阮老爸正港的生日

 2010

11131227阮老爸正港的生日

187心路篇

拄才因為欲查民國乙卯年是西元佗一年，臨時想著網路的萬年曆會當查。所以，我就上網揣萬年曆。查著了後，想著欲查阮阿母的生日是佗一工(其實我真正袂記得矣，唉！人的記智真正袂靠得。)

無法度，只好就對知影的開始推算。當然嘛是我家己的生日。會記得阮老爸是相牛的，向前推算，總算揣著阮老爸出生彼冬的年閣。

其實，阮爸(pa5)的生日嘛欲到矣，所以才會想著欲查看覓咧。看舊曆，阮爸的生日慢我五工。所以先到我的生日的月份看覓咧，結果，阮爸的生日拄好跳月。一下看日期，我才知影阮老爸的真正生日是1937年12月1日。

佇我的記智內底，阮老爸的生日舊曆是10月29日；新曆是正月初七日。自細漢到大漢，阮兜咧講生日攏是講舊曆的生日，所以若拄著老爸的生日，阮兄妹仔四个攏會揀生日前的拜六抑是禮拜去看伊。

若講著新曆生日，攏知影較早的戶口記的生日是去登記的日子，所以袂準。捌聽講阮老爸因為傷晏報我的戶口，有去予人罰錢。in彼代(te7)的人報戶口定定攏嘛等甲有閒工才會去報，所以差的日子就愈濟。所以，阮老爸(pe7)正月初七的新曆生日是報戶口的生日。

這馬網路發達，資料欲愛啥，小查一下就有，毋知影的代誌，足緊就揣會著答案矣。原來，阮老爸干焦知影伊的生日新曆是正月初七。抑我咧？若是今仔日無去想著順紲查一下仔萬年曆，我可能一世人嘛毋知影阮老爸正港的生日是佗一工！(544字, 開34分鐘)

(轉去心路篇目錄) (轉去主目錄)

回應

2011-02-23 18:42:47梅子粉 email給梅子粉 前往梅子粉的日誌

是"傳"---準備'??  

於2011-02-23 22:46:44回覆

To 梅子粉

tshuan5(準備), 這馬教育部的用字是 "攢". 資料如下: 詞目 攢 　　　　部首：手 064-19-22 音讀 tshuân　 釋義 張羅、準備。例：我共物件攢好矣。Guá kā mi̍h-kiānn tshuân-hó--ah. (我把東西準備好了。)　
異用字 僎

2011-02-23 18:41:36梅子粉 email給梅子粉 前往梅子粉的日誌

老師好: 你這篇'!~ 揣! 馬ㄚ那唸'?? 訶'!~~

於2011-02-23 22:36:34回覆

To 梅子粉

這篇的 "揣" 字, 音 tshue7. 資料佇下面. 你會使點入去看. 序號 詞目 音讀 附錄 1 覕相揣 bih-sio-tshuē/bih-sio-tshē 　 2 走揣 tsáu-t

2011-02-23 18:41:36梅子粉 email給梅子粉 前往梅子粉的日誌

接上則

於2011-02-23 22:36:34回覆

To 梅子粉

shuē/tsáu-tshē 　 3 揣頭路 tshuē thâu-lōo/tshē thâu-lōo 　 4 揣  tshuē/tshē

2010-11-15 12:54:30麗思 email給麗思 前往麗思的日誌

真無簡單

五百外字 開半點外鐘

足佩服你的認真甲耐性

古早人的生日 無一定會準

尤其 有人生十外ㄝ囝仔

根本就記未清楚

於2010-11-15 18:00:27回覆

To 麗思

古早人會準的是農曆, 做穡人攏嘛照農曆來起居生活的, 俗講女命無真, 男命無假, 可見佇重男輕女的社會諸查人較受著重視, 尤其是到嫁娶的時, 合八字是足重要的代誌, 查某人若是命中帶鉸刀爿鐵掃帚就會造假八字:)

2010-11-14 23:27:07帥安 email給帥安 前往帥安的日誌

我自己也搞錯生日很久
直到這幾年才找出正確的

於2010-11-14 23:48:18回覆

To 帥安

看起來咱攏有三个生日, 無定確咱這一代的這款情形是足正常的, 若無萬年曆通查, 咱真正會毋知有這款代誌存在:)

2010-11-14 10:14:07少年 email給少年 前往少年的日誌

聽你按呢講，我對日子嘛無啥概念。

阮兜所有的人這三個生日，我攏干單知影戶口彼個

我嘛應該愛記錄一下，才袂定定散散.........

於2010-11-14 14:57:56回覆

To 少年

袂吧!!??咱若去予人算命攏嘛是愛報農曆生日予人才有法度算, 若干焦報戶口彼个, 算命先查查算算咧, 結果算出來的是別人的毋是你的. 阮另外一半的戶口生日佇1月15日, in媽媽講伊是浮圓仔迄工生的, 了後我查萬年曆, 我才知就是冬至迄工. in媽媽講的日子無毋著.

2010-11-14 09:33:27小姑姑 email給小姑姑 前往小姑姑的日誌

那老師的生日也快到囉!先祝您生日快樂，事事順心如意喔!

於2010-11-14 09:48:07回覆

To 小姑姑

其實, 我家己的生日顛倒較會袂記得, 因為我無啥咧注意日子, 時常想著的時, 生日就過去矣, 因為阮爸爸的生日佇我的後壁, 顛倒較會記阮爸爸的生日. 自從查萬年曆了後, 才知影原來咱攏有三个生日, (1) 農曆生日 (2) 戶口生日 (3) 正港的新曆生日.

2010-11-14 00:24:1233 email給33 前往33的日誌

阮兜兄弟姐妹戶口的生日無一咧會準的 我捌字了後，去冊局查萬年曆（彼年代無網路通查），才知影家己的生日離報戶口足足慢四個外月； 佇兄弟姐妹當中算早報戶口的。 有一個講法....以早的囡仔真濟飼無起來的....所以確定飼會活才報戶口 阮阿爸是講報戶口愛專工，做穡人一無閒就忘記得矣....  

於2010-11-14 09:42:02回覆

To 33

較早農業社會, 幼嬰仔閣有百日關, 若是按這个角度來看, 嘛是因為囡仔飼無起來情形足普遍, 所以, 較早的人嘛較會拚命生, 會生生甲袂生為止. 報戶口的代誌就愛等囡仔穩定落來愛閣有閒的時陣才去報. 台灣戶口是日治期間才開始有的. 台灣人古早用的是族譜.