2010
03092049分享
拜六暗時(3/30)，走去台員圖書室聽清大ｅ張炎憲 教授演講「台灣歷史ｅ主體性」轉來。因為轉來ｅ時陣已經真晚(晏)a，所以想欲準備來洗形軀洗了就卡早去歇睏。
物件傳(僎)好勢了後，就落去樓腳。彼時陣，猶有人咧看電視「玫瑰之夜」ｅ「玫瑰之約」單元，真抵好去看著戲尾。雖然僅單影著一、二分鐘耳耳(niania)，毋閣我看著咱所欠缺ｅ物件。
自頭到尾，毋知也主持人訪問彼個外國人是咧訪問啥麼代誌。佇「玫瑰之約」節目內，每遍若訪問完了後，主持人攏會佇禮貌上送受訪者一束真水ｅ花。
彼個外國人接著花了後，就馬上dui彼束花抽一蕊花「還」主持人，續落去，伊隨dui座位跁起來，原本叫是伊毋識禮數，無欲向觀眾相辭就欲來離開，啥知伊繼續行過隔壁間，將賰落來ｅ花分互其他在場ｅ工作人員，每一個人一蕊花，將花分了了，家己隴無留半蕊。
其實，咱若是收著別人送咱物件ｅ時，攏未曉「借花獻佛」一下。若是咱會當詳細想看覓咧，人送物件互咱，咱若歡喜，送ｅ人嘛會歡喜。咱若閣會當進一步將咱ｅ歡喜分享互咱身邊ｅ人，unna互怹得著歡喜，相信咱毋單(m-na)會閣卡歡喜，猶會得著卡好ｅ人緣，每工攏會生活佇快樂當中，自然就會長歲壽。
咱還頭閣看彼個外國人，看伊將花分了了。人伊並無因為家己無留半蕊花來減少伊ｅ快樂，反倒轉來，看著伊歡喜ｅ笑容顛倒比提著花ｅ時閣卡快樂，因為伊得著完全分享了後ｅ快樂。
因此，想起今年正月中旬ｅ時陣，佇台中教師研習營聽著一個教授演講，有講著伊僅單(ganna)希望伊ｅ序細現在佇國小時陣若學會曉分享這個美德，伊就感覺真滿足a。
是啊，佇咱這個社會，咱自細漢到大漢ｅ教育並無教咱來按怎分享咱ｅ快樂、文化、知識、經驗……等等。咱實在有真濟真濟需要學ｅ代誌攏無佇學校學著。相信咱若學會曉分享快樂，咱ｅ人緣會真好，做代誌會加真順利；咱若學會曉分享文化，咱ｅ文化傳承和發展就會無問題，而且閣會進步真緊；咱若會曉分享知識，咱就會有真好ｅ知識基礎來進一步做深入ｅ研究，因為「咱若踏佇人ｅ肩胛頭面頂總是會看卡遠」；咱若學會曉分享生活經驗，就會當省去未少四界碰璧ｅ時間，咱嘛卡有法度適應快速變遷ｅ高科技ｅ社會。
總講一句，咱若學會曉分享，相信咱ｅ社會會閣卡和諧，咱ｅ文化就未有斷層ｅ煩惱，咱ｅ生活就會充滿著快樂。
1996.04.02
沒有留言:
張貼留言