2014
06252324103 年度全國語文競賽-閩南語朗讀文章（教大學生組）
103 年度全國語文競賽-閩南語朗讀文章（教大學生組）(原稿pdf檔下載)
01 對挲圓仔講起 趙玉華
02 臺灣歌謠．臺語情 張詩瑄
03 我的故鄉 陳清裕
04 糖廠的浴間仔 平安嬸仔
05 雞籠中元祭 賴錫真
06 行棋 廖瑞昌
07 玉蘭花 王秀容
08 牛車 林桂鄉
09 老母的查某囝 Han-Bān
=============================
冬節，想著的就是挲圓仔。佇學校佮學生囡仔做伙咧挲圓仔，逐家歡歡喜喜，那講那笑，囡仔挲甲足趣味。面滒著麵粉、挲的圓仔歪膏揤斜。
我手裡的圓仔挲甲圓圓圓，挲啊挲，煞戇神去……。細漢的時陣，冬節暝，阿母共挲圓仔的物件攢予便，逐家圍佇桌仔邊挲圓仔。有時陣比看啥人挲較圓，有時陣比看啥人一改挲較濟粒，足好耍的！挲好早早就去睏，想著明仔早仔甜甜的圓仔，逐家攏乖乖仔睏。第二工透早，天色猶閣暗暗，就起來等食圓仔。彼種燒燒、甜甜的感覺，逐冬的冬節，攏會閣出現佇腦海中，是一種寒天透早特別的幸福，我嘛誠珍惜這份挲冬節圓的幸福。
會記得大約二十外冬前，彼陣我佇內山教冊。有一个拜六下晡，對山頂轉來，我佮同事去市內看電影，暗頓食飽轉去到厝，看著阿母䖙佇眠床，毋是寒天伊煞咧蓋大領被。伊講伊足寒，人足艱苦。我佮小弟仔用被共阿母包咧，抱入去車內底。佇車內，阿母的頭倚佇我的大腿頂懸，阿母無啥清醒，我一直叫阿母、阿母……。伊久久仔共我應一聲。彼陣我足驚，小弟車嘛駛足緊，為著欲予阿母毋通昏去，我一直共伊叫，一直挲伊的面。
這是我頭一改挲阿母的面，阿母的面毋捌咧保養，攏用清水戽戽咧爾爾。寒天會抹一種『百雀翎』的面油，彼就是阿母的化妝品，會使抹必去的跤後蹬、焦燥的手盤佮清水洗過的面。阿母的面挲著誠釉，毋過嘛是足濟皺痕。雖然阿母較無做粗重的工課勞力，阿母攏是咧勞心。挲著阿母的面，我心內足急閣足艱苦。看伊的目頭結結，一定是誠艱苦，我閣去看電影……誠不應該。
我目屎流落來，滴佇阿母的面。「莫煩惱，無要緊啦！」伊講甲誠食力。我聽了後愈艱苦，手佇阿母的面一直挲，心內拜託天公伯仔，佮佇天頂的阿爸，一定愛保庇阿母，予阿母緊好起來，毋通予阿母遐爾艱苦。後來佇病院檢查，阿母少年的時就欠營養，年久月深，毛病就足濟矣！愛食較濟有營養的物件。阿母干焦應「我知、我知」。好佳哉，彼陣阮姊妹仔、小弟攏大漢矣，會當有孝阿母，阿母的身體嘛漸漸勇健起來。
這件代誌提醒我，有孝阿母、關懷阿母就愛隨時做。這二十外冬來，我定定想著就挲阿母的面、阿母的手。伊嘛笑笑仔講：「你咧創啥！」我就啦嘻啦嘻講：「挲著誠好啊！」這是隨時就有的幸福。(TOP)
桌仔頂的喇叭響起「異鄉的我，一个人起畏寒……」歌詞配合旋律，歌曲內底的世界不知不覺浮現佇我的面頭前，慢慢仔𤆬我行入時間的旅行，看見臺灣歌謠生湠的故事。
