2011
03082245雷公佮爍爁(二)
517民間故事
雷公佮爍爁是一對蹛佇天頂的翁仔某神。這兩个神是受玉皇大帝的命令，監督咱人佇凡間的行動，若是有歹心烏漉肚的人做歹代誌，攏愛隨共伊摃死，用按呢來處罰人，予人知影通驚。
雷公手提一枝摃槌佮一枝斧(poo2)頭，爍爁是提一塊鏡，逐擺佇咧監視凡間的時，先愛閃一道爍爁才閣提鏡看清楚凡間的好歹代誌了後，雷公才下手用斧頭佮摃鎚摃死遐的歹人。
話講翻頭，有一改這兩个神咧監視凡間的時陣，去看著凡間的作穡人當咧播稻仔。遐的作穡人無像較早干焦種旱稻，這馬是種水稻。按呢就愛先共進前種佇水田內底的秧仔薅起來，閣共in用做一束一束，了後共加出來的尖葉仔去掉，才閣共秧仔離些(tse7)縫，囥佇田裡的每一个所在，按呢逐个人就較好分工共秧仔插予好勢。
猶毋過，雷公佮爍爁這兩个神攏毋捌看過作穡人播稻仔的情形。一看著in共秧仔薅起來，閣共葉仔切掉，紲落(luei3)閣擲佇田裡，雷公煞按耐袂牢伊的雷公性，氣怫怫講：「可惡！可惡！實在有夠烏白來，竟然敢共遮爾寶貴的稻仔栽烏白薅閣烏白擲！」
起性地的雷公，那喝那攑摃槌佮斧頭就欲共in摃落去。佳哉佇邊仔的爍爁隨共伊擋牢咧講：「閣小看一下仔嘛無差到佗位去，咱斟酌看in敢是咧濫sam2(糝)毀稻仔栽！」
爍爁就用伊的鏡共看予詳細。過一時仔，真正看著作穡人共囥佇水田內底的秧仔一束一束種甲好勢好勢，並毋是像雷公拄才想的按呢凊彩烏白擲稻仔栽。「哦！原來是按呢啊，差一屑仔就去看毋著去，險險仔去共in摃摃死。」
就按呢，雷公佮爍爁就慶祝in兩个無去枉冤著人共人摃死，了後就離開遐矣。作穡人嘛閣繼續佇遐骨力拍拚做in的穡頭。
參考資料來源：吳瀛濤《臺灣民俗》臺北市：眾文圖書，1992。
回應
lau7 su1 tsiann5 iong7 sim1,ti7 bun5 tsiunn1 lai7 lik8 sik4 e5 ji7 long2 kap4 ji7 tian2 lian5 kiat4,
an2 ne1 m7 pat4 e5 su5 kap4 ji7 tsin1 kin2 to7 e7 tang3 tshue7 tioh8 kai2 sueh4! ka7 lau7 su1 o1 lo2!