2010
03272248歡喜講台語(7)
(1) 基本母音 (the basic vowels; the cardinal vowels)
世界每一個族群的語言攏一定有母音和子音，母音一定有基本母音存在，然後才閣用基本母音來組合成閣卡複雜的母音，對複雜的母音觀點無仝，當然所分析出來的結果就會無仝，希望咱會凍家己分析出其他的分法，無一定愛完全將本文的分析當做唯一的答案。每一個語言分析方法攏是先有一個實際現象存在才來做這個實際存在的現象的合理解說而已。
一般來講，母音是講話的時自然產生的物件 (mih8-kiann7)，即然是自然產生，自然所產生的母音就是以最自然的情形來發音，無需要特別去刻意來發某一個音。當然，基本母音只要佇無影響著意義辨識之下，伊就有某一種的發音空間，主要的原因是咱佇咧發音的時，無可能親像機械仝款做完全一模一樣的動作，親像咱講「會曉」 (e7-hiau2) 這個詞，若經過物理聲波的頻率、時間和音量比較了後，咱會發現咱無可能講第二個仝款的「會曉」出來。只要佇某一種發音允準空間之下，咱毋免親像數學仝款遐呢頂真，講三分之一就一定愛是三分之一，未凍變成五分之二，若按呢做就會變成縛腳縛手。
基本母音攏會有伊的基本發音空間，而且愛佇無影響著辨義之下才會使，也因為按呢，基本母音就會平均來分配伊的發音空間，當然，基本母音愈濟，每一個基本母音所會凍使用的發音空間就會愈窄，親像英語就有十四個基本母音，當然伊的分配空間就真窄。
咱台語的基本母音有六個，就親像圖六所顯示仝款。
圖六：台語的基本母音圖。
其實，這個母音圖上重要的所在毋是拼音，嘛毋是漢字，是圖形上點的位置，咱若是看識 (bat4) 這個圖所代表的意義，自然會凍應用佇世界各種語言頂面，會凍真緊學會曉一個語言的母音系統。拼音和漢字只是圖上點的舉例而已，只要任何的符號是表示圖上點的發音位置就可以a，親像圖七仝款。
當然，以正常的感覺來講，咱並無法度來接受用「#, $, %, &, *, @」按呢的符號來做發音符號，但是，若是透過教育，多數人的接受，伊真自然就會參像咱第一次接觸ㄅㄆㄇㄈ、ABCDE、K.K.音標、國際音標、物理、數學、化學...等等的符號仝款，會來接受，來使用，凡是會曉看母音圖的人，會凍完全毋免考慮著符號的形體，唸出「#, $, %, &, *, @」的符號所代表的就是「醫、會、阿、芋、蚵、有」的台語音，如果這個圖若是完全用漢字表示，毋管伊是毋是會曉看漢字嘛是仝款會曉唸。
圖七：用任何符號來代表台語的六個基本母音。
所以，咱現在來學看這個圖形所代表的意義，按呢咱卜閣介紹其他的韻母就會凍加真緊的速度，也會凍省去真濟真長的說明。
首先，咱來比較「醫生」的「醫」和「阿公」的「阿」，咱若是發「醫」的時，嘴一定是合ka嘴齒得卜咬做伙，發「阿」的時一定是嘴開ka真大孔，嘴開ka無法度閣再開所發的音嘛是「阿」，所以母音圖點「醫」和「阿」的位置所代表的意思就是按呢。所以咱看圖馬上知「會曉」的「會」抵好佇發音的時，嘴抵好開一半。
閣來，咱來比較「醫生」的「醫」和「有或無」的「有」，咱會發現這二個的音嘴開開的程度差不多，只是「有」的嘴唇有變圓，另外就是咱的舌的後半部會向軟顎的所在接近，換一句話講，就是咱講「醫」的時，舌會對自然狀態徙 (sua2) 進前和硬顎接近，講「有」的時舌會對自然狀態徙向軟顎的所在接近。「醫」代表舌是佇頭前，「有」代表舌是佇後壁。
最後，咱若是以點做中心，會發現著基本母音圖的符號有囥佇點的倒手爿和囥佇點的正手爿，這是代表啥麼意思呢？咱抵才講「醫」和「有」的差別的時，有講著「有」的嘴唇是圓的；咱若是注意咱講「醫」的時，咱的嘴唇的形狀是扁扁的，所以點的倒手爿代表著嘴唇是扁的，點的正手爿代表嘴唇是圓的。因此，咱看著「醫」和「會」攏囥佇倒手爿，「芋」、「蚵」和「有」攏囥佇正手爿。「阿」因為嘴開真開，一般無計較嘴形，所以囥佇下面。