遮的佇吟唱時代上時行的旋律，一个音符、一葩歌詞，攏咧表達生活佇這塊土地頂懸每一个人的情感佮生活。烏狗兄的熱情，烏貓姊的妖嬌，彼當陣上時行的打扮佮流行歌曲，陪伴足濟人度過青春少年時。
這馬的『CD』佮過去的舊曲盤真無仝款，彼種對留聲機流出來的歌聲，雖然我聽無幾擺，毋過彼種聲音聽起來有五○年代特殊的感情佮氣味：就是彼當時上流行、上有名的代表，像〈孤女的願望〉、〈人生〉、〈港都戀歌〉等等，真濟歌到這陣猶予人會數念。這馬閣放出來聽一擺，感覺真熟似，敢若捌聽過的款呢！好聽的歌謠會永遠流傳落去，爸母少年時代的歌，有彼个時代的特色，陪伴行過快樂、行過傷心。總是歌謠的時代意義真大，嘛影響足濟人！
離鄉背井來到臺中讀大學，一條〈落雨聲〉引起我思鄉的情緒。親像命運的交響曲，一个音、一个音彈奏出來，敢若是為我寫的曲，予我感動，閣一擺記錄我佮這个時代的故事。
台仔頂老師認真咧講臺灣歌謠發展的故事，一條一條對喇叭放送出來的歌，無論是描寫女主角予人放捒、寂寞心情的〈青春悲喜曲〉，抑是〈鑼聲若響〉歌詞內面，彼種船未到就咧等待，船走了後閣毋甘的心情，我攏會那聽歌那想歌詞內底的故事，予我感覺有一點仔稀微。臺灣歌謠千千條，無法度逐條攏有共伊斟酌聽。
老師有講，臺灣每一个時代攏有代表彼个時代的故事佮歌曲。予我印象上深的是〈安平追想曲〉。有一擺，佇人𤲍人的夜市仔聽過這條歌，我感覺真熟似。後來上課的時閣再聽，對照老師分予阮的歌詞，解說歌曲的故事佮伊過去時代的特色，就有真無仝款的感覺。這條歌是陳達儒作詞，許石作曲，發表佇1951年，佇臺灣流行歌謠史占真重要的地位，江蕙、洪榮宏佮張清芳等等，真濟出名的歌手攏捌唱過。(TOP)
若有人問起我的故鄉佇佗位？我攏會共伊應講：「我有兩个故鄉。」咦！哪會按呢？論真講起來這嘛無啥物奇怪，我是佇彰化埔鹽的火燒庄出世的，毋過猶未度晬，就佮爸母兄姊規家伙仔，搬去臺北瑞芳的一坑仔趁食。我是佇遐大漢的，就是按呢我毋才講：我有兩个故鄉。
頭一个故鄉：埔鹽的火燒庄。遐干焦是我佇咧紅嬰仔的時蹛較無一冬，實在無啥物印象。毋過，阮猶有一間祖厝佇遐，三不五時仔嘛會轉去行行咧。遐的厝邊隔壁攏佮阮爸母較熟似，到阮這代就較無相捌。遐算起來是傳統的農村，賰一寡仔年歲較大的，猶有咧種田，少年的攏出外拍拚較濟。遐的地勢較曠闊，向東遠遠看，有看著八卦山脈，賰的三向攏是平地。講起來嘛真歹勢，我毋知影埔鹽的地名按怎號來的，抑若火燒庄的地名，照我所了解是彼个所在古早時代有咧燒瓦，才叫做火燒庄，隔壁的庄頭是號做瓦窯。
