2010
03092101是m是beh繼續
時間過了實在真緊，無形中，ti一工接一工，一禮拜過一禮拜，一個月黏一個月，半年繼續半年了後，自舊年四月以後，就無閣再寫任何ｅ文章。這段時間算算咧也已經過了一年二個月a。是按怎會無寫文章咧？應該講有真濟理由hoo阮無閣寫文章，但是無論啥麼理由攏比未過一個理由，就是家己無對家己做嚴格ｅ規定，也就是講，是家己貧憚所引起ｅ過失。
講有真濟理由是真正有未少ｅ理由通講，咱來一項一項仔聽：
上起先，欲寫文章一定愛有靈感，另外就是愛有想欲寫ｅ衝動，無論是歡喜、快樂或是悲哀，總是愛有想欲寫ｅ心情ham熱情，若無，真正m知欲寫啥麼。因為寫文章除了內容以外，就是beh將咱ｅ感情囥(khng3)入去，用咱ｅ感情去牽引看咱ｅ文章ｅ人，hoo讀咱文章ｅ人了解咱寫文章ｅ情懷，更加希望看咱ｅ文章ｅ人會凍ti精神上支持咱；ti行動上同意咱；ti感情上接受咱；ti心理上kah咱做伙；若是認同咱，上好會凍做伙和咱來拍拼。寫文章和讀者ｅ關係會凍無受著時間和空間ｅ限制，ti時間上，m免和讀者協調，只要讀者有時間想欲讀，隨時會凍讀；ti空間上，m免和讀者約束ti佗位相等。另外，猶有可能招著無識悉ｅ朋友來結緣。
也m知按怎，自從舊年四月了後，就無寫文章ｅ衝動，當然嘛無想欲寫ｅ題目，ti心內，根本就無啥麼靈感通寫。
閣來，寫文章愛有時間寫，寫一篇文章總是愛用著真濟時間，一篇文章經過思考、組織、文字表達、打字、排版、修改、校對……，攏愛開足濟時間，上短ｅ文章嘛需要一點鐘ｅ時間，平常時上班以外，暗時轉來，三趖四趖(so5)，時間真緊就過去，會凍講時間是ti三摸四摸ｅ情形，一點仔嘛無效率ｅ辦事方法渡了去，時間就自按呢三分割四分割無了了。
閣來，ti這段時間內底，有看著真濟人開始動筆動腦寫台語文章a。想想咧，當初，家己寫頭一篇文章ｅ動機已經達成a，是m是會凍來「退休」a。想起三年外前，台語文運動抵開始，並無幾個人敢寫台語文，因為台語文本身存在著真濟ｅ問題，所以ti彼時陣寫台語文ｅ人口會使用「beh絕種ｅ稀罕動物」來形容。台語是咱ｅ文化根源，需要文字ｅ記載來傳承。換一句話講，雖然我m是會曉寫文章ｅ材料，但是ti台語文真需要有人生湠ｅ時陣，若閣無落來寫，用真情來引起逐個人ｅ注意，hoo人開始beh動腦動筆來寫，台語文m知啥麼時陣才會有希望。所以，ti m驚見笑，m驚hoo人笑ｅ情形，m驚hoo人批評之下，想欲引起看未過ｅ「程咬金」出現，按呢生才會凍吸引有才華kah熱情ｅ人來共同參與。三年來，台語文不時就有新ｅ人材出現，文章也攏寫了真好，即然當初寫文章ｅ目的嘛已經達成a，會凍安心「隱居」來「封筆」了。
ti舊年四月以後，有一段時間，心情嘛真無穩定，根本就無啥麼心情會想欲來寫文章。當然，這一年二個月ｅ心情攏無講真好，到底是啥麼代誌，昑仔嘛無一定真清楚，總是一定離未開現實ｅ環境，學生教出ｅ成績hoo人真無成就感，頭路無穩定感也是一個原因。無論按怎講，心情未快活是無法度寫出啥麼款ｅ文章，尤其是感覺m知閣有啥麼通寫，自然而然就停落來寫作ｅ腳步a。
除了教冊以外，猶閣有出考試題、改作業、改考試單、拍球、陪學生、做輔導、整理校友會資料、參加開會、陪牽手出去行行咧、鬥看顧目前九個外月ｅ囡仔、轉去故鄉行行咧、ti電台主持節目、主持台語寫作班、看想欲看ｅ冊、聽音樂、看一寡愛看ｅ電視節目……等等。實在有真濟真濟ｅ代誌分割了去，有想欲寫文章嘛是加減一工拖一工，時間就是按呢無形中過了一年二個外月。
ti無動機、無靈感、無心情、無目的ｅ情形，就hoo時間一工過一工來過去，因為無形中過去一年二個外月ｅ日子，日拆(曆)ka我講，時間已經過了未少去啊，應該是閣寫ｅ時陣，但是beh寫啥麼？ti寫台語文ｅ日子，總是感覺著真稀微，有外濟人beh來支持我這款頇顢ｅ文章咧？人海茫茫，有外濟人會有機會看著我ｅ文章咧？我是m是閣beh繼續寫咧？beh閣寫啥麼？目的閣是啥麼？
1997.06.21
【註】這篇文章差不多是一千六百字左右，總共開二百十八分鐘以及修改五遍 (以上數字是電腦計算ｅ數目。)
沒有留言:
張貼留言