母音圖介紹了後，咱開始詳細一一介紹基本母音，當然為著篇幅的問題，咱無卜閣詳細說明母音的發音以及母音的名稱，如：oo /ɔ/ [ɔ]叫做後半低圓母音 (au7-puann3-ke7 inn5-bo2-im1; lower-mid back rounded vowel)。
i. -i /i/ [i; I]
因為台語的基本母音只有六個，所以每一個基本母音的發音空間攏真闊，佇實際發音的時，就會有自由變音 (free variations) 出現，自由變音的互相替換未改變字的意思，而且佇無改變意思的情形下，一般的語言使用者並未去注意著自由變音的存在，若是經過人提出說明，猶原是有部分的人無法度分別in之間的差別。一般來講，發 i /i/ 的時，後面若有加上子音，咱的嘴會開卡開一點a，發成 [I] 的音。這個韻母會因為漳泉祖籍的無仝，使得有一部分的字時常會和-u的韻母對換，因此造成真大的地方色彩，伊嘛是一般人分「北部腔」和「南部腔」的重要根據之一。一般來講，「鼠」、「語」兩字發-i韻的人是漳州音，發-u韻的人是泉州音。當然，佇語言互相影響之下，並毋是每一個原來是漳州音的字詞就會一直維持佇漳州音。一般來講，漳泉互相影響之下，泉州音會佔佇優勢的一方面，有可能是因為以早 漢學仔 所讀的文讀音是泉州音為主的關係所形成的，嘛有可能是泉州人從事商業的人卡濟的原因所產生的。佇世界上每一個語言會予人當做共同使用溝通語攏是因為做生理時自然產生的，也因此無形中變成了比較卡強勢的語言。
例字：比、鄙、米；箸、剃、你；記、氣、宜；支、持、時、字；喜、醫
例詞：卑鄙註[1]、比起、脾氣；知己、治理、理智、鯉魚；機器、歧視、起義、氣味、語氣、儀器、義氣；支持、指示、只是、志氣、時機、時期；稀微、稀奇、喜氣、魚翅、魚市、醫治、醫理、意義、意志
情歌：(1) 牡丹花開笑微微，娘仔生嫷真漂緻，
害我暝日病相思，想卜與娘結連理。
(2) 海水拍岸白絲絲，海邊石頭發青苔(ti5)，
你的心肝肯放離，叫我山貓想水魚。
諺語：(1) 飼囝無惜thai5一隻豬，飼父母惜添(thinn1)一雙箸。
(2) 一人智，毋值 (m7-tat8) 二人議。
老歌：「雨夜花」第三段、「孤戀花」第一段、「為什麼」全部、「丟丟咚仔」全部、「噢!媽媽」全部、「河邊春夢」第二段、「淡水暮色」第三段、「港都夜雨」前二段、「安平追想曲」第二段、「桃花泣血記」第一段
謎猜：池外起柳絲，池中小孩兒，心清池無水，心煩水滿池。[i]
童謠：火車卜行行鐵枝，嘉義查某點姻脂，
囝婿過門卜娶真歡喜，新娘卜嫁目屎四湳垂 (lam5-sui5)。
ii. -e /e/ [e; E; E]
這個韻母會因為漳泉祖籍的無仝，使得有一部分的字時常會和 -ue的韻母對換，因此嘛會造成真大的地方色彩，伊嘛是一般人分「北部腔」和「南部腔」的重要根據之一。一般來講，「鞋」、「雞」兩字發 -e韻的人是漳州音，發 -ue韻的人是泉州音。例字：父、批、馬；茶、替、螺；雞、溪、芽；坐、脆、洗；蝦、會
例詞：買賣；抵制、地勢、體制、體系；雞ce1、架勢、溪底；逝世、洗禮、洗鞋；鞋底、下底
情歌：(1) 咱哥一日著讀冊，咱嫂艱苦著揀(king2)茶，
嫂嫂盡心無若濟，盡心兄哥我一個註[2]。
諺語：(1) 一人看出一家，新婦看出大家。
(2) 緊紡無好紗，緊嫁無好大家。
老歌：「望春風」第一段 (泉州音)
童謠：馬馬馬，斬頭做牲禮，鯽仔魚 做下底，
桶盤註[3]、紅漆著來買。
例字：豹、葩、麻(ba5)；焦(ta1)、蜊(la5)；咬、腳、牙(ga5)；早、柴；夏(ha7)、阿
例詞：巴哈；巧詐；沙拉；阿爸、阿拉
情歌：粉鳥出世成註[4]斑鳩，鷓鴣出世成烏鴉，
天下歹囝免人教，姻緣註定是無差。
諺語：人二腳，錢四腳。
童謠：點仔膠 黏著腳 叫阿爸 買豬腳
