2010
12041248初相見(tshoo1 sio1-kinn3)----極短篇小說:原作 帥安; 夢生 譯
李的入來這間公司嘛有兩個外月矣，這是頭一遍參加台北總公司的業務部會議。這時陣的心情是又閣緊張又閣歡喜，緊張的是咧欲看著董事長的「鐵面」，歡喜的是會當當面看著會計部朱小姐的真面目矣。伊對總公司裡的人有夠生份，除了佇電話內底捌講過話以外，伊啥物人都攏無相捌。干焦佇普通時仔有聽同事講起，知影董事長王先生誠嚴肅，平常時仔恬恬無啥會笑，是一个死釘釘的人。嘛聽人講會計部朱小姐人生了誠好看，袂較輸電影明星。
才七點半伊就起床矣，足緊就共今仔日開會欲提出來的報告整理一改。了後行入去化妝室，開兩倍的時間咧打扮。希望會當予頭一改見面的王董的佮朱小姐有一个好印象。共一切攏整理好了後，行出旅社的時拄好是八點。儘管公司九點才開門，他猶原拍算會代先到公司，閣佇附近食早頓。按呢就免驚會去揣無路，畢竟伊攏毋捌來過遮，所以一出旅社就坐計程車向公司出發。
伊今仔日穿的是一領淺黃色的衫、長白褲佮公司最近才開發出來猶未上市的純白色休閒鞋，看起來足清氣的感覺。車駛足緊，車外的日頭光炤(tshio7)佇台北的街仔路，白鑠鑠(siak)，四界看起來攏誠活骨。有一屑(sut)仔的日頭光誠活動(uah8-tang7)，透過車窗滑來到伊的身軀面頂，予伊感覺伊規身軀的打扮閣較緣投。伊愛這款天氣，閣較愛這款的日頭光，佮這款的感覺。自我陶醉了足久足久……。雄雄，司機誠大力踏一下跤擋，坐佇後座的李的完全攏無防備，頭殼額是大大力去予硞(khok8)一下。這一硞，共伊的好心情硞甲一點仔都攏無去仔。伊足受氣共運將罵:「今(tann)是會曉駛車袂？」
運將嘛無落軟，隨加伊應講：「恁娘咧，無看著頭前有一个囡仔走出來？你目睭是去予蜊仔肉糊去是無？」
李的心肝頭足毋情願的，毋過看彼个運將橫pih霸閣歹衝衝(tshing3)，家己嘛無啥敢閣共伊應，賰的路程攏是佇提心吊膽佮忍氣吞聲中度過的。
車停佇公司的門跤口。門猶未開，伊拍算先去食早頓。經過一間美容院，一个小姐佇亭仔跤沖(tshiang5)地板。這時陣，有兩个走相逐的囡仔向伊遮走過來。李的驚去予垃圾水噴甲規身軀，向倒爿跳開半步。可惜，嘛是袂赴，水仝款噴甲規个褲管。閣較害的是伊去挵著一个對邊仔行過的中年人。伊的心肝頭當咧袂爽相連紲的歹代誌，對方開喙共伊講:「少年的，行路較細膩一下。」
伊看彼个中年人差不多有五十歲，面仔四角四角，看起來斯文斯文也(a7)。想起拄才的歹運將，閣去看著予人創垃圾的褲，就按呢共目睭褫(thi2)甲大大蕊共彼个中年人喝(huah)「細膩啥？你是無看著頭前有囡仔走出來？你目睭是去予蜊仔肉糊去是無？」
對方看伊穿的白鞋，干焦笑一下爾。李的看白鞋予人創甲癩ko爛癆，火氣煞閣較大矣。就閣共對方喝：「無看過白鞋是無？」
中年人一直幌頭就行走去矣。李的顛倒是衝kuainn7-kuainn7，拄才一腹肚的怨氣當咧無地通消敨(thau2)，拄好來一个衰尾仔。看對方斯斯文文也(a7)，看範勢袂tshua7一陣相拍雞仔來算數(siau3)。就算講會閣是欲按怎？台北市無幾个人捌伊，明仔載就欲轉去下港矣，彼个人佇台北就算講予伊攑鼓仔燈來咧相揣，連一个影跡伊嘛揣袂著。那想是那暢，最後煞家己一个人笑笑出來。
八點五十分，公司開門矣。拍完卡的人攏佇咧無閒攢等一下的會議，李的伊是佇咧無閒佮朱小姐開講。講咧講咧，伊聽著逐家喝「王先生gau5早！」一定是王董事長來矣。伊毋敢怠慢，就隨越過去喝講：「王先生……」
李的規个頭殼皮攏開始麻起來。伊看著一个中年人，差不多有五十歲，面路仔是四角四角，看起來斯文斯文……(字數1340)欣賞原作品
這就是人生
按呢的劇情敢若無啥變化
逐齣戲攏按呢搬
咱逐工攏咧搬家己人生的戲齣,
欲變化家己的戲齣嘛需要有勇氣, 有實力才會使
你嘛當咧演改變家己人生的戲齣, 敢毋是咧??