2010
11101630傳愛(小說)----原作:帥安 夢生譯
「囡仔讀冊蓋重要，袂使斷，拜託你…」
聽著這句話，我就共碗箸囥(khng3)落來，共頭tann起來看電視當咧報的新聞。
畫面當咧播出國際有名的畫家吳秋忠先生，伊共某一位校長的手握甲恆恆恆(an5)，用上蓋誠懇的口氣講出頂面遐的話。原來新聞主播報導的是高雄縣某國小，因為風颱淹水造成嚴重的損失，吳秋忠先生誠慷慨，伊捐五十萬箍倒轉來予伊的母校的新聞。
這段話予我想起三十二年前的一个拜六暝，彼時陣我才拄創業無偌久，徛家佮公司做伙。咧欲九點的時陣，一台大貨車駛來停佇公司門跤口，運將一落車就問我：「借問你敢是林老闆？」
「請問你是…」
「我是替屏東長慶紙器廠送紙盒仔來的。」
我看彼个運將的歲數差不多六十歲，兩爿鬢邊有淡薄仔白白，紗仔衫(汗衫)的頷仔領早就破幾若空。坐佇駕駛座邊仔位的查某人佮伊的歲數差無偌濟，後來才知影彼是in牽手。伊穿一領印有某物候選人的名的圓領衫仔－－彼時陣彼个候選人已經做兩年外的縣議員矣。
in的中央閣坐一个查甫囡仔。
「喔，你好。」我照禮數佮伊相借問一下。
「歹勢啦，因為先送一寡貨去路竹才會拖到九點。」他足認真咧共我會失禮，in坐佇車裡的牽手嘛一直咧頕(tom3)頭，面仔是規个歹勢歹勢的笑容，兩个人攏表現甲誠落軟的身段。
「無要緊啦，橫直我蹛佇遮，無咧趕時間啦。來來來，囥內面的角仔就好，所在已經整理好囉。毋過歹勢，阮遮無板車(pan2-tshia1)通捒(sak)，咱可能愛用搬的。」我有淡薄仔歹勢咧共in講一下仔這馬的情形。
「無要緊，無要緊！」伊共車後斗的布帆(phang5)掀開，就開始搬第一逝(tsua7)。運將in牽的嘛過來鬥搬，查甫囡仔就peh起去車頂負責共較內底的紙盒仔徙(sua2)來到較外面來，予in較好搬咧。
我共外衫褪落來，嘛落去鬥共in搬。
「唉喲，毋通啦！林老闆，歹勢啦。」我感覺運將有淡薄仔驚惶(hiann5)。
「無要緊啦，按呢會當較早歇睏。」
彼个查甫囡仔嘛誠乖，共內底的貨攏總徙(sua2)出來了後，伊就跳落來鬥相共，人細罔細，煞想欲佮逐家搬平濟(penn5 tse7)。紙盒仔一捆(khun2)一捆，講重(tang7)是無偌重，毋過是足蓬鬆的。伊共紙盒仔疊甲比人較懸，欲看頭前都攏看袂著，按正面看起來敢若親像一堆紙盒仔會家己幌來幌去咧徙振動仝款，彼个情景予人看著就會想欲笑，我共伊提醒：「搬較少淡薄仔，按呢較袂跋倒！」
話才拄講煞爾爾，伊就隨跋跋倒。
運將in某隨走過去，目頭結結佇伊的身軀佮腳手攏巡巡看看咧，共伊問講：「有受傷無？」
看伊peh起來，共手裡的塗沙粉仔拌(puann7)拌咧，頭搖搖咧。我笑笑仔講：「你看，按呢顛倒較慢著無？你若無遐(hiah)貪心著(tioh8)會使較早結束喔！」
查甫囡仔頕點，誠閉思(pi3-su3)笑一下。
到落尾！運將共最後一捆疊好勢，疊甲齊齊齊(tse5)，工課總算告一段落。逐家攏會使歇一下仔喘(tshuan2)咧，八千个盒仔講濟無濟，煞共逐个人舞甲大粒汗細粒汗。
其實，一開始，我對in三个人－－尤其是這个囡仔，就有一份好奇佮親切，工課一下做煞，我就隨入去提四罐銅管(kong2)仔飲料出來請in，緊共飲料一罐一罐開好勢，指(ki2)膨椅遐講：「坐一下啦。」
等兩个老的攏坐落來了後，我就拍我邊仔的位共查甫囡仔講：「你來坐遮。」
伊一坐來我邊仔，我就抽兩張面紙共伊頭殼額仔頂的汗拭拭咧，那摸伊的頭那唸講：「真古錐，伊是…」
「阮孫仔啦，讀五年的，明仔載無讀冊，伊就綴(tue3)阮做伙出來走車，這个囡仔歹命啦…」老先生輕輕仔幌一下頭。
這是隔(keh)代教養的問題！
我想囡仔的爸母八成有啥物困難，儘管我心肝內起疑煞無方便共人問，干焦講：「按呢真好啊，歐里桑，我嘛是做工仔人的序細，細漢就是佇阮爸爸的工場鬥跤手咧搬紙，你看我訓練到今(tann)有夠粗勇無？」
看我身懸超過百八，將近九十公斤的身材，兩个老的佮囡仔攏笑矣。
「平平是做紙的，看著伊就會予我想著細漢的我，有夠親切的呢！」我講完、啉一喙飲料，閣問：「學校的成績啥款？」
「這學期較退步，提第三名，普通時攏總是第一名啦，毋過…」老阿公的面頂的驕傲干焦爍(sih)一下仔。
我袂輸得已經聽著伊紲(sua3)落來想欲講的話，就隨插喙共伊的話拍斷講：「讀冊真重要喔！」
運將指(ki2)邊仔的查某人講：「阮某嘛是定定按呢講，毋過…」
伊毋知影後壁欲講啥，恬恬仔幾若秒了後才講：「好啦，林老闆多謝你，攪擾你的時間。」
我起身送in到門跤口，伊peh上車就隨共車窗絞(ka2)落來：「林老闆，再會。」
「再會。」我嘛向in輕輕仔揲(iat8)手。
雄雄，我對這个囡仔的前途感覺一份無奈。毋過，頭一遍見面，無代無誌就共人講欲共in鬥相共出錢的話題，毋但唐突嘛會予人感覺誠假仙。閣再講，講鬥出錢敢是拄創業的我做會到的？何況無熟無似，人嘛無一定會願意接受……一大堆的因素予我實在想袂出來愛講啥較好。
看伊ian9-jin2(引擎)發磅(pong7)，我有淡薄仔急矣，終其尾，我竟然用懇求的語氣講：
「歐里桑，囡仔讀冊蓋重要，袂使斷，拜託你！」
……(小說原稿欣賞)
p.s. 翻譯佮修稿時間:140分鐘. 字數:1849字.
囡仔讀冊蓋重要
翻譯台語抑重要
繼續落去誠重要
發揚台語足重要