第二个故鄉：瑞芳的一坑仔。我未度晬就搬去蹛遐，佇遐大漢，一直蹛到娶某了後，所以對遐較清楚。瑞芳的景色真媠，三爿山，一爿海，閣有一條雞籠河流過鎮裡，佮雞籠、貢仔寮、雙溪猶有平溪相隔壁，規年的雨水真濟。瑞芳的地名聽講是古早時代，第一間𥴊仔店的店名，演變做地名的。一坑仔的地名是因為遐有一个炭空號做一坑。這馬，這个𥴊仔店佮一坑炭空口攏總揣無囉。從日本時代到一、二十年前，瑞芳是咱臺灣上有名的礦鎮，有金礦、銅礦佮炭礦。金礦佇九份仔上濟，銅礦是佇金瓜石仔出產，若是炭礦佇瑞芳鎮裡就一四界攏有。毋過，金、銅愈掘愈少，炭空嘛愈掘愈深，生產成本就愈來愈懸，按呢就無法度佮進口塗炭相比並，礦產公司差不多攏收了了囉！
「雞籠河」的景色嘛真媠，伊的溪底是上早有人發現沙金，才開始對伊的源頭去揣著九份仔的金礦區。以早規條溪咧洗塗炭，烏趖趖，這馬炭礦較少，溪仔水一日比一日較清，這種情形佇咧臺灣嘛真稀罕。
環境嘛綴時代一直咧變化，阮細漢的時猶有「瑞濱海水浴場」會當泅水佮耍海沙，青色的海水佮金色的海沙埔實在真媠。毋過從濱海公路開通了後，海邊擲足濟紅毛塗的肉粽角，原來的沙埔煞無去囉！細漢的囡仔伴，嘛是規臺灣溜溜去，留佇瑞芳嘛賰無幾个矣。(TOP)
前幾工仔阿爸佮阿母，利用歇睏日仔和一寡老朋友相招去日本𨑨迌。暗時仔佇飯店歇睏的時陣，難免會想欲去浸溫泉，試一下仔無仝款的滋味。問題是佇日本浸溫泉的方式佮咱臺灣有淡薄仔無仝。遐無論是有分別查埔的佮查某的，甚至是公共浴堂，攏是愛褪光光才會當落去浸。這款情形真正會予一寡仔較保守、較閉思的人，感覺真歹勢，感覺無意無意，大範袂起來。
這種情形予我想起較早五、六十年代，規條街仔差不多有三份一的人，逐工下晡時若到，無論查埔查某、大人囡仔，攏會提一跤面桶，內底囥欲換的衫褲、面巾、茶箍佮洗頭毛粉，一陣一陣行對糖廠設佇牆圍仔外的浴間仔去洗身軀，閣若親像輪班咧做工課咧。彼个年代因為逐家的生活猶真困苦，日常的開銷嘛攏誠儉。臺灣的經濟嘛才拄欲起磅，所以講若會當去糖廠遐免開錢洗身軀，佇厝裡就毋免閣起火燃柴兼了水。會當省當然嘛盡量省，哪有咧考慮著佮逐家做伙洗身軀會歹勢抑袂咧？
這陣的少年輩抑是囡仔兄囡仔姊、甚至是出外的人，一定會感覺誠奇怪？是按怎糖廠的外口會起一間公用的浴池，免費咧予人洗身軀咧？這「講甲恁捌喙鬚就好拍結」矣。較早寒天若到，糖廠就會廍動，開始𤲍甘蔗製糖，廍動機器咧運轉的時，溫度會真懸，著愛一直用水來降低溫度，遐的水就會對排水槽流出來。因為溫度真懸，所以流出來的水毋但是燒的，猶閣有真芳的糖分味。而且色水攏是甘蔗色的，浸佇浴池就若親像咧浸溫泉仝款。
其實，糖廠是日本時代所設的。彼陣公共浴池有分做兩爿，一爿是查埔的，另外一爿是查某的。對大多數的人來講，應該攏袂感覺會袂慣勢、會礙虐。當然啦！彼个年代嘛猶閣是男女授受不親，真保守的年代，欲查埔查某仝一間浴池洗身軀，根本是無可能的代誌。大人囡仔做伙洗身軀，無論有熟似無，心肝內想的是干焦為著欲節省厝裡的開銷，攏會相招做伙來洗身軀，欲哪會去想著歹勢佮礙虐的代誌咧。
