2010
11281003疊(thah8)做伙的生日
「我的生日佮孔子仝一工，佇農曆九月二十八日。我的生日嘛佮先總統仝一工，新曆是十月三十一日。猶閣有，我今年農曆的生日佮新曆的生日是仝一工。」
「哪會按呢？農曆佮新曆的生日哪會疊做伙佇仝一工？我攏毋捌拄過。」
「你毋知？咱的農曆佮新曆的生日十九冬就會相疊做伙。今年，我拄好滿十九歲，後遍我滿三十八歲的時就會閣拄著。」
* * * * * * * * *
前兩禮拜，我查萬年曆，無意中去發現阮爸爸的真正生日。因為，文章內底有提起我的生日嘛欲到矣。有網友注意著，問起我的生日，並且先祝我生日快樂。
佇我的認知內底，我的農曆生日是十月二十四日；戶口的新曆生日是11月29日。自從有網路通好查萬年曆了後。我才知影我新曆的真正生日是11月27日。
因為，自細漢我的生日攏是看農曆的。較無啥會去注意戶口的生日。
今年，網友問起。我就查萬年曆看覓咧，看我的生日到底會佇佗一工。一下查，才發現我今年的農曆生日佮戶口生日是佇仝一工。嘛因為按呢，我才會想起我讀大學的時，去熟似著一个夜間部化工系的查某囡仔。想起阮彼時陣的對話。
彼時陣，教師節猶是國定的假日，猶有咧放假。伊共我講伊的生日是孔子的生日。我想講按呢毋就是明仔載。
伊講毋是。
伊閣講孔子的生日其實是農曆的九月二十八日。咱為著方便好記，共人改佇新曆9月28日。了後，伊講伊的新曆生日是10月31日。伊今年的生日新曆佮舊曆是仝一工。伊共我講每十九年會重疊做伙。
自伊按呢共我講了後，我才知影，原來我攏無去拄著農曆佮新曆疊做伙，是因為我的新曆生日的日子去重耽(tann5)去。所以佇我滿十九歲的時新曆佮舊曆就無疊做伙。
既然，發現今年的新曆佮舊曆是仝一工，閣去想起這段大學時陣的往事。我就想欲查看覓咧，看是毋是真正十九年會相疊做伙。
欲查，當然是按家己真正的生日查起。我一冬一冬去看。奇怪！較看就看無相疊的日子，攏是慢一工。竟然得著的答案是根本就袂相疊！哪會按呢？！顛倒去看著真正的生日較會去拄著感恩節。
抑無，換查戶口的生日佮農曆有相疊的日子。今年2010無問題，向前查1991、1972年嘛攏有；向後查2029、2048嘛攏有。哪會按呢？！這時陣就查有！！
抑無，查逐年的正月初一看覓咧。一冬一冬看，感覺無啥有規律。
既然，無啥有規律，就只好做記錄落來。看著回娘家，想著細漢逐年阮阿母攏會tshua7阮轉去三界埔。自按呢決定，用正月初二來做記錄。揣完矣，記錄嘛做完矣。開始揣規則、做統計、整理資料。
原來，普遍是十九年會相疊做伙。會記得俗語有講：「三年一閏，好歹照輪。」佮頂遍有精差一工的，應該就是農曆有閏日佮閏月的關係。用閏日佮閏月落去撨測。按呢才有法度予日子維持十九年儘量會相疊的情形。詳細看，1985年彼冬差上濟，應該是有閏月才會按呢。
經過統計計算，佮頂一遍提早一工的有24.56%；慢一工的有13.45%；全部計算是39.18%。
閣一項真巧合的代誌就是轉去後頭厝的日子一定是佇1月22日到2月21日中間。正正是一個月的期間。所以，若有人講伊過年正月初二日新曆1月21日轉去外公外媽in兜，按呢表示伊的日子去記了毋著去。
看統計的數字，我攏總做19年的循環有10个，理論上應該有日子佮頂遍是仝一工的愛有10个，實際上，上懸的記錄是9个。正常是5个到8个。
當然記錄上少的兩工，並無規律通好講，2月21日一遍是出現佇1920年，另外一遍是1985年。後一遍，毋知愛幾百年後才拄會著！因為，萬年曆目前干焦查到2100年爾爾。
翻頭閣轉來講，我真正生日會查無相疊做伙的原因，就是我真正的生日彼工拄好去拄著佮頂一个19年提早一工，所以，我這世人若欲閣去拄著真正的生日佮農曆佇仝一工，彼是無可能的代誌！若是戶口生日佮農曆生日佇仝一工，今年拄拄仔好拄著。後一遍，就是十九年後，閣後一遍嘛是十九年後。閣後一遍，我就愛食超過百二歲才拄會著囉！
lau7-su1 sinn1 jit8 khuai3 lok8!
kin1-a2-jit8 tsiann5 huann1-hi2,gun2 tsa7-boo2-kiann2 tsai2-khi2 sinn1 tsit8 e5 hau7 sinn1,kin1 a2 jit8 gua2 sing1 kong1 loh4,
sinn1 jit8 kap4 lau7 su1 kang5 tsit8 kang1,tan7 guan7 au7 jit8 ,kah4 lau7 su1 kang5 khuann2 u7 hak8 bun7;
講起來誠拄好, 生日佮我仝一工, 按呢你攏會記得我的生日矣. 我想可能是你唯一一个毋免人講就知影我的生日佇佗一工囉:)
囡仔愛自細漢教, 細漢予伊捌禮數, 守規矩, 家己會捌字讀冊, 以後絕對有足好的學問:)
自細漢佮伊講母語, 母語就袂失傳去:)