2010
11122329羨(sian7) (小說 原作:帥安 夢生譯)
月華拖著跤步，手裡捾(kuann7)幾若个百貨公司的紙袋仔，喙角小可仔垂落來，伊的面攏無買物件了後的快樂。看一下仔錶仔，八點拄過，坐入去計程車內底擲一句「玉宇荷莊」，人就懶絲懶絲共頭並(phing7)佇車窗的玻璃頂，輕輕仔共兩蕊目睭瞌(kheh)起來－－橫直這个市內的運將無一个毋知影玉宇荷莊按怎走。
車行一下停一下，過一時仔，兩爿鬢邊略仔白白的運將半tann頭看鏡共伊講：「這位太太，頭前面的民族路當咧修路，驚會塞車，我想欲走民生路，雖然較遠一屑仔，毋閣會較緊到，敢會使？」
伊仝款無共目睭擘開，若應閣若毋應的應伊一聲講：「凊彩！」
這个時陣，伊甘願伊家己是大海裡的孤帆(phang5)，由在水流載伊烏白漂流。
運將閣解說講：「ennh－我是想欲－先共你講一聲，較免予伊叫是我刁故意踅遠路的。」
坐佇後壁的伊猶是無應話。
「這都市喔，一日到暗攏一直挖(oo2)袂煞，煞共咱遮的百姓害甲慘慘慘。你看阮開車的，這真正是…」運將想欲揣(tshue7)話題，希望莫予空氣激牢(kik-tiau5)咧。可惜，看伊自頭到尾攏毋講話，家己感覺無趣味，伊的喙空嘛塞(that)起來矣。
車內雄雄恬喌喌(tsiuh)，靜甲會驚人，靜甲予人毋知影欲按怎才好。
運將無閣講話，伊的目睭煞擘開矣。面攏無表情咧看窗仔外來來去去咧行路的人、車，猶閣有肩胛頭並(phing7)做伙的男女朋友……。
咧欲到厝矣！
這幾年來伊對「轉來厝」的感覺，若是欲講討厭，較輸講有閣足濟成份是驚！
自in翁佇國外設廠了後，伊開始會驚厝裡彼款安靜，靜甲會予人驚，靜甲予人毋知影欲按怎才好－－就佮這陣的感覺攏仝款！
這嘛袂當怪伊，一个查某人，翁是長年佇國外，一年才會當做伙無幾天。遐爾大間的厝就干焦伊佮in囝兩个人咧蹛爾爾，in囝是一日到暗攏佮朋友四界去跳舞、四界去嚾(uang)，轉來到地(te3)就屈佇房間內底。家己的喜怒哀樂完全無人通仔好分享，物質生活閣較富裕又閣按怎？有時陣甚至感覺連想欲揣一个人開講都攏是一款痟想。
想咧想咧，雄雄鼻頭酸酸，她閣再輕輕仔共目睭瞌起來……
玉宇荷莊－－號稱這个市內歷史上規模上大佮所費開上濟的造鎮計畫，建商佇新重劃好的土地頂懸起幾十戶的『豪宅』，家己成做一个社區。社區的入口倒爿就是足有氣派的造景，青翠的草埔佮假山水沖(tshiang5)展現出氣勢非凡的款式，水埤(pi5)仔內底飼幾若尾錦鯉佇遐穩心仔泅來泅去。石頭縫的中央，炤(tshio7)出電火發出來的光線，直直炤佇對面的牆仔頂，共用佇羅馬石牆頂的「玉宇荷莊」四个大金字炤甲光颺颺(iann7)，恬恬咧共人講這是一款尊榮，一款袂當替代的質感。
一个勇桀桀(khiat8)的中年查甫人跤lap驢仔殼lap入來社區，澹(tam5)糊糊的紗仔衫(汗衫)已經貼佇伊ting7篤(tauh)的身軀，肉仁的線條略仔看會著。路燈共伊頭殼額仔頂的汗照甲若像一粒一粒光爍爍(sih)的鑽石，佮牆仔頂的四个金字相搶光彩。坐佇駕駛座邊仔迄个人是in某，這个查某人細粒子仔細粒子，面路仔猶算清秀，可惜，生活佮年歲佇彼面頂留落來太濟痕跡。in載半台的回收物件慢慢仔佇一棟一棟的『豪宅』中間咧徙振動。
