2011
02281657台語短劇影片欣賞----巧新婦
台語劇欣賞：巧新婦(超連結失效已提掉)
這是 "嘉義市警察局第一分局９６年度守望相助示範觀摩協調會" 的台語劇表演, 影片有台語拍字. 內底的演員攏總是阮熟似的朋友.
演出的時間:2007.09.09
地點:福全里守望相助隊隊部
演出:本土民俗演藝研究社風鼓劇團
音效:蔡翠娟 化妝:陳美蘭
攝影:黃士玲 錄影:羅篤安
指導:黃玉雨 道具:陳武權
場務:張素秦, 林厚星
報幕:曾淑惠 (影片時間: 1:40~2:33)
人講: 「坐飛行機看天頂，坐大船看海湧。」今仔日，恁逐家坐佇遮，就注意看台頂。阮雖然頂港無名聲，下港無出名；今仔日用幾分鐘欲來介紹咱台灣的民間故事。人講：「做著歹田仰(ng3)後冬，𤆬著歹某規世人。新婦若知情，大官就清閒。今仔日，阮欲講的故事就是：「巧新婦。」
第一幕 兩个新婦袂變巧，員外受氣氣袂了。(影片時間:2:39~7:05)
演員：
員外：王春生
大新婦：施素琴
二新婦：劉素珍
某物人：羅篤志
員外:「囝啊！囝啊！阿爸的話，你著聽。恁逐家共看覓咧，日頭曝著尻川矣。這兩个新婦猶無欲起來煮早頓。害我枵甲大腸告小腸，真正是一頓久久，兩頓相拄。阿珠啊，阿花啊。恁緊出來啦。」
大新婦：「阿爹，阮來矣啦！逐家好！我是大新婦，我叫做阿珠也啦。人攏嘛呵咾講我生做媠閣妖嬌。阿花也！阿花也！緊出來啦！」
二新婦：「一步行、二步行、三步到大廳。看著阿爹徛佇遐，趕緊叫一聲，阿爹！欲創啥？」
員外：「恁去買魩仔魚轉來煮糜通食。」
大新婦：「哦！阿爹，欲買魩仔魚哦。我隨來去買！我隨來去買！」
二新婦：「啊欲買幾尾？」
大新婦：「買一尾就好矣。頭、尾共剁掉，啊腸仔肚閣共撏撏咧，啊閣共斲做六塊。」
二新婦：「我知、我知，咱兜拄好六个人。一人食一塊，閣拄仔好，閣公平。」
員外：「呼呼！真正是外甥仔娶某。」
二新婦：「阿爹！彼是啥物意思咧？」
員外：「啊就了聯(然)啦。連魩仔魚生做圓抑扁，啊恁就攏毋知影。」
大新婦：「阿爹，歹勢啦！啊無，我來去買六尾。一人食一尾，
員外：「呼呼！牛牽到北京嘛是牛。魩仔魚，免買矣啦！」
二新婦：「阿爹！啊無，欲買啥物？」
員外：「規氣恁兩个轉去外家歇熱。」
大新婦：「啊！阿爹！真的哦！啊當時轉來hannh？」
員外：「阿珠也！你五月節倒轉來。欲倒轉來的時陣，愛提紙包風。」
二新婦：「啊我咧！我咧！」
員外：「阿花也！你……七月半倒轉來。抑欲倒轉來，愛提紙包火。」
大新婦：「阿爹！啊你是咧講啥？啊我哪聽甲霧嗄嗄！」
員外：「猶閣有咧！啊恁兩个愛仝一工倒轉來。」
大新婦：「爹--！人講刣魚刣到鰓，講話就講透枝。阿爹！請你共阮明示啦！阿爹！阿爹！」
二新婦：「免叫矣啦！老人食紅蟳----管(講)無效。咱那行那想啦！」
大新婦：「阿爹！阮來去hannh，阮來去hannh。」
員外：「娶著這兩个仔新婦，真正是予我氣身擼命。我猶有一个後生，猶袂娶。恁若有較精光的姑娘仔，才介紹予阮第三的做新婦。啊若彼个媒人錢，絕對袂失恁的禮，若有才請敲電話:0800-0909-449。」
某物人：「聽無啦！」
員外：「啊就恁爸閒閒，啉酒啉甲欶欶叫啦。按呢有較好記無？」
眾聲：「有哦！」
員外：「萬事拜託！萬事拜託咧！」
第二幕 阿珠阿花想無步，阿美出面傳撇步。(影片時間:7:18~9:33)
演員：
大新婦阿珠：施素琴
二新婦阿花：劉素珍
阿美：韓滿
阿珠：「阿花也！啥物是紙包風hannh？」
阿花：「我嘛毋知呢！啥物叫做紙包火？」
阿珠：「啊五月節佮七月半明明就無仝一工，啊咱兩个是欲按怎同齊轉來hannh？」
阿花：「這……我嘛毋知呢！你就比我較巧！啊你毋知！我欲哪會曉啦？」
