2014
06252306103 年度全國語文競賽-閩南語朗讀文章（高中組）
103 年度全國語文競賽-閩南語朗讀文章（高中組）(原稿pdf檔下載)
01 故鄉 李宜芳
02 臭豆腐的滋味 黃文俊
03 臺語佮我 田美瑜
04 氣味 喜悅
05 聰仔 東部客
06 故鄉的滋味 蔡連真
07 民風純樸的人情味 韓滿
08 SPA 藍淑貞
09 思念 林炤慧
===========================
有人蹛佇臺灣頭，有人蹛佇臺灣尾，逐家攏是為著理想來臺北拍拚。俗語講：查某人的命親像菜子仔命，「嫁雞綴雞飛，嫁狗綴狗走。」我是結婚以後才來臺北蹛，為著生活，翁仔某抱著「甘願做牛，毋驚無犁通拖」的想法，逐工認真拍拚。雖然來臺北蹛二十外冬矣！毋過若是逐擺聽著「故鄉」這條歌，猶原嘛會予我想著離開二十偌冬的故鄉「高雄」。遐是我蹛二十外冬的所在，有阮爸母佮兄弟姊妹予我滿滿的愛。
細漢的時，阮兜四箍輾轉攏是田園，定定攏會鼻著草仔的芳味，早起時閣會聽著蟋蟀仔咧叫的聲。厝邊頭尾的囡仔嘛定定相招去溪仔邊灌肚伯仔，掠四跤仔。對我來講，高雄毋但是一个地名，伊是充滿記持的所在。
會記得蹛佇高雄的時，阿爸定定會𤆬阮去西仔灣佮中山大學遐行行咧！遐的海佮天頂仝色、欲暗仔看會著日頭落山，紲落去看遐的夜景兼搧海風，去中山大學的邊仔遐食海產，食煞順紲看大學生佇遐談情說愛。雖然海風有淡薄仔冷，毋過會當佮厝裡的人做伙，心內嘛感覺誠溫暖。
若講著愛河，二十外冬前是臭konn-konn，蹛佇附近的人家佮經過遐的車輛，窗仔門攏愛關甲密喌喌。經過幾若冬的整治，才有這馬遮爾媠的真愛碼頭，會當佇遐啉咖啡、開講，閣會使坐船看風景，嘛會使坐去旗津𨑨迌、食海產閣看大船咧放尿。半暝仔若是腹肚枵想欲食宵夜，就去六合夜市仔，遐有食閣有掠，閣有物件通𨑨迌。
高雄土地面積真闊，道路規畫嘛真讚！一心、二聖、三多、四維、五福、六合、七賢、八德、九如、十全這十條路，是高雄的重要道路。公車、捷運交通利便、四通八達。若是想欲臺灣頭尾一日遊，坐高鐵到高雄才換捷運佮公車，會使載恁四界去，省錢輕鬆閣趣味。我的故鄉好耍的所在一大拖，若欲講煞一山坪。有閒較捷來高雄行踏，我這个免費的導遊就會佇遮，包你歡喜閣滿意。(TOP)
佇「烏白切」的路邊擔仔食暗頓，拄好看著電視新聞放送的畫面：有人佇大樓的涼亭仔賣臭豆腐，厝邊嫌臭豆腐的味傷臭煞起冤家，雙方拍甲流血流滴，攏袂癮和解，閣去法院相告。我目睭金金相電視，若親像會當鼻著臭豆腐的味仝款，囡仔時陣的情景，敢若綴臭豆腐的芳味，衝入去鼻空、出現佇我的頭殼底…。
時間踅翻頭，轉去三十外冬前，阮規家伙仔搬去臺北無偌久，阿爸做塗水的工課三做四歇睏，日子實在袂得過矣！只好去共漢藥店的簷岑跤稅落來賣臭豆腐，雖然是小生理，阮阿爸煞當做大事業咧經營：臭豆腐愛先洗過才糋；泡菜愛用高麗菜去豉，袂當用高麗菜乾；豆油膏愛煮過才袂死鹹；盤仔愛用瓷的，所有的材料攏愛上實在的。因為阿爸講：「這是欲食落去腹肚底的，袂當凊彩！」就按呢，一个路邊擔仔煞共阮規家伙仔攏拖落水，無論大細漢攏做甲誠忝頭！
