2010
05081047結婚五冬, 我閣發現一改愛情
【踏話頭】想袂到翻譯七千字左右的文章竟然愛開超過三倍左右的時間。普通時仔，我家己寫物件，想啥就寫啥，點外鐘左右用電腦就寫千外字的文章。莫怪我一直攏無愛翻譯物件。十幾冬攏無翻譯物件，已經完全袂記得翻譯物件愛開的時間。
這遍是頭一遍翻中文的物件，想袂到感覺無像翻英文遐簡單。
這篇文章，是佇我教過的學生仔遐看著的連結，我看了有感動著，有共文章連結佇我的blog頂頭，過一站仔煞連袂起去。後來想欲徵求主人的同意來翻譯，結果伊無法度做主張，因為文章毋是伊寫的。我就copy一段佇網路搜揣，想袂到已經有八千外篇仝款的。
已經毋知影欲按怎揣原作者矣。假使原作者若有看著這篇翻譯作品，無欲予我囥佇網頁，麻煩留話一下，我會隨提掉。
淡水嘛是我生活過五冬的所在。無定著因為講著淡水的關係，人無親地親，煞予我會想欲翻譯這篇文章。
後一遍閣翻譯中文作品凡勢(huan7-se3)愛閣等十幾冬後矣，愛等我完全袂記得翻譯愛開的時間是三倍外的時矣。(2010母親節 by 夢生 譯)
======================================
嫁予(hoo7)這个(tsit-e5)查甫人五冬矣，我毋知影我是毋是猶(iau2)愛伊。
會記得拄(tu2)結婚的時陣，下早仔，精神的時陣，攏嘛是予伊抱牢咧，我攏(long2)嘛是面仔紅記記毋敢共伊講一聲gau5早，驚喙裡的氣味會予伊的眉頭結結；齒觳(khok)仔佮(kap)齒抿(bin2)仔堅持愛佮伊用仝款無仝色，兩个囥作伙，看起來毋才有翁仔某的感覺；我會共伊上班的衫褲款好勢，啥物款的下底衫著配啥物款的領帶，攏愛我先看會得過，穿了有飄撇才准伊穿佇身軀。
起床了後，來到灶跤，為著(tioh8)伊的健康，我逐工攏會變無仝齣頭的早頓，好天的時可能是烘肉煎卵加上烘過的俗phang2；若小可仔落雨，無定著會來食一寡泔糜仔配蔭瓜仔鹹卵；若是烏陰天，就來去食一寡外口賣的燒餅、油食粿佮豆奶......有步數變(pinn3)佮無步數，毋過，我sian變嘛變袂sian7。
除了做一个賢慧的牽手，我一屑仔都攏袂掩崁(kham3)對伊的熱情，「我愛你」是逐工恭送伊出門上班一定會講的話，了後閣足親蜜共伊唚(tsim)一下，就算講伊大多數的時陣干焦(kan-na7)淡薄仔笑一下耳耳，嘛有夠額予我歡喜甲規半工的。
毋過，五冬過去矣。
我相信猶未到癢的時陣，會使(e7-sai2)講是，到底是啥物改變了我佮伊的互動？
下早仔起來，伊睏的位定定攏無看著人，干焦會當(e7-tang3)對皺皺皺(jiau5)的被單來證實講伊確實有轉來睏過，就算講我已經得欲(tit4-beh4)袂記得佮伊相攬做伙迎接日頭出來的感覺。
浴間仔裡(--li2)的齒觳仔，早就佇幾若(na7)冬前摃破一个去矣，了後，閣較按怎揣(tshue7)就揣袂著(be7-tioh8)完全仝款的，抑(a2)另外一个因為去落(lak)落去馬桶裡，所以嘛換新的矣；五冬內，齒抿仔已經換甲毋知影換過幾枝去矣，甚至有當時仔阮睏甲戇戇去，猶會用仝一枝洗喙，啥物氣味的問題攏無需要掩崁矣。
