吸杯仔

 2010

06152346吸杯仔

201心路篇

用手吸杯仔的原理足簡單，我是耍甲足歡喜的。囡仔是興tshih-tshih。

今仔日，看著細个杯仔，就想欲耍吸杯仔予囡仔看。

無定著是因為頂禮拜的讀冊會，連紲讀〈捏水〉佮〈水管噴水〉兩篇，祥哥建議我共囡仔時會曉耍的代誌共寫寫落來。這个種(tsing2)種(tsing3)佇我的心肝底，沓沓仔咧發(puh)穎，才會予我今仔日看著杯仔就囡仔性閣夯起來矣。

目睭看會著的杯仔攏是囡仔愛用的杯仔，袂使提來耍，所以，我就去資源回收的桶仔揣適合的空罐仔來用。

一開始無看適合用的罐仔，罐仔喙超過我的手捗(poo5)的攏袂使用。最後，揣著一个會使貯250cc的水的塑膠罐仔。這款塑膠罐仔我毋捌試過，無確定是毋是耍會起來。

罐仔貯水八分滇就會使表演。當然，水滿起來是上蓋讚的。予罐仔底的空氣愈少成功率就愈大。因為用手吸杯仔是利用氣壓來鬥相共的。

代先，用手蹄仔崁杯仔崁一半，用大拘拇的手底肉共水抑是空氣儘量擠(tsik)出來，沓沓仔手徙振動，共崁的所在愈崁愈少，到規个手捗攏共杯仔崁甲密密密為止。

閣來，就是撇步的所在手捗愛出力弓予伊平平平，按呢杯仔就會吸著咧

若是兩个人耍，一人一个杯仔，會使比賽看啥物人的杯仔會使吸較久。因為咱的手雖然有崁予峇(ba7)，毋過，空氣嘛是會一點一滴揣空揣縫鑽入去杯仔底，杯仔內底的氣壓無夠低的時自然就會落落來矣。

第一遍用塑膠罐仔，才發現伊比玻璃杯仔加較好用，吸的時間嘛維持較久。無共伊節時間看覓咧，凡勢有法度維持五分鐘嘛無一定。普通時仔玻璃杯仔差不多是一分鐘左右。

表演開始。哈哈，和捏水的情形仝款，有的囡仔干焦看就講伊嘛會，有的想欲來試，才發現無影會曉，試幾若遍就是吸袂起來。我的是吸咧閣會使予in剝看覓咧，我想囡仔至少愛出超過400公克的力才剝會落來，所以攏會講哪會使吸遐絚(an5)。有一寡囡仔看我吸起來了後，攏講我是咧變魔術

耍甲歡喜袂收山咧，就愈耍愈有紲，最後，我就共杯仔吸咧佇亭仔跤行，按呢行，差不多有百出頭个囡仔有看著。我想，明仔載是五日節，有看著的囡仔可能會轉去厝耍看覓咧

(轉去心路篇目錄) (轉去主目錄)

回應

2010-06-23 22:02:26“宏”動武林 email給“宏”動武林 前往“宏”動武林的日誌

汝是囝仔頭王 拐囝仔尚賢 哈哈
講著五日節 較早囝仔抑細漢 攏是耍徛卵
看啥徛上久上濟 
後擺若想卜想齣頭騙囝仔 汝這步會使揀起來用

於2010-06-23 22:32:02回覆

To “宏”動武林

若像你講的, 按呢五月節就會使閣加一項好耍的藝量出來矣:)

2010-06-19 18:35:19出外人 email給出外人 前往出外人的日誌

有點難,不過學很多字,以後寫台語時,先來這兒深造.

祝順心!

於2010-06-19 21:47:10回覆

To 出外人

多謝前輩願意來遮行踏我是拄好先看著前輩的留話是用台語所以才有緣去前輩遐一睏頭就共所有的作品看完以前輩的根柢來寫台語文一定會足緊而且會寫了足紲拍的歡迎前輩有閒就捷來遮行踏一下:)

2010-06-18 12:52:08周 email給周 前往周的日誌

若有影片畫面應該會更有趣喔!!

於2010-06-18 20:16:11回覆

To 周

是啊, 有影片當然是上好的, 可惜, 我連相機都無矣, 閣較免講會使翕影片:)

2010-06-17 21:34:30minda email給minda 前往minda的日誌

阮捌看人耍過   講是魔術   聽汝講成趣味   阮要來試耍看覓的

多謝分享

於2010-06-17 23:25:53回覆

To minda

只要手捗崁會牢的攏耍會起來:)我想你這馬應該會曉耍矣:)

2010-06-16 00:18:56羚蘭 email給羚蘭 前往羚蘭的日誌

囡阿時陣 有在耍 毋擱..是將杯阿放勒嘴吸吮

有時吸過頭   嘴巴周圍著會一个圓圈圈

於2010-06-16 00:31:43回覆

To 羚蘭

多謝你就隨共拄送起來的兩篇文章做第一个回應. 用喙較簡單. 用手較困難:)