阿珠：「啊哈哈！歹勢啦！阿花也，啊咱兩个就半斤八兩，啊就相知相知，啊你嘛莫共我三跤貓，啊笑我一目狗！」
阿花：「這……這……」
阿珠：「我看這改穩慘的。」
阿花：「我看這改穩慘的。」
阿珠：(對觀眾講)「你知否？小朋友！你知否？轉去問恁阿媽！啊恁阿媽有佇咧無？啊我毋知欲按怎！」
阿美：「這兩位大嫂，請了。拄才，恁講的話，我攏有聽著，請恁放心免煩惱，小妹佇遮較佔權，出主意予恁來做參考。」
阿珠：「哦？有影！來，我問你！啥物號做紙包風？」
阿美：「紙包風就彼號彼號(比手勢)。」
阿珠：(雄雄知影矣)
阿花：「啥物叫做紙包火？」
阿美：「紙包火哦！(比手勢)彼啦。」
阿花：「哦--！我哪攏無去想著？啊你哪遮巧、遮𠢕(gau5)？」
阿珠：「猶閣有乎！猶閣有乎！啊五月節、啊佮七月半，啊就無仝工，啊阮兩个是欲按怎同齊轉來hannh？」
阿美：「哦！兩位大嫂，請恁放心！免著急，這寬寬仔是。免煩惱啦！eh！咱沓沓仔行，行來彼爿的樹仔跤，我才來勻勻仔來講予恁聽。」
阿珠：「誠好！誠好！拜託！拜託！」
阿美：「咱來彼爿樹仔跤講較涼乎！」
第三幕 包風包火紙攏有，員外歡喜添新婦。(影片時間:9:40~12:31)
演員：
員外：王春生
大新婦阿珠：施素琴
二新婦阿花：劉素珍
員外：「這兩个戇新婦無佇咧，厝裡加偌清靜咧。啊若無，干焦看就倒彈哦！」
阿珠：「阿爹！我轉來囉！」
員外：「啊恁兩个閣有法度同齊倒轉來！」
阿珠：「啊你叫阮紮的物件，人攏嘛有紮轉來呢！」
阿花：「你看！你看！人阮嘛有呢！」
員外：「啊恁兩个閣知通有法度倒轉來呢！」
阿珠：「啊爹！你叫我五月節倒轉來，五月節就有縛肉棕，啊我就縛肉粽轉來，就表示五月節啦。」
阿花：「啊你叫我七月半轉來，七月半攏炊粿，我提一塊醎粿轉來，啊就是代表七月半矣。你看，按呢就著矣。」
員外：「烏枋畫烏貓----看袂出來。恁兩个當時仔變甲遮爾仔巧咧？」
阿珠：「哈哈，歹勢啦！頭一改予阿爹呵咾！」
員外：「慢且歡喜，啊紙包風閣紙包火咧？」
阿珠：「噹--噹--噹噹噹，哦，有涼無？」
員外：「有！有！有涼！有涼！」
阿珠：「葵扇是用紙糊的，擛落就有風，所以，這叫做紙包風。」
阿花：「鼓仔燈嘛是用紙糊的，蠟條點佇內底，按呢就是紙包火。這个叫做紙包火啦。」
員外：「機關藏佇倉庫，是毋是有高人指點咧？」
阿珠：「哈哈！無影無跡，閣予你講甲對同仔對同！」
阿花：「啊就有一个姑娘仔共阮教的啦！」
員外：「是佗一个姑娘仔？是啥物人的新婦咧？」
阿珠：「伊哦！伊就咱隔壁阿花仔in新婦彼个媠姑娘仔，這阿……就是矣啦！」
員外：「哦！遐爾仔巧！我著趕緊叫媒人去共做親情，娶轉來做第三新婦。」
阿珠：「哦！誠好！誠好！行！來去揣媒人婆也，來去！」
第四幕 員外閒閒掛無事，縣爺受氣煞有事。 (影片時間:12:40~17:37)
演員：
員外：王春生
兵：張至宏
卒：羅篤志
縣老爺：翁國雄
阿美：韓滿
員外：「自從第三新婦娶入門了後，我就加偌輕鬆囉！這馬會使掛無事牌囉！(掛牌)會使來哈茶啉咖啡囉！」
兵：「縣老爺出巡囉！閃！閃！閃！閃----！閃！閃！閃！閃----！無代誌的較閃咧！喂！啊你是無khuainn3(看見)哦！縣老爺佇後壁來矣！恁袂曉較閃咧哦！閃！閃！閃！閃----！喂！閃！閃！閃！閃----！喂！無代誌的攏閃去邊仔呼！」
縣老爺：「哼！無事牌？有人規工做甲強強欲死！有人閒閒無代誌！閣掛一个無事牌！這款呼！ah無揣工課來予做，哪會使得(tsit)咧！來人啊！叫彼个門口掛無事牌的人，叫伊入來見我！」
兵：「是遵命！」
卒：「見著大人跪咧！」
員外：「草民拜見大人！」
縣老爺：「啍！你，真好大膽！食飽閒閒無代誌！閣掛个無事牌咧聳鬚！我限你三日內，提兩項物件予我！」
員外：「佗……佗兩項？」
