2010
03092045勿放棄
聯考ｅ腳步聲漸漸lih接近，這個腳步聲hoo阮想起十二冬前，得欲參加聯考ｅ時，內心種種ｅ心情。未輸是昨方才發生ｅ代誌niania。
佇做學生ｅ時陣，阮ｅ成績一直是全校尾仔算過來，會用講是完全無希望會凍考著大學阮不時就為著這項代誌咧煩惱kah鬱卒。彼當時，根本無人，甚至阮家己，想會到講佇學校成績表現遐爾bai ｅ人，竟然會凍考著大學。
閣有另外一項代誌更加hoo阮驚一趒ｅ，就是彼冬阮仝村仔內ｅ，有十五個應屆畢業，準備欲考大學，每一個人佇學校ｅ成績攏比阮卡好幾a倍，甚至有全校前幾名ｅ。放榜ｅ時陣，才知影十五個人內底只有阮一個人考著，未輸li做夢咧。真m敢相信事實會按呢。
想起過去高中ｅ時陣，阮彼班咧準備聯考ｅ情形，大約佇高三距離聯考半冬前，就差不多有將近欲一半ｅ人就因為面對著六冊ｅ份量而放棄，開始扑算欲重考。等候到聯考進前二個月ｅ時，差不多chun無夠三分之一ｅ人咧繼續打拼奮鬥，根本無啥麼希望ｅ我就是無放棄ｅ一份子。
經過真濟考試了後，才深深體會著，讀冊考試根本無啥麼祕訣，只要勿放棄就會使a。因為：「哀莫大於心死。」若放棄就是代表著無絲毫ｅ希望，無放棄就是猶有希望。
佇家己高中讀冊ｅ日子，根本就是一個真憨ｅ學生，總是認為家己已經真拼勢，真認真咧讀冊，每暗若讀到九點半卡加就認為有夠拼a。講出來真正會笑破人ｅ腹肚，會用講是憨到未扒癢。好佳哉家己猶會憨憨仔讀，m識想欲來ga伊放棄掉。真正是憨人有憨福。憨憨仔讀，天就會助憨人。
隨著經驗ｅ增加，阮才知也，咱講：「三日無餾，peh上樹。」確實 有影無m著。因為咱人ｅ頭腦 真正是無用就會生銑、變鈍去，會將真濟物件放未記得，對腦來講，放未記或是發生錯誤是正常ｅ代誌。但是，咱並無任何ｅ意識，感覺會著咱無形中漸漸放未記得ｅ代誌以及漸漸增加ｅ犯錯機率。所以，若放棄就等於無希望，前功盡棄。
按頂頭所講ｅ，咱明白，普通時若lih準備聯考ｅ時尚好是做憨人，憨憨仔讀，勿想講考試欲到a，猶有真濟無讀著欲按怎？咱講：「盡人事，聽天命。」有啥麼通好緊張？緊張顛倒會hoo咱ｅ表現失常，尤其是佇考試ｅ時，緊張所造成ｅ失誤和損失是算未合ｅ，無論按怎，愛想辦法解除緊張，心情放輕鬆。
另外，讀書ｅ態度嘛愛注意，咱愛有一個認識，就是咱ｅ能力是會凍改變ｅ。過去ｅ咱造成今天ｅ咱，今天ｅ咱捏造未來ｅ咱，但是過去ｅ咱並無一定會造成未來ｅ咱。人生ｅ邏輯並不是數學邏輯。今仔日咱因為過去ｅ累積來輸人，並無代表從今以後就永遠輸人。過去所形成ｅ事實和結果，咱無可能去改變，未來ｅ成果和局勢猶未確定，誰嘛m知結果會演變按怎。m是有一句話講：「逝者已矣，來者可追」？千萬m通因為過去佇學校幾遍ｅ失敗，就來餒志放棄，按呢就永遠peh未起來囉。因為：「世上尚大ｅ敵人就是咱家己。」咱一定愛有信心，咱若堅持奮鬥到底，無人扑咱會倒。「天下無難事，只怕有心人。」有心欲做，最後一定會親像咱所欲希望ｅ成果。「一切勝敗，操之在我。」咱愛有信心繼續向前行，無到最後ｅ關頭絕對無欲放棄。
最後，若準萬不一考試ｅ最後結果，hoo咱無介意，無論是扑算欲重考或是一定愛重考，一定愛斟酌檢討咱ｅ缺失是啥麼？咱愛按怎來調整改進？勿因為已經無法度挽救ｅ定局來心煩，嘛勿為著猶未成局ｅ未來，憂心沖沖。生活要有規律，千萬m通生活坐息無正常，暗時看冊，日時來睏。損害身體健康絕對算未合，健康就是本錢。現主時ｅ高三嘛仝款，讀冊這條路無快活，尚好愛抱著輕鬆快樂ｅ心情來讀冊，心甘情願來讀，閣卡按怎甘苦嘛愛承受擔落來。想欲實現咱青春ｅ理想和美夢成真，愛靠咱把握現在好好來打拼。
1995.06.21 三更半暝
1999.12.30 (TLPA)
沒有留言:
張貼留言