2010
03092043文書處理ｅ要訣
真濟人一談起電腦，總認為電腦是用來扑電動玩具用ｅ。這個觀念，已經將電腦定位成玩具ｅ一種。按呢生，已經真明顯是對電腦ｅ誤解。其實，電腦是一項工具，而且，目前已經有非常濟ｅ人是靠電腦來做空課ｅ。
有真濟人總是毋知也按怎來操作電腦。其實，操作電腦是真簡單ｅ代誌，只要咱心中勿怕犯錯，就會使快快樂樂又閣順心來使用電腦了。只要咱毋是存心欲破壞電腦ｅ設備以及電腦內ｅ系統資料，大可放一百二十個心大膽來做任何嘗試，因為電腦允準咱一直犯相同ｅ錯誤(幾千萬擺攏無關係)，一直到咱學會曉為止。
因為時代ｅ變遷迅速，漸漸，咱有真濟代誌攏想欲用電腦來處理，甚至連大學生平常時欲交ｅ作業，嘛需要用電腦將作業扑好了後，列印出來才交出去，有ｅ甚至閣再用電腦做一張真水ｅ封面，希望按呢會凍顯示出家己ｅ特殊風格。因此，基本ｅ電腦文書處理，便成了個人ｅ基本技能。所以，本文上介想欲探討ｅ就是文書處理應該有ｅ一屑仔觀念，希望咱每一個人會使閣卡順心來運用電腦這個現代化工具。
當咱面對電腦ｅ時，毋管咱所使用ｅ是佗一套文書處理，總希望這套文書處理軟體會凍幫助咱達成咱ｅ要求。所以，首先，咱先愛知也按怎進入以及退出某一款軟體(一般以附檔名有exe為執行進入ｅ方法，退出則視各軟體而定)；其次，就是愛善用輔助齒(即help齒，大多數ｅ軟體以扑F1齒為主)，因為help齒內底會ga咱講所有有關係應該按怎操作某一個軟體ｅ說明，善用這個齒會凍賜咱更加快速進入狀況。
有基本概念了後，續落來當然是一定愛知也按怎建立新檔案了(一般而言，大多數ｅ軟體一進入以後就隨進入了新檔案ｅ狀況)，再來就是一定愛知也按怎將咱辛辛苦苦所扑入ｅ資料存檔起來，最後當然嘛一定愛知也按怎將以前ｅ檔案叫出來以便做日後ｅ修改與列印(請愛會記得善用help齒，每一個軟體攏有一寡無仝款，恕難以詳說，本文只談應有ｅ概念而已。)
至於咱佇咧編輯檔案時ｅ技巧與熟練性，就愛靠咱家己卡扑拚練習並且善用help齒了。毋通未記得：「一回生，二回熟，熟能生巧。」(但願咱逐個早日脫離單指神功ｅ階段。)
文書處理至此並毋是完畢了，上介重要ｅ代誌，就是將咱扑好ｅ資料，會凍合乎咱ｅ要求列印出來，毋是真單純將伊印出來就好a(真濟人一開始攏是按呢生做ｅ)。
佇咱將檔案列印出來進前，當然猶閣愛做真濟考慮。首先，愛考慮ｅ是咱印出來以後，紙ｅ四周圍空白處應該留若濟公分。譬如：一個大學生ｅ作業要求是上下為3公分 ，左右為2.54公分 ；或是倒邊閣加1.5公分 ｅ裝訂邊。這時陣，咱猶會凍凊采否？若是咱從未做過這類ｅ考慮，ganna這呢簡單ｅ要求，恐怕就愛無閒gah霧sasa囉。閣卡毋免講字和字之間ｅ距離(字間距)以及一行(ling5)和一行中央ｅ距離(行間距)了；猶有紙張ｅ大小，一行欲印幾字，一頁欲印幾行；題目、標題和內容文字ｅ大小和字體應該按怎安排；若是抵著老師有老花眼，猶閣愛考慮所印ｅ字是毋是會siunn細，以免老師看未清楚！
這一切列印時陣，所愛考慮ｅ代誌，完全愛倚靠列印控制碼ｅ控制了(當然，嘛愛考慮到所使用ｅ印表機機種)。
後擺，咱若看著別人用出一份或是一張電腦列印出來，而且看起來親像是理所當然ｅ文件時，請咱細膩一點ga斟酌看，假使若換做咱，咱是毋是嘛做會到咧？
總講一句，本文除了ga咱講一寡應該有ｅ基本觀念外，就是希望咱今後會凍採取更加積極主動又閣毋怕犯錯ｅ學習態度，同時嘛知也咱家己ｅ需要，來學習咱身邊一切實用性ｅ代誌；同時閣卡會凍考慮一寡卡細微ｅ實際問題；但願咱閣卡會實際又閣大膽來找出解決ｅ方法。反正，看著別人一寡假若是理所當然ｅ成績出來是一回事，換家己做看覓咧又閣是另外一回事了。希望讀完本文以後，會凍對咱今後ｅ學習態度有所幫助。
1995.10.10
沒有留言:
張貼留言