2010
03092056飲水機
「食果子，拜樹頭。」教咱愛會曉感恩，但是……
辦公室外面有一台飲水機，是學生囡仔上愛泡麵ｅ所在。可惜彼台飲水機四週圍ｅ環境m bat清氣過，定定ma i kah一四界(ke3)穢pe pe(ue3 pe5 pe5)。
阮ｅ辦公室ｅ位置非常ｅ特別，阮彼棟建築物若按空中ｅ角度看落來是一個「凸」(phook4)字形，若只有看辦公室和教室ｅ部分，就變成「凹」(lap4)字形；按建築物ｅ正身看去，是一棟五間起ｅ建築物，凸出來ｅ所在是一樓到二樓ｅ樓梯，ti正手爿凹(lap4)落去ｅ所在囥(khng3)一台飲水機，飲水機ｅ後壁是一堵有窗仔門無裝窗仔ｅ壁，飲水機抵好和(ham7)窗仔台平岏(kuan5)。
彼堵壁後面是中央(ng1)一間辦公室和辦公室二爿邊仔二間教室ｅ亭仔腳(走廊)。阮彼棟抵好是國中一年ｅ下課時陣欲去合作社愛經過ｅ路，假使每一個國中生攏有食泡麵ｅ習慣，理論上，加上二班國二、二班國三和二班高一ma愛經過彼台飲水機，攏總差不多有將近一千個學生有可能用會著彼台飲水機。
自從阮ｅ辦公室搬過來目前ｅ所在，一年半以來，彼台飲水機就變成我每一tau出入辦公室愛經過或是看著ｅ所在，所以無形中彼台飲水機就變成我ｅ每一日ｅ生活空間ｅ一部分，即然是我ｅ生活空間ｅ一部分，偏偏抵著遐是三不管ｅ所在，並無一個班級ｅ學生來拚掃整理，濫(lam7)飲水機排水落去ｅ彼條會積水ｅ細條水溝仔ma是無人管ｅ所在，所以為著欲hoo家己ｅ生活空間看起來卡清氣相，ma ti無形中，遐變成我時常拚掃ｅ所在。
一年半以來，彼台飲水機四周圍ｅ環境變化hoo我感慨萬千，因為遐ｅ環境引起我想起自囡仔時代所有關係著咱環境變化ｅ代誌。
抵搬來ｅ時陣，飲水機三不五時a就有一寡泡麵內底ｅ調味包ｅ塑膠lok仔tan ti窗仔台面頂，差不多一禮拜愛洗一kai窗仔台，其實垃圾桶就ti飲水機ｅ正手爿，就是有學生囡仔siunn過無頭神，順手將調味包ｅ塑膠lok仔囥ti窗仔台面頂，雙手ka泡麵捧咧就離開去a。人講：「做賊一更，顧賊一暝。」根本就m知也佗一位無頭神ｅ人囥ｅ，嘛無可能逐節下課親像khia衛兵仝款去看是啥麼人做ｅ，何況in若有看著老師ti附近斟酌攏會真自動做好好。
半年過去了後，換一批新生入來，暑假抵開始一站仔攏真清氣，差不多個外月m免清，暑假欲結束ｅ時陣，調味包ｅ塑膠lok仔一禮拜比一禮拜卡濟，看著垃圾愈來愈濟，開始就ti飲水機頂貼標語，提醒著囡仔愛順手將垃圾tan落去垃圾桶，抵開始ｅ時陣，情形有改善，後來ma無效，標語一直換，甚至有人用三腳貓ｅ英文寫："who bird you" ti頂頭，彼陣，已經差不多是三工就愛洗一kai窗仔台。