豬腳箍 焄爛爛 枵(iau1)鬼囡仔 流嘴瀾(nua7)(涎)
iv. -oo /ɔ/ [ɔ]
因為台語有「芋」和「蚵」的母音分別，英文的母音字母只有A, E, I, O, U五個，所以，每一個拼音系統攏愛想盡各種的辦法來表示「芋」和「蚵」的分別。當然，咱的表示方法嘛是其中的一種標示方法。
佇民間的情歌、童謠、民謠、謎猜、諺語、孽畜仔語 (歇後語) 、詩...等等，若是有押韻的時，假使無真嚴格遵守語韻的時，時常會將韻母 -oo和韻母 -o算做是仝一個詩韻。
例字：布、菩、某；肚、兔、路；姑、褲、五；祖、醋、素；虎、湖
例詞：補助、舖路、普渡、某奴、模糊、暮鼓；圖謀、度數、土庫、路途；孤苦、五股；初步、粗布、粗魯、訴苦；糊塗、葫蘆、互助；烏幕、烏土、烏醋、鳴呼、挖土
情歌：(1) 看見娘仔在沃雨，兄哥看見為娘苦，
娘仔身命何不顧，天光來挽到日烏。
(2) 匏仔出世成葫蘆，幼柴浸水發香菇，
路頭吊遠幾十舖註[5]，認真卜行免一晡。
諺語：(1) 一兼二顧，摸蜊仔兼洗褲。
(2) 細孔毋補，大孔艱苦。
老歌：「台東人」第四段、「日日春」第三段、「天黑黑」前四句、「桃花泣血記」第四段
謎猜：紅布包白布，一嘴哺，一嘴吐。[ii]
童謠：點a點茶古，啥麼人今暗卜娶某。
v. -o /o; F/ [o; F]
頂面有講過基本母音是自然發音形成，有伊的發音空間。韻母-o 的自然發音以及發音方法來講，咱的舌的後面部分會小可仔靠近軟顎；咱的嘴唇是會自然一點仔變成圓形的，嘴唇會自然變成圓形的原因是：因為舌向後面徙入去，嘴唇自然會因為這個動作做自然的配合來變成圓形，所以發 [o] 是自然發音，但是這個韻母的語音形成了漳州音的 [o] 以及泉州音的 [F] 兩個自由變音。就親像本文開頭講的，語言是族群的身份證，所以根據這個音，會凍大約看出一個人祖先的原籍有可能是漳州或是泉州。一般來講，嘉義以早舊桃仔城大部分是漳州人所居住，所以，卡早桃仔尾以東和以西分成二個明顯的腔口區，也就是現今成仁街以東是漳州腔為主。這個母音分佈會凍看出無仝時陣的移民情形，甚至以及語言變遷的情形。例字：婆、抱、帽；道、桃、勞；果、考、鵝；棗、錯、鎖；好、蚵
例詞：寶刀、寶島、寶座、報到、報導、報告、報考、葡萄、無好；導播、禱告、潦草、勞保、囉嗦、勞騷；高考、可靠、鵝母；做好、曹操；呵咾、好報、好做、河道、和好
情歌：(1) 一暝未睏半撐倒，神魂一半去尋(chue7)哥，
有人講我與你好，心肝現有嘴諍(cenn3)無。
(2) 大隻水牛小條索，大漢小娘細漢哥，
是妳有好不識寶，細粒干樂卡賢(gau5)go5。
諺語：(1) 神仙拍鼓有時錯，腳步踏差啥人無。
(2) 好囝好彳亍(chit4-tho5) (跮踱)，歹囝不如無。
老歌：「十一哥」第一、二段；「青蚵仔嫂」第一段
謎猜：一個矸仔 貯烏棗，日時開 暗時鎖。[iii]
童謠：阿不倒，揠(ian2)未倒，掠去火燒島。
vi. -u /u/ [u;U]
例字：炰、浮、霧；蛛、女；龜、區、牛；珠、厝、士、儒；符、有
例詞：舞女、武士；廚具、女子、女士；滋事、侏儒、主使、主詞、主婦、自主、自私、自負、厝主、師資、私自、私事、師父、四處、詞句、事務；夫婦、附註、副詞、富庶、富裕、婦女、父子
諺語：(1) 細漢偷挽匏，大漢偷牽牛。
(2) 有人興燒酒，有人愛豆腐。
謎猜：貓大姑 嫷新婦，lo3腳姊夫，紅面大舅。[iv](四項蔬菜)
註[1] 佇傳統的聲韻，這款的例詞叫做疊韻。
註[2] 會凍hoo我全心全意真心相對待的是無幾個人，而且嘛只有我一個人對你才是全心全意的。
註[3] 貯 (te2) 牲禮所用的圓形或是四角形的盤仔叫做桶盤。
註[4] 成：音sing5，親像的意思。
註[5] 以早用腳程計算距離，需要行一千步的路程叫一里路，十里路叫做一舖 (phoo3)。
沒有留言:
張貼留言