2010
03092058【笑詼代一層】害a！出代誌a！
阮牽手交代我愛去郵局領錢，所以，下早仔時有閒就想欲出去領錢。
欲領錢就愛找提款卡，所以，就去lih樓頂找提款卡，找a找，真無簡單才去找著提款卡，順續就ka以早ti淡水辦ｅ提款卡提luai(落來)，久無用a，想欲查看覓猶閣有賰偌濟錢。
阮用行ｅ行到郵局，來到郵局ｅ提款機頭前，先ka淡水彼張lok落去，tann密碼m知幾號，gi gi咧，既然會用lih。
過幾分鐘以後，一張結帳(siau3)ｅ紙出來a，奇怪，那會無半項，結存金額是空白ｅ，閣來換欲領錢ｅ彰化銀行彼張卡，將欲領ｅ金額gi gi咧，結果嘛是仝款，tann害囉，領無錢。是m是siunn久無去銀行劃簿仔？真正m知欲按怎，所以將彼二張單kai看卡詳細咧，只有錯誤訊息代碼，淡水彼張4601，掀過後爿看覓咧，密碼無合，tang時a是密碼m著去。慘啊，到底幾號？已經有四、五年無用a。干單會記lih卡早每一張卡ｅ密碼攏仝號而已。干單這張無仝，到底是幾號，欲按怎去想咧。
第二張欲領錢ｅ錯誤代號是4605，掀過後爿看覓咧，啥麼！賰ｅ錢無夠領！這……！這.....！這塔有可能咧！得欲規年ｅ薪水攏ti內底，塔有可能無夠？慘啊！慘啊！欲按怎？
閣來kai查一遍賰ｅ錢有偌濟，手一面gi，心內一面想講甘會閣仝款是空白。唉唷！這回m是空白，算卡真咧。啥麼！干單賰千外元(khoo1)！慘啊！慘啊！出代誌a。一時黑天暗地，欲按怎？猶閣有厝ｅ貸款和汽車ｅ貸款愛納，生活ｅ開銷欲按怎？緊咧，趕緊去找阮某，看欲按怎才好？
ti路中，一面行一面想，甘會去hong偷領去？簿仔和提款卡攏ti咧，甘有可能？甘會是銀行ｅ電腦當機過？所以金額變亂去。甘會銀行ｅ行員動了腳手？是m是愛提銀行ｅ簿仔去斗南彰化銀行去一筆一筆對看覓咧？
行到阮某上班ｅ所在，匈匈狂狂就入去a。奇怪，塔無看著阮牽手，tang時換位？tann是換去佗位？問in同事看覓咧。in講無換位，伊人昑仔就ti頭前遐，去找看覓咧就有。
找著阮某了後，就kai講：「害a，出代誌a」。
「tann是出啥麼代誌？」
「銀行ｅ簿仔只賰千外元nia nia。」
「我看覓咧。」
我就ka提款卡和結帳單提hoo阮某，阮某看看咧講：「你提m著張去a，這張m是斗南彼張，斗南彼張外皮是紅色ｅ，我有ti後面寫一字斗ti頂頭，會記得否？」
好佳哉！好佳哉！一二三四，驚著無代誌。是我提m著張去，是我已經未記得我猶有一張嘉義彰化銀行ｅ提款卡。真正險險仔就「害囉！出代誌a」。
【註解】
1. 一層：「層」音can5，一件、一條、一個、一則ｅ意思，ti我ｅ語感內面m知按怎會講can5，再三考慮了ｅ結果，決定老老實實照口語音記錄落來。就親像我ｅ口語講「我kiau你去」有人講「我參你去」、「我kah你去」、「我ham你去」、「我kap你去」以及「我kin你去」仝款，佇新竹師範董教授來嘉義文化中心有講起「kiau」是giong欲消失去ｅ口音。所以，我決定照口語寫luai(落來)，並無做文字「個、條」ｅ轉換。
2. luai：音luai3，落來二字ｅ連音。
3. 偌：音jua7；有人講lua7，音同「賴」；我ｅ音講gua7，音同外；聽講有真濟老一輩ｅ人是講dzua7。
4. 阮：ti我ｅ語感有淡薄仔和人無仝，音gun2是我一個人ｅ意思；音guan2是無包括聽話ｅ人，有二個人以上ｅ意思。
5. gi gi：有文字寫「扼扼」，音jih8 jih8或是chih8 chih8，我ｅ口語已經變成gi7 gi7ｅ音。
6. kai：ka7 i7 ｅ連音，雖然「ka伊」ｅ「伊」ti各種字典以及文獻攏是和「醫生」ｅ「醫」仝音，有可能我已經是音變閣加上連音。
7. 元：照文字應該讀guan5，但是因為咱目前幣制頂頭寫「元」，咱ｅ口語自然會講khoo1，相信除了滾耍笑以外故意唸guan5以外，我想大部分會自動講khoo1，所以，我文字並無寫「箍」或是「圓」。
8. hong：音hong5，「hoo人」ｅ連音。
9. 昑仔：音cim2ma2，現在ｅ意思。
10. 遐：hia1，彼爿遐ｅ意思。
1997.07.04
(轉去主目錄)
"khi2-khi3 " ti7 khau2 gi2 gun2 kong "khit -li3",u7 kho2 ling5 si7 tng5 ki5 bo5 huat4 hian7 e5 tsho3 goo7, "khi2--lih" gi5 kam2 ma7 e5 thong,
這款連續仝聲母的詞後壁的聲母變成l-開頭的音, 佇1873年的廈英大辭典就有記載矣.
第一擺聽著,往遍毋捌注意即個問題，今仔日加學一項＇多謝老師
經過你按呢講, 我才發現我嘛是發khit--li3的音, 我起來嘛會變成khit--lai5, 講較緊咧甚至變成khiai(是一個中降調, 無佇八音內底).