隨著時間ｅ過去，窗仔台ｅ清洗頻率愈來愈岏，甚至得欲每一節下課完了後就愛洗一遍，換另外一句話講，窗仔台不時就去hoo囡仔用kah thai-ko爛癆，m是干單調味包ｅ塑膠lok仔nia-nia，用無了ｅ料甚至得欲規包ｅ料就膏(ko7)kah窗仔台四界遐一搭、茲一搭，看就有夠thai-ko，猶有雞卵殼，卵去用破去ｅ卵清卵仁糊糊ti窗仔台面頂，甚至有人擤鼻擤ti飲水機面頂或是呸痰呸ti面頂，就是有一寡囡仔ｅ生活習慣特別孬(bai2)，甚至飲水機雙爿攏囥垃圾桶ma是仝款。m知是家庭教育siunn過孬？或是國小時陣咱ｅ教育教了無好？或是囡仔本身天資素質就是孬ｅ？或是伊四周圍ｅ大人做歹模範hoo伊學？人攏講：「身教不如言教。」我m相信經過六年國小ｅ教育，甚至幼稚園ｅ教育，伊會m知影垃圾愛tan落去垃圾桶，更何況大眾媒體ma一直咧宣傳環保ｅ觀念！！為啥麼干單短短一年半ｅ時間，干單飲水機附近四周圍ｅ環境就變化遮呢大？
這hoo我想起咱咧住ｅ環境，這個台灣是咱ｅ生活空間，ti二十外冬前我猶細漢住莊腳ｅ時陣，路邊不時ma有泉水pu出來，若是嘴乾，人趴落去就直接lim泉水；國小時陣，水道水轉開就lim，但是今仔日，若是嘴乾欲lim水，有人lam飲水機ｅ水ma無啥麼敢lim，就愛去買礦泉水來lim，現代人實在是可憐(阮十個月大ｅ囝愈可憐， 阮 太太欲用hoo伊lim ｅ水攏愛經過淨水器、過瀘杯、熱水瓶hiann滾過等等ｅ手續才安心hoo阮囝lim)，買水比買汽油閣卡貴。
二十外年來，咱ｅ環境hoo咱不斷ｅ污染之下，已經到kah無一條大溪是清氣ｅ，每一條攏變成烏水溪，原本充滿生命活力ｅ溪水，變成臭konn-konnｅ死溪仔水，ti環境保護觀念夯(gia5)頭ｅ今仔日，甘講這個觀念unna會和卡早其他ｅ觀念仝款，攏總是一種口號而已？甘講維護環境m是咱愛做ｅ空課？甘講咱ｅ生存空間一直欲繼續污染去？最近電視廣告已經有廣告著tui法國進口入來ｅ礦泉水，甘講咱國內ｅ礦泉水已經到kah有人開始未凍信任ｅ程度？若按呢落去，十年後咱ｅ環境m知欲變成按怎？
tui一台飲水機附近ｅ環境，會凍看出咱規個社會整體教育ｅ失敗，更加會凍看出咱ｅ環境污染加速了腳步。咱有一句話講：「食果子，拜樹頭。」雖然以科學來講是迷信，實際上是叫咱愛知影感恩，但是咱目前ｅ環境污染嚴重，咱已經未曉飲水思源，咱ｅ後一代繼續加速對生活環境破壞，咱生存ti這個空間，咱是m是愛「食果子，拜樹頭」開始為咱ｅ生活環境做一寡代誌？是m是愛教咱ｅ序細實際以行動來保護咱ｅ環境？是m是愛hoo in了解咱若是閣繼續破壞咱ｅ生存空間，十年後ma是咱家己愛來承受污染所帶來ｅ後果？就親像咱二十外年來ｅ不斷污染所帶來ｅ一切後果ma是咱昑仔來承擔，咱是m是愛來開始動頭動腦動腳動手來救咱ｅ環境？看會凍閣看著真濟真濟ｅ魚仔、蝦仔、loo蟹仔、la仔……等等ti清氣ｅ溪仔水內底悠遊自在泅來泅去走來走去否？
1997.07.10
【註】
1. 「每一tau」ｅ「tau」：音tau2，是我漸漸消失中ｅ口語部分，有tang時仔去hoo kai2代替，是「遍、回、罷、次、趟」ｅ意思。
2. 孬：音bai2，是無好ｅ意思，台語文有人用「醜、坯、壞、婄」等等，嘛有用其他文字，雖然想欲接受，因為電腦無字，只有放棄。
沒有留言:
張貼留言