是毋是有仝款色彩，仝款款式，伊講遮的(tsia--e5)根本就無重要。In是兩个無仝款故事的齒觳仔，閣有囥佇兩个無仝所在的齒抿仔，敢若(kann2-na2) 佇咧恥笑阮兩个翁仔某的關係，沓(tauh8)沓仔起懨(ia3)sian7嘛沓沓仔變遠去。
因為伊早早就出門，共伊的穿插看頭看尾已經無我的代誌矣，伊家己會創(tshong3)好勢。
閣較(koh-khah)免講「我愛你」這句話，連下早仔時共伊熱情的唚一下，伊嘛無福氣通享受，而且這馬講起來嘛有淡薄仔假仙假觸(tak)矣。
詳細共想看覓咧，五冬來，伊攏毋捌(bat)講過一改「我愛你」，一改都無。
＊ ＊ ＊ ＊ ＊ ＊ ＊ ＊ ＊ ＊ ＊ ＊
佇厝，我佮伊會當做伙的時間，嚴格講起來是對(tui3)暗時七點開始，攏是佇伊下班轉(tng2)來矣以後。若拄著伊加班，按呢時間可能就會延(tshian5)到十點、十一點。
拄結婚的時陣，我為著(tioh8)伊去學煮食，「欲掠牢(tiau5)查甫人的心，就愛先掠牢伊的胃」，我共這句話信篤篤(tauh)。
所以，一寡餐館有名的菜就定定出現佇阮兜的食飯桌仔頂，『宮保雞丁、五更腸旺、蔥油雞、東坡肉......』。
食飯飽，阮會並(phing7)佇咧膨椅頂看電視，我陪伊看新聞，聽伊評論(phing5-lun7)國政、批判社會上發生的代誌；伊陪我看八點檔(tong3)，聽我對劇情嫌東嫌西、大聲哭大聲笑。所以我知影行政院長、立法院長是啥物人，伊嘛知影當(tng)紅的李世民是啥(siang2)演的。
我無去想著的是，五冬的時間會當改變這所有的一切。
煮食班我會當講是頭仔興興，尾仔冷冷，毋知影對佗一工開始，伊開始會管我料理的方法，『宮保雞丁』伊無佮意傷濟薟(hiam)薑仔，我煮的菜就沓沓仔變簡單，煮食班嘛無想欲(beh)去矣，有當時仔一盤炒青菜、貢丸湯佮皮蛋(phi5-tan3)豆腐就共伊應付好勢矣，伊顛倒無啥物意見。
我想，我掠伊的胃掠袂牢。
了後，伊加班的次數愈來愈捷(tsiap8)，阮就足少做伙看電視矣，除了現任的總統是陳水扁，我對國家的大條代誌會使講完全毋知影；抑(a2)若伊咧，連問都毋免問，台灣霹靂火的男主角是啥伊絕對毋知影。
阮兩个翁仔某開始講話講袂著重點，伊共我講的話，差不多攏是「免等我矣啦」、「較早睏咧」，我共伊講的話，嘛差不多是「你轉來矣」、「菜佇電鍋內底咧熥(thng7)」。阮的話題無仝款，興趣無仝款，除了「翁仔某」佇名義上有牽聯牢咧，阮的交流空冇冇(phann3)，有夠可憐，並(phing7)普通朋友猶(iau2)較無好。
有夠好笑的翁仔某關係，敢毋是咧？
＊ ＊ ＊ ＊ ＊ ＊ ＊ ＊ ＊ ＊
結婚進前，阮捌(bat)描繪(biau5-hue7)著未來的願景(guan7-king2)，伊講欲生兩个囡仔(gin2-a2)，先查甫的後壁才查某的，阿兄通仔保護小妹；我煞認為應該先享受一段兩人的生活，生囡仔的代誌免趕緊，干焦我一个無想欲失伊的興致(hing3-ti3)，就無講出喙(tshui3)。
結婚了後有一站仔，伊足積極咧佮我『創造宇宙繼起之生命』，伊想欲有囡仔，對伊無套sak-khuh的行為就看會出來矣，會使講是我猶無想欲愛，閣驚伊無歡喜，自按呢我就偷食避胎藥(pi7-the1-ioh8)。