顛倒是這馬經濟改善，人佮人中間的感情沓沓仔薄去矣。會當利用洗溫泉的機會，予逐家真心剖腹來相見，互相開講、盤撋來培養情份。啥知影逐家煞毋驚生份人，翻頭來驚喙見目見的熟似人，實在是予人想攏無？(TOP)
歇熱的時，阮規家伙仔相𤆬轉去雞籠。車一下駛出磅空，遠遠就看著點燈結綵的主普壇。港墘仔燈仔火一葩一葩掛規排，規个海洋廣場已經有真濟人佇遐咧搧海風，那鼻海味那看大船放尿，順紲占上好的位置。
「乖孫！恁轉來矣喔！緊來。」小弟一下落車就隨走去共阿媽攬牢牢，阿媽、阿媽叫袂煞，實在有夠古錐的！暗頓規桌頂攏是阿姆的手路菜，足腥臊的。逐家那食那開講，誠歡喜。我對窗仔門就看會著規條街仔，人挨挨陣陣，趕欲來看鬧熱。食暗飽，阿伯𤆬阮起去樓尾頂徛懸看低，毋但看會著迎水燈的陣頭，閣會當欣賞大隻遊輪點聖誕電火彼款佮日時無仝款的模樣。
煙火雄雄對海面衝起去天頂，變出五花十色的花蕊，船螺仔聲嘛同齊霆。這个時陣，主普字姓的水燈車做頭前駛過來，鑼鼓聲齊響。連鞭飛天，連鞭鑽地的龍陣、獅陣，佮金光閃爍的花車、藝閣……，鬧熱滾滾的陣頭，一陣接一陣真紲拍。贊普字姓的花燈車輸人毋輸陣，嘛是金光沖沖滾，押尾後。閣有文化局的「藝文華會」，嘛有外國的藝術團體來鬥鬧熱，沿路行沿路表演，精彩閣心適。觀眾噗仔聲一直催，逐家看甲喙仔裂sai-sai；阿爸講這款迎鬧熱的活動是干焦基隆才有。
「雞籠中元祭」差不多有一百六十年的歷史矣，伊的內涵有誠濟：有文化、藝術、宗教、觀光佮族群和諧的功能，閣有孝道佮博愛的精神。經過長期的交流演變，這个民俗活動這馬名聲迵四海，閣予文建會登錄做無形的文化資產呢！
阿公有共阮講：「先民佇開發的過程中有犧牲過足濟人。咸豐¹元年漳泉拚，死108个人。當時在地的耆老展現出悲天憫人的腹腸佮智慧，利用宗親輪流主普，用「拚陣頭代替摃破頭」來化解仇恨。中元節的傳統對當時的「張頭許尾」，到這馬的「張頭郭尾」，傳承到今攏毋捌斷過。
這擺阮轉來阿媽兜，順紲看雞籠中元祭的民俗活動，予我親身體驗著臺灣歷史文化的趣味。(TOP)
¹咸豐(Hâm-hong)
俗語講：「世事如棋局局新。」逐盤棋的演變攏無相，逐款棋子仔嘛攏有伊的行法佮權力，「頂司管下司，鋤頭管畚箕」，連小卒仔若是行過河，嘛會當食紅軍呢！
學會曉行棋是阮阿爸教的，伊共我講：「軍和士顧營地，象行田，車直挵，馬行日，包飛山，烏卒仔會當食過河，遮的規則…」我猶會記得伊特別共我強調，行棋著愛「一步棋，一步著」、「攑手無回大丈夫」，逐步攏愛想予好勢才出手，才袂「哎！」吐大氣，事後才來後悔。阿爸嘛講，學會曉行棋真𠢕，毋過學會曉看人行棋的人閣較厲害，因為欲做一个「觀棋不語」的「君子」是無簡單的，愛會當控制家己「好為人師」的毛病，若無，會予人嫌講「人咧食包仔你咧喝燒」。行棋有影學問真濟，處處都有啟示咱「為人處世」的道理佮鋩角。
