2010
11281727耍巨集(sng2 ki7-tsip8)
我是貧憚人，會當省時間我就會省時間。巨集足符合我的要求，所以我足gau5耍巨集。
講著巨集，足濟人會問：「彼是啥物？」
我會應講：「彼親像錄音帶。會共咱所有做過的動作錄落來。用一个快速齒記落來。欲用的時，共快速齒揤(tshih8)一下，就會共所有的動作做一遍。」
第一遍耍巨集是1993年的年底。因為彼時陣用《書中仙》做文書處理。佇DOS環境內底，只要我用一暝的時間耍過一項文書處理的軟體，我就會當操作足熟練的，完全會當應付我所有的需要。
有一工，我去看著對話視窗內底(彼時陣有對話視窗就是足先進的文書處理的軟體矣)有「巨集」這項物件。因為好奇，就開始落去耍看覓咧，到底伊是按怎耍？功能是欲創啥？彼改耍了後，對巨集嘛有普脈仔了解矣。毋過，一直攏無使用。
過幾若冬了後，Window發展足發達矣。四界攏有Word文書處理。佇學校上班加減會用著電腦。我佇咧拍台語文嘛愛用著電腦。講實在的，我所有的文書處理的工課，會當講完全是倚靠電腦。
因為我拍字是用倉頡輸入法。若是看稿拍字，有時陣愛選字，後面有標點符合的時攏會換位去，親像講：「這我毋知。你敢會使共我講？」拍字的時會變成：「這我毋。佑你敢會使共我講？」
這時陣，我會用「自動校正」的功能，共「佑」字改成「知」。了後，就是用「巨集」來共「。知」變成「知。」
用巨集，我只要揤「Alt-R」齒就會使矣(齒是在人設定的，因為我讀英文系，所以我的齒基本上是用英文單字的第一字母落去設定的，按呢我欲用的時自然就知影欲用佗一个齒來執行需要的功能)。按呢我就會當省去(1)刣「。」、(2)徙游標去「知」的後面、(3)重拍「。」的動作。佇這个階段，我耍的巨集攏是這款小型的巨集。毋過，已經予我省袂少的時間。
佇六、七冬前，因為做資料庫的需要，我需要共文字資料加上HTML碼。哇！這聲害矣！這是足大的工程。我閣袂曉寫程式。我會使用的資源就是用word內底的巨集功能來做矣。
經過各種的試驗，排除所有拄著的問題，巨集愈耍愈大，共規本需要加html碼的所在攏總用巨集就會當解決矣。用人工老老實實一步一步落去做，可能愛十幾點鐘的時間，這馬巨集的齒揤落去，予電腦家己去走，看檔案的大細，上緊幾秒鐘就解決矣，上慢五分鐘解決。
這馬，我的工課已經無需要用著巨集矣。干焦賰我的blog欲送文章的時，想欲節省blog的空間。我會家己加html碼去文章面頂，這个時陣，每一段的html碼就是用巨集落去走，「Alt-P」揤落，一秒鐘的時間，就共我需要的html碼攏加好矣。
送上blog，發表文章揤落去，就是各位線頂朋友所看著的排版方式矣。
改天試試看不懂再問你