猶會記得彼時陣，伊猶興tshih-tshih tshua7我去病院探視一个女性朋友，伊拄生一个四千兩百公克的巨嬰煞，面色青sun2-sun2，身軀軟ko5-ko5，倒佇眠床頂。
我閣較毋敢生囝矣。
五冬後的今仔日，伊敢若已經放棄生囝這號代誌，畢竟干焦伊一頭熱phut-phut是無路用的。
毋過，踮佇伊去上班後空lo-lo的厝裡，我雄雄感覺生一个囡仔嘛袂bai2，上蓋無厝裡會較鬧熱--淡薄仔，我的寂寞(tsik8-bok8)嘛會較少一寡。
伊佇幾若冬前早就開始用sak-khuh矣，我無啥清楚是啥物代誌予伊改變心意，毋過按呢嘛予我會當歇一下喘咧，我對避胎藥敢若過敏，無論換啥物牌子食了身軀攏會捾(kuann7)水。
我臆(ioh)伊六百外度的近視加散光，應(ing)該看袂出我捾水前佮捾水後有啥無仝款，重點是，伊的sak-khuh解決了我一个大麻煩，同時閣帶來另外一个新的煩惱。
我這馬想欲生一个囡仔矣，伊煞敢若無想欲生，我毋知影欲按怎共伊開喙。
閣較免講，伊足捷(tsiap8)加班的代誌，暗時定定忝(thiam2)甲倒落去就睏，若我閣開喙共講，敢若變相(pian3-siong3)增加伊的壓力。
阮兩个人，已經有夠無好矣，無需要閣再增加一个會引起衝突(tut8)的話題。
＊ ＊ ＊ ＊ ＊ ＊ ＊ ＊ ＊ ＊
佇阮戀愛的時陣，伊足愛tshua7我去淡水，坐佇河堤(the5)墘(kinn5)看日頭落山，沿碼頭行一逝(tsua7)，會當食著無仝口味的好食物仔。
有當時仔，伊會tshua7我坐船仔過對面的八里坌(hun)，遐(hia)鬧熱的所在干焦一條路耳耳，賣的攏總是九孔(kau2-khang2)，兩个人有法度共一大盤食了了，猶感覺食了無夠氣(khui3)。
伊嘛會佮我騎兩个人騎的跤踏車沿淡水老街騎到淡海，閣再對淡海騎轉來，沿路的風景無算十分迷人，煞有一款單純的氣味，猶閣有海風鹹鹹，拍(phah)佇面裡(--li2)，我足享受這款氣氛。當然，坐佇跤踏車後壁位的我三工掠魚兩工曝網仔，心情好的時陣才共伊踏--兩下仔，伊明明就知影我會貧惰(pin5-tuann7)，抑(ah)是足搰力lop。
我誠懷念，真的，就算講過五冬矣，想起彼(hit)站仔的代誌，逐項攏浮佇目睭前。結婚以後閣去淡水的次數，除了拄結婚彼一站仔，差不多拗指(tsing2)頭仔就算會出來，最近這兩、三冬閣較是一改就攏無去過。
歇睏日照理講，我佮伊應該會當有一寡交集(tsip8)，毋過，伊忝(thiam2)矣，我干焦會當家己揣代誌來做，佮有咧上班食頭路的朋友出門踅(seh8)街仔，講一寡五四三的代誌，嘛順紲(sua3)講一點仔伊的尻川後話。
講著佇厝咧睏的伊，中晝頓、暗頓，彼著家己去解決！
伊毋知影，佇前幾個月，我無聊甲擋袂牢，就家己一个人坐捷(tsiat8)運去淡水。河堤墘的點心攤仔無--去矣，全部集中佇捷運站彼跤兜，較早我佮伊做伙看夕陽(sik8-iong5)的所在，整修做一條長長的駁岸(poh-huann7)，干焦會使散步耳耳。
無伊共我tshua7路，我揣袂著正港的海產店，揣袂著好食的點心，家己一个人嘛騎袂贏兩人騎的鐵馬。『漁人碼頭』，伊的跤步猶未踏過，我代先伊一跤步。這，是無伊，干焦我的經驗。
