2010
05302213一求求九年—兼做《彙音寶鑑》台語字典的秘密後記
彼是我大學一年的寒假的代誌。
彼冬，我當佇阮兜的倉庫頭前，袂記得我咧創啥物。
雄雄，聽著離我欲十公尺遠的阿爸喙咧踅踅唸：「君堅金規嘉；干公乖經觀……」我是完全聽毋捌阮老爸仔到底咧唸啥物。心裡咧想講：「嘿！自細漢到大漢，我攏毋捌聽阮老爸仔咧講外國話。啊伊這馬到底咧講佗一國的話？」
我過去問阮爸爸：「爸也！你到底咧講啥物話？我thah(盍khah)會攏毋捌聽過？」
「啊我就咧讀《十五音》。」
「《十五音》？」我看彼本冊的冊皮明明印《彙音寶鑑》，那會講《十五音》？
「因為咱攏共台語字典叫做《十五音》？」
啥貨？彼本冊是台語字典，我攏毋捌看過。佇彼个年代，自國小的開始就禁止阮講台語，對台語的認識除了國中的時陣捌聽過講台語有八个聲調以外，賰的就攏總毋捌囉。
「啊這本字典欲按怎用？」
這時陣，阮老爸仔就共四十五的字母音、十五音、八音反法攏總教我。嗯(ng3)！這我攏無問題。毋過，按呢嘛猶袂曉查字典。
閣來，我老爸就教我算筆畫的揣法。這足簡單的，當然嘛無問題。
紲落來才是問題的所在！
「譬論講咱欲查ju5，就愛唸ju5求ku5。」
「ju5求ku5？」是按怎會ju5求ku5？我一直想攏無。叫阮爸爸解說，伊干焦講一句：「你求久自然就會曉矣。」阮爸爸伊閣舉幾若个例。阿娘喂！我投降矣！我完全袂曉按怎落去求！
自按呢，我就無閣去摸彼本台語字典。
經過兩年了後，又閣是寒假，無拄好又閣看著彼本字典。好奇心予我閣去提彼本字典起來掀。
這時陣，內底的羅馬字吸引著我的注意。因為阮中國現代史拄教無偌久有學著各朝代和人名的拼音法。我發現我看有羅馬字想欲標的音。借著漢字仝音字的幫助以及我對台語生活用詞的語感。我有法度用偷食步的方式讀出所有的音。
等阮爸爸轉來了後，我刁工揣罕用字問阮老爸。阮老爸就沓沓仔用切音的方式，反正彼時陣我嘛聽無伊咧唸啥物，伊就是愛唸一捾了後才來確定我問的音。經過問過二十外字了後的鑑定，我確定我會曉讀所有的音。
了後，我佇阮阿公遐看著《彙音寶鑑》，自伊過身了後就無人咧用矣。看字典猶足新的，可能是阮阿爸買來予阮阿媽的，我就提來用。
大學三年的歇熱。我閒閒無代誌做，就開始共《彙音寶鑑》對第一頁開始看，看到上尾頁，規本共讀了了。
其中，有一个禮拜，啥物攏無做，干焦為著唸「君滚棍骨、裙滚郡滑」這八字欲唸予伊順喙，我用一禮拜七工的時間，就一直唸一直唸。
因為我學的是西洋的聲韻學，用求的方式我袂曉用，所以我就家己做一个按照韻母字母順序落去排的索引表，彼是用國際音標寫的。彼時陣是我欲準備考研究所的時陣。
研究所碩士論文順序過關了後，干焦賰論文愛修改佮印刷爾爾。
有一工暗時，佇指導教授的辦公室內底，坐忝矣，就起來行行咧。雄雄，靈光一閃，無代無誌，腦海底浮現出答案：「啊！我知矣！」原來ju5求ku5的道理就是按呢。
詳細想起來，阮老爸自教我ju5求ku5開始，我的腦海底一直佇咧走揣ju5求ku5這个原理的答案。算算咧，自開始到知影伊的道理，攏總是九冬的時間。所以我攏一直會記得一求求九年這件代誌。
了後，我綴大學時陣的教授做田野調查踅台灣兩遍，便若問人，就會問厝裡有台語字典《彙音寶鑑》無。若問有，攏會問看會曉查無。大部分的人攏袂曉查，因為彼攏是in阿公抑是序大人留落來的。會曉唸口訣的人，問in是按怎攏愛按呢唸？攏無人知影，極加攏會講：「求久自然就會曉矣。」
因為驚這个祖先的智慧失傳去，我就開始寫佮《彙音寶鑑》有關係的文章。人講：「江湖一點訣，講破無價值。」祖先遮爾好用閣寶貴的智慧若失傳去可惜。
(2010.05.30寫)
[註] 我甚至猶有寫一篇足長的《彙音寶鑑》的自修法，寫一半寫無完就囥咧。
[小記]今仔日(2010.06.01)加超連結佮相關網頁連結，檔案攏做好矣，偏偏送出去講系統當咧無閒，害我規个攏總重做一遍。今仔日的運實在無好，因為機車無兩段轉彎去予人開紅單，這世人第一遍當面收著紅單。
相關網頁連結:
台語字典 彙音寶鑑欲按怎查字佮查音(台語文)
看你足用心看的, 按呢你嘛會開始用恁兜的彙音寶鑑矣, 相信你嘛一定有去看我的第一篇彙音寶鑑的文章.