細漢的時，逐遍和阿爸行棋，行到尾仔攏是我贏，這馬我當然知影彼是阿爸疼囝的方式。有一擺，和阿爸講著較早佮伊行棋的情形，阿爸講：「你敢猶會記得有一擺，你講欲讓我雙車，尾仔賰兩支士、兩支卒、一支包佮一隻象，行甲強欲輸去？」我講：「當然嘛會記得，我彼支包實在有夠𠢕的，尾仔共你的棋子仔攏飛了了！」阿爸講：「彼當陣，你彼兩支士仔佮彼隻象因為有乖乖仔顧營地，共軍保護牢咧，尾仔毋才會贏。」我笑笑仔講：「是啊！我就像彼隻軍，你佮阿母就袂輸士佮象仝款，共阮三个囡仔顧甲好勢好勢。」
人生若行棋，咱就像棋子仔仝款，無論是佗一款角色，攏愛隨時去想講欲按怎保護別人，閣愛顧著家己的安全。無論是過去阿爸和我行棋，抑是這馬我和阮阿寬仔行棋，我攏有感受著這隻「軍」，是踮佇阿爸和我的心肝底。伊是一種價值、一種向望，若欲用一个詞來共伊形容，彼就是「疼惜」。為著欲守護這隻「軍」，阮知影家己的角色是啥，嘛知影這个角色的重要性。當當阮阿寬仔大聲喝出：「軍啦！」我的笑容就和阿爸當年疼惜我是仝款的，世事如棋，局局著愛用心。(TOP)
阮隔壁彼間國中，校園內底有幾若欉懸拄天的樹仔，平常時看青翠秋凊，若對植物無研究的人，其實是看袂出是啥物樹仔。六月天若到，免看，用鼻的就知。
六月南風吹，就鼻會出玉蘭花已經開矣。熱天透早六、七點，日頭軟軟仔，拄拄仔好予花的芳味先精神起來，風猶涼涼仔，花芳就和涼風做伴慢慢仔行，一戶一戶探訪、行踏。恬恬仔來到客廳，予我暫時袂記得熱天的日頭足熁，輕輕仔斡入來飯廳；看我早頓是毋是食有飽；閣飛入來房間看我照鏡。我慢慢仔欶一下氣，熱天竟然有春天的花味，對喙邊笑到心肝穎仔！
玉蘭花的芳味會唌人，予人無張持就想欲加欶幾喙仔清甜仔清甜的空氣。拄著歇睏日毋免趕上班的日子，心肝頭會擽擽，想欲探看送花芳來阮兜的是佗一蕊。順花芳行到玉蘭花的樹欉，滿滿是白雪雪的玉蘭花，有的花開，有的含蕊。躡跤尾一蕊鼻過一蕊，心花嘛一蕊仔一蕊綴咧開。滿樹椏的芳花，有福氣鼻著的攏嘛精神百倍。
我誠愛玉蘭花，毋過，若駛車停佇青紅燈有人硞我的車窗咧喝賣，我攏毋敢買。因為捀咧賣的玉蘭花，哪會有野芳味？我捌好心共買過，毋過，吊佇車內，鼻久頭殼煞會眩。哪會按呢？彼毋是軟軟的日頭、涼涼的風送來阮兜的花芳，彼毋是來自大自然內底逐蕊清芳的樹欉。賣花的人嘛是無辜的啦！聽講是對大賣割來的，有過芳水，閣驚囥久會失去花蕊白白的雅氣，防腐劑嘛噴袂少，煞礙著玉蘭花的芳味佮色緻。我因為較過敏，鼻著野芳會頭眩眩擋袂牢，驚按呢駛車會慘，便若人共我鼓舞，我攏毋敢買，干焦會當佇心肝內會失禮。
遐的賣花的人攏是艱苦人，有斷手的，有跛跤的，為著一仙五釐，趁人停紅燈的時軁來軁去。有一擺，我看著一个人長短跤、跛咧跛咧，身軀攲四、五十度，行路都足困難，閣笑笑仔咧賣玉蘭花。我停佇第五台，伊𨂿咧𨂿咧，一台行過一台，我的目屎煞綴伊的跤步輾落來。等伊行到我遮，我足感謝天地予我好跤好手，有通穿閣有通食。好佳哉是六月天玉蘭花當開，袂有野芳味。我緊共車窗搖落來，提十箍來迎接花芳…。(TOP)
