2010
05022203冷清
這幾禮拜攏一直咧做網站的網頁連結。仝款，嘛攏一直注意著我的訪客的人數。今仔日的訪客人數冷冷清清。可能是開站以來人數上少的日子。
詳細想想咧，最近人數一直減少，我想，來拜訪的人可能看著的攏是網頁連結，日子一下久就連入來就無想欲入來看。因為，若欲揣資料，Yahoo的搜揣共keyword齒入去就好矣。哪著來我遮揣咧。
我本來就是一个gâu放棄的人。只要看著物件有人做，我就無想欲做。因為，我攏想講人的攏做比我較好，人攏比我較厲害。
我，袂曉唱歌、袂曉畫圖、袂曉配色、袂曉寫文章、袂曉日語、袂曉程式設計，去yahoo知識+看看咧，發現我啥物攏無法度回答，干焦賰台語的問題勉強會曉回答足小範圍的問題，差不多20條才有法度回答一條耳耳。所以，嘛一直共家己定位佇啥物攏袂曉的人。
佇台語的世界，外口的人攏共我當做專家。毋閣，我家己攏共家己定位佇半桶師的地位。因為，我知影，佇台語的世界內底欲做頂尖的人，除了母語一定愛是台語以外，欲看豐富的資料，除了基本愛會曉教會的白話字以外，閣愛會曉英語，才有法度看廈英大辭典內的解說。嘛閣愛會曉日語，才有法度讀日本人共咱留落來的豐富的台語資料。
拄開始會曉做網站面頂的超連結的時，予我足歡喜的。彼是三月底的代誌。當然，技術是有愈來愈厲害，毋閣，猶是佇半桶師的程度。
佇做百科全書的網頁連結的時，有想講，欲共blog用超連結的方式，共資料分類連連咧，變做台語的圖書館仝款。就開始做散文、答喙鼓、朗讀文章、電子畫本等等的網頁連結。
因為，我袂曉程式設計，佇做朗讀文章的時就開始出問題矣，聲音的部分攏無法度連結成功。做電子畫本的連結時，發現著我袂曉予影像順利連結起來，予伊會當佇線上播放。
做嘉義市的本土語言輔導團的網頁連結的時，拄著的問題愈濟，我根本就解決袂去。連紲無閒兩工，訪客攏無入來捧場。想講，人只要點「鄉語訊息公告」了後，所得著的結果，比我做的較好足濟倍的。所以，只好暫時共伊起一半就囥咧，人若佇我遮看著的項目若欲去看，就點「鄉語訊息公告」了後，才閣家己去點就好矣。
想著「家己做甲流汗」，人會「嫌甲流瀾」，閣無人欲捧場，我的gâu放棄的性地又閣咧夯起來。干焦做一个百科全書的連結就做一工的時間。想起我寫「現代台語文的時代優勢」彼篇文章敢若用無百科全書網頁連結的一半。
原本就想欲共允言兄的物件做一个連結的目錄出來，因為內底的資料太豐富咧，閣有足寶貴的資料。今仔日，想講欲共《台語文記憶》內底的冊做連結，一看著有787份。當然，心裡足歡喜的，一下想著後壁可能愛開足濟時間佮無人會捧場的情形下。我開始放棄做超連結的念頭。
總感覺，開點外鐘的時間，就會當家己的想法佮心情寫落來，按呢，對我來講，是加足輕鬆的。
我毋知，我這一停落來了後，毋知愛閣過外久才會開始振動。想著我寫「是m是欲繼續」彼篇了後，一停就停十冬矣。我無想欲去想，嘛無愛閣去想。(2010.05.02)
莫謙虛 汝足賢 文章寫得真好
多謝分享
當然要繼續寫落去 為台語文化拍拼加油
阮有訂閱汝的部落格 歡迎逐家交流分享