2010
06120835啥閣敢管
原新聞標題: 罵一句「遲到大王」 老師判刑
這是今仔日的網頁新聞。
較早阮咧讀冊的時，去予老師摃、老師罰、老師罵攏是足正常的代誌。囡仔佇學校無乖，轉去厝閣會去予家長修理，tiap甲粗飽粗飽咧。
我是散赤人，無任何的背景，對囡仔的管教足頇顢的。尤其是較皮，特別無乖的囡仔特別無辦法。
這馬的囡仔予所有老師的印象攏是一冬比一冬閣較歹管教。
咱講：「相罵無揀喙。」有的囡仔實在是皮甲予人擋袂牢，咱的忍耐總是有限度的。尤其是我實在擋袂牢上課囡仔講話，除了影響邊仔的人上課，其實嘛變成tshua7頭亂，因為會愈來愈濟人開始綴咧講話。甚至有的人是sian講就講袂聽，實在足想欲共伊趕出去教室外口(較早予人趕出去教室外口罰徛是足正常的代誌)，毋過，想著袂當影響著伊的受教權(伊就會使影響全班所有的人的受教權，敢著？)，上嚴重就是叫伊去後壁罰徛(這馬的囡仔根本袂乖乖仔罰徛，照常佇遐行來行去，佇遐耍)。
叫伊去罰徛閣愛想著袂使罰徛傷久，驚會萬不一又閣惹著相連綴的麻煩。唉！我上課連紲徛四節課，等於嘛罰徛四點鐘。囡仔罰徛到下課就會有代誌，老師上課連紲徛四點鐘，攏無囡仔會來共咱想講咱的辛苦，真正是「坐的毋知影徛的人跤痠(sng1)。」
網頁新聞面頂是講伊遲到9遍。看時間，其實是開學無偌久。我想，普通時仔上課，一定嘛是定定咧遲到，伊的遲到頻率一定是予人擋袂牢，若無，干焦9遍，無可能會予人想著共伊封做「遲到大王」，甚至閣會使列入「金世紀錄」。這是彼个囡仔慣勢的行為引起老師擋袂牢才會出喙按呢講。
這條新聞，內底是罰4萬元，彼毋是新台幣，法律上的元愛疊三倍，所以是新台幣12萬箍。
我是支援教師，這个數字，等於阮半冬的所得。支援教師表面上是鐘點費比在職的老師較懸，實際上是有課才有錢，無課就無錢，寒暑假是完全無收入，年終奬金嘛無阮的份。一學期20禮拜，有上課的時間一禮拜五工，其實是100工，按照規定，一禮拜20節課是盡磅，等於實的是50工。一年365工實領的其實是100工爾爾。賰的家己備課改作業的工課攏是額外本份內愛做愛開的時間，實際上開起來的時間佮在職的時間差無偌濟。
逐工，我咧上課，若一禮拜過攏會『慶幸』平安渡過，佳哉無去拄著麻煩。聽著人去拄著麻煩，心裡攏會驚，時時刻刻祈禱平安無代誌。足驚去拄著報紙、新聞、網頁、聽著的麻煩。
做支援教師教國小的，今年我是第一冬，雖然比做英文教師加較好教濟咧，毋過，逐工攏是過著驚去拄著麻煩的煩惱。
今仔日看著這條，「遲到大王」這个詞根本就足普通的一个詞，連這款詞就會惹著麻煩。按呢，囡仔知影這條新聞，會「看樣學樣」，相信會愈來愈濟囡仔『有勢無恐』，上課了後猶佇外口賴賴趖，趖甲伊歡喜為止。 (2010.06.12)
多謝你, 我有去看這篇文矣. 生本就是會看袂過才會去管囡仔的. 有的囡仔真正是惡性難改, 造謠生事, 惡意中傷, 出喙有夠惡毒, 無想欲佮in有交插, 保持安全距離, 共in的話當做無存在, 像有一寡人私底下惡意叫我猴, 我完全當做無聽著, 當然, in講的話實在袂聽得, 這款惡意的中傷佮無禮貌, 雖然是少數人的行為, 毋過, 因為in的行為, 予我認為in彼班是上無禮貌的班. 就像阮讀冊會的時會講起逐間學校的情形, 往往會講佗一間學校的囡仔上蓋歹. 其實, 歹囡仔可能干焦一兩个爾爾, 一个班有兩个歹管教的囡仔, 規班予人的印象就會足bai2的.
我閣想著, 迄个惡毒的查某囡仔, 佇我行過伊的邊仔的時, 刁工共跤伸出來擋路, 若是幾冬前, 我會刁工大下用跤共伊踏予伊落去, 因為, 伊會使講伊毋知影我欲行過, 仝款, 我嘛會使講我無看著, 是伊雄雄伸跤出來的, 我塔會知!!!!!
我閣去想著一項代誌, 彼是幾若冬前的代誌, 嘛是囡仔作孽, 我行過第一个和第二个位了後, 囡仔的隨用索仔共回頭的路圍起來, 普通時仔, 我會踅對別排去, 迄遍, 我就刁工當做完全無看索仔, 硬按原路轉來, 共所有的桌仔和椅仔拖咧行. 佇學校囡仔作孽的代誌是足濟的哦, 若欲講講袂了, 真正欲共遮的作孽的代誌寫出來, 我看逐工攏有通仔寫幾若條出來!!!
哈~ 幼稚園阮有教過
小朋友足古錐的 真乖喔~
加較好教 合小朋友作伙 予人感覺足快樂的