到『漁人碼頭』邊，風景媠媠媠(sui2)，煞有一款人工雕硿(khong7)的激款。我叫是開幾百箍仔坐藍色公路會當去對面的八里坌，就親像渡輪仝款，毋閣，彼隻無古早味的遊艇(thing2)煞踅一大輾(lian3)了後閣駛倒轉來原位。除了幌來幌去的船身幌甲我楞(gong5)車車以外，我根本就無記著啥物好看的風景，連九孔嘛無罟(koo1)甲半粒。
淡水變矣，我佮伊的回憶 嘛變矣。
＊ ＊ ＊ ＊ ＊ ＊ ＊ ＊ ＊ ＊
有一工的早起，我特別比伊較早起來，煮一頓有夠久無煮閣足腥臊(tsenn-tshau)的早頓予伊。
紲落去，無第三者，無冤家。
我共離婚協議書tu予伊。
彼是我第一擺看著伊遐爾仔著驚的表情，彼工若是愚人節(gu5-jin5-tsiat4)，我想我成功矣。
伊無像一般的查甫人仝款，氣甲怫(phut4)怫跳，開始咒讖(tsiu3-tsham3)查某彼爿(ping5)的罪狀(tsng7)；嘛無啼(thi5)啼哭哭，跪落來哀求我留落來，伊有可能嘛覺察著阮的翁仔某關係到甲一个關頭，嘛拍算詳細考慮離緣的可行性，伊這幾冬來的疏遠，我淡薄仔後悔，這款後悔沓沓仔生湠(thuann3)，按心臟做一个起點，湠來到我的頭頂佮跤尾。
毋閣，後悔閣會使按怎？
我毋知影家己對伊的愛猶賰偌濟(jua7-tse7)，閣較無清楚伊對我的愛是賰偌濟。嫁予伊進前，我就知影伊生成噷噷(hmh8)恬恬(tiam7)；我的愛，猶無法度共伊改變，伊的愛，嘛猶無夠來為我改變，這大概是關鍵(kian7)的所在。
柴米油鹽醬醋茶會摧毀愛情的甜蜜，我啖(tam1)著矣，毋過，這卻是用五冬換來的教示。
趁這陣，無囡仔，無纏絆(tinn5-puann3)，我嘛無想欲數(siau3)想伊啥物，應該是離婚上好的時機，著無？
用慄慄掣(lak8-lak8-tshuah4)的手佇離婚協議書面頂共名簽落去的我，到尾後伊出去幾若(na7)點鐘矣，我猶原佇咧咇咇掣(pih8-pih8-tshuah4)。
＊ ＊ ＊ ＊ ＊ ＊ ＊ ＊ ＊ ＊
伊冷淡我五冬了後，閣凌遲我七工。
從(tsing5)離婚協議書交到伊手裡了後，足足一个禮拜，伊無欲佮我講一句話，嘛去睏七工的膨椅，逐工猶原照常上下班，除了閣較冷淡，我感覺袂著伊的喜怒哀樂。
彼張協議書，就算講擲(tan3)去糞埽桶裡，猶會有礚(khap8)著塑膠袋仔嚓(tshiak8)一下的聲，毋閣，伊咧？一點點仔聲嗽都攏無，我懷疑伊根本就激放放(hong3-hong3)，一站仔毋插(tshap)我，干焦咧看我敢會家己袂記得離緣這件代誌。
我堪(kham)袂牢矣，伊到底是欲按怎做？連離緣，嘛欲離甲遮爾仔外外外？
毋閣，七工了後的伊，有夠ting7篤篤(tauh4)的共我驚一趒。
透早，我聽著伊佇客廳起來的聲音，隔著門扇板聽袂蓋清楚，我煞一直攏等無著伊出門去上班的關門聲。
「起床矣？來食寡雞卵捲。」伊笑笑也(--ah)，就敢若拄結婚的時陣我共伊唚了後彼款的麻(ba5)文仔笑。
我心肝頭嚓(tshiak8)一下足大下，原本叫是講像古井袂起波的情緒，因為伊足久無看著的體貼起了一絲一絲的水痕。
伊抑(ah4)是遐爾仔簡單，就會當挑觸(thio1-tak4)我的心。
