2010
03092051改頭換面
若準無記了毋對，彼是一九八六年ｅ代誌，彼時陣是我大學三年ｅ時陣。
有一工ｅ早仔，若照天色來判斷，應該是佇熱人ｅ時陣。
我真準時起床，非常ｅ準時，一秒都無差，真正是真佩服家己，從來攏毋識用亂鐘仔叫家己起床，猶閣有法度遐呢準時起床。
每一工透早目睭扒金，頭一個動作就是看手錶仔幾點a。每一遍，錶仔面ｅ長短針以及秒針攏仝款，連家己就無啥欲相信這個事實，家己ｅ生物時間那會遐呢仔準時？
按睏ｅ頂舖落床後，發現著睏佇下舖ｅ室友已經早就起床a，心內起淡薄仔懷疑，因為普通時a，伊攏比我卡晚起床。每一工攏是我給叫起床ｅ，是按怎今仔日thah顛倒比我卡早起床？
雖然伊攏有寄亂鐘仔ｅ習慣，但是亂鐘仔寄嘛是無路用，亂鐘仔咧liangliang叫ｅ時，就將伊切掉，繼續閣睏。佇伊ｅ亂鐘仔liangｅ時，大部分我攏已經起床半點外鐘a。是按怎這回會比我卡早？
心肝內一連串ｅ疑問先暫時囥(khng)一邊，行到我彼個闊一尺左右、長尺半左右ｅ鏡ｅ頭前。提起lua仔起來欲梳頭毛。雖然頭毛短罔短，嘛是愛小整理一下a。
這時陣，鏡反射出來ｅ面容hoo我驚一下，竟然已經未認得鏡內ｅ家己。
因為鏡並無釘佇壁頂，kanna峙(chai)佇學生仔用ｅ四層鐵仔做ｅ冊架仔頂。所以，影著正爿ｅ角仔反射出一粒嘛是峙佇冊架仔頂ｅ頭殼。
心內想講：「奇怪，我tang時囥一粒頭佇遐？」視線慢慢仔徙(sua2)到彼粒頭ｅ面前，想欲看清楚彼粒頭ｅ面，竟然看著和我高中時陣ｅ相片一模一樣ｅ面。
我恬恬看彼個頭ｅ面。
過一時仔，親像領悟著啥麼代誌仝款，對家己講：「我知也了，彼粒頭是昨ｅ我，佇鏡看著ｅ面容是今仔日ｅ我。昨ｅ我已經過去a，今仔日ｅ我已經是另外一個新ｅ我。親像又閣開始一個新ｅ生命仝款，昨ｅ我就親像過身去ｅ生命仝款，何必閣將一切不如意ｅ過去來灌hoo今仔日ｅ我？」
講完茲ｅ話，目睭扒金，看一下仔錶仔，人peh起來坐咧，猶閣一屑仔茫茫。
坐佇眠床頂，看著冊架仔，看著鏡。內面ｅ佈置，一切攏真正常，親像家己若像有做一場真奇怪ｅ夢。因此，開始一件一件代誌慢慢仔想，終於想起夢中ｅ一切。
現在，已經三十出頭歲a，想起過去ｅ種種，確實，轉變過幾a遍ｅ性格，高中一年留級以前，國小ｅ時，是非常孽畜又閣貧憚；國中ｅ時，同學講我厚話，但是我ｅ天真，賜hoo我非常好ｅ人緣；留級了後，煞變做一個自卑感真重ｅ人。
大學一年ｅ頂學期，為著欲專心讀冊，放棄一切ｅ社團活動。彼時陣，記憶力真好，只要見一擺面，半冬了後閣見著面，猶原閣叫會出對方ｅ名，往往會hoo對方驚著；看過朋友gi (ji) 過怹厝ｅ電話號碼就會記得；班上通訊錄看一遍，差不多有一半ｅ人ｅ生日就背起來；偏偏就是課本讀未來，差一屑仔就因為三二退學(【註】三二就是有三分之二ｅ學分無入格，現在已經改做二一。)。
一年ｅ下學期，因為一個同學ｅ一句話，轉變著心內ｅ觀念。從此了後，就變kah真無頭神，時常毋知也今a日tang時；見過幾a遍ｅ面，就偏偏未記得伊ｅ名；有一遍去聽顏元叔ｅ演講了後，規日就匿佇圖書館內面，就按呢變成一個獨行俠，giong欲hoo人當做怪胎兼變態。
二年ｅ頂學期，因為同學hoo我ｅ心靈傷害，使我將我家己內心封閉起來，斷絕任何朋友ｅ聯絡。
一年十個月ｅ做兵生活，更加增加著個人灰(phu2)色ｅ人生觀。
退伍了後，為著準備考研究所，每禮拜攏和大學 時ｅ 教授討論語言學種種ｅ問題，因為伊ｅ一句話，我放棄原本想欲佇研究所研究英語文教學法ｅ想法，決心來轉向母語ｅ研究和探討。
研究所ｅ時，因為想講家己過去佇大學讀冊四年當中，毋識開嘴問過教授問題，一定愛佇上課ｅ 時和 教授對答才會成一個研究生，致使佇上課ｅ時，成為一個愛提問題、討論問題和表達想法ｅ學生。
研究所二年ｅ時，因為母親ｅ過身，為著欲完成母親希望我研究所二年畢業ｅ願望。因此，克服一切ｅ困難和種種ｅ阻礙 (因為論文是探討台語ｅ聲韻問題，受著有外省人情節ｅ所長ｅ種種刁難)，研究所二年就畢業。結果，破了輔大語言所近二十年來無人二年畢業ｅ記錄。
佇經歷了數度ｅ轉變了後，深深體會了一層代誌，就是咱若想欲改變著家己ｅ行為，其實就和彼個夢仝款，昨ｅ一切攏過去a，今仔日是一個完全新ｅ生命，無需要因為過去ｅ牽連來纏腳絆手。
咱嘛曾經聽過：「昨日種種譬如昨日死，今日種種譬如今日生。」相信講出這句話ｅ人unna有相仝ｅ體驗。
所以，咱若欲hoo人感覺咱已經是變另外一個人，其實將咱ｅ觀念改變，照改變了ｅ觀念去做，就會變做另外一個人仝款。
這時陣，有人會想著咱定定咧講：「江山易改，本性難易。」想信每一個人提起這句話攏是認為一個人一但養成一個人格了後就難以改變，親像悲觀ｅ人欲變做一個樂觀ｅ人就真困難。
相信這句話是和三字經ｅ「性相近，習相遠」有仝款ｅ意思。「江山」和「習」攏指咱後天所養成ｅ習性，欲改真簡單。只是咱攏毋知欲按怎改。
其實，咱ｅ一切行為攏是咱ｅ觀念和態度所表現出來ｅ，咱只要將咱對所欲辦ｅ代誌ｅ重要性ｅ順序小調整一下就可以a。
咱來舉例講卡清楚，咱若認為三頓食飽了後愛行三百步來幫助消化，促進健康是非常重要ｅ代誌，無論啥麼代誌都未當來阻擋著行三百步這項代誌；咱若認為看著土腳ｅ糞圾著愛親身抾起來，以維護環境整潔是真重要，無做未當。
過去咱若毋識按呢做，若做一站仔了後，咱來家己想看覓咧，做一下比較，咱會發現咱已經變做另外一個人了。信毋信由在你。「天下無難事，只怕有心人。」
1996.03.10
沒有留言:
張貼留言