答喙鼓--千里眼、順風耳

 2014

12232223答喙鼓--千里眼、順風耳

1295初啼篇

答喙鼓--千里眼、順風耳

千：我是千里眼，眼界無限。

順：我是順風耳，耳聽迵天。

千&順：千里眼、順風耳，上台行禮。

順：你講你是千里眼？

千：規欉好好--無錯。閣會使看到佗位，就摸到佗位。

順：(趕緊掩重要部位)你莫共我看！

千：你是咧驚啥？

順：我驚你共我烏白摸。

千：你是想去佗位？

順：啊你就講：「看到佗位，摸到佗位。」

千：Hennh啊。我的千里眼，加上這肢。

順：啊就手啊。哪有啥？我嘛有啊。

千：我這叫做「萬里穿雲手」。

順：萬里穿雲手？看到佗位，摸到佗位？

千：你有影是蹛佇行仔內的。

順：啊你是臭耳聾𠢕翻話！我是毋相信，毋是咧共你褒。

千：你看我。我的手機仔是智慧型的（做滑手機的動作）；電腦是平枋的（做縮放相片的動作及翻頁動作）。

順：按呢哪會叫做千里眼？

千：你想看覓咧，我看著的網站佮網頁，攏是離咱有千萬里以外。當然嘛是千里眼。

順：萬里穿雲手咧？

千：你無看見我用手機仔佮平枋的電腦一直咧收、放、畫、掀。

順：會害哦，你著愛細膩喔。

千：著愛細膩啥？

順：變做啞口的佮青盲仔。

千：哪會？

順：你實在有夠無頭神。

千：按怎講？

順：新聞有報過，一个高中生，一日手機仔畫到暗，結果語言退化，賰會曉頕頭佮搖頭。按呢毋是變啞口。

千：白布沐著打馬膠—歹勢。雄雄袂記得。啊青盲仔咧？

順：既然你有千里眼，一定嘛會有火眼金睛。

千：你哪會知？我日時看無夠摸無夠，暗時就會用我的火眼金睛，覕佇被底紲落去摸。

順：我就知。就是按呢才會變做青盲仔。

千：敢會？

順：啊就人徛佇路燈跤—有影啊。

千：啊！！

順：你是咧棺柴底放炮仔—驚死人喔。

千：有影就著，我想著矣。新聞有影有報過，彼是一个佮咱平大的囡仔。差一塊仔就青盲矣。

順：嘿嘿！

千：抑無，你是咧歡喜啥？

順：像我順風耳就免驚會變啞口佮變青盲。

千：我看你是半暝仔看日頭—猶早咧。

順：是按怎講？

千：歡喜甲傷早。你的絕招是啥物？

順：斟酌聽，莫驚著。

千：好膽做你來。

順：就是順風耳，會使聽著千萬里的聲音。

千：我看你是便所內彈吉他—臭彈。

順：啊就有影的啊。

千：講一下來鼻芳一下。

順：我就佮你仝款。上網網站四界踅，揣歌聽歌聽甲迷迷迷。好聽的歌聽透透；耳機不時嘛鬥牢牢。

千：你會害。

順：會偌害？

千：無死嘛半條命！

順：你騙鬼袂食水。

千：毋是啦！我是欲講無臭耳聾嘛耳孔重。

順：敢會？

千：你真正是龜笑鱉無尾。干焦會曉講我會變啞口佮青盲仔。

順：著乎！報紙新聞定咧報，遐的攏是大學生。

千：Hennh啊！長期鬥耳機仔，致使聽覺神經損害。

順：所以講。

千：靈魂之窗愛保護。

順：耳空嘛愛好好仔顧。

千：用手機仔愛撙節；目睭青盲誠毋值。

順：千萬毋通變臭耳；聽覺歹去無地醫啊無地醫。

千：千里眼。

順：順風耳。

千&順：落台行禮。

(轉去主目錄)