我無清楚伊哪(na2)會使趖(so5)到九點、十點猶無去上班，伊接收著我的憢(giau5)疑，嘛干焦輕輕仔笑一下爾爾(nia7)，身軀頂簡單的穿插一點仔上班的氣絲仔都攏無，可能伊，嘛會工課做甲懨(ia3)sian7矣？
嘛有可能……，伊欲宣判矣，關係彼張離婚協議書。
看伊老神在在的款，我恬恬仔食早頓，烏白咧想等一下伊會講的話。伊敢會自按呢就離緣矣？
抑是，佇我的面頭前共協議書裂(liah)掉？
袂當否認的，我的心，傾向後壁彼个。
「我升做經理矣。」伊的第一句話，予我誠意外，下一句話，煞隨進入重點，轟(hong)甲我應付袂來，做工課敢是排佇家庭進(tsin3)前？我苦笑。
「頭路顧好勢，我才會當予妳安定的家(ke1)。」伊親像佇咧解說我的憢疑，「所以，共我講為啥物欲離緣？」伊終其尾問矣，面色變甲有夠正經的。
伊攏毋捌用過這款若咧問口供的口氣佮我講話，相(siong3)著伊罕得有的歹面腔(tshiunn1)，我煞連一句話嘛講袂出來。
「妳感覺我有共妳冷淡，著無？」一目nih仔，伊的態度雄雄閣變甲家己詼(khue1)家己，舞甲我霧嗄嗄(sa3)，「我就知影妳一个人佇厝攏咧烏白想......」
我和(ham7)伊講話講甲規工貼貼(tah)，幾若點鐘的談(tam5)話，有五分之四的時間我攏佇咧哭，因為我感覺家己犯了一个大大大的毋著。
毋過，有一寡代誌，若無彼張離婚協議書，我永遠袂知影。
伊講，五冬來，伊確實逐工攏是共我抱咧 精神的，只是後來伊工課無閒，起床的時間變早，抑我猶睏甲遨遨(go9-go5)。「我娶妳，是希望妳享福，毋是欲叫妳來做查某kan2仔的。」對伊這句話開始，我的目屎就開始掰(pue2)袂離。
講著伊的穿插，伊閣笑我戇，伊看會出來我會為伊添新衫新褲，照色彩花樣佇衫仔櫉內底四序(su3-si7)仔四序分類囥甲好勢好勢，抑拄結婚的時陣我定定共伊安搭，久了後伊嘛知影我興(hing3)按怎配，啥物領帶配啥物衫仔褲，伊是為我來穿的。
講著熱情的『早安吻』，逐工伊早就佇我睏甲毋知人的時陣予我矣，我煞家己一睏頭袂曉變竅，叫是伊無需要我唚伊。
「你是按怎攏毋捌講你愛我？」我目屎含(kam5)咧共伊問。
「我叫是妳知影，若無咱是按怎欲結婚？」伊理所當然應(in3)我的話。
是啊，我知影，我一直攏知影，若無我袂嫁予伊，毋過，既然知影，我哪著閣硬(nge7)求伊講出來咧？
查某人攏需要一寡愛語滋潤的，我想這就是理由，看著我咧共伊投的眼光，我想伊嘛知影理由矣。
＊ ＊ ＊ ＊ ＊ ＊ ＊ ＊ ＊ ＊
「妳煮的好料理，足好食的，毋過遐的菜誠厚工，嘛無全部是妳佮意的，所以我甘願妳煮一寡簡單的菜，上好是妳嘛愛食的。」
伊一句一句的解說，閣予我流甲欲一醃(am)缸水的目屎，「妳無愛食薟的，我毋才會叫妳薟薑仔下較少咧；妳毋食腹內，彼我嘛毋食；妳驚大箍，所以料理的時我希望油倒較少--一屑仔；豆油鹽分(hun)懸(kuan5)，食濟腰子負擔大，為著妳我健康設想，調味就好矣，毋免下傷濟。」
只要是我煮的，伊攏佮意，想想咧逐擺準備好食物予伊，伊無一改無食了了，到底是按怎我會感覺掠袂著伊的胃咧？
所以，我嘛有掠著伊的心矣？
另外一項予我驚著的代誌，伊真正知影台灣霹靂火的男主角是啥(siang2)，就算講臆了無完全正確。
「是劉文聰？抑是彼个李正賢？暗時佇公司加班，同事攏有咧看電視，所以我加減嘛會知--一寡。」
