2010
11281133懷疑
「阿牛也，你有夠厲害。竟然予你考牢嘉中！恁彼班查甫第一名彼个，竟然無考牢嘉中！啊你考試敢有作弊(pe3)無？」
「哪有可能！我考試坐佇第四排第一位，正爿、倒爿佮後壁攏是坐古坑國中的考生，也毋知影in的程度好抑bai2。若看in的，凡勢會考較bai2嘛無一定。閣再講，我的面頭前就是監考官。哪有可能作弊咧？」
彼是放榜彼工的代誌。
較早，資訊無發達，放榜是透過收音機來放送的。
嘛毋知按怎，拄好聯考放榜煞。我偏偏走去學校tshit迌。一下到位，去拄著阮小弟的導師，伊無教過我，毋過，伊捌我，嘛知影我的外號。伊就是按呢共我講的。
代誌經過遐濟冬矣。彼時陣少歲，無啥感覺。毋過，這馬想著這件代誌。感覺彼个老師實在可惡。
阮是庄跤學校，會當考牢嘉中佮嘉女的學生仔，攏是誠優秀的。自升國中三年的開始，每一个老師攏會共阮提醒講阮這班佮隔壁班是衝嘉義第一志願的嘉中、嘉女班。舊年，咱學校考牢48个，進前有18个；希望恁這屆會當破學校的記錄。
彼時陣，班級的名是按忠、孝、仁、愛、信、義、和、平、誠、正、修、齊、智排的。嘛是按成積的好bai2落去排的。我佇忠班，孝班佮阮仝款是升學班。上後壁的班攏去予老師叫牛頭班。
佇阮彼个年代，佇庄跤學校讀牛頭班就差不多攏是讀到國中畢業就袂閣讀矣。in的教室嘛離阮足遠的。阮佇第一棟，in佇上尾棟。基本上，阮佮in的活動空間是完全無仝款。就算講是國小的同學，雖然是佇仝一間學校內底，若無特別去揣in，根本就佇學校內底相拄袂著。
彼時陣，一班的人數有較濟。會記得我一年的時，猶未分班，班上有60个。我三年的時，阮班上是55个。
我的成績，其實是無偌好，一年的時，排名佇三十幾名。二年的時重編班，照理講，我是予人編佇普通班。因為，阮生物老師，認為我有夠巧，予人編去普通班傷無彩。所以，就共我抾去in彼班。
抾去彼个班以後，我的成績固定佇尾三的。因為另外兩个，一个是農會總幹事的後生，一个是阮國小老師的後生，聽講攏是靠關係，才會來阮這班。
會記得，我佇學校排名，上好的名次是106名。若按呢算起來，意思就是講有普通班的人的成績是比我的成績閣較好。
聯考成績出來矣。阮彼屆真正破記錄，考牢73个。真正予學校足歡喜的。
彼時陣，總分是700分。彼冬嘉中的錄取分數是540分。我考549.5(是按怎有點五這款分數，我毋知，可能是有倒扣抑是分數換算的關係)。
聽講，阮彼班查甫第一名的彼个，因為伊差零點五分，所以無考牢。哪會按呢？第一名無考牢，顛倒是我這个尾三的去考牢。照學校的排名來看，根本較排就排袂著我！因為按呢，彼个老師才懷疑我考試作弊。
我考牢嘉中，有的講我是烏馬；有的講我是考運好。我是感謝天公伯也，予我佇讀冊這條路順利考牢逐个人認為的第一志願。
有一回不小心考第二名
老師也是懷疑我
我有一點受傷但是我直接說請她再考一次
她笑著說不必了...很好要保持
他相信了因為她給我一張文具行的優待劵
但是我現在想起來有一點反感