪(mua1)棕簑，
去到屎礐仔口 趨(chu7)一倒 雙腳展開開，
叫父叫母 叫甲大頷kui1。
xiii. -ue /ue/ [ue;oe]
佇實際發音，唸這個雙母音的時，因為嘴舌無真認真維持著 /u/ 應該有的位置，若唸 /u/ 的部分的時陣，比較卡會接近 /o/ 的音，所以有未少的拼音系統將伊拼寫成-oe。
例字：杯、皮、尾；瓜、詼(khue1)、月；罪、髓、稅、銳；火、話
例詞：賠罪；炊粿(kue2)
情歌：(1) 人食閒米講閒話，講咱二人有交陪，
此去姻緣若無配，汝咱二人逐家衰(sue1)。
(2) 我娘生美十八歲，卡美京城牡丹花，
終身配伊都未過，親像犀(sai1)牛咧望月。
諺語：(1) 未先學行先學飛，未先種籽想挽瓜。
(2) 某張 毋蓋被，翁氣 毋食糜。
老歌：「雨夜花」第一段 (泉音)
謎猜：出門一蕊花，入門一條瓜[x]。
童謠：圓仔花，白雞髻 ( kue3 )，翁行某tue3。
xiv. -ua /ua/ [ua; oa]
和-ue 的情形相仝，所以有部分的拼音系統拼成-oa。
例字：破、磨；大、拖、賴；歌、誇、我；紙、蔡、沙；華、倚 (ua2)
例詞：拖磨、拖沙
情歌：六月算來是火熱(juah8)，少年幾人未(be7)風花(hua1)，
咱嫂與哥來咒誓，先梟(hiau1)死了予(hoo7)狗拖。
諺語：做人著磨，做牛著拖。
老歌：「台東人」第一段
謎猜：(1) 風來嘩嘩，雨來沙沙，隱痀的生百外[xi]。
(2) 二兄弟仔平岏平大，日時分開 暗時相chua7[xii]。
(3) 三母音 (triphthongs)
對三母音的名來看，咱就會凍真明顯知影伊就是三個基本母音黏做伙當做一個音來講，因為有三個母音共同存在，所以，有人會覺察著伊毋是一個語音而已，大部分的人攏會認為伊是二個音組成的。咱會按呢想的原因就是因為咱學過的注音符號標記華語的時就是標記二個符號。
當然，佇一般韻母分析，真少人認為有三母音存在，因為，上頭前彼個母音另外稱呼介音，算做半母音。攏無算做母音看待。
xv. -iau /iau/ [iau]
例字：標、飄、苗；條、跳、廖；嬌、蹺、消、爪(jiau2/3)；曉、要
例詞：攪擾；蕭條、宵小、逍遙；妖嬌、窈窕
諺語：一代(te7)親，二代表，三代無了了。
童謠；仁丹標，烏矸仔標，萬金油用虎標，
籐條 薄荷條，卜扠(sa1)無半條。
xvi. -uai /uai/ [uai]
例字：乖、快、懷；歪
3 鼻母音 (nasal vowels)
鼻母音是台語的一個真大的特色，是非常的豐富，世界上有鼻母音的語言無濟，佇語言學時常舉法語做例，所以，真濟人知影法語有鼻母音，但是毋知影台語的鼻母音是濟假若貓仔毛咧。
鼻母音就是發音的時，聲音毋是單純對嘴出來而已，聲音閣愛同時經過鼻孔出來，有人認為in是鼻化母音 (nasalized vowels) 。對歷史語言學來講，鼻母音原來後面攏有一個鼻音結尾，佇語言變化的過程中去予消失去而已，鼻音結尾的消失並無將伊ka母音鼻化的特色做伙消失，所以，鼻母音是因為按呢才會繼續保存落來。
雖然，in原來是鼻化母音，但是按照咱目前的韻母系統來講，in已經變成獨立的母音，無應該閣稱呼in是鼻化母音，應該稱呼鼻母音才對。