縣老爺：「第一項，叫牛犅生牛仔囝！第二項，做一領遮天的布帆。我欲看你是有事抑無事啦！」
卒：「啥物號做牛犅咧？」
兵：「這毋較簡單，啊牛犅就是公的牛就叫做牛犅。」
卒：「呼---，公的牛號做牛犅哦？按呢我知啦！(對觀眾)按呢恁知無？送--。」
員外：「這----」
縣老爺：「退堂！」
兵卒：「威武！」
員外：「啊今！這馬是欲按怎？這馬是欲按怎咧！恁會當共我鬥解決無？」
阿花：「阿爹！lai9(來去)食飯哦！」
阿珠：「阿爹！清清白米飯，鹹鹹鴨母卵，燒燒菜頭湯。」
阿花：「無事，新婦來擔當！」
員外：「好啦！好啦！恁人的先去食(成乞食)啦！」
阿花：「講咱兩个成乞食啦！唉--！」
阿美：「阿爹！咱來去食飯！清清白米飯，鹹鹹鴨母卵，燒燒菜頭湯。若有事，新婦來替你擔當！」
員外：「唉！欲哪食會落去啦！」
阿美：「阿爹！是啥代誌？毋就講出來咱逐家通好討論。」
員外：「啊就無代誌掠一尾蟲佇尻川咧擽(ngiau)。詳情聽說，用比的。」
阿美：「哦！阿爹！這小可仔代誌爾爾啦！免煩惱！這予新婦來發落就好！阿爹！咱來去食飯啦！」
員外：「好！來食飯。」
阿美：「咱來食飯。」
第五幕 縣爺出題共考試，新婦化解無代誌。 (影片時間:17:44~17:37)
演員：
員外：王春生
兵：張至宏
卒：羅篤志
縣老爺：翁國雄
阿美：韓滿
報幕：曾淑惠
兵：「(唱)開封有個垃圾先，身軀無洗全全鉎。」
兵卒：「(唱)走去溪仔邊洗三遍，毒死烏仔魚數萬千。」
縣老爺：「扯！亂來！無禮貌！」
兵卒：「火灰(威武)！」
縣老爺：「三日期限已經到囉！彼个門口掛無事牌的猶閣無來探頭，哈哈哈！我欲看伊有偌爾仔𠢕(gau6)？」
卒：「報！」
兵：「報！」
卒：「有人求見。」
縣老爺：「傳！」
卒：「傳！」
阿美：「民女參見縣老爺！」
縣老爺：「來食胡蠅(來者何人)？」
阿美：「我叫阿美矣。因為阮阿爹佇厝裡掛一塊無事牌，煞惹縣老爺你受氣。今仔日，我替阮阿爹來遮共縣老爺你會不是。」
縣老爺：「啊恁阿爹是怎樣無來咧？」
阿美：「哦！阮阿爹就佇厝裡咧做月內啦！」
縣老爺：「塗虱(胡說)！查甫人袂生囝通人知，做啥物月內咧？」
阿美：「縣老爺！查甫人袂生，這—你嘛知，啊是按怎叫阮阿爹轉去牛犅會生牛仔囝咧？」
縣老爺：「這……(對兵講)巧！有巧！有夠巧！(對阿美講)好！好！好好好！這項準予你通過。第二項，遮天的布帆咧？」
阿美：「縣老爺！阮兜倉庫的布疋是足濟足濟足濟，請縣老爺你共天頂的寸尺量予好勢，我通好轉去發落人去做！」
縣老爺：「(對卒講)巧！真巧！真正巧！哈！哈！哈哈哈！恁厝就是有你這款的巧新婦，莫怪恁大官hiau-pai，敢掛一个無事牌。哈！哈！哈哈哈！」
阿美：「縣裡縣爹你上大，(欲叫牛犅生牛囝，)交辦的代誌若敢拖，頭身存範分開蹛，佳哉縣爺你放爹煞，真是明理的父母官，轉去欲閣來共無事牌來掛，社會安定又繁華。」
縣老爺：「好好好！誠好！」
員外：「阮兜有一个巧新婦，凡事有伊咧(teh)擔當，歡喜毋是咧聳鬚，日日清閒掛無事。」
報幕：「員外本是無心機，縣爺刁持共考試，賢慧新婦好計智，替伊解圍無代誌。今仔日，阮的表演就到遮。多謝。」
2011-03-07 23:25:22minda email給minda 前往minda的日誌
多謝分享
lau7 su1 li2 ho2!
tsit4 tshut4 it4 ting7 tsiann5 tsing1 tshai2 ,m7 koh4 beh4 download ai3 tsiann5 ku2,u7 lang3 phang7 gua2 e5 ka7 lok8 teh4 tshiu2 ki1 a2 lai7 ,tau7 tau7 a2 him1 siong2,to1 sia7 li2!