「嗯。」我閣想欲哭矣，我真正是小可仔覷(tshu3)目去看彼个節目的收視率。
「做經理了後會較少去加班，彼 咱就同齊看。」伊講甲足爽勢的，我煞鼻頭一陣酸酸。
我致意的，其實毋是看啥物節目，管伊行政院長、立法院長是啥，無伊佇身軀邊，看啥物攏無趣味。
我發現，只要願意，兩个人啥物代誌攏會當談，連我共伊解說台灣霹靂火的劇情，一路講到整容的話題，伊嘛聽甲耳仔覆覆覆(phak)。
是我，是我家己共家己封起來，叫是伊無願意聽我講話、無願意佮我講話。伊會心疼我一个人佇厝裡，無論伊共我講啥物，我攏足愛聽的，毋過我這馬才予伊知影，阮兩个翁仔某浪費幾若冬的時間佇這款誤解的中央轉踅，伊應(ing3)該，我嘛應該。
「我足少看新聞，攏毋知影國家最近發生啥物大代誌。」我這句話講了有淡薄仔咧報鳥鼠仔冤。
「好，我後改逐工做妳的新聞台。」伊溫柔仔笑矣。
＊ ＊ ＊ ＊ ＊ ＊ ＊ ＊ ＊ ＊
講著生囝的代誌，伊代先是恬恬--一睏仔。
「我想欲生一个囡仔。」這時陣，我有勇氣講出喙矣。
「我叫是妳無愛，拄結婚彼站仔，妳毋是一直食避胎藥？」罕得聽著伊有淡薄仔怪罪的語氣。
進一步了解了後，我才發現，伊一直知影我佇咧食藥仔──有可能是我毋知佗一擺共藥仔烏白囥佇梳粧台頂頭，予伊看著矣，伊完全知影我無想欲生囡仔。
抑伊嘛知影，我食完藥仔隔轉工會有捾水的現象，瘦(san2)閣薄板的我，一雙跤腫甲若象腿仝款，嘛干焦有我這款人的長頷鳥心態才會認為伊袂發現。
後來我有慣勢共藥仔好好仔囥佇屜仔底，伊叫是我無閣食矣，驚我捾水會艱苦，所以伊才會套sak-khuh，講來講去，抑是為著我。
「妳閣捾水矣乎(honnh)？一直哭袂煞，是想欲共積佇身軀裡的水逼出來是無？」伊竟然敢笑我，當然免不了予我共伊拍甲粗飽仔粗飽！
伊抑是想欲有囡仔，聽著我講想欲生囝，伊 目睭內底暢甲光爍爍共我講這點。
「妳真正想欲生？」
「想啊，我一个人佇厝足無聊的。」
「干焦因為無聊？若一个人佇厝無聊，妳想欲出去學物件、食頭路、佮朋友去踅街仔路，我攏袂阻擋妳。」
「你毋是嘛想欲生？」我受氣矣，就算講目屎tshop8-tshop8滴嘛無啥物說服力。
伊開始講起彼个四千兩百公克的巨嬰，原來彼个女性朋友的經驗毋但(m7-na7)共我驚著，嘛共伊驚著矣。
伊明白我驚疼，所以伊放棄生囝的想法。
「人毋管啦，我欲生。」了解伊的想法了後，我閣較希望共伊生一个囡仔，身軀內底流著我佮伊的血的 囡仔。
「按呢就來生矣！」伊細聲仔佇我的耳孔邊講一句予我面仔紅紅的話。
「你氣血遮爾仔飽滇(tinn7)？上班敢無誠忝？」我懷疑伊講話的真實性。
經過伊的解釋，我才恍然大悟，就算工課忝頭，伊有當時仔嘛會有慾望，有時暗時攬我睏，閣看我睏甲遐爾仔甜，面對伊的心意，我，真正無話通好講矣。
＊ ＊ ＊ ＊ ＊ ＊ ＊ ＊ ＊ ＊
佇我像兩粒水蜜桃的目睭略仔消腫了後，伊叫我緊換衫，tshua7我出門。
已經有夠久無佮伊做伙出來耍(sng2)矣，佇阮兩个人中央的冷淡破冰了後，坐佇伊的邊--仔煞嘛予我當初戀愛的感覺。
彼張離婚協議書。
我欲一世人共伊的模樣記牢牢，若準講伊最後猶是簽了名。
毋過，伊應該袂簽乎(honnh4)？若無，伊哪著佮我討論生囝的代誌......