沓沓仔，阿爸「堅持用好料」的名聲，予人客食好鬥相報、生理愈來愈好！有一冬過年，阿爸講：「市內人過年食傷腥臊，咱來賣臭豆腐佮雞絲麵，人客一定真佮意！」想袂到阿爸袂輸夜市仔的算命仙仝款，講甲一必一中！阮逐家雖然攏無閒甲烏天暗地，毋過臭豆腐鼻起來是芳貢貢的氣味！
佇我讀國中彼年，阿爸得失著佇夜市仔收保護費的𨑨迌人，予對方揣著藉口，侵門踏戶來厝裡欲揤欲拍。阮爸母想講囡仔猶閣細漢，所以佇半暝緊共包袱仔款款咧，坐暗班的火車轉去庄跤覕。佇火車頂，阿母共彼暗袂赴食的臭豆腐予阮做點心。彼个時陣，阮喙裡哺的臭豆腐，干焦賰苦閣澀的滋味！
大漢了後，我佇外地食頭路，定定有機會食著臭豆腐，心內攏咧向望：敢會當食著比阮兜較好食的臭豆腐？毋過，二十外冬過去矣，猶毋捌食過會當比並的。我想，臭豆腐對我來講，伊毋但是芳佮臭的問題，伊有我細漢時陣的記持，嘛有阮規家伙仔佇臺北拍拚的酸、甜、苦、澀，彼是別人無法度食著的滋味！(TOP)
阮阿爸是客人，阿母是臺灣人，應該佇厝裡有足濟講母語的機會才著。毋過細漢的時陣，阮兜較定咧講華語，干焦阿母佮隔壁開講，抑是轉去後頭厝，才會佮大舅講臺語。我攏是聽人講較濟，因為無人用臺語佮我開講。
我佮臺語的因緣，是對今年的歇熱開始。歇熱的第一工，我倒轉去學校，欲拚掃教室，煞去拄著主任咧共我擛手，問我敢有提著臺語的認證。因為我工課無在額，較毋知影有這款代誌，我聽了就緊去網路揣看有這款的研習無?就按呢，我才報名一間國小的臺語認證加強輔導班。毋過，老師佇頭前講甲喙角全波，我煞聽甲霧嗄嗄。
佇研習的彼規禮拜，是我食甲遐大漢，頭一擺聽著遐濟人咧講臺語，嘛是我頭一擺知影有遐濟人咧研究臺語，為臺語咧拍拚。
我想講若欲加強我的臺語能力，著愛較捷參加研習。所以紲落來，我閣去另外一間國小參加臺語工作坊。上課的時陣，老師會教臺語的音字是對佗位來的。老師閣叫逐家讀文章，練習看臺羅拼音。閣有誠刺激的，就是愛學臺語朗讀的鋩鋩角角，落尾閣叫逐家一个一个上台朗讀。雖罔我佇厝裡已經讀過四十外擺，毋過，換我上台的時，我若像聽著我心臟咇噗跳的聲。
這就奇怪矣，細漢的時，老師若咧無閒、抑是臨時有代誌，攏會叫我上臺講故事。我就隨共我讀過上新的尪仔冊『王子』內底的故事講予同學聽 ，一點仔都袂緊張。這馬已經有誠濟教冊的經驗，煞會懍場，面色一陣青一陣白，實在是因為我知影家己臺語無半撇，心誠虛。
我教英語十外冬矣， 慣勢用英語翻譯，想袂到讀臺語文章的時，看著『4』想欲講『four』，頭殼轉袂過來，實在是足笑詼。以早咧眠夢的時，若夢著佮阿啄仔講英語，是偌爾仔歡喜，因為表示我的心內已經用英語咧思考矣。 這馬我向望有一工，我會使夢著佮別人用臺語開講。看著『大家』會曉講「逐家」，看著機車，會曉講『oo-tóo-bái』。 嘛愛親像老師仝款，做伙為臺語拍拚：予逐家攏知影，臺語是咱上媠的臺灣文化。(TOP)
熱天下晡的日頭燒huāng-huāng，共伊的魔爪伸向大地的一四界。幾个毋知天地幾斤重的囡仔疕，當然對炎天赤日頭也無咧掣，猶閣佇地球表面硞硞傱。我，就是其中一个。