阮阿公是牛犁兄。牛是伊的作穡伴，無論透風落雨，無論平地懸山，規年透冬，無一日通歇睏。有時山頂有人種薑叫牛犁，一去就幾若工。按怎操勞，兩个頭家辛勞鬥相伨，親像褲帶結相倚，互相做伴，互相疼惜。
毋過牛仔老矣，袂堪得閣做粗重的工課，阿公煞欲賣彼隻老牛。買牛的鐵牛仔車駛到門口埕，敨開車後斗的鐵鍊仔，柴枋趨趨，欲趕老牛行上車。阿舅共牛索仔搝甲絚絚絚，阿母閘佇鐵牛仔頭前，那吼那喝：阿爸，毋通共牛賣掉啦！阿舅蝹佇塗跤，驚阿公一喝聲，老牛就會起跤乖乖仔行。牛恬恬恬，大大蕊的目睭輾落大大滴的目屎。阿公真無奈嘛真艱苦；粗peh-peh的手搭佇老牛的尻脊骿講：牛啊！牛，歹勢啦！因為無錢姑不將才欲共你賣掉，新的主人伊會予你食好做輕可，你就綴伊去乎？牛親像了解阿公的苦衷，沓沓仔踏上柴枋起去鐵牛仔車頂。
阿公彼時真正是散甲強欲予鬼掠去，拄隨人也著輪火鬮、也著借錢起厝，大漢囝出痲仔，傱無錢通應付驚死人的醫藥費，阿媽大身大命工課照常做，閣愛顧一陣囡仔，有一擺，無張持，煞摔落去牛車跤，予蔗尾硩甲規身軀，致使屘舅一出世就吐肚臍，醫真久才好。阿公賣牛實在是無法度的代誌。
農村機器化了後，阿公共這台老牛車留落來，十幾年前，有人來欲買去遊樂場載人客，嘛有人來想欲買去做古董。這時陣，咧欲結婚的阿母共阿公講：阿爸！這台牛車予我做嫁妝，好無？這馬牛車囥佇阮兜。阮阿爸是修理汽車的烏手，嘛會負責修理兩輪的牛車，因為阮阿母有「嫁妝一牛車」，阿母定定講起以前的生活。伊問我：「阿萱！這台牛車後日仔予你做嫁妝好無？」
我毋知我底時會結婚，毋過我知影這台牛車是阮阿母上讚的嫁妝，伊陪伴過阿祖，阿公和阿母，後擺嘛會繼續陪伴我。伊恬恬仔講古予我聽，一頁一頁攏是阿公的堅持，一句一句摻著阿媽的心肝，一聲一聲踏出阿祖的形影，一字一字描寫阮祖先的跤跡。(TOP)
大兄雄仔是食飯若親像武松拍虎，做工課若親像桃花過渡的彼款人，無一項代誌做會好勢。啊若小妹蓮花仔外表是跤尖手幼，毋過伊毋但氣力大、跤手猛，閣誠𠢕做工課，所以誠濟工課伊攏搶咧做。
雄仔的老爸定定踏三輪車，去杉仔行抔鋸屑烌轉來厝。鋸屑烌載轉來了後，才閣倒入去灶空舂予絚，就會當用來煮飯、炒菜佮燃滾水。有一擺老爸出車禍，蓮花仔就家己一个踏三輪車，去抔兩袋鋸屑烌轉來，伊扛無法，就共三輪車偃坦敧，才閣寬寬仔共彼兩袋鋸屑烌輾入去灶跤。彼个時陣，蓮花仔才讀國校仔五年的爾爾，遐爾仔細漢就遮爾𠢕，閣會頂老爸做大人的工課，逐家攏嘛共呵咾甲會觸舌。
