2010
12042249回頭----極短篇小說:原作 帥安; 夢生 譯
拜六第四節課，逐家攏無啥想欲聽。大部分的同學攏利用這一點鐘來安排佮聯絡禮拜的節目。無代誌的同學，嘛開始做好放假的心理準備，培養歇睏的情緒。
今仔日閣拄著拜六，當然嘛無例外。台仔跤傳(thuan5)紙條仔的傳紙條仔，講話的講話，盹龜的盹龜，實在是無站無節。真正是人講的「教室像電影院」。上好笑的是徛佇台頂彼个，伊根本就無啥致意。繼續唸伊的「臣亮言……」誠奇怪，都攏西元幾年矣？猶咧讀彼款物件，啥物佮啥物嘛！上接載(tsih-tsai3)袂牢的就是國文課矣，逐改上國文課，攏感覺時間過了足慢的。我心肝內咧踅踅唸，連鞭看手錶仔閣連鞭看外口，一時仔換摸書包仔，等欲下課。
「阿瑞予你的。」後面的人用筆尾駐(tu7)我的尻脊骿，細聲仔講。
我接過來看，面頭寫「康康佮阿文已經同意矣，今仔日來阮兜戰通宵，放學就去。欠你一跤，敢無？」
哼！手下敗將猶敢佇遐咧聳(tshang3)鬚落戰貼。頂斗贏的猶未開完咧，好膽來講。無去的毋成囝。我隨攑紅筆批「准戰」，閣傳轉去。
代誌就按呢講定矣，我著編一个理由共阮母也(a7)講，講今仔日欲佇同學in兜過暝。
in照老規矩，放學就直接走去阿瑞in兜家——去佇遐咧等我。普通時仔我攏是飯食飽才去，我無愛像in遐爾狼狽，幾若个人屈做伙食泡麵準做一頓，誠無出脫的款。
一放學，我就隨去學校門口的麵店仔。遮我捷來，頭家佮和我誠熟，一看著我就隨笑笑仔頕頭相借問一下。
「今仔日生理不止仔好呢！」我慣勢按呢講，紲落去閣吩咐講「我欲愛三十粒水餃。若無閒，小等咧才煮就好矣，我坐一睏仔無要緊。」
我四界看看咧，攏無賰空桌仔。倚窗仔門的彼塊大塊圓桌仔，干焦一个查某人佮一个學生囡仔，看起來是母仔囝。我就坐去in的邊仔。in兩个食一碗湯麵，又閣是查某人一直咧飼彼个囡仔，家己攏無食半喙。現看甲碗裡的麵就賰無偌濟矣，查某人猶閣用湯匙仔共麵送到囡仔的面頭前。囡仔頭幌幌咧，查某人共箸囥咧細聲仔問講「食飽未？」囡仔頕一下仔頭，用手共喙拭拭咧。
查某人共賰的麵食予完，嘛共湯啉甲攏無賰，才共囡仔tshua7走。我看in佇門口納錢的時，提一搣(me1)銀角仔出來，全部攏是一箍的。我有淡薄仔好奇，目睭綴咧看in行出去。in斡過麵店仔倒爿的巷仔，經過我邊仔的窗仔門，我透過窗仔門看in。
雄雄，有一个讀國中的囡仔騎跤踏車，對巷仔內的斡角仔衝出來。速度誠緊，看起來是捏(tenn7)手擋都攏捏未赴矣。我看著彼个老母向囡仔的頭前擋過去，紲落來，彼个讀國中的囡仔共車仔偏向正爿過。雖然無正面挵著，嘛共彼个查某人挵倒佇塗跤。無定著是共跤挵著傷矣，查某人跪佇塗跤，誠久攏徛袂起來。伊正手的手股頭嘛摖(tshe3)一巡，看起來無偌大巡，毋過，血流袂少。伊敢若袂感覺疼仝款，嘛毋知影伊家己的手股頭咧流血。我看伊共囡仔攬咧，看頭看尾一直檢查、閣共伊摸摸咧，恐驚囡仔身軀頂去減一塊肉仝款。那共囡仔安慰：「免驚，阿母佇遮……」
我拄才猶一直咧想欲按怎共阿母講咧，講我今仔日無按算欲轉去食飯，嘛無欲轉去睏。這馬，我已經知影我愛按怎講矣。自按呢，我徛起來，行去頭家頭前問伊:「阿伯，我的水餃煮矣未？」
「哦，歹勢，我一無閒，煞共你的水餃袂記得矣，你小坐一下仔，我這陣就共你sa7。」頭家誠袂過意咧講。
我共伊講「免矣，免sa7矣。我雄雄想著一件代誌猶未辦完，無時間等矣。」了後，我足緊行出麵店仔，敲(kha3)電話轉去厝。
電話彼頭傳來阿母的聲：「喂，欲揣啥人？」
「阿母，是我啦。我隨轉去食飯，下晡陪你去共阿爸買siat4-tsuh4(襯衫)。你毋是講一个人無啥想欲去？下晡我就陪你去。」我有淡薄仔激動咧講。
共電話掛掉，我騎上跤踏車，向阮兜的方向拚勢飇(phe1)。(字數1409)原作品欣賞
台語翻譯小說!我想您應該是第一人吧!?
超酷的!真的事發揮專長