阮兜四箍輾轉攏是田園，四季的面容就綴節氣一直咧變化。春夏秋冬，土地自然攏有無仝的氣味。春天的時，鐵牛仔紡過翻新的田塗，衝出厚厚的田塗氣，予拄仔剪掉長草的草埔，發出清新迷人的青草仔味。熱天的時，遐的佇春天佈秧仔的稻仔田，規片青蘢蘢的色緻，枝骨相爭大欉伸向天，連早起時的露水嘛預告稻仔芬芳的氣味。阮遮愛耍閣愛𨑨迌的，佇狹狹的田岸仔頂行來行去、佇大圳溝戽水相噴，身軀頂嘛攏有鄉野天然的氣味。
有一擺，幾若个囡仔伴相招咧耍「掩咯雞」。我覕佇一个家己想講絕對袂予人揣著的揜角。因為是覕相揣，耳空邊攏會聽著別人的跤步聲，連鞭遠，連鞭近，心肝頭有一份期待，向望別人揣著我，閣希望毋通遐爾緊就予人揣著。
頭起先，我覕佇附近的土地公廟仔，空氣中有人燒香的氣味，一下仔就鑽入來我的鼻空，目油開始喢喢滴，激甲我緊起跤走。半路有聽著人咧喝佮漸漸倚近的跤步聲，袂赴看，我驚一下跳入去邊仔的田園，規个人跋落去厚厚醬醬的田塗裡。彼款路糊糜仔的爛塗味，予我知影一定是跳入去芋仔田矣！等到人無注意，恬恬仔趖落去水溝仔，共家己略仔洗洗咧，彼个田塗味總算漸漸仔無去矣。
尾仔，我閣偷偷仔徙位，來到一个袂予人發現的所在，遐有一種薄薄仔，予人放鬆柔和的清芳，敢若會沓沓仔共猶閣留咧的田塗味崁過去。彼種氣味予我若親像佇咧夢中。上尾仔當然是我贏囉！
轉去到厝，真樂暢，愛阿母臆我覕佇佗位，「覕佇蝶仔花的花欉內底，著無?」阿母按呢講，予我掣一趒，有夠厲害！一擺就臆著矣。阿母咧攢暗頓，我佇邊仔袂死心，硞硞咧問阿母，阿母笑笑，講:「鼻著你規身軀的蝶仔花芳啦！」(TOP)
有人講，當當一个人開喙合喙攏咧講過去的時陣，就是開始變老矣。有影，這站仔我攏常在想著過去的代誌。特別是兩年前轉去故鄉，去參加聰仔的告別式了後，我的腦海中不時就有伊的形影。伊才50幾歲爾爾，哪會按呢就過身去？敢講是一人一款命，運命天註定？
聰仔是我細漢上好的囡仔伴。伊蹛佇海墘仔的瑪東，我蹛佇旭村的庄仔內。阿爸對恆春搬來臺東的瑪東遮作穡；阮阿爸對苗栗搬來旭村開墾，攏是對前山搬來後山揣機會的出外人。伊閣佮我仝姓，名嘛差一字爾爾，所以自讀小學仝班了後，阮就是上好的朋友。
可能蹛佇海墘仔，閣可能有平埔族的血統，所以伊規个面曝甲烏趖趖，閣生做人懸漢大，力頭誠飽。所以上體育課的時，阮便若踢跤球，伊攏是一踢就hoo-mú-láng。啊若耍閃避球，上驚去予伊掔著。走標比賽閣較免講，絕對無人逐伊會著。所以阮讀小學的時陣，攏是豐里國小的跤球隊。伊做後衛、我做前鋒，是上好的戰友，閣捌提過全縣第一名呢！
因為攏是作田人的子弟，所以飼牛、泅水、釣魚仔就是阮的工課兼𨑨迌。阮定定共家己厝裡的牛牽出來飼，一陣囡仔共牛放佇墓仔埔食草，就相招去泅水佮釣魚仔。記持上深的是有一擺共牛牽去海邊佮阮做伙泅水，啥知影牛看著海湧衝來起跤就走，阮綴佇後壁是愛笑甲…。啥人講「牛，知死毋知走」？性命關頭，走敢若飛咧！
其實，聰仔是一个古意人，伊定定共兜豉的煙仔魚爿佮海鰻，紮來學校請阮食，拄著仔嘛捌紮海龜卵來。讀國中彼站仔上孤單的青春期，伊逐工攏會佮我騎鐵馬、對田路騎轉來庄裡。後來伊去讀高工，出業了後，因為佇臺東揣無頭路，就走來北部共人搬石頭、做駁岸。可能是來到他鄉的稀微佮孤單，伊煞學著佮人啉酒、哺檳榔。四十外歲仔就天天醉，啉甲尾仔變酒悾。才四十幾歲就去致著嚨喉癌，拖磨欲十冬才去做神！到今，我若轉去故鄉，攏會去海墘仔踅踅咧，因為遐有我少年上好的朋友「聰仔」的形影…。(TOP)