厝後有一坵番薯園，番薯大到在咧收成的時，一陣囡仔就會加薦仔捾咧，綴佇主人的後壁抾番薯。蓮花是骨力兼顧家，看講抾無啥番薯，轉去定著無夠一人食一條，伊就趁主人無注意的時，偷提幾若條大條番薯閣緊走轉來厝裡，對厝後共番薯擲入去厝內，牆圍仔邊遐有一岫雞母佮雞仔囝，哪知影遐爾注死! 拄拄仔好予番薯掔掔死。老母誠受氣講︰「偷拈偷捻一世人缺欠，你就是偷提人的番薯，天公伯仔毋才會共咱兜的雞母雞仔囝收收去！」老母攑棰仔欲摃蓮花仔，伊走足甲若飛咧，予老母仙逐都逐袂著。後來老母越頭轉來，沿路行沿路唸︰「我才看你偌𠢕走，你就攏莫轉來，若轉來才摃予你死。」蓮花走去路裡等老爸，共老爸司奶，才閣綴老爸轉來。老母講︰「恁轉來矣喔！飯菜攏冷去矣，我緊來去熥予燒通予恁食。」
老母毋是袂記著彼項代誌，其實伊是一个喙硬、心肝軟，閣誠惜囝的人。因為囡仔濟，經濟無偌好，所以教示囡仔佇外口莫逐項欲佮人比並，伊嘛教囝做人做事愛較吞忍、較讓人咧。定定教講︰「袂使去佮人冤家相拍；予人偏較贏偏人，予人偏會食會睏得，啊若偏人就袂食袂睏囉！」閣講︰「雖然咱兜散赤，毋過：圓人會扁，扁人會圓。咱著愛活甲有骨氣，有一工嘛會出頭天。」(TOP)
雲林古坑地區頭一个國中布袋戲團佇2011年出世。經過訓練了後，學生囡仔對布袋戲已經有小可仔了解。逐家摸尪仔、提尪仔，閣會當搬一齣家己想出來、拍拚出來的布袋戲，知影搬戲的鋩角。做一齣戲，有影真無簡單。
阮搬的頭一齣戲《環保西遊記》，故事趣味閣有教育意義。去學校外口做戲，逐家感覺誠緊張，煩惱會脫箠、落氣。毋過看戲的人誠濟，有少年的，嘛有阿公阿媽牽孫仔來看的，鬧熱滾滾。這擺的經驗，予逐个學生囡仔變甲加誠有自信。隔轉年，阮去苗栗參加全國學生創意偶戲比賽，提著甲等，受著這个肯定是逐家認真拍拚得來的。第二年逐家猶原抱著學習的心情，用《汪洋中的一隻船》代表雲林縣提著優等。
學習的過程中，學生除了認捌傳統戲劇，嘛會當佇表演的過程中了解家己，共對戲劇的認捌表現出來，行出學校大門，予眼界加較開闊。對欣賞別人的演出佮交流中檢討家己，予家己閣較進步；對欣賞別人的優點，提昇家己的技術；對別人的錯誤中，檢討家己是毋是有仝款的欠點，隨時提醒……遮个，攏是佇課本內底學袂著的寶貴的經驗，嘛會佇的人生當中，學著無仝的體會。尤其是咱庄跤所在的囡仔，定定佇需要表現的時陣會較閉思，較歹勢。毋過，經過這幾擺表演落來，阮對這陣囡仔的眼神，有看著的自信。
對搬戲的人來講，戲尪仔毋但是戲尪仔爾爾，袂輸是做戲人的囝，敢若是伊的第二性命。欲共一仙尪仔演甲會活起來，需要長時間的訓練。學生囡仔對撐尪仔開始，學習逐款角色的動作，表演出無仝款的感覺；對口白當中表現出無仝款的情緒佮想法，閣配合音樂，予觀眾感覺一仙尪仔生真活跳的一面。學生透過實際的參與，了解本土文化的特色，進一步會當認同，會曉欣賞，嘛了解傳統戲劇的藝術佮美感。對戲劇的欣賞佮接觸，嘛會當了解臺語聲情的媠、臺語文雅的所在佮語言豐富的多元性。
佇遮的機會當中，這陣囡仔和布袋戲牽著好的姻緣。阮向望會當佇學生的內心，種一粒會曉欣賞戲劇藝術的種子落去，向望有一工，會當出芽發穎，開花、結子閣生湠，予的生命閣較豐富，人生閣較精彩美麗。(TOP)
(轉去主目錄)
沒有留言:
張貼留言