因為鼻母音是台語的一個大特色，是英語所無的，單純用二十六個英文字母來拼鼻母音一定是無夠用的，所以愛有特別的處理方式，佇國際音標的處理方式是用這個 [ )] 符號 (有人稱呼伊是「刺毛蟲」) 標寫佇母音的正頂頭，佇咱的拼音系統是用「-nn」囥佇母音的後面來處理，其他拼音系統有人用大寫N來處理、用上標n來處理、用n標佇母音的頭前來處理、以及其他的符號來處理。一般來講，鼻母音若是佇拼寫的時，頭前若是有鼻音聲母m-、n-或是ng- 的時，大部分的拼音系統會去掉鼻音的成份，只有寫母音的部分，因為只要是聲母m-、n-或是ng- 加上母音的時，對台語音來講，後面的母音會自動鼻化，所以會凍免閣拼寫鼻音-nn [ )] 的部分。
佇民間的情歌、童謠、民謠、謎猜、諺語、孽畜仔語 (歇後語) 、詩...等等，若是有押韻的時，假使無真嚴格遵守語韻的時，時常會將鼻母音和母音算做是仝一個詩韻。所以咱時常會看著韻母-i和韻母-inn是仝韻；韻母-e和韻母-enn仝韻；韻母-a和韻母-ann仝韻。
(1) 單鼻母音 (basic nasal vowels)
佇台語的單鼻母音中，有一個真奇怪的現象就是無韻母 /u)/ 和 /o)/單獨存在，形成一個意外縫 (accidental gaps) 註[3]。顛倒佇雙鼻母音之中有韻母-iunn 的存在。當然，佇理論上，母音 (包括基本母音、雙母音和三母音) 有幾個，鼻母音就有幾個，實際上，咱發現著in有未少的意外縫存在。咱猶原會凍無抵著外大的困難來發茲的意外縫的音。
xvii. -inn /i)/ [i)]
例字：邊、鼻、麵；甜、天、年；見；錢、鮮、扇；耳、圓
例詞：天邊；見天；耳邊、耳鼻
情歌：(1) 咱嫂坐在大門邊，咱哥坐在眠床墘(kinn5)，
嫂嫂一身卡幼麵，嘴頰(phue2)來唚(cim1)才是甜。
(2)卜食好魚近水墘，卜盤註[4]娘仔近厝邊，
三不五時可相見，卡好雲開月見時。
謎猜：竹篙接天，雨傘團圓，大的生囝卡值錢。[xiii]
童謠：白鴒鷥捙畚箕，捙到潭仔墘，跋一倒 拾著一銑錢。
xviii -enn /E)/ [E)]
這個音佇泉州系統的人大部分的字音已經變成韻母-inn 的字音。
例字：病、澎、暝；鄭、躺、晾；更、坑、硬；井、青、生；嬰
例詞：青瞑
諺語：賊偷一更，顧賊一暝。
xix. -ann /A)/ [A)]
例字：冇(phann3)、媽；膽；三；嚇、餡(ann7)
例詞：擔擔(tann1-tann3)
諺語：咸豐三註[5]，講到今。
xx. -onn /ɔ)/ [ɔ)]
這個韻母的音有部分嘛是已經有產生了變化，親像數字「1, 2, 3」的「2」，原本是這個韻母，發音為 [n)]，現在只賰漳州系統的一部分老人才有存在這個語音。這個韻母和聲母ng-的結合嘛有真濟已經變成和goo是自由變音。
例字：魔；怒；娥；嗡
註[1] 匏籚：pu5-lau2。是一種以竹為骨，頂下攏有纏布，形狀親像匏。古早時查某人用來貯紗線、碎布kah針器的物件。兒童取來坐，縛一條帶仔，另外一個兒童牽咧行，或是加一個人，ti後面推sak4的遊戲。
註[2] 形容一個囡仔性地無好又閣毋識道理叫做累tui。
註[3] 意外縫就是以一個系統性的完整情形來講，自台語聲母的系統性來講，咱有聲母b-和g-，唯獨欠缺一個聲母d-，理論上，既然有聲母p-, t-, k-形成一套；聲母ph-, th-, kh-形成一套，按呢b-, d-, g-嘛愛形成一套才會表現出完整的系統，但實際上並無d- 的聲母，因此，形成一個意外縫，也因為按呢，有人認為聲母l-就是聲母d-，卜用按呢來彌補這個意外縫。
註[4] 盤：說服的意思。
註[5] 為太平天國之亂1853年。
沒有留言:
張貼留言