逐擺若聽著「走遍了天涯海角，也是故鄉的月較圓，食遍了山珍海味，也是阿娘煮的較有滋味……」這條歌的時陣，阿爸就喙笑目笑，攏會講甲喙角全波。講起佇下港咧食的早頓，佮佇市內緊張的生活所食的物件有真大的無仝。
若講著北港這个所在，真正是頂港有名聲，下港有出名，毋但逐冬咱人的正月到三月，有千千萬萬的媽祖信徒，挨挨陣陣規家大細𤆬來咧參拜。尤其是舊曆的三月十九、二十，這兩工的媽祖出巡，閣較是予政府列入去國家的宗教文化活動資產。彼鬧熱的場面就毋是三、兩句話就講會清楚的代誌囉！這猶是著愛請咱逐家會當撥時間親身來體驗。當然啦！來到北港除了參拜媽祖以外，上歡喜的目的就是欲食出名的北港點心。
講著北港的點心佮其他的所在較無仝款的特色，我就簡單紹介幾項仔來予逐家鼻芳一下。嘛予恁知影，是按怎阮阿爸佮阮規口灶的大大細細，攏會來數念故鄉的滋味。早起時仔食的物件比較較傳統的，是滷肉飯抑是炕肉飯配燖筒仔湯。閣較特別的是煎盤粿，這是出外趁食的北港人思思念念的早頓。煎盤粿就是咱一般所講的菜頭粿，伊較特別的所在就是煎好欲食的時陣，著愛摻米漿、滷湯、芫荽、蒜仔、蒜茸、抑是薟椒仔做配料來食。當然啦！咱若是欲閣較豐沛咧猶有煙腸、滷腸仔、大腸頭佮秫米腸，而且猶有免費的麥仔茶，抑是柴魚湯通好啉，莫怪會予出外的人真數念。
另外一項無食會大心氣的好食物仔就是麵線糊。講著阮北港的麵線糊，是佮別所在的麵線糊無仝的。伊是用白色的麵線落去煠的，欲食的時才閣透滷肉湯佮卵清。若是欲較營養咧，抑是毋驚血油洘的，嘛會當先濫卵仁落去碗底拍拍咧，麵線糊才𣁳落去碗裡閣再加滷湯，食起來的滋味毋但是芳貢貢，規个心肝頭嘛會燒烙仔燒烙，實在是予咧排隊等欲食的人會喙瀾㴙㴙津。
啊若半晡抑是暗時的好食物仔嘛真濟，親像：假魚肚羹、紅燒四跤仔、炒鱔魚、塗豆油飯、塗魠魚羹、芋丸、當歸鴨麵…濟濟會講袂盡的好食物，攏是阮故鄉的好滋味，一想著就會大腸告小腸腹肚枵。朋友啊！啥物時陣咱欲包車來去北港拜媽祖兼食點心咧！等恁喔！(TOP)
有一个飄撇的少年家手裡捧一束花，笑咧笑咧對遠遠遐一直行過來。嗯！我臆伊是隔壁班彼个少年查某老師的男朋友，我原本就無啥冗剩時間，就想欲緊斡入去教室。
「老師！你袂記得我矣是無？祝你母親節快樂。」這敢毋是拄才彼个少年家？伊笑甲足燦爛的，啊！著啦！就是這个笑容啦！就是12冬前阮教畢業的阿興仔啦！
猶未調來這个學校教冊進前，我就捌來遮四界行行看看咧，煞去煞著這个世外桃源閣民風純樸的好所在。班裡的囡仔攏誠古錐，對新老師嘛攏誠好玄。有人問老師蹛佇佗位？嘛有人問老師結婚矣未？閣有一个查埔囡仔問老師敢做人的阿母矣？
母親節進前，阮班的作文課，題目是：我的母親、我的阿媽抑是我的阿姨。頭起先我看阿興仔憂頭結面，頭仔向咧毋知咧想啥？後來我才知影老母得著血癌過身去矣，無偌久老爸就閣再娶阿姨入門。老爸佮阿姨對伊的要求誠嚴，若考試考無好抑是做代誌做無好，伊就隨食棰仔枝炒肉絲。伊就按呢變做一个足狡怪、足愛忤逆序大人佮老師的囡仔。毋過，彼擺伊煞佇作文的上尾寫講：「老師，你若是阮阿母毋知有偌好咧！」我看了就寫講：「對這馬起，你會使共老師當做你的阿母矣！」
