2010
05312329慧星一號(cwi)--陪我過研究所生活的時上重要的工具
昨方，為著搜揣〈彙音寶鑑(二)—台語字典入聲的秘密〉寫作時間。就開始揣電腦檔案。
結果，出來一个副檔名是cwi的檔案。這个檔案共我睏佇記憶池足久的往事攏總叫叫轉來。
經過遐濟冬，這馬我的電腦內底完完全全無一个程式會使開這款檔案矣。
拄看著cwi，驚一趒，想講這是啥物程式做出來的檔案，完全袂記得伊是慧星一號做出來的。
透過網路，才知影伊是慧星一號做出來的。
看著慧星一號四字，我的腦海馬上浮現出我讀研究所彼時陣為著欲拍第一份作業的情形。
佇大學的時陣，阮毋捌學過電腦的文書處理，到阮三年的時，大學一年的新生的文書處理就是學用電腦來處理文件。抑阮是傳統的英文拍字機爾爾，用電腦處理根本就袂曉。
我考牢研究所，做伙讀的同學正常是減我四歲，所以in有學過文書處理。發音法第一節課，教授出一份作業，講一定愛用電腦拍字交作業。彼篇作業是愛阮用國際音標來標注北風佮日頭這篇故事。
一聽著愛用電腦拍字，我就足煩惱的，因為無學過電腦，除了會曉拍倉頡輸入法以外，賰的就完全毋知影。
下課轉來宿舍，共我的困擾講予室友聽、講予樓友聽。佳哉！樓友電腦足厲害的。伊就用兩塊大塊的磁碟片(5¼寸)，一塊做開機磁片，一塊做文書處理的工課。因為需要造國際音標的字形，所以伊就用慧星一號予我用。
彼時陣的電腦猶無外先進。我家己無電腦，用我的室友的電腦。伊的電腦無硬碟。我就是靠樓友予我的兩塊磁片落去做作業。
家己一个人，想盡辦法佇dos系統造16*15的國際音標字形，拍字，總算共作業拍好矣。
彼時陣，印表機是撞針式的，列印的時會吱甲足大聲的，差不多規棟宿舍的人攏聽會著。
作業順利印出來了後，我的心情實在足歡喜的。嘛佇這時陣體會著成就感。另外，上重要的是學著毋通驚犯毋著這个觀念。因為，無論我出幾百遍的差錯，電腦攏容允我一直改一直改攏無要緊。彼是我用英語拍字機所學袂著的代誌。
雖然，過半冬後，我才了解我第一份作業實在足原始。因為，用24*24的字型印起來的品質加足好的。
到今，我的資料夾內底，猶有當初是我造的國際音標佮我寫論文愛用著的符號。
佇生活中，我已經袂記得慧星一號的代誌矣。因為搜揣檔案的關係，予我想著寫第一份作業的辛苦過程。抑資料夾內底的物件是用過慧星一號的證明。
這馬，我的電腦檔案有十外个開袂起來的cwi檔案。慧星一號，佇我研究所畢業了後就無閣再用過矣。因為，大學的教授有予我sil國際音標的字型。改用word了後，所有的需要攏有法度解決，慧星一號這个詞嘛沉入去腦海底足深足深的所在。若無昨方的檔案搜揣，我可能永遠嘛袂去想著慧星一號是陪我行過研究所生活的上重要的工具，無伊，我的論文一定做袂出來。
(2010.05.31)
雖然我是倒地番薯仔子
可是讀台語還是很憋扭
看到你們的努力
只有佩服
也讓我想棄家父
曾經想交我讀漢學(用台語)
敎我台語八調
畢竟缺少應用環境
就沒認真學過
現在老了 也學不來了
俗語講:食到老,學到老; 食一歲, 學一歲. 咱嘛講:捷講喙會順. 既然前輩的母語是台語, 按呢讀這基本上袂有偌大的困難. 你閣捌字, 其實是足簡單的代誌, 只要共看著的漢字讀做台語就會使矣. 加看幾篇仔文章就會慣勢矣.
實際上, 你若讀阮寫的文章, 所開的時間無阮的三分之一的時間, 阮有耐心來寫, 前輩若用仝款的耐心來讀, 足緊就會讀了誠順矣. 建議前輩先看我的網頁連結內面有教育部的140篇朗讀文章, 有文字和聲音檔, 一面看文字一面聽聲音檔案, 其實是足緊就會曉矣.
阮只不過是共咱講的話寫落來爾爾, 前輩仝款嘛 會使想著啥就寫啥, 其實, 無像前輩講的遐困難, 因為咱干焦共咱的母語記錄落來爾爾. 時常來我遮行踏的一位網友, 嘛是食老才來學寫台語, 你去看我上早訂閱的線上朋友就是伊矣.
看這篇文章，好像倒轉去初初學電腦的年代
因為工作需要，所以佇成十年前開始學電腦，除了用PE2處理文件，嘛學會曉LOTUS123，閣有一種軟體叫做［沙士比亞］畫格仔足好用...
若毋是佇這看著這篇文，這幾項用過的軟體已經予我袂得了了矣
慧星一號我本底有一本冊是咧講彼套軟体的功能佮按怎操作的＇舊年整理冊櫥仔的時＇共伊提去資源回收＇佇DOS的年代慧星一號算是功能誠好的程式＇阮用PE,尾手用PE2;APPLE║的時代我有買一台,母閣袂曉用,16位元XT是用720k的磁片,到AT才用1.2M佮1.44M３ 1/2的磁片
您提起遮＇嘛乎我想著過去學電腦的記憶／佇彼陣欲拍電腦就愛學語言＇像BASIC,Dbase,LOTUS123,assemble,佮Ｃ語言＇我無一項學會好勢,若拄著迴圈我著走袂出來
這馬的科技足發達，較早的物件，親像大塊磁片，攏無用啊！！甚至連細塊的 嘛強欲淘汰掉。
慧星一號 我毋捌聽過，實在真歹勢。
是啊, 電腦的進步足緊的, 我高一的時猶有看過Apple2的磁帶機, 看起來佮錄音帶足相仝的. 這馬連錄音帶就欲退時矣, 因為有錄音筆, 錄的量閣大:)