「到矣。」伊共車停落來，我嘛綴(tue3)伊落車。
海風對頭前面搧(sian3)過來，是淡水。伊猶會記得這个所在，這个阮記憶珍藏的所在。
「我一直想欲tshua7妳來，毋過妳歇睏日攏佮朋友出門，我只好掩(om1)棉襀(tsioh)被佇厝裡睏。」伊按呢講。
這是啥物款的重耽(ting5-tann5)？
我體諒伊工課忝頭，伊體諒我佮朋友出門，就按呢，阮錯過一改閣一改的相伴(sio1-phuann7)。
「你後擺想欲創啥，會當直接講！」我起發hong5掠伊金金看。
「妳嘛是。」伊有夠正經的共我看轉來，意思是叫我莫(mai3)龜笑鼈無尾。
講來嘛好笑，阮一直認為家己是佇咧為對方設想，用家己的方式去體貼對方，這款家己認為家己著煞致使sian1算就算袂清个陰錯陽差，一直到我開始懷疑家己無愛伊，伊嘛無愛我矣，才去驚精神：這份愛並毋是消失去，是去予溶(iunn5)入去生活內底，予人足自然袂記得伊的存在。
愛情的表現，會當若黏黐(thi1)、親熱、奉獻、祝福，甚至是退讓，逐个人的方式無仝，會引tshua7的結果無仝。
阮的婚姻，就是起佇這款欠溝通的空中樓閣(lau5-koh4)頂頭，嫁予這个查甫人五冬矣，我叫是我沓沓仔無愛伊。
查某人會因為查甫人久長的冷落才來對愛情失望，嘛會當因為查甫人一句話閣對愛情充滿希望，我──無想欲佮伊離婚，「彼(hit)……彼張離婚協議書……」我想欲共伊收--轉來。
「佇公司遐。」伊足老步定的，「公司的碎紙機裡。」這个意思是 ......？
「妳想欲離緣，等我變成亡夫的時才閣講！」我臆袂出來伊講這句話是毋是佇咧滾耍(sng2)笑，毋過伊閣騙著我的目屎矣。伊真正足愛我……就準講無講過。我想，若準我堅持離緣，他會放我走，伊會毋甘得看我艱苦，假使，換伊想欲離緣咧？
恕我自私，我是堅決袂放的，除非等我變成亡妻，仝款因為伊毋甘得看我艱苦，我自信會當共伊留牢咧。
「淡水規个攏變矣，我攏強欲毋捌矣。」共我惜惜了後，伊連鞭緊共話題換掉。
「我來過，我知影有啥物景點。」
「按呢這逝(tsua7)就愛靠妳tshua7路囉。」
是啊，阮會當開創新的回憶，只要有我閣有伊，啥物時間地點攏無成問題。
結婚五冬，我閣發現一改愛情。
(2010.05.14第二改修譯)
我卡曼嫁，阮子一個小學3年一個1年