雷公佮爍爁(一)

 2011

03062234雷公佮爍爁(一)

846民間故事

逐改雷公欲霆(tan5)雷進前，咱攏會khuainn3(看見)著金光閃閃的爍爁佇天頂鼢(bun3)。關係著霆雷佮爍爁這款定定鬥陣的由來，咱的祖先是按呢傳說的。

佇古早的時陣，有一个足有孝的新婦。伊咧守寡，伊有一个青盲的大家。因為in兜足散赤，伊家己干焦食刺瓜仔的子爾爾，而(a)若in大家咧？伊攏會想辦法逐工創一寡仔米飯來予in大家食。

後來in大家有覺察著in新婦定定忍著枵飢失頓的艱苦，煞來用好好的米飯予伊食。按呢的孝心，予伊足感動的，有一工，伊想欲共飯留予新婦食，家己來食刺瓜仔子。伊就共飯佮刺瓜仔子換過來。in新婦ui3田裡轉來，看著in大家當咧食刺瓜仔子，就隨共飯倒過來in大家這爿，紲手共in大家的刺瓜仔子提kuei3(過去)，隨擲(c.f.捏,捏)ui3外口去。

偏偏就佇這个時陣，煞去予雷公看著這款情形。雷公煞無斟酌看，叫是彼个新婦是共咱愛寶惜的五穀擲掉，就隨用雷共伊摃落去，彼个新婦就自按呢過身去矣。

這改，雷公去看重耽(tann5)去，煞去摃死一个無辜的人。這件代誌，尾仔去予玉皇大帝知影了後，除了共雷公罵以外，閣任命彼个寡婦做爍爁娘娘，叫伊愛走佇雷公的頭前，用伊的光來炤(tshio7)塗跤，看清楚好歹代誌了後才準雷公摃歹人。

另外一个講法是講較早有一个查某人，伊共金瓜的子，凊彩烏白擲佇外口的塗跤。這時陣，當咧siang3大雨，四界是烏ma3ma3，雷公煞共金瓜子看做白米飯，叫是彼个查某人去蹧躂白米飯，khenn9一聲，就共彼个查某人摃死。

為著欲補償彼个查某人的枉屈，天頂的玉皇大帝就派伊做專門管爍爁的女神，予人共叫爍爁娘娘。自按呢了後，佇霆雷進前，爍爁愛先照予明，較免得雷公閣去摃著好人。

參考資料來源：吳瀛濤《臺灣民俗》臺北市：眾文圖書，1992。 

(轉去民間故事目錄)  (轉去主目錄)

回應

2011-03-07 23:17:24minda email給minda 前往minda的日誌

這故事阮捌聽序大人講過

汝用文字來講故事   寫得誠好

感謝分享

於2011-03-08 17:41:15回覆

To minda

這个故事對細漢囡仔來講應該攏會誠著驚, 因為這个故事的主角是去予雷公摃死的, 其實, 咱人若是相信鬼神, 深信雷公會摃歹人, 按呢民風自然會純樸, 社會案件自然會減少去, 因為有做虧心事的人會驚霆雷的時, 雷公摃落來會摃著伊.  這个故事電視劇嘛捌做過, 所以, 就算講無聽過, 嘛因為電視做過來印象深刻.

2011-03-07 23:13:18小姑姑 email給小姑姑 前往小姑姑的日誌

 這則留言是悄悄話。

於2011-03-07 23:15:54回覆

To 小姑姑

 這則留言是悄悄話。