伊佇路燈跤共車停落來，指面頭前無偌遠的塗跤講：「你去共遐的bih-luh矸仔提過來。」伊家己才去另外一爿共一綑舊報紙搬來。
查某人轉來矣，共一个細跤袋仔的銅管仔囥佇車後斗內底。in翁嘛共報紙囥入去，那拭汗那講：「小歇一下仔。」
計程車佇離in無偌遠的所在停落來，運將越頭共坐佇後壁的月華講：「兩百六十箍，感謝！」
月華落車，按半開的車窗共三百元提予運將：「免找矣。」隨向三輪車－－嘛是in兜的方向行過去。
「當(tng)你孤單，你會想起啥…」恬靜的熱天的暗暝，伊的手機仔咧liang的聲同齊引起三个人的注意，車頂的翁仔某兩个人同齊越頭共伊眼一下。
「喂……hann9----？那閣毋轉來？」口氣內底隱含著予人憐憫的向(ng3)望，目頭是結結結，共兩條目眉攏強欲結做伙矣。
「……好啦好啦，錢紥(tsah)有夠用無？……五千哪有夠啦？教你出門加紮寡錢都攏無咧共我信篤(tau2)！」
「……」伊那行那講電話，無拄好去看著查某人提面布共查甫人拭頭殼額仔頂的汗。這一幕，予伊無張無持就共跤步停落來矣，一手提電話一手捾(kuann7)袋仔，規个人敢若定格仝款，伊開始看in看甲戇神去。事實上，伊拄好藉聽電話的動作來掩崁(am-kham3)伊共人看的不安。無掛(khua3)去詳細聽電話彼爿in後生咧講啥，干焦聽著查甫人問講：「敢會喙焦？」
查某人輕輕仔頕(tom3)一下頭，越頭按車後斗的角仔提出一个『家庭號鮮奶』的舊罐仔，共囥佇車架仔頂早就櫼(tsinn)甲mi-mi-mauh-mauh的鋼杯捎(sa)落來，倒一杯水予查甫人。查甫人文文仔笑，共杯仔輕輕仔捒(sak)倒轉去伊的面頭前講：「你先啉。」
查某人啉完，閣斟(thin5)一杯tu過去，佇in翁啉水的時陣，伊偷偷仔咧稱(tshin3)這位好額查某人的斤重。看伊規身軀的穿插攏是名牌，頭尾頂頂下下攏散發出高貴的氣質，嘛閣較清楚咧注意伊講電話的內容：「……恁老爸下晡敲電話轉來講欲延期矣，後個月才會當轉來……所以你莫一日到暗佇外口抛拋(pha)走……好啦。喔，對啦，我共你買一領衫，今仔日有拍折物件俗甲按呢，才五千八，囥佇你的眠床頂，轉來愛會記得試穿一下……」
月華講電話的時，嘛一直咧注意彼兩个人的互動。
查甫人講：「好行矣啦。」
「嗯！」
「小等一下……」查甫人又閣停落來，共頷頸頂的面布捎(sa)落來，輕輕仔佇查某人的頭殼額仔頂揤揤(jih8)咧，共伊的汗吸焦，閣順手共頭前澹去的頭毛撥(pue2)一下。
「緊行啦！」查某人看邊仔有人，伊的面露出一絲仔若少女仝款的歹勢咧催矣。欲行的時，猶翻頭bi一下仔月華，伊發現月華猶咧共伊看，兩个人的目神相拄，同齊用若笑若無笑的表情回應對方。
車慢慢仔離開矣，兩个查某人心肝頭攏咧想講：「嗯……這个查某人有夠好命！」(2156字) 原作欣賞
2010-11-14 23:56:55帥安 email給帥安 前往帥安的日誌