逐家知影了後就一直有人會食醋，講老師偏心收阿興仔做契囝，所以逐家嘛相爭欲予老師做契囝，就按呢，我若行到佗逐家就綴到佗，人攏笑我是雞母咧𤆬雞仔囝。
班裡有足濟囡仔的厝裡攏有種花，有人提花矸、有人挽花來，逐工攏有一矸誠媠的花佇老師的講台。有一工，雄雄透一陣大風，共規个花矸掃落塗跤。聽著phiang一聲，我隨向落去欲抾破矸仔杮的時，班長攑掃帚、副班長提畚斗，閘佇我的頭前咧掃、咧抾!看著這幕，我也歡喜、也感動，感動甲目屎強欲輾落來。
時間咻一下12冬就飛過去矣，佇民風純樸的所在，一个細漢查埔囡仔連鞭變做一个飄撇的少年家囉！(TOP)
現代人的生活真緊張，壓力真大，所以真濟人有閒的時，愛開真濟錢去做SPA，來調養家己，予家己輕鬆一下。其實，佇我囡仔時代，早就不時咧做免費的SPA矣，彼就是去『phòng-phuh仔』沖水。
草地囡仔，喙裡唸阿母教的囡仔歌，藍天做蓋，綠地做毯，白雲做伴。風聲、雨聲、蟲聲、樹葉仔聲，攏是足好聽的音樂，毋免開錢，毋免揀時陣，不管好額散，逐家做伙𨑨迌。只要有人提議，隨時都有真好耍的𨑨迌方法，規片的大自然攏是阮𨑨迌的好所在。
彼當時社會風氣真好，囡仔溜溜去，只要食飯時間到，囡仔自然就會轉來食飯，爸母毋免煩惱囡仔會出代誌。佇真濟𨑨迌的方法中，上蓋好耍的，記持上深的，會使講是去『phòng-phuh仔』沖水。
草地一四界攏是水田，遮的田地，需要真濟水，所以佇水田邊，攏有人裝『phòng-phuh仔』抽地下水來淹田。『phòng-phuh仔』抽起來的水真大港，袂使直接灌入去田裡，會共田沖歹，所以作穡人會用磚仔做低牆仔，共抽出來的水閘起來，就親像一个大水池，這个大水池設一个水門，欲淹水的時共門拍開一縫，予水流入去田邊的溝仔，才閣勻勻仔流入田裡。普通時水門就關起來。
若有人咧抽水淹田的時，就有人相招去『phòng-phuh仔』沖水。四、五个囡仔伴，毋驚日曝，也毋免換游泳衫，佇燒hut-hut的熱人，跳入去清清清的水池仔。水深袂超過胸坎，也毋免驚予水沖走。若是徛蹛『phòng-phuh仔』水的出口，抽出來的水，直接沖佇尻脊骿抑是胸坎，真正是清涼閣刺激。有時予水沖甲徛攏袂牢，逐家互相扶持，彼種感覺，比這馬的SPA好濟咧！
臺灣原本有真濟好山好水，媠閣清幽，免開錢閣好耍的所在。現代的人，袂曉寶惜大自然賞賜予咱的資源，樹仔剉了了，溪仔變烏水溝，厝蹛山坡地，啉消毒水，配農藥菜，共家己逼甲無地通徛起，罪過喔！(TOP)
行佇十二月天，風飛沙颺颺飛的街路上，除了寒、閣有一種孤單的感覺。
經過文具店門口，看著展示架頂懸排甲滿滿是，紅帕帕的賀年片，好親像猶佇咧等待最後一个憐惜的眼神！雄雄有淡薄仔衝動，想欲買一張仔寄予久年無相揣的你。揀啊揀，揀啊揀，到尾仔猶是閣共囥轉去，因為我無你的住址，想講不如敲一通電話直接用講的就好矣。毋過，終其尾我猶是共家己跳票無去兌現。原來孤單毋是無原因的，[啥人](siáng)叫你逐擺攏是暗時全步數，天光無半步咧！
有人講「思念」是神聖的悲劇，因為無地相見，甚至是永遠袂得相見才著思念。只是這款酸甘甜仔酸甘甜的滋味，煞著愛經歷失去一个捌真心疼痛的愛人、親人、抑是朋友的時陣才體會會著，這个代價實在傷過傷重矣！毋過遮濟年來我猶是偷偷仔思念你，忍受見袂著你的苦楚，嘛沉醉佇美麗往事的記持內底。只會當講時間無情，偏偏我又閣傷過多情。二、三十冬矣！到今我猶原向望有一工會當將咱的友誼揣轉來。嘛明其知影這比天落紅雨馬發角閣較困難，我就是心甘情願守佇這个悲劇的舞台，繼續忠實搬演彼个神聖而且孤單的角色。這一切攏是因為你講的彼句話：「欲永遠做伙！」
每一遍若轉去後頭厝，故鄉的街路熟似的景緻，咱少女時代做伙行過的跤跡宛然猶留咧；歡喜的歌聲佮笑聲，嘛一幕一幕親像電影閣佇心內重搬。我自來毋捌放袂記得，相信你嘛仝款，敢毋是咧？毋過佇這个遮爾熟似，而且是現此時你蹛的城市，是按怎我煞揣袂著你？連你的電話號碼嘛是別人予我的！我欲敲毋是，毋敲嘛干焦暗暗佇咧傷悲。
真想欲問你這馬好無？嘛親像當年佇我出嫁的時，你予我深深的祝福仝款，想欲還你這份情。哪會知影這个應該是天公地道、小小的心願，煞因為一場莫名其妙的誤會，變甲遐爾遙遠。若準人生是一齣戲，我足想欲要求導演予我一个佮你重逢的機會，通好將我多年來、深深的思念，當面講予你知！只是毋知導演敢會共我講：「人生的劇本是五百年前就註定矣，僫改囉！」(TOP)
這陣臺灣滿四界攏有咧賣池上便當，毋過食來食去，猶是袂比得池上車頭月台的便當遐爾仔好食。以早佇花蓮食頭路的時，有真濟機會坐火車經過池上，攏會盡量時間節好勢，去到池上買便當食。彼款古早味便當的滋味，到這陣猶記踮頭殼底。
講著池上便當就愛先講著池上米，伊的粟種是佇日本時代對日本山形縣引進入來的蓬萊米。因為池上地區的環境真適合種稻仔，當時的池上米捌由臺灣總督府送去東京進貢日本天皇，可見伊的品質有夠讚的。到這陣池上地區的稻仔田猶是較無受著工業污染，池上米猶是品質保證的品牌。
記持內底的池上便當攏是仝一款，便當盒仔是用柴片仔做的，飯當然是用池上米煮的白米飯，菜色有兩塊精肉、半爿煙腸、半爿滷卵、兩片醃瓜仔、蝦仔糋、筍絲、豆乾、青菜等等。
池上便當到今已經有數十年的歷史，聽講這陣較出名的有三間，口味精差無偌濟。無論按怎，若有機會去臺東，毋通袂記得去試看正港的古早味——池上便當喔！嘛會當來參觀一間真出名的池上飯包博物館，伊詳細記載池上便當久長的歷史。
池上的位置是佇花蓮縣富里鄉的南爿，是臺東縣上蓋北爿的鄉鎮。伊地名的由來是因為伊拄拄佇大坡池的北爿，才會有「池上」的名。大坡嘛有人講做大埤，以早有50外公頃，是濟濟魚蝦的出產地。這陣大概干焦賰28公頃的跤兜，已經漸漸轉變做是花東縱谷出名的天然濕地，水面不時有水鳥經過，這是池上鄉上媠的自然景觀。
池上除了有誠大片的水田，生產出名的池上米以外，目前閣有大約九百外公頃的農地。休耕的時陣攏種規大片的油菜，每年冬天的「油菜花季」就會吸引千千萬萬的人客來遮觀光。可能真濟人會想講油菜哪會是菜咧! 其實油菜原本就是一種青菜，食著嘛袂歹食。毋過因為油菜有較臭賤，足好種的，閣足𠢕開花，佇咱臺灣就用來當做稻仔田的綠肥。所以便若有稻仔田的所在，通常就會有規大片的油菜花。全臺灣就算「池上鄉」上蓋出名。雖罔油菜花並無偌大蕊，毋過千千萬萬、規大片的油菜花，看著嘛是誠媠喔！(TOP)
(轉去主目錄